တ္ၚဲဏံဂှ် အလဵုအသဳတၠအဝဵုပၞာန်တအ်ဂှ် ကဵုဏာသတိပါၚ် သွက်ဂွံကၠောန်သ္ပကဵု ပေဲါရုဲမာဲသၟးဟွံသေၚ်၊ သီုကဵုအခေါၚ်ကဵု ဗော်ပရေၚ်ဍုၚ်ကွာန်လ္ၚဵုတံ ပါလုပ်ပ္ဍဲကဵုရုၚ်မာဲဏအ်တုဲရ။ အတိုၚ်အလဵုအသဳပၞာန်တအ် ကၠောန်သ္ပမံၚ်ဏံ ရံၚ်အာဗွဲအပြောံမ္ဂး၊ နကဵု ဍေံတအ် ကၠောန်သ္ပပေဲါရုဲမာဲဏအ်တုဲမ္ဂး ဂၠံၚ်တရဴပရေၚ်ဍုၚ်ကွာန်၊ ဂၠံၚ်တရဴ ပရေၚ်ဒဳမဝ်ကရေဇြဳ ခိုဟ်တၟိုဟ်တိုန်ညိဟာဟွံတီ ညးဗွဲမဂၠိုၚ်တံ စၟီဒၟံၚ်အိုတ်ရ။
ဂကူကောန်ဍုၚ်အရၚ်ဂမၠိုၚ် သီုကဵုကောန်ဂကူမန်ကီု ရန်ကဵုအခေါၚ်အရာ ကံကုသဵုဂကူဇကု ဇကုဂွံဖန်က်ကေတ်မာန်တုဲ လုပ်ကၠုၚ်ပေါဲဗတိုက် ပ္ဍဲဗွိုၚ် ပၠန်ဂတးကီု ပ္ဍဲကဵုဗွိုၚ်ဥပဒေကီုဂှ် လၟုဟ်မ္ဂး လအ်ကၠုၚ်ဗၞတ် (၆၀) သၞာံရ။ လောန်ကၠုၚ်ဗၞတ် (၁၅) သၞာံတေံ ဗော်ရပ်လွဟ်ကောန်ဍုၚ်အရၚ် ဗွဲမဂၠိုၚ်တအ်ကဵု အလဵုအသဳပၞာန်တအ် ဒေံါကၠုၚ်ပန်ပှော်တုဲ ကောန်ဍုၚ်အရၚ်တအ် စၟဳကၠုၚ်ပရေၚ် ၜိုဟ်လလံရ။
ပိုဲဂကူမန်တအ် ဒးအဂၞပ်စိုတ်ကီုဒှ်၊ ဟွံဒှ်အဂၞပ်စိုတ်ကီုဒှ် ပ္ဍဲကဵုသၞာံ ၂၀၁၀ ဏအ် ကၠာဟွံစိုပ်ဏီမ္ဂး အလဵုအသဳပၞာန်တအ် သွက်ဂွံကၠောန်သ္ပ ပေါဲရုဲမာဲနွံရောၚ်။ အတိုၚ်သၞောတ်ဝ်ဒက်ပတန်ဍုၚ် ၂၀၀၈ နူအလဵုအသဳချူဓဇက်လဝ်ဟေၚ်၊ ဒပ်ပၞာန်ဗၟာတအ် ကေတ်စေဝ်လတူတုဲ ကၠောန်သ္ပပေါဲရုဲမာဲရောၚ်။ ပ္ဍဲကဵုပေါဲရုဲမာဲဏအ် သွက်ပိုဲတအ် ဂွံစၟဳစအောန် ကွေံရ။ ဆဂး သွက်ညးဍုၚ်ကွာန်မန် စၟတ် (၈၀) တၟအ်ကၠံ ဒးတန်တဴ ဒၟံၚ် သၟဝ်တဲအလဵုအသဳပၞာန်ဂှ် ဂၠံၚ်ဍာန်သွက်ဂွံရုဲစှ်ဟွံမွဲ ဒးအာဂၠံၚ်ဍာန် ဏအ်ဟေၚ်တုဲ သာ်လဵု ပိုဲတံဂွံသ္ပရော။