ကမ္မတဳကၠောန်ဗဒှ် သဘၚ်သဳကၠဳဇၞော်ကောန်ဂကူမန်ဝွံ တုဲကၠုၚ် ဂိတုဝှ် (၁၀) စွေက်၊ ဂိတုအံက်တိုဝ်ဗါ (၂၉) ဂှ် ညးစၞး ဗော်ပရေၚ်ဍုၚ်ကွာန်ဂမၠိုၚ်ကီု ညးစၞး နူဂကောံမဟာဇန်မန်နာနာကီု နူဂကောံ ညးမဘိက်ထေက်မန်ဂမၠိုၚ်ကီု ပံၚ်ဗစပ်ပံက်လဝ် ဂကောံနာယက ကဵု ဂကောံကမ္မတဳတိုၚ် သၚ်ခရှ် (၄၀) တၠ ရ။
ကမ္မတဳကၠောန်ဗဒှ် သဘၚ်သဳကၠဳဇၞော်ကောန်ဂကူမန် မံက်ကၠုၚ်တုဲ ကမ္မတဳတံ ချပ်သဳကၠဳအခိၚ် သွက်ဂွံ ကၠောန်ဗဒှ်အာ သဘၚ်သဳကၠဳဇၞော်ကောန်ဂကူမန် ပ္ဍဲသၞာံ ၂၀၁၄ ဂိတုဂျာန်နဝါရဳ အကြာ ၁၀-၁၅ ဂှ် ကၠောန်ဗဒှ်အာ ပ္ဍဲပွိုၚ်ဍုၚ်ဇြပ်ဗု ဟွံသေၚ် ပ္ဍဲပွိုၚ်ဍုၚ်မတ်မလီု မွဲဒၞာဲရောၚ် ဖျေံလဝ် သ္ဂုတ်သွာတ်ရ။
ပ္ဍဲကဵု တ္ၚဲသ္ပကောံဓရီုပံက်ကမ္မတဳတိုၚ် သွက်သဘၚ်သဳကၠဳဇၞော်ကောန်ဂကူမန်ဂှ် နူဗော်ဒဳမဵုကရေဇြဳအလုံရး မန် ပ္တိုန်ထ္ၜးလဝ် လိက်ကိစ္စပံက်လဝ် ကမ္မတဳကၠောန်ဗဒှ် သဘၚ်သဳကၠဳဇၞော်ကောန်ဂကူမန်ဂှ် ပရေၚ်ဓဝ်ယာဟွံမွဲ ဂးတုဲ ပဲါတးလဝ် ကမ္မတဳဝွံတုဲ ဗော်မန်ပိဗော် ညံၚ်ဂွံကော် ကောံဓရီုကၠာဂှ် ချူပ္တိုန်ထ္ၜးလဝ်ရ။
“ကမ္မတဳသဘၚ်သဳကၠဳဇၞော်ကောန်ဂကူမန် လံဂွံဒှ်ဒတန်ဂှ် ကမ္မတဳတိုၚ် ကောံဓရီုဇၞော်ပိုဲတံ တာလျိုၚ်နွံမံၚ်၊ လၟုဟ်ဂှ် ဟီုတှေ် သွက်ဗော်ပိဗော် ဂွံဒှ်ဆဵုဂဗ ညးသ္ကံပြဟ်ဟ် ဗီုကဵုဗော် AMDP ပ္တိုန်ထ္ၜးလဝ်ဂှ် ပိုဲတံဒးဂစာန် ဆဵုကၠာရောၚ်၊ ဂွံကၠောန်အာ သဘၚ်သဳကၠဳဇၞော်ကောန်ဂကူမန်ဂှ်တှေ် လညာတ်အဲမွဲတှေ် တ္ၚဲကောန်ဂကူမန် လ္ပာ်တေံတုဲမှ ဒှ်မာန်ရောၚ်” သာ်ဏံ ဥက္ကဌ ကမ္မတဳကၠောန်ဗဒှ်ကောံဓရီုဇၞော် ပရေၚ်ဂကူမန် အ္စာသဝ်နာဲဟံၚ်ဍုၚ် ဟီုကလးရ။
ဒုဥက္ကဌ ကမ္မတဳကၠောန်ဗဒှ်ကောံဓရီုဇၞော်ပရေၚ်ဂကူမန် နာဲတၠညး ဂှ် “ ကမ္မတဳတိုၚ်ပံက်လဝ် သွက်သ ဘၚ်သဳကၠဳဏံ ဒးဒေံါဇူလဝ် မွဲလစုတ်ကၠာရောၚ် ကာလဗော်ပိဗော်ဆဵုညးသ္ကံ တုဲမှ အဵုဠဂှ်မှ ညးတံ ကလေၚ်ရုဲစှ်တၟိပၠန်ရောၚ် တုဲမှ ပရေၚ်ကမၠောန် သဘၚ်သဳကၠဳကောန်ဂကူဂှ် ဂွံဓမံက်ရုပ်ရဴဂွံရောၚ်” သာ်ဝွံ ဒုဥက္ကဌ နာဲတၠညး ဟီုရ။
ဒှ်သာ်ဂှ်မ္ဂး ကမ္မတဳတိုၚ်ပံက်လဝ်တုဲဂှ် လီုအာယျဟာကျာ် သၟာန်ရံၚ် ညးစၞးဂကောံခမဳသၚ် မပါလုပ် ပ္ဍဲကမ္မ တဳတိုၚ်မွဲဇကုဂှ် “ ကမ္မတဳပံက်လဝ်ဂှ် ပလီုထောံ ဟွံသေၚ်ပုဟ် ဗော်ပိဗော်ဂှ် ညးတံ ဆဵုဂဗညးသ္ကံ တုဲတှေ် မုမုညးတံ လးဖျေံနၚ်ကမၠောန်တှေ် ကမ္မတဳဏံကၠောန် ကမ္မတဳတိုၚ်တံဂှ် ရဲကၠောန်ကမၠောန်ရရောၚ်” ဗီုဏံ စၞးဂကောံခမဳသၚ် ကျာ်ဇၞော်အ္စာသဳလဝန္တ ဟီုထ္ၜးရ။
နူကဵု ဗော်ဒဳမဵုကရေဇြဳအလုံရးမန် ပ္တိုန်ထ္ၜးလဝ် သွက်ဂွံကၠောန်အာ သဘၚ်သဳကၠဳဇၞော်ကောန်ဂကူမန်ဂှ် ညးစၞးဗော်ပရေၚ်ဍုၚ်ကွာန် (၅) တၠ ဒးက္ဍိုက်ပ် ပ္ဍဲကမ္မတဳဂှ်ရောၚ်တုဲ ပ္ဍဲအရာ ဓမံက်ရုပ်ရဴ ပရေၚ်ကမၠောန်ပၠန်လေဝ် ဗော်ပရေၚ်ဍုၚ်ကွာန်မန် ပိဗော်ဂှ်ဟေၚ် ချပ်ဇန်ဓမံက်အာ ရုပ်ရဴရောၚ် သာ်ဏံ ပ္တိုန်ထ္ၜးလဝ်တုဲ ဂကောံမဟာဇန်တံ တုပ်တဴပၟိက်ဟွံဇၞော်ဂှ်တုဲ ဂကောံမဟာဇန်လ္ၚဵု ဟွံစှေ်စိုတ် လ္တူလိက်ဗော် AMDP ဂှ် နွံရ။