သွဟ်ပေဲါရုဲမာဲမံက်တုဲဗက်ဂှ် ညးလ္ၚဵုဂှ် ကၠောန်ဗဒှ်လဝ် နကဵုယၟု အကံက် ဒမၠုက် (ယၟုပၞုက်) တုဲ ချူပတိုန်ဒၟံၚ်ပရိုၚ်အလီ၊ ပရိုၚ်ပတောံဂှ် မၞိဟ်ဗွဲမဂၠိုၚ်တံ ထပ်တြးပတိတ်ဒၟံၚ်ဂၠိုၚ်ကွေံကွေံဂှ် သ္ဂောံဆဵုကေတ်ဒၟံၚ်ရ။

နူကဵုယၟုအကံက် “ဘုန်းမြၚ့်” ပတိုန်လဝ်တုဲကၠုၚ် (၂၀၂၀) ဒဳဇြေမ်ဗာ ၃ တေံဂှ် ဒဒှ်ရ “နူကဵုဂကောံ UEC တအ် မၞိဟ် ၆ တၠ နုတ်တိတ်နူကဵုဂကောံတအ်ဂှ် ဒှ်ပရိုၚ်ဗၠေတ်ဗၠေတ်မွဲပိုတ်ရောၚ် နူကဵု ကဏ္ဍ “ဒး ဟွံဒးတုဲ ချပ်” ပိုဲတံ လ္ၚတ်ဂၠိုက်ဂၠာဲစၟဳစၟတ်လဝ်ရ။

“ဆေၚ်စပ်ကဵုပရိုၚ်အလီ၊ ပရိုၚ်ပ္တောံဏံတုဲတှ်ေ ပွဳပွူပိုယ်ဂှ် ဒှ်မံၚ်သၞတၟာဟလိုၚ်ဏောၚ်၊ ပြဟ်ဟ်ဏံဆေၚ်ကဵု ပေဲါရုဲ မာဲလေဝ် ပိုယ်တအ်ဆဵုကၠုၚ်မံၚ် ဒှ်ဟွံဒှ်ဂှ် ပိုယ်တအ်ဟွံကလေၚ်ပါ်ပဲါပုဟ်လေဝ် ကလေၚ်ပြးဏာပရိုၚ် မွဲက္ဆံၚ်တုဲမွဲ က္ဆံၚ်ဂှ်တှ်ေ ပ္ဍဲကဵုကွာန်ဇကုဂှ်မှ ဗ္ဒဲါသ္ၚိဇကုရဂှ် ဒှ်သၞညးသ္ကအ်နွံမံၚ်” သာ်ဏံ ညးချဳဓရာၚ်ပရေၚ်မဟာဇန် မိပိုန်ဉာဏ် ဆာဲ ဟီုရ။

ပရိုၚ်အလီ၊ ပရိုၚ်ပ္တောံဟီုမ္ဂးဂှ် ဗွဲတၟေၚ်တှ်ေ ပ္ဍဲကဵုအခိၚ်အခါတအ်ဏံတှ်ေ သ္ပအဓိကကဵု ပ္ဍဲကဵု Social Media လေဝ်၊ ပရိုၚ်ဗၠေတ်တ်၊ ပရိုၚ်ပ္တောံဂှ် ပရိုၚ်ဟွံဒးပုဟ်နဝ်၊ မွဲပၠန်ဂှ် နကဵုတၚ်ရန်တၟံမွဲမွဲသာ်တုဲ ကၠောန်လဝ်ပရိုၚ်ဂှ်လေဝ်နွံမံၚ်ကီု တုဲတှ်ေ တမ်ရိုဟ်ပရိုၚ်ဏံ ကၠုၚ်နူကဵုလဵုဟီုဂှ် ပိုယ်တအ်ဟွံတီမံၚ်ပုဟ် ပိုယ်တအ်သုၚ်စောဲဏါဏောၚ်

အ္စာဗြဴဗ္တောန်လိက် ဒးတာလျိုၚ်မၚ်ရုၚ်မာဲတံ ကၠတ်မမာဲဂးတုဲ ဥက္ကဌကမ္မယှေန်ပေဲါရုဲမာဲကၟိန်ဍုၚ် ဥုလှတုၚ် ဒုၚ်ဝန်ယျ ဟီုဂှ် ပြးတဴဒၟံၚ်လတူမုက်လိက် Facebook ဂမၠိုၚ်ဂှ် ဒှ်ပရိုၚ်ဗၠေတ်ဗၠေတ်မွဲရောၚ် နူဂကောံ “ဟုတ်တယ် Vs မဟုတ်ဘူး”တံ စၟဳစၟတ်လ္ၚတ်ဂၠိုက်ဂၠာဲလဝ်ဂှ် နူဌာန်ပရိုၚ်မန် (MNA) ဏံ ထပ်ပတိုန်ထ္ၜးဏာရ။

နကဵုလိက်လလောၚ်တြးပ္တောံတုဲ ဖန်ဗဒှ်ဒၟံၚ်ပရိုၚ်ပ္တောံဟီုမ္ဂးဂှ် ဆေၚ်စပ်ကဵုဗော်ပရေၚ်ဍုၚ်ကွာန်တုဲ သုၚ်စောဲလဝ် ယၟုပူဂဵုမွဲမွဲကီု တဆိပ်မွဲမွဲတံကီုဂှ် သွက်မၞိဟ်ဗှ်ဒၟံၚ်တံ ညံၚ်ဂွံဒှ်သၠေဟ်ပၟာဂှ် ဖန်ဗဒှ်ဒၟံၚ်ပရိုၚ်ပ္တောံတံရ။ ပရိုၚ်ပ္တောံဗီုတအ်ဏံတံဂှ် ဌာနဒးဒုၚ်လလောၚ်တြးပတိတ်လဝ်ပ္တောံတအ် ဟွံသေၚ်သာ်ဂှ် ဂကောံညံၚ်ဂွံသဝ်စှ်ေအာတအ်ဂှ် ဗဇဵုတဴဒၟံၚ် အကြာဂကောံမွဲကဵုမွဲ တုဲ က္တဵုဗဒှ်ဒၟံၚ်ဓဝ်သၠေဟ်ပၟာမာန်ရ။