လၟုဟ်ဝွံ ရဲဒဳကွဳစက်ကဵု မၞိဟ်ဗက်သ္ကံတံဂှ် နကဵု COVID-19 Test Kit ဂှ် စၟဳစၟတ်မံၚ်ကဵုစၟယဲဂှ် ပွိုၚ် (၃) တ္ၚဲဂှ် မၞိဟ် (၇၀၀) တၠကြပ်ပေၚ်တုဲ အပ္ဍဲဂှ် ဆဵုညာတ်အာစၟယဲမၞိဟ် (၄) တၠရောၚ် ဌာနပရေၚ်ထတ်ယုက်တံ လလောၚ်တြးလဝ်ရ။

မၞိဟ်ယဲကဝ်ဝေဒ်သ္ပဒတန် ပ္ဍဲကဵုတွဵုရးဍုၚ်မန်တံဂှ် ကောန်ၚာ်အာယုက် (၁၀) သၞာံ နူကဵုဍုၚ်ကျာ်ခမဳလေဝ် ဒးဒုၚ်ကၠောံယဲကဝ်ဝေဒ်ဂှ်ရ သကအ်ရဲဝေၚ်လဝ်ကရောံညးတေံမွဲစွံ (၁၁) တၠတံလေဝ် ပ္ဍဲကဵုဂိတုအံက်တဝ်ဗာ (၁) ဂှ် ဒးကၠုၚ်လုပ် Quarantine ပ္ဍဲကဵုဍုၚ်မတ်မလီုရောၚ် ဂွံတီကေတ်ရ။

“ပ္ဍဲတွဵုရးဍုၚ်မန်ဂှ်တှ်ေ မၞိဟ်ယဲ နူဍုၚ်မတ်မလီုကဵု ပွိုၚ်ဍုၚ်ၜဳကလေၚ်တံရ စှ်ေဂၠိုၚ်လေဝ်၊ ပွိုၚ်ဍုၚ်ဍေံတံရတှ်ေ ဆဵုမၞိဟ်ယဲဂၠိုၚ်တှ်ေလေဝ် အပ္ဍဲမၞိဟ်ယဲသှ်ေမံၚ်တံဂှ် မၞိဟ်ယဲ ၄ တၠဂှ်ရ ဒးမၚ်ရံၚ် (ယဲသ္ကာတ်) မံၚ်ဖိုဟ်” သာ်ဏံ ညးဂးရ။

“ပ္ဍဲကဵုတိဍာ်ဗော်ဍုၚ်မန်တၟိ ပွိုၚ်ဍုၚ်လှာဒကှ်ဂှ် ကၟုဲနူကဵုမ္ၚး အာကၠုၚ်ဟွံဂွံ ညးတံ ပိုၚ်ခြာလဝ်ရ။ အေပ္ဍဲကဵုဒၞာဲတံဏံ အဲဟွံဒှ်အာ စန်ဒက်မာဲရ။ သွက်အဲမွဲဂှ် ၜိုန်ရညးတံ ကဵုကၠုၚ်အခေါၚ်တၟေၚ်ရကၠာလေဝ် အဲဖျေံလဝ် သ္ဂုတ်သွာတ် ဟွံအာရပုဟ်။ မုဟိုတ်ရောတှ်ေ ဟိုတ်နူကဵုဇကုတုဲ ရဲဒေသတံ ဒးဒှ်ဓဝိၚ်၊ ပ္ဍဲဇကု ယဲဟွံမွဲကီုလေဝ် ဟွံမိက်ဂွံဒှ် သၠေဟ်ပၟာရ” သာ်ဝွံ ညးစၞးအလံၚ်အမာတ် နူကဵုဗော်ကောန်ဂကူမန် နာဲထောန်လွေန် ဟီုရ။

ပ္ဍဲကဵုအရာပ်ဏံဂှ် ပွိုၚ် (၁၄) တ္ၚဲဂှ် ဟွံဆဵုမၞိဟ်ယဲကဝ်ဝေဒ်ကီု နူကဵုမၞိဟ်ယဲအရာပ်ဏံဂှ်လေဝ် ဟွံဆက်ကၠောံထၞာန်အာကဵု ဗွဲဗွဝ်ကီု မၞိဟ်လုက်စုက်လဝ်ကဵုမၞိဟ်ယဲအရာပ်ဏံ တိုက်ရိုက်တံဂှ်လေဝ် ဟွံဆဵုစၟယဲဂှ်ရ အရာပ်ဏံဂှ် နူကဵုကၟာတ်လဒဵုလဝ်အခေါၚ်အာကၠုၚ် (Lockdown) ဂှ် ကဵုအခေါၚ်အာကၠုၚ်ယျရောၚ် ဂွံတီကေတ်ရ။

ပ္ဍဲကဵုပွိုၚ်ဍုၚ်မုဟ်ဍုၚ် ဍုၚ်ကၟာဝက် အရာပ်ဝါယာပ်ဂှ် ကၟာတ်လဒဵုထောံအခေါၚ်အာကၠုၚ် သ္ပထောံ (lockdown) တုဲ အရာပ်စိၚ်တံၚ်၊ ကၟာဝက်၊ ထံၚ်ကှ်ေ ကေုာံ ဘာဟနိ (ဂုံးညၚ်းတန်း) တံဂှ် ကဵုဒၟံၚ်အပ္ဍဲသ္ၚိ (Stay Home) ရောၚ် ဌာနပရေၚ်ထတ်ယုက်တွဵုရးဍုၚ်မန် လလောၚ်တြးလဝ်ရ။

ဟိုတ်နူကဵုမၞိဟ်ဗြဴဂှ် ဒှ်မံၚ်Covid-19 Positive ဂှ် ကေၚ်ဍိုက်လဝ်ကွဳလိုန်ဓာတ် (Taxi) တုဲ ဂြိပ်စဴလဝ် ဍုၚ်ကျာ်ခမဳဂှ်ရ သၟာ (Taxi) ပလံၚ်ဏာမၞိဟ်ဗြဴဂှ် နွံပၟိက်ကဵု လုပ် Quarantine ဂှ်ရဂၠိုက်ဂၠာဲမံၚ် ဟွံဆဵုဏီရ။