နာဲမာန် – နူကဵုဂကောံဗ္တိုက်ပလီုဂဥုဲၜူမာဲ ခရိုၚ်မတ်မလီု ဗော်ဍုၚ်မန်တၟိ ရပ်ဂွံနၚ် ညးတဵု သွံတၞံဘိၚ် (တၞံၜဲါကဓမ်) ကောန်သ္ဂံၚ် ဂကောံဒပ်စဵုဒၞာၜိုဟ်လလံမန် မွဲတၠ ပါဲဒဳဇြေန်ပါ ၂ ဂှ် တုဲ ညးလျိုၚ်တံ ပလံၚ်ပ္တိုန်ဏာ ဋ္ဌာန်ဂအုပ်ခရိုၚ်မတ်မလီုရ။
ညးတဵုတၞံဘိၚ် (တၞံၜဲါကဓမ်) နူဂကောံဒပ်စဵုဒၞာမန်ၜိုဟ်လလံဂှ် မၞုံယၟု ဗၠာဲမန် ကော် မာံတေန်ဥူ တုဲ လၟေၚ်ဂၞန်ဂကောံဒပ်ဂှ် (တ/၀၄၇၅) ပ္ဍဲဂကောံဒပ်မန်စဵုဒၞာၜိုဟ်လလံ (မွန်ငြိမ်ချမ်း ကာကွယ်ရေးတပ်ဖွဲ့) နူတံဒပ်လၟိဟ်(၂) ဒှ်ကောန်သ္ဂံၚ် ဓမ္မတာမွဲရ၊
အတိုၚ် ညးတာလျိုၚ်ရုၚ်ဆက်ဆောံဍုၚ်ဇြပ်ဗု လဴဂှ်မ္ဂး “ၝဏံဂှ် ဒှ်မံၚ် ရဲဂကောံ ၜိုဟ်လလံမန် ဍေံကော်ဗီုဂှ်ရ၊ ညးကွာန်ရဲအရာပ်တံ ကဵုပရိုၚ် ကၠုၚ်တေၚ်တုဲတှေ် ဒးရပ်ရ၊ ရပ်ဂွံတုဲ ပိုဲပလံၚ်ဏာ ရုၚ်ခရိုၚ်လဝဲါဂှ် ဟဂှ်ရ အတိုၚ်သၞောတ်ဝ်ဓဝ်ဂှ် ဗော်ပိုဲကေတ်အာရေဝ်ရောၚ်” သာ်ဏံ ညးတာလျိုၚ်ရုၚ်ဆက်ဆောံ ‘နာဲရာဇာ’ လဴထ္ၜးရ။
အတိုၚ်ညးဍုၚ်ကွာန် ရဲအရာပ်တံ ကဵုပရိုၚ်ဂှ် မာံဗၠာဲမန် ကော် မာံတေန်ဥူ ဝွံ တဵုလဝ်တၞံဘိၚ် ကော် (တၞံၜဲါကဓမ်) ပ္ဍဲဗဒဲါဒဵုကျာ်ဓါတ်သော် ဗၟံက်ဍုၚ်ဇြပ်ဗုဂှ်တုဲ သွံရာန်ဒၟံၚ်ကဵုသၟတ်တံ တၟာလံရရောၚ် သ္ဂးရ၊ လၟုဟ်ရပ်ဂွံနၚ် တၞံဘိၚ် နူကဵုကောန်ဂကောံဒပ်စဵုဒၞာၜိုဟ်လလံမန် နူတဲ ‘မာံဗၠာဲမာန်’ ကော် ‘မာံတေန်ဥူ’ ဂှ် လၟိဟ် (၄၀) တၞံတုဲ အခိၚ်ရပ်ဂွံ ညးတဵုလဝ်တၞံဘိၚ် (တၞံၜဲါကဓမ်) ဂှ် ဂကောံဗ္တိုက်ပလီုဂဥုဲၜူမာဲတံ ဗါ်ပလီု ထောံအိုတ်ရောၚ်ဂှ်လေဝ် ‘နာဲရာဇာ’ ထပ်လဴကဵုရ။
ပ္ဍဲသၞာံ ၂၀၁၃ ဏံဝွံ နူကဵုဂကောံအလဵုအသဳကီု ဂကောံဗ္တိုက်ပလီုဂဥုဲၜူမာဲ ဗော်ဍုၚ်မန်တၟိကီု ရပ်စပ်ဗ္တိုက် ပလီုဒၟံၚ် နဇိုၚ်နဲတုဲ အသိၚ်နွံနွံတုဲ ပရေၚ်ဂဥုဲၜူမာဲ မဂဥုဲချေံကီု မန်ပိုဲကော် တၞးဘိၚ် သေံကော် (ၜဲါကဓမ်) ဂှ်ကီု အသိၚ်ဍိုန်စှေ်အာ တၟာဂလိုၚ်ရ။
လၟုဟ် နူဗော်ဍုၚ်မန်တၟိ ရပ်ဂွံလဝ် မာံဗၠာဲမန် ကော် မာံတေန်ဥူဝွံ ဟိုတ်နူ ဒှ်ကောန်ဂကောံဒပ်စဵုဒၞာၜိုဟ် လံမန်တုဲ ဍေံဂံၚ်တဵု၊ ဂံၚ်သွံရာန်ရောၚ်ဂှ်လေဝ် ညးကွာန်ရဲအရာပ်တံ ဟီုပါ်ပဲါထ္ၜးရ။
စပ်ကဵု ပရေၚ်ဂဥုဲၜူမာဲ ပြးဇးဒၟံၚ် အပ္ဍဲဍုၚ်မန် ဟွံအောန်လးလးတုဲ ပ္ဍဲကဵုကောံဓရီုဇၞော် ပရေၚ်ဂကူမန် ကၠောန်ဗဒှ်တုဲကၠုၚ် ဂိတုသေပ်တေန်ဗါ ၂၈-၂၉-၃၀ တုဲကၠုၚ် လ္တူဍုၚ်မတ်မလီုဂှ် သွာၚ်ညးကုညး ညံၚ်ဂွံသၠုၚ်ပ္တိုန်အသိၚ် ရပ်စပ် ဗ္တိုက်ပလီု ပရေၚ်ဂဥုဲၜူမာဲဂှ်ရောၚ် သာ်ဝွံ ဂွံတၚ်တုပ်စိုတ် ဖျေံလဝ်သ္ဂုတ်သွာတ် နွံရ။