ယဲကပ် Covid-19 ဂှ် အသိၚ်ကၠောံထၞာန် သ္ကာတ်မြဟ်ကၠုၚ်ကီု ပ္ဍဲကဵုတိဍာ်ဗော်ဍုၚ်မန်တၟိဂှ် မၞိဟ်မ္ၚးတံ ဟွံကဵုအခေါၚ်လုပ်တိတ်ဂှ်ရ ညးစၞးအလံၚ်အမာတ် ကေၚ်ကာကောန်ဂကူမန် နူကဵုဗော်ညဳသၟဟ်မန်လေဝ် အာစန်ဒက်ပ္ဍဲကဵုပွိုၚ်ဍုၚ်လှာဒကှ် ဟွံဂွံဏီရောၚ် အလံၚ်အမာတ်ဂှ် ဟီုကဵုဌာန်ပရိုၚ်မန်ရ။
“ပ္ဍဲကဵုတိဍာ်ဗော်ဍုၚ်မန်တၟိ ပွိုၚ်ဍုၚ်လှာဒကှ်ဂှ် ကၟုဲနူကဵုမ္ၚး အာကၠုၚ်ဟွံဂွံ ညးတံ ပိုၚ်ခြာလဝ်ရ။ အေပ္ဍဲကဵုဒၞာဲတံဏံ အဲဟွံဒှ်အာ စန်ဒက်မာဲရ။ သွက်အဲမွဲဂှ် ၜိုန်ရညးတံ ကဵုကၠုၚ်အခေါၚ်တၟေၚ်ရကၠာလေဝ် အဲဖျေံလဝ် သ္ဂုတ်သွာတ် ဟွံအာရပုဟ်။ မုဟိုတ်ရောတှ်ေ ဟိုတ်နူကဵုဇကုတုဲ ရဲဒေသတံ ဒးဒှ်ဓဝိၚ်၊ ပ္ဍဲဇကု ယဲဟွံမွဲကီုလေဝ် ဟွံမိက်ဂွံဒှ် သၠေဟ်ပၟာရ” သာ်ဝွံ ညးစၞးအလံၚ်အမာတ် နူကဵုဗော်ကောန်ဂကူမန် နာဲထောန်လွေန် ဟီုရ။
ပြဟ်ဟ်ဏံ ပ္ဍဲကဵုတွဵုရးဍုၚ်ကရေၚ်ဂှ် နကဵုလိက်ထံက်ဂလာန်နာနာဂှ် တတ်ကၠောံအာကၠုၚ်မံၚ်ဂှ်ရ ညးစၞးအလံၚ်အမာတ် ကေၚ်ကာကောန်ဂကူမန်မွဲတၠဂှ် ဒးအာစန်ဒက်ဒၞာဲဇဳထေက်ကီုလေဝ် ဒၞာဲလ္ၚဵုအာစိုပ်အာမာန်တံဂှ် ကၠိုဟ်ကဵုစိုတ်ညိ ညးဆက်ဟီုလဝ်ရ။
နကဵုဗော်ဍုၚ်မန်တၟိဂှ် ဗော်ပရေၚ်ဍုၚ်ကွာန်တံ ညံၚ်ဂွံဒ္ဂေတ်ဗက်အာမာန်ဂှ် ပ္တိတ်လဝ်သၞောဝ်နွံတုဲ အတိုၚ်သၞောဝ်ဂှ်ဟေၚ် စန်ဒက်အာမာန်ကီု ညးစၞးအလံၚ်အမာတ် ဒၟံၚ်တန်တဴ ပ္ဍဲကဵုပွိုၚ်ဍုၚ်လှာဒကှ်တံဟေၚ် ကဵုအခေါၚ်စန်ဒက်မာဲ ပ္ဍဲကဵုဒေသဂှ်ရောၚ် ညးလျိုၚ်ဗွိုၚ်အပ္ဍဲဍုၚ်ဗော်ဍုၚ်မန်တၟိ နာဲဗညာလဴ ဟီုဂးလဝ် နွံရ။
ညးစၞးအလံၚ်အမာတ် ကေၚ်ကာကောန်ဂကူကောန်ဍုၚ်အရၚ်မွဲတၠဂှ် ဒးစန်ဒက်အာမာဲ လ္တူကောန်ဂကူညး အလုံမွဲတွဵုရး၊ ရးဒေသဇၞော်ရောၚ် ဂွံတီကေတ်ရ။
