ပ္ဍဲ Facebook ဂှ် ပိုယ်ဟီုရ ပိုယ်ဆဵုပရိုၚ်မွဲမွဲ တၚ်နၚ်မွဲမွဲ ညးတၞဟ်ချူပတိုန်လဝ် ညးတၞဟ် Share လဝ်ဆဵုယျတှ်ေ ကၠာပိုယ်ဂွိုအ် Share ဂှ်တှ်ေ တၚ်နၚ်ဏံ ပရူပရာဏံ ဍာံဟာဟွံဍာံဟာဂှ် ပိုယ်ဒးချပ်ချိုတ်တ်ပၠိုတ်တ်ထေက်ဏောၚ်…

“ပ္ဍဲတွဵုရးဍုၚ်မန် ပွိုၚ်ဍုၚ်မုဟ်ဍုၚ် NLD ကဵု UEC ပံၚ်တောဲတုဲ ကၠတ်လဝ်မာဲ ၄၀၀၀၀ ပြၚ် ဇၞးလဝ်အတိုၚ် ၅ ဒၞာဲဂှ် ဒးဒုၚ်ပလီုဏာ” ပရိုၚ်ဝွံ နူကဵု မုက်လိက် (Myanmar American News) ချူပတိုန် နဝ်ဝေမ်ဗာ (၁၀) ဂှ် ပွိုၚ်မွဲဗ္ဂာပ်ဓဝ် မၞိဟ်ကလေၚ်တြး Share ဏာ (၄) လ္ၚီပြၚ်အာရ…

ပ္ဍဲကဵုတွဵုရးဍုၚ်ရေဝ် ဂှ် ဒၞဲါဗော်ညဳသၟဟ်မန် MUP ပ္ဍဲပွိုၚ်ဍုၚ်ရေဝ် တအ် လုပ်ပြိုၚ်လဝ် ပ္ဍဲဒၞဲါပိဒၞဲါဂမၠိုၚ်တအ်ဂှ် ဒှ်ဒၟံၚ်မာဲအလီဏောၚ်၊ ကော်မရှၚ်ပေဲါရုဲမာဲတအ် ကလေၚ်စၟဳစၟတ်ကဵုပၠန်ညိဂှ် နူကဵုအကံက် အောၚ်ဘလ (Aung Ba La) ချူပတိုန်လဝ် ပ္ဍဲကဵု group (မော်လမြိုၚ်ကို ချစ်ကြသူများ) ဂှ်ရ။

ပ္ဍဲကဵုပရိုၚ် ဇကုပ္တိတ်ဏာယဝ်ရဗၠေတ်မံၚ်ဏောၚ် ဟီုတှ်ေလေဝ် ပရိုၚ်ဏံဗၠေတ်မံၚ်ဏောၚ်ဂှ် ဇကုဒးခၠေဝ်သှ်၊ ဒးကလေၚ်သောၚ် ကလးကဵုညးဍုၚ်ကွာန်တံထေက်၊ ဇှ်ဂှ်တှ်ေ ဍေံကော်စတၚ်ဒုၚ်လျိုၚ် တၚ်ကေတ်လျိုၚ်၊ ပိုဲတံမိက်ဂွံဒှ် professional ပရိုၚ်ဂှ်ညးတၞဟ်ကေတ် ဏောၚ်ဟီုတှ်ေ ညးတၞဟ်ဒးသ္ပ နိဿဲ တၚ်နၚ်တံဂှ်တှ်ေ တၚ်ဒုၚ်လျိုၚ် တၚ်ကေတ်လျိုၚ် တဂှ် ကိစ္စဇၞော်မံၚ်၊ ပ္ဍဲဏံဍေံဂွံစိုပ်တရဴမာန်ဂှ်တှ်ေ ဂကောံသၟာပရိုၚ်တံသီုဖအိုတ်ဂှ် ညးညးအဲအဲဒးဒ္ဂေတ်ဗက် ညံၚ်ဂွံ ကၠောန် ညံၚ်ဂွံဒုၚ် လျိုၚ်အာဇှ်မှလေဝ် ညးဍုၚ်ကွာန်တံပရိုၚ်ဒးဒး ပရိုၚ်ချိုတ်တ်ပၠိုတ်တ်ဂှ် ပိုဲတံဂွံအာမာန်ဏောၚ်။

deepfake(ပတောံဗွဲမဇြိုဟ်နက်)ဟီုဂှ် နကဵုနဲကဲပညာ AIဂှ် သုၚ်စောဲလဝ်ဗီုရုပ်မၞိဟ်မြဟ်မံၚ်ဂၠးတိတုဲ ပံၚ်ဗစိုပ်လဝ်ကဵု ဗီုပြၚ်အကာဲအရာဇကုချဳဒရာၚ်မံၚ်တုဲ ဖန်ဗဒှ်ပတိုန်ဗဳဒဳယိုဝ်မွဲရ။ ဗဳဒဳယိုဝ်ဗီုတၞဟ်ဂှ်တှ်ေ ပ္တောံဟာ ဇေတ်ဟာဂှ် ပါ်ပဲါဝါတ်မံၚ်ကီုတုဲ မၞိဟ်ဖန်ဗဒှ်ပရိုၚ်ပ္တောံတအ်ဂှ် ယဝ်ရ ရန်တၟံ ပရးပတိတ်မံၚ်ဝါဒဗၠေတ်ဗၠေတ်တအ်ဏေါၚ်တှ်ေ ပရိုၚ်ပရေံရေံတအ် က္တဵုဒှ်ကၠုၚ်လေပ်ရ။

ဗီုကဵုဌာန်ပရိုၚ်ယၟုပြာကတ်တဴဒၟံၚ် ပ္ဍဲကၟိန်ဍုၚ်ဗမာ ဗီုကဵုဌာန်ပရိုၚ် 7Day News ဂှ် ကီု၊ ဗီုကဵုဌာန်ပရိုၚ် Myanmar Now ကီု ကၠောန်ပတောံ-ပတုပ်လဝ် တဆိပ် logo တုဲ ချူပတိုန်တြးဒၟံၚ်ပရိုၚ်ဟွံဍာံ၊ ပရိုၚ်သ္ပဒတန်ဟွံဂွံတံဂှ်နွံရ။