ပ္ဍဲကဵုဂိတု သေပ်တေမ်ဗာ ၂၁ ဌာနပရေၚ်ထတ်ယုက်ကၟိုန်ဍုၚ်တေံ လလောၚ်တြးကၠုၚ်လဝ် စပ်ကဵုမၞိဟ်ယဲကဝ်ဝေဒ်ဂှ် နူကဵုပွိုၚ်ဍုၚ်ဇြပ်ဗု ဍုၚ်ကျာ်ခမဳ မၞိဟ်ဗြဴမၞုံအာယုက်(၂၅) သၞာံဂှ်လေဝ် ပါလုပ်ကၠုၚ်မွဲတၠ ပါကၠုၚ်တုဲ မၞိဟ်လုက်စုက်လဝ် (၂၅) တၠတံ ဒးလုပ်မံၚ် Quarantine ရောၚ် ဂွံတီကေတ်ရ။
ဟိုတ်နူကဵုမၞိဟ်ဗြဴဂှ် ဒှ်မံၚ်Covid-19 Positive ဂှ် ကေၚ်ဍိုက်လဝ်ကွဳလိုန်ဓာတ် (Taxi) တုဲ ဂြိပ်စဴလဝ် ဍုၚ်ကျာ်ခမဳဂှ်ရ သၟာ (Taxi) ပလံၚ်ဏာမၞိဟ်ဗြဴဂှ် နွံပၟိက်ကဵု လုပ် Quarantine ဂှ်ရဂၠိုက်ဂၠာဲမံၚ် ဟွံဆဵုဏီရ။
“သၟာ(Taxi) ဂှ်ဂၠာဲဟွံ ဆဵုဏီပုဟ်၊ လၟုဟ်ဂှ်တှ်ေ ပိုဲဆက်စၠောံကဵု ရဲ(Taxi gate) ဟလိုၚ်တုဲဂၠာဲမံၚ်ရ၊ ဍိုက်အာနူကဵု gate ဟွံသေၚ် ဍေံကော်ဏာနူကဵုအကြာ ဏောၚ်တှ်ေ ဂၠာဲစကျာတ်မံၚ် ၊ တုဲပၠန် မၞိဟ်ပိုဲဂၠာဲမံၚ်ဏံဂှ် ဟိုတ်နူကဵု ဍေံဟွံမိၚ်ကိစ္စပရိုၚ်ဏံတုဲ ဍေံကၠုၚ်ဟွံစိုပ်ကဵုပိုဲလေဝ်ဒှ်မာန်မံၚ်” သာ်ဝွံ နူကဵုဂကောံ (နာရေးကူညီမှုအသၚ်း) ဍုၚ်ဇြပ်ဗု ဥူကျဝ်သဝ် ဟီုလဝ်ရ။
မၞိဟ်ဆက်စိုပ်ကဵု မၞိဟ်ယဲကဝ်ဝေဒ် နွံမံၚ်(၂၅)တၠဂှ် ပလံၚ်ၚ်ဏာ CBFQ တက္ကသိုလ်မတ်မလီုတုဲ မၞိဟ်ယဲ positive ဂှ် ပလံၚ်ဏာရုၚ်ဂဥုဲ ဇၞော်တေံရ။ ရဲအရာပ်ညးဆဵုညာတ်လဝ်စၟယဲဏံဂှ် ကဵုမံၚ်အာဗီုပြၚ် stay home တုဲ မၚ်ရံၚ်အာမံၚ်ဏောၚ် ညးဆက်ဟီုရ။
မၞိဟ်ဗြဴ မၞံုအယုက် (၂၅) သၞာံရဲဍုၚ်ကျာ်ခမဳဂှ် စၟတ်တ္ၚဲ ၁၂-၉-၂၀၂၀ ဂှ် စဴကၠုၚ်နူဍုၚ်လဂုၚ်ဂှ်ရ ဒးလုပ်မံၚ် Quarantine ပ္ဍဲဘာ(အထက-၂) ဍုၚ်ဇြပ်ဗုရ။ အဃောလုပ်မံၚ် Q ဂှ် ဟိုတ်နူကဵု ဗှ်သၞာကောန်ဂှ်တုဲ စၟတ်တ္ၚဲ ၁၉-၉-၂၀၂၀ အခိၚ်နူဂယး ၄းဝဝ နာဍဳဂှ် နူကဵုပါၚ်ဂၠံၚ်ဝါခရူဂှ် ဒဵုကဵု ကျာ်ခမဳစဴကၠုၚ်ကဵု (taxi) သ္ၚိတ်တ်တုဲ ညးတာလျိုၚ်တံ ဒးကလေၚ်ကော်ပၠောပ်လဝ် CBFQ ပၠန်ရောၚ် ဂးရ။
မွဲသာ်ပၠန်ဂှ် ပ္ဍဲကဵုဂိတုသေပ်တေမ်ဗာ ၂၂ အခိၚ်ဖါနူဂယးဂှ် ပ္ဍဲကဵုတွဵုရးဍုၚ်မန် ဆဵုစၟယဲကဝ်ဝေဒ် မၞိဟ် (၃) တၠပၠန်ဂှ် လ္တူဍုၚ်မတ်မလီု (၁) တၠကဵု ရဲအရာပ်ဝါယာပ် ဍုၚ်ကၟာဝက်တေံလေဝ် ပါမံၚ် (၂) တၠကီုရ။
ညးမဆက်စပ်မံၚ်ကဵုမၞိဟ်ယဲကၟာဝက် (၂) တၠဏံဂှ် အ္စာသဝ်ဝန် (၂) တၠကီု သီုဖအိုတ်မၞိဟ် (၁၅) တၠတံ ဒးလုပ်မံၚ် Quarantine ကီုရောၚ် ဂွံတီကေတ်ရ။
ပ္ဍဲကဵုတွဵုရးဍုၚ်မန်ဂှ် မၞိဟ်ယဲကဝ်ဝေဒ်သ္ပဒတန်လဝ် (၁၆၂) တၠနွံတုဲ မၞိဟ်ချိုတ်အာလဝ် (၁) တၠရ။
အလုံကၟိန်ဍုၚ်ဂှ် မၞိဟ်ယဲကဝ်ဝေဒ် (၆၄၇၁) တၠနွံတုဲ မၞိဟ်ဗၠးသက်သာဂွံစှ်ေအာနူကဵုရုၚ်ဂဥုဲဂှ် (၁၄၄၅) တၠရ။ မၞိဟ်ဒးချိုတ်အာကဵုယဲဏံဂှ် (၁၀၀) တၠရောၚ် ဂွံတီကေတ်ရ။
