ဆဵုဂဗ သၟာန်သှ် ကဵု သၟာဒယှေ်ဒွက် တိုၚ်ဆာန်

ကဝးဒွက်မန်ဂှ် သၟာဒယှေ်တံ သြန်တံရိုဟ် နွံၜိုတ်ထေက်ကြိုက်မ္ဂး ကၠောန်ပ္တိတ်ကလိတ်ကလောတ်တုဲဒှ်ကီုလေဝ် လ္ပာ်တြးသွံ ကဝးတံဂှ် ဒးဆဵုဂဗကဵု တၚ်ခက်ခုဲနာနာသာ်တုဲ ဘဝသၟာဒယှေ်ဒွက်တံ ဂွံဆက်တန်တဴအာ နကဵု ဘဝသၟာဒယှေ်ဒွက် ဍာ်ဇမၠိၚ်မာန်ဂှ် ဂၠာဲဂၠံၚ်ဟွံဆဵုဏီ သာ်ဏံ ဆဵုဗဂလဝ်ကဵု သၟာဒယှေ် တိုၚ်ဆာန် အဃောတြး သွံမံၚ်ကဝးဒွက် မၞုံယၟု “ရမျှာၚ် ဟိုဲဟိုဲ” ဂှ် ပ္တိုန်ထ္ၜးဏါရ။

မာန် – ကၠာဟွံဂွံသ္ပ ပရေၚ်သၟာန်သှ်တှေ် တိုၚ်ဆာန် ဆက်ကဵုမိတ်ကၠာ –

တိုၚ်ဆာန် – ယွံ ဌာန်ဒၟံၚ်အဲဂှ်တှေ် ကွာန်သက်၊ ပွိုၚ်ဍုၚ်ဇြပ်ဗု၊ ယၟုဂှ်တှေ် အ္စာသုခုမဇဝ် ခုတ်တၚ်ကဵုလဝ်ဂှ်တှေ် တိုၚ်ဆာန်ရ။

မာန် – တိုၚ်ဆာန် စဒယှေ်မံၚ်ဒွက် နူသၞာံလဵုရရော-

တိုၚ်ဆာန် – နူကဵုသၞာံ (၂၀၀၇) အခိၚ်ဂှ် စလုပ်ဒယှေ်ကၠုၚ် ဂဳတအလၚ်္ကာ၊ ဂဳတအလၚ်္ကာဂှ် လုပ်ဂွံၜိုတ်ၜါသၞာံ တုဲတှေ် ဂဳတအလၚ်္ကာဂှ်ဇူအာ၊ အဲလေဝ်ဇူအာဂဳတတုဲ လၟုဟ်ဂှ်တှေ် ပ္တိတ်ကဝးတၟိ “ရမျှာၚ် ဟိုဲဟိုဲ” ဏံရ လၟုဟ် ဂှ်တှေ် စတြးမံၚ်ယျ၊ တုဲ လၟုဟ်ပၠန်ဂှ် ဂစာန်ကၠောန်မံၚ် ဂကောံဂဳတတၟိမွဲပၠန်၊ ဂကောံဂဳတအနာဂတ် ကဵု ဂကောံဂဳတ အလၚ်္ကာသရောပ်တုဲ ပလဝ်မွဲဂကောံ၊ ယၟုဂကောံဂှ်လေဝ် တၚ်လဝ်ယျေယျေ ဂကောံဂဳတရ၊ ဟီုဟဏံတှေ် မၞိဟ်ဓမ္မတာတံလေဝ် ဂွံတီလောဲတုဲတှေ် တၚ်လဝ် ဂကောံဂဳတ ၜတ်တ်မွဲရ။

မာန် – သၟာဒယှေ် ပ္ဍဲဂကောံဂဳတအနာဂတ် ကဵု ဂကောံဂဳတအလၚ်္ကာ ပံၚ်ပကောံတုဲ တိုၚ်ဆာန်တံဂစာန်ဒက်လဝ် ဂကောံဂဳတဂှ် တၟိတှေ် အခိၚ်လဵု စချဳဒရာၚ်ရော-

တိုၚ်ဆာန် – လၟုဟ်ဂှ်တှေ် စချဳဒရာၚ်မံၚ်ယျနဝ်၊ ဟွံလံ တက်ပဵုသတာရောၚ် တုဲတှေ် ဗက်တြးကဵုရောၚ်။

မာန် – ဂကောံဂဳတဏံ တိတ်ဒယှေ်စၚ်ကီုဟာ –

တိုၚ်ဆာန် – လၟုဟ်ဂှ်တှေ် ဟွံဂွိုအ်တိတ်ဏီပုဟ်လေဝ်၊ ကောန်ဂကောံပိုဲဂှ် ပြးမံၚ်ဏီ ပိုဲကလေၚ်ပကောံ ကောန် ဂကောံပိုဲတုဲတှေ် ယဝ်ခါရ ကောန်ဂကူပိုဲ သ္ပကေၚ်ကာမွဲမွဲသာ် ကၠုၚ်ကော်စိုပ်တှေ် အစဳအဇန် သွက်ဂွံတိတ်နွံ ချိၚ် လဝ်ရ။

မာန် – ပ္ဍဲကဵုဂကောံဂဳတဂှ် ညးဂှ်အာက္ဍိုပ်ကီု –

တိုၚ်ဆာန် – လၟုဟ်ဂှ်တှေ် အမြာယ် ဘိုၚ်စဳဇန်လဝ်ကဵု ညးဂှ်တှေ် ညးစဳဇန်ကဵုစေတနာညးတှေ် ဂကောံဂဳတဏံ အာဂွံ ကွာ်ဂွံယျတှေ် ညးဇူရ၊ စက်ကီု ရဲဂွံတိၚ်တက်ကီုဂှ်တှေ် ညးရ ဂၠာဲလဝ်ကဵုလေဝ်။

မာန် – တိုၚ်ဆာန် တုဲတုဲကၠုၚ်တေံ ကေၚ်ဒယှေ် ပ္တိတ်လဝ်ကဝးနွံမံၚ်ကီုဟာ –

တိုၚ်ဆာန် – အခိၚ်တေံဂှ် ကဝး ခေတ်ဏံ ခေတ်ပိုဲ(၂) ကေၚ်ဒယှေ်လဝ်ကီုလေဝ် စဳဇန်ဂှ်တှေ် Star ပံၚ်ကောံ ဒယှေ်လဝ မွဲကဝးကီု –

မာန် – ကဝး တိုၚ်ဆာန် ကေၚ်ဒယှေ်လဝ် ခေတ်ဏံ ခေတ်ပိုဲ ဂှ် နူအခိၚ်လဵုရော –

တိုၚ်ဆာန် – နူကဵုသၞာံ ၂၀၀၉ တေံရ။

မာန် – နူကဵုသၞာံ (၂၀၀၉) တေံ ဒဵုလၟုဟ် (၂၀၁၂) တှေ် အကြာဂှ် တိုၚ်ဆာန် ကၠေံမံၚ် ပိုတ်မံၚ်ကဵု သၟာဒယှေ် ပွိုၚ်ပိသၞာံတှေ် အကြာဂှ် တိုၚ်ဆာန် မုကၠောန်မံၚ်ရော –

တိုၚ်ဆာန် – ယွံ ယွံ အဵုဠဂှ်ဂှ် ပ္တိတ်ကဝးဂကောံတုဲတှေ် ဂဳတဂှ်လေဝ် ဇူမံၚ်အကြာဂှ်တှေ် အဲအာထောံဍုၚ်သေံ ပွိုၚ်ၜါသၞာံ အာကၠောန်စ ရန်တၟံဂွံပ္တိတ်ကဝးတၟိလၟုဟ် “ရမျှာၚ် ဟိုဲဟိုဲ”ဏံရ။ ရန်တၟံလဝ် ကဝးဏံ ဂွံတိတ်ဂှ် လၟုဟ်ပေၚ်ကၠုၚ် (၄) သၞာံရ၊ အခိၚ်တ္ၚဲဏံမှ ဂွံစတြး ကဝးတၟိဏံ ။

မာန် – ပ္ဍဲကဵုကဝးတိတ်တၟိဏံဂှ်တှေ် ကဵုဖျုန်ကဵု ပရေၚ်လဵုဂၠိုၚ် လဴစညိ-

တိုၚ်ဆာန် – ကဝးလၟုဟ်ဏံဂှ်တှေ် ရန်တၟံလဝ် ပရေၚ်ဂကူကီုရ။ အဵုဂှ်ရတှေ် ပ္ဍဲကဵုဒွက်ဂှ် ပရေၚ်ဂကူလေဝ် ပရေၚ် ဆာန်လေဝ်နွံ တုဲတှေ် ပရေၚ်မိမလေဝ်နွံ။

မာန် – တၚ်ရန်တၟံ ဂွံပ္တိတ်ကဝးတၟိဏံဂှ် ဗီုလဵုနွံ လဴစညိ –

တိုၚ်ဆာန် – တၚ်ရန်တၟံ ကၠာအိုတ်ဂှ်တှေ် ဝါသနာရလေဝ်၊ တုဲတှေ်ပူရိသာဒ်ဂမၠိုၚ်ညံၚ်ဂွံဒုၚ်တဲကီု တၚ်မွဲ၊ တုဲ တၚ်ၜါဂှ်တှေ် သွက်ဂကူမန်ဇကု ဒွက်မန်ဇကုဍေံဂွံပြးဂၠိုၚ်အာ ဂွံတဴတက်ကီု ပ္ဍဲပွဳဗွိုၚ်မန်ဇကု၊ သုခုမဂကူညး တၞဟ်ဟ်ရောၚ်အုပ်ဓလီုမံၚ်ရောၚ်တှေ် ဂကူမန်ဇကု ဍေံဂွံတၟးအာအကြာဂကူညးဟလိုၚ်ကီု အဵုရန်တၟံဗီုဂှ်လေဝ်။

မာန် – နူတံကိုပ်ကၠာ ဗီုလဵု တိုၚ်ဆာန် ဂွံဒှ်ကၠုၚ်ဘဝသၟာဒယှေ်ဒွက်ဂှ်တှေ် ဗွဲသရောပ် လဴစညိ –

တိုၚ်ဆာန် – နူစတံဂှ်တှေ် ကၠာဟွံဂွံဆဵုဂဗကဵု အ္စာဏီဂှ်တှေ် ဝါသနာနွံမံၚ်ရလေဝ် အဵုတုဲတှေ် ကြဴဏံဆဵုဂဗကဵု အ္စာဟံၚ်ဆာန်ကၠာအိုတ်ရ လုပ်ဂဳတဟီုတှေ် အ္စာဟံၚ်ဆာန်ရ ဟတောဲကဝါ်လဝ်ကဵု ၜတ်မံၚ်လေဝ်အခိၚ်တေံဂှ် လၟုဟ်တှေ် ခိုဟ်တိုန်ညိညိနဝ် –

မာန် – တိုၚ်ဆာန် စတိုန်စၚ်ကၠာ နူကဵု ဂဳတအလၚ်္ကာဟာ –

တိုၚ်ဆာန် – ယွံ စဒယှေ် ပ္ဍဲစၚ်ဂဳတအလၚ်္ကာရ ။

မာန် – သွက်အနာဂတ်ဂတလေဝ် စပ်ကဵုပရေၚ်ဂဳတကီု ပရေၚ်တိၚ်တက်ဂဳတကီု မု တိုၚ်ဆာန် ချပ်လဝ်နွံကီုရော-

တိုၚ်ဆာန် – အဝ်ယွံ ချပ်လဝ်ဂှ် ချပ်လဝ်တၟာဂလိုၚ်ရနဝ် ဆၜိုတ်လဴဂွံညိညိဂှ်တှေ် လၟုဟ်ဂှ်တှေ် ညးတၞဟ်ဟီုပ္တိုန် စမံၚ်ဟာ ကေတ်ဟွံဒးပုဟ်နဝ် ညးတၞဟ်ဟီုမံၚ် တိုၚ်ဆာန်လှေ်ခိုဟ်မံၚ်ညိညိ ညးတၞဟ်ဟီုလေဝ် ဇေတ်တ်ဂှ် ဇကုအဲ မုအဲပမံၚ် မုအဲဒှ်မံၚ် မုလေဝ် အဲကေတ်ဟွံဒးပုဟ် ပုရိသာဒ်လ္ၚဵု ဟီုပ္တိုန်စမံၚ်ဂှ်တှေ် နကဵုကွတ်လှေ် ကွတ်နာနာဂှ်တှေ် ကတ်လ္ၚတ်မံၚ်ညိညိနွံကီု လၟုဟ်ဂှ်တှေ် အ္စာဟံၚ်ဆာန်ဂှ် ကွတ်လှေ်ကီု ကွတ်ဒယှေ်ကီု ညးလဴမံၚ်ကဵုကီု လ္ပာ်ကွတ်ဂဳတာတံဂှ် ကွတ်မုတံဂှ်တှေ် ဟွံဂွံကတ်ကွေံကွေံဏီပုဟ် ။

မာန် – ဂွံဆဵုကေတ် တိုၚ်ဆာန်ကဵု ဂကောံသၟတ်ဝုတ်ကညာတံ လှေ်မံၚ်လ္တူစၚ် တ္ၚဲကောန်ဂကူမန်ဇြပ်ဗု သၞာံတုဲ ကၠုၚ်ဂှ်တှေ် အစဳအဇန် နူလဵုတုဲတှေ် တိုၚ်ဆာန်လှေ်မံၚ်ဂှ်ရော –

တိုၚ်ဆာန် – အစဳအဇန်ဂှ် ဒးဟီုတှေ် စဳဇန်စဒယှေ်ဒွက် နူကဵုပ္တိတ်ကဝးတေံ ရန်တၟံလဝ်ဒွက်ပရေၚ်ဂကူရ နကဵုဇကု မွဲဓဝ်အာဟွံဂွိုအ်တုဲတှေ် နူကဵုဂကောံသၟတ်ဝုတ်တံ ကေတ်စကသပ် ညးကသပ်အဲတုဲ ပံၚ်သရောပ်တုဲတှေ် ကၠောန် လဝ်ဒွက် လှေ်လဝ် “ချိုတ်ကလေၚ်စဴ ဘဝဂကူမန်”ဂှ်ရ။

မာန် – ဆေၚ်ကဵု ကဝးဒွက် တိတ်လက္ကရဴဏံလေဝ် အကာဲအရာ ပရေၚ်ဍုၚ်ကွာန်လေဝ် ပြံၚ်လှာဲနွံကၠုၚ်ညိညိယျ တှေ် သၟာဒယှေ်ဒွက်လ္ၚဵုတံလေဝ် ပ္တိတ်ကဝးရောၚ်ဟီုတှေ် ချပ်ကၠုၚ်ပရေၚ် လိက်အခေါၚ် (ဆၚ်ဆာ) နွံရ တိုၚ်ဆာန်ရော ပရောဏံ ဗီုလဵုချပ်လဝ်နွံကီု –

တိုၚ်ဆာန် – လ္ပာ် (ဆၚ်ဆာ) ဟီုဂှ်တှေ် လၟုဟ်ကဝးလ္ပာ်ကူဏံဂှ်တှေ် ဂၠိုၚ်လေဝ် ဂၠိုၚ်မံၚ်ဏောၚ် လ္ပာ်အလဵုအသဳ လေဝ် ညးတံထိၚ်ကဵုမံၚ်ဖိုဟ်ရ လၟုဟ်တှေ် မန်ပိုဲဗွဲမဂၠိုၚ်တှေ် ကၠောန်တိုန်မံၚ်သိုက်က်ဖိုဟ်ရ၊ အဵုလ္ပာ်ဂှ်တှေ် ယဝ်ရဒှ်မာန် ဗော်ပရေၚ်ဍုၚ်ကွာန်မန်ပိုဲ ယဝ်ရညးတံထ္ပာ်ဂစာန်ကဵုမာန်တှေ် ၜိုတ်လဵုခိုဟ်ဟွံတီရ ကူချပ်မံၚ်နဝ် ဒှ်မာန်တှေ် အခေါၚ်ဇကုကဵုဇကု ညံၚ်ဍေံဂွံဒှ်မာန်ဂှ်တုဲ (ဆၚ်ဆာ) ဟွံမွဲတှေ် မုက်မတ်ဍောတ်မံၚ်လေဝ် ။

မာန် – ကဝးတၟိဏံဂွံတိတ်ဂှ်တှေ် နကဵုတိုၚ်ဆာန် ဒးဆဵုဂဗ တၚ်ခက်ခုဲဗီုလဵုနွံ လဴစညိ

-တိုၚ်ဆာန် – တၚ်သၟာန်ဏံဟီုတှေ် တၚ်ခက်ခုဲဟီုဂှ် ကျာတ်ကွေံကွေံလေဝ် ဗီုလဵုဂွံခက်ဟွံတီပုဟ် ကျာတ်ၝဟွံ ကေၚ်ဒုၚ်စသိုၚ် မွဲလှေ်ဟဂှ်ရ အရာအိုတ်သီုလေဝ် စနူအာဒယှေ်ဒွက်ကီု ပရေၚ်ပညာကီုနဝ် ဟွံတီညာတ်ညးကံ ဒးအာကၠုၚ်ဂၠိုၚ် ပရေၚ်ဆက်ဆောံကီု ဒးဆဵုဂဗကၠုၚ် ၝဟွံထေၚ်ခယျလဝ်တဂှ်နဝ် ကောသူရိယမာန်ဂှ်လေဝ် ဏောၚ် ညးဂှ် ကေၚ်အာကၠုၚ်မံၚ်ကဵု ဗၟာတဂှ်တှေ် ညးဘိုၚ်ရေၚ်တၠုၚ်ကဵု ပရေၚ်အာကၠုၚ်ကီု ပရေၚ်ဂွံဒယှေ်ကီု အဆက်ညး တံနွံမံၚ်တှေ် ဇကုသက်သာအာတၟာဂလိုၚ် ။

မာန် – ဗွဲမဂၠိုၚ် ကဝးဒွက် တိုၚ်ဆာန်ဒယှေ်လဝ်လၟုဟ်ဏံဂှ် ညးဂှ်ဘိုၚ်ချူစဳဇန်လဝ်ကီု တုဲတှေ် ညးဂှ်ကၠောန်လဝ်ကဵု အခိုက်ကီု –

တိုၚ်ဆာန် – ယွံ ယွံ ချူဂှ်တှေ် တၠဂုဏ်အ္စာခေမာနန် တၠဂုဏ်အ္စာ နန်လွဳနာဲတံ တုဲတှေ် သူရိယမာန် ရဲခေတ်တံ အခိုက်ဂှ်တှေ် ECO တာရာ သူရိယမာန် သာၚ်ဝဏ်တံ –

မာန် – ပ္ဍဲကဵုကဝးဒွက်တိတ်လၟုဟ်ဏံ ဂကောံသၟတ်ဝုတ်ကညာ လှေ်တံဂှ်ရော နူကဵုဂကောံလဵု –

တိုၚ်ဆာန် – ယွံ သၟတ်ဝုတ်ဂှ်တှေ် နူကဵုဍုၚ်ဇြပ်ဗု အရာပ်ခိုၚ်ကၠိုက်ဂှ်လေဝ်နွံ နူကဵုကွာန်ပိုဲ ရဲဂကောံလှေ်မံၚ် ယေန်သၞာၚ် ဂှ်လေဝ်နွံ သရောပ်လဝ်တုဲတှေ် ပါမံၚ်ရ –

မာန် – သၟာဒယှေ်မန်ပိုဲ ဗွဲမဂၠိုၚ် ညးဗြဴကီု ညးတြုံကီု ညးဂှ် တိုၚ်ဆာန် စိုတ်လုပ်စဂၠိုၚ် –

တိုၚ်ဆာန် – အဝ် လၟုဟ်တှေ် သၟာဒယှေ်တံဂှ်တှေ် လိုၚ်ညးကဵုညးလေဝ်နဝ် ညးဗြဴတှေ် နဒဳ လေဝ်ခိုဟ် ပဉ္စဝဳလေဝ် ခိုဟ်နဝ် လ္ပာ်ညးတြုံဂှ်တှေ် ပူရိသာဒ်သၟတ်တံဒးစိုတ်ကီုဂှ်တှေ် ဗီုကဵု သူရိယမာန်တံ အဂ္ဂတံ သက္ကတံ အဲလေဝ် စိုတ်လုပ်စမံၚ်ကီုလေဝ် ။

မာန် – အဵုဟီုဏါ ဟီုနၚ်တှေ် ရဲဒယှေ်ဒွက်တံစိုတ်အိုတ်မံၚ် စပ်ကဵုပရေၚ်ကဝးပ္တောံဂှ်လေဝ် လၟုဟ်တိုၚ်ဆာန်လေဝ် ပ္တိတ်ကဝးတၟိတှေ် ပရောကဝးပ္တောံဏံ နကဵုတိုၚ်ဆာန် ဗီုလဵုချပ်လဝ်နွံကီု –

တိုၚ်ဆာန် – ယွံ ဆေၚ်စပ်ကဵုကဝးပ္တောံဏံတှေ် ယဝ်ရ မွဲလ္ပာ်ဓဝ် ဗီုလဵုဂွံဟီု လ္ပာ်အလဵုအသဳဂှ် ယဝ်ရညးတံ ကေတ် တာလျိုၚ်လေဝ် ဟွံကၠောံက္ဍညးသ္ကံဟွံလောဲတှေ် ကေတ်ဟွံမာန်က္ဍၚ်ပုဟ်၊ ယဝ်ရပုရိသာတ်ဟလိုၚ် ဘိုၚ်ကေတ်ကဵု တာလျိုၚ်မှ ဘိုၚ်ပကဵုရောၚ်ဟီုတှေ် အိုတ်အးအာဟဂှ်ရ ပုရိသာဒ်တံဟွံကွဵုဇြဟတ်ကဵုကဝးပ္တောံပုဟ်ဟီုတှေ် ဍေံတံ ယဵုမံၚ်ကီုလေဝ် ဍေံဒးဒေံါအာကေတ်တ်ရလေဝ် –

မာန် – ပြဟ်ဟ်ဏံ တိုၚ်ဆာန် ဘိုအ်ဂွံတိတ် (Show) စဳဇန်နွံမံၚ်ကီုဟာ –

တိုၚ်ဆာန် – ပြဟ်ဟ်ဏံဟီုဂှ်တှေ် (Show) ဂှ်မုလေဝ်ဟွံဂွံကူချပ်လဝ်ဏီပုဟ်လေဝ် ဒးဂစာန်မံၚ်လ္ပာ်ဂွံပ္တိတ်ကဝး ဏံမွဲဟေၚ်ရ အာရောမာန် ဍောၚ် သက်ဟီုဟွံမွဲရ မုလေဝ်ချပ်ဟွံမာန်ဏီရ ။

မာန် – ကဝးလၟုဟ်ဏံ တြးတုဲဒှ်အိုတ်တှေ်ရော ဂတ ဘိုအ်ဂွံဆက်ပ္တိတ်အာဆက်က် စဳဇန်နွံမံၚ်ဟာ –

တိုၚ်ဆာန် – အာပး – ဟွံဂွံချပ်ဏီပုဟ်လေဝ် အခိၚ်တ္ၚဲဏံဂှ် ကၠောန်လဝ်တုဲဂှ် စိုတ်ဒှ်ညံၚ်ကဵု ဒိုအ်ဟွံဂွိုအ် ဂွံမံၚ် ဇြဟတ်ကဵု သ္ကံရဲကီု ဂွံမံၚ်သ္ကံကဵုဂုဏ်အ္စာတုဲရောၚ် လၟုဟ်ကၠောန်မံၚ်ဂှ်။ နကဵုအခိၚ်ဂတတေံ ဍောၚ်ပြေအာတုဲတှေ် မိက်ဂွံဍောၚ်စမ်ရံၚ်မွဲတဲတှေ် မိက်ဂွံကၠောန်တှေ် ကၠောန်စမ်ရံၚ် –

မာန် – အကာဲအရာ တြးမံၚ်ကဝးဂှ်ရော ဗီုလဵုနွံလဴစညိ –

တိုၚ်ဆာန် – ပ္ဍဲကဵုတြးဏံတှေ် ဗီုလဵုဂွံဟီု ဟီုထောံဟဏံတှေ် ကေတ်ရီုဗၚ်ပ္ဍဲကဵုသ္ကံရဲမိတ်သဟာဲရနဝ်၊ နကဵုဇကုအဲ အာကွာန်တေံတှေ် ကေတ်ရီုဗၚ်ကဵုသ္ကံရဲကွာန်တေံ၊ စိုပ်ကွာန်ဏံတှေ် ကေတ်ရီုဗၚ်ကဵုရဲကွာန်ဏံ အာတ်ရီုဗၚ်နကဵု ဂကောံသၟတ်တံ ဂုဏ်အ္စာတံကီု အဵုဗီုဂှ် လ္တူဆေၚ်ဂှ်တှေ် လၟုဟ်ဟွံဂွိုအ်စွံလဝ်ဏီပုဟ်၊ ဍုၚ်တၞဟ်ဟ် မပ္တံဍုၚ်သေံ တေံလေဝ် ဟိုတ်နူခက်ခုဲကဵုစရိတ်တုဲတှေ် ဟွံဂွံတြးဏီပုဟ် –

မာန် – ပ္တိတ်လဝ်တၟာဂလိုၚ်ဟာ –

တိုၚ်ဆာန် – ပ္တိတ်လဝ်ပြဟ်ဟ်ဏံ ၜိုတ်(၁၀၀၀)ကဝးဓဝ်ရလေဝ် ဆတြးဂွံၜါတ္ၚဲညိကီု –

မာန် – ယဝ်ရ ၜိုတ်ပ္တိတ်လဝ် တြးအိုတ်အာတှေ် ၜိုတ်ပ္တိတ်လဝ်တမ်ရိုဟ်ဂှ် ပြေပြံၚ်မာန်ဟာ –

တိုၚ်ဆာန် – ၜိုတ်ပ္တိတ်လဝ် ယဝ်ရ အိုတ်အာတှေ် ဍေံပြေပြံၚ်ၜိုတ်ထေက်ကြိုက်နွံ ဆဂး အကာဲအရာလၟုဟ်တှေ် သ္ပအာစရိတ်ဂၠံၚ်ညိ စရိတ်သုၚ်ဍာ်ဂံက်က်ညိ အိုတ်အာအတိုၚ်ဂှ် ဟဂှ်ရ – ရဲဒယှေ်ဒွက်မန်ပိုဲတံ ပရဲဂွံတိတ်ဟီုဂှ် အောန်ကွေံကွေံဟဂှ်ရ ဗီုလဵုဍေံပြဲရောဟီုတှေ် ကမၠောန်ဇကု ဇကုကၠောန်တုဲအာ ဇကုစိုတ်ပြေအာလ္တူကမၠောန်ဇကု ပရဲနွံၜိုတ်ဆဂှ်ဟေၚ်ရ။ သြန်ဂွံသှေ်ဟီုဂှ် နွံအောန်ကွေံကွေံဟဂှ်လေဝ် –

မာန် – ဟီုဟဂှ်တှေ် သၟာဒယှေ်ဒွက်မန်ပိုဲ ဂွံတန်တဴဍာ်ဇမၠိုၚ်မာန် မွဲမွဲဂှ်တှေ် ဗီုလဵုဂွံတန်တဴအာမာန် လညာတ် တိုၚ်ဆာန် –

တိုၚ်ဆာန် – ရဲသၟာဒယှေ်ဒွက်တံ ဂွံအာဍာ်ဇမၠိၚ်မာန်ဟီုတှေ် တန်တဴပ္ဍဲကဵုစိုတ်ဓါတ်ကီု ဗီုလဵုမှဟွံယှအ်ထောံပုဟ် တှေ်နဝ် တုဲတှေ် ပူရိသာဒ်လေဝ် ဒးကဵုဇြဟတ်လ္တူဇကုလၟိုန်မာန်ကီုတှေ် ဍာ်ဇမၠိၚ်အာဂွံနဝ်။

မာန် – တ္ၚဲဏံဟီုတှေ် ပ္ဍဲကဵုဍုၚ်မန်ပိုဲ ဂဳတမန် ကဵု ဂဳတ (Power music) ဂကောံဂဳတနွံၜါရ ဂဳတမန်ၜါဂကောံဏံ ဂကောံဂဳတလဵု တိုၚ်ဆာန်စိုတ်လုပ်စဂၠိုၚ် –

တိုၚ်ဆာန် – အဲဂှ်တှေ် စိုတ်လုပ်စ တုပ်ပ်ရနဝ် မုဒှ်ရောဟီုတှေ် ဂဳတမန် ကဵု (Power music) ဂှ်ဟွံတၞဟ်ခြာရ မွဲသၞာံ ကဵုမွဲသၞာံ လဆောဝ်တှေ် (Power music) ဂွံတိတ်ဂၠိုၚ် လဆောဝ်တှေ် ဂကောံဂဳတမန်ဂွံအာလေဝ်နွံ ဍေံဟွံခြာ ပုရိသာဒ်တံလေဝ်ဘိုၚ်ကဵုမံၚ်ဇြဟတ်ရ။

မာန် – ဘဝရဲသၟာဒယှေ်ဒွက်မန်တံ ဂွံတိုန်ကီု ကဆံၚ်ဂွံပဵုသၠုၚ်တိုန်ဂှ်တှေ် ဗီုလဵုတိုၚ်ဆာန် ညာတ်ကေတ်ရော –

တိုၚ်ဆာန် – ယွံ ယဝ်ရ ရဲဒယှေ်ဒွက်တံ ကဆံၚ်ဂွံပဵုတိုန်တှေ် ဒးကေတ်အခိၚ် ဒးသၠးပွးကမၠောန်ပ္ဍဲသ္ၚိဇကုအရာ အိုတ်သီုမာန် ကဵုအခိၚ်ကဵု ပ္ဍဲဘဝသၟာဒယှေ်ဂှ်ချိုတ်ပၠိုတ်တုဲမှ အဵုဗီုဂှ်မှ ဍေံဂွံပဵုတိုန် ယဝ်ရအဵုဗီုဂှ်ဟွံသေၚ် အကာဲ အရာလၟုဟ်ရ အခိၚ်ဇကုသၠးမှ အာလ္ၚတ်ထောံညိညိ တုဲတှေ် စဴအာ ကၠောန်ကမၠောန်ပ္ဍဲသ္ၚိ ဠသၠးမှ ကၠုၚ်လ္ၚတ်ပၠန် ကမၠောန်ဇကုသောၚ်မှ လ္ၚတ်ပါ်ဒွက်ဂှ်တှေ် ဍေံဂွံၜိုတ်ဆဝါသနာသၟးရ နကဵုအဲလၟုဟ်တှေ် ၜိုန်ရဒးဒယှေ်ဏါၜိုတ် ဏံဂှ် ညှာစိုတ်ကဵုပုရိသာဒ်တံဘဲလေဝ် ပုရိသာဒ်တံ ဂွံကလၚ်ၜိုတ်ဏံဓဝ်ဂှ်နဝ် ။

မာန် – လၟုဟ် ကဝးတိုၚ်ဆာန်တၟိဏံတိတ်ယျရောၚ်ဟီုတှေ် မုဂလာန်ဗီုလဵု မိက်ဂွံကဵုပရၚ်တဲ ကဵုပူရိသာဒ်ဂမၠိုၚ် –

တိုၚ်ဆာန် – ယွံ အတိုၚ်ပၟိက်စိုတ် ပုရိသာဒ်ဂကူပိုဲဂှ်တှေ် တိုၚ်ဆာန်ဂိုတ်ဂစာန်အာရောၚ် ပူရိသာဒ်ဂကူမန်ပိုဲဂမၠိုၚ်တံ လေဝ် ဘိုၚ်ကဵုဇြဟတ်ကဵု တိုၚ်ဆာန် ကီု သီုကဵု သၟာဒယှေ်ဒွက်ညးပ္တိတ်မံၚ်ကဝးမန်ပိုဲ သီုဖအိုတ်ညိဂှ် တိုၚ်ဆာန် မိက်ဂွံဟီုဗ္ကန်သာ်ဏံရ။

မာန် – ကဵုအခိၚ်သ္ပသၟာန်သှ်ဂှ် တၚ်ဂုဏ်ရ –

တိုၚ်ဆာန် – ယွံ ဂွံအခေါၚ်သှ်ဏါ ပရေၚ်ဘဝဇကုသာ်ဏံဂှ် အဲတိုၚ်ဆာန်လေဝ် တၚ်ဂုဏ်ဗွဲမလောန်ရ။