ရာၚ်မြဟ် – သၟာကမၠောန် ကောန်ဍုၚ်ဗၟာ မကၠောန်ဒၟံၚ်ကမၠောန် ပ္ဍဲဒေသဗၠိုက်ဍာ် ဍုၚ်သေံတံ ကလေၚ်စဴဒၟံၚ် ဌာန်ဒေသညးတံ နကဵုဂကောံအိုတ်ရ။
ပ္ဍဲဒေသ ပထုံဌာနဳ၊ နန်ထပူရဳ၊ ္ၚောန်ပူရဳ၊ အယုဒ္ဓယ ဇရေၚ်ဍုၚ်ၜၚ်ကံက်တံဂှ် ဍာ်ဗၠိုက်ဒၟံၚ် လအ်ကဵုဂိတုတုဲ သၟာကမၠောန် မကၠောန်ဒၟံၚ်ကမၠောန် ပ္ဍဲရုၚ်စက် မကၟာတ်လဝ်တံဂှ် ကလေၚ်စဴဍုၚ်ဗၟာအိုတ်ရောၚ်။
“သၟာကမၠောန် ကောန်ဍုၚ်ဗၟာ နူပထုံဌာနဳတံဂှ် ကလေၚ်စဴမံၚ် ဍုၚ်ဗၟာ ဇၟာပ်ဇၟာပ်တ္ၚဲ။ နူတနေံတေံလေဝ် ဒဒှေ်ဒယှ်အဲ စဴအာ ၁၀ တၠ။ ပိုဲလေဝ် ဒးမၚ်ရံၚ်မံၚ် အကာဲအရာဖိုဟ်။ ၜိုတ်ၜါသတ္တဟပၠန် ဍာ်ဟွံစှေ်ဏီပုဟ်တှေ် ပိုဲလေဝ် ကလေၚ်စဴဏောၚ်” သာ်ဝွံ သၟာကမၠောန် နာဲဒေန်အံၚ်ထောန် နူပထုံဌာနဳဂှ် ဟီုရ။
ညးလှုဲလှာ်နွံ၊ ညးကၠောန်ဒၟံၚ်ကမၠောန် ပ္ဍဲဍုၚ်သေံ သၞာံလအ်လအ်တံဂှ် ကလေၚ်စဴဍုၚ်ဗၟာအိုတ်ကီုလေဝ် ညးမစိုပ်ကၠုၚ် ဍုၚ်သေံ ကဵုဂိတုတံဂှ် မိက်ဂွံကလေၚ်စဴလေဝ် စဴဟွံမာန်အိုတ်ရောၚ်ဂှ် ညးဟီုရ။
“လ္ၚဵုတံဂှ်တှေ် လုပ်ကၠုၚ်ဍုၚ်သေံ ခရိတ်ဂၠံၚ်လေဝ် ဟွံပြေဏီ၊ ဗီုလဵုဂွံကလေၚ်စဴရော။ ဒးမံၚ်အာ အကြာအခက်အခုဲ ဒးမၚ် ဒဵုကဵုဍာ်စှေ်ရ” သာ်ဝွံ ညးဆက်ဟီုရ။
သၟာကမၠောန် ကၠောန်ဒၟံၚ်ကမၠောန် ပ္ဍဲဒေသ ပထုံဌာနဳ မွဲလ္ၚီပြၚ် ဒးဆဵုဂဗဒၟံၚ်ဘဲဍာ်တုဲ နူအခိၚ်ဍာ်စဇၞော်ဂှ် နူရုၚ်စက် ဖန်ဇန်ကဵု ဆဒၞာဲမံၚ်ဟေၚ်တုဲ ဟွံဂွံအရီုအဗၚ်မွဲသာ်ဏီဂှ်ရ ပရေၚ်အာကၠုၚ် စသုၚ်တံဂှ် ဒးဖန်ဇန်ကေတ်ဒၟံၚ် အလဵုဇကုအိုတ်ရောၚ်ဂှ် သၟာကမၠောန်တံ ဟီုအိုတ်ရ။
ၜိုန်ဂှ်လေဝ် နူသတ္တဟတုဲကၠုၚ်ဂှ် ကလိဂွံဒၟံၚ် အရီုအဗၚ် မပ္တံကဵု စၞစ၊ ဍာ်တံရောၚ် ဂွံတီကေတ်ရ။
“မွဲမွဲတ္ၚဲ ကလေၚ်စဴဒၟံၚ် ကဵုကၠံ၊ ညးတံ စဴဂှ်လေဝ် ဍာ်ဇၞော်တုဲ ကမၠောန်ကၟိတ် ဟွံမွဲ၊ မွဲသာ်ပၠန်ဂှ် ဍာ်ဆက်ဇၞော်မံၚ် ၜိုတ်မွဲဂိတုဏီ ဟိုတ်နူလလောၚ်လဝ်ပရိုၚ်တုဲ ညးတံ ကလေၚ်စဴဒၟံၚ် ကဵုဂကောံ” သာ်ဝွံ ညးတာလျိုၚ် ဂကောံကောန်ဍုၚ်ဗၟာ မစိုပ်ဍုၚ်သေံ ဥူကျဝ်သိုၚ် ဟီုရ။
သၟာကမၠောန် ကောန်ဍုၚ်ဗၟာ မကၠောန်ဒၟံၚ်ကမၠောန် ပ္ဍဲဍုၚ်သေံ မၞုံၜိုတ် ၂ ပြကောဋိကိုဋ်ရောၚ်ဂှ် ဂကောံရီုဗၚ်သၟာကမၠောန်တံ ဆိၚ်ဆလဝ်အိုတ်ရ။
ပၞောဝ်ကဵု ဒေသဍာ်ဗၠိုက်ဂမၠိုၚ် မပ္တံကဵု ဒေသအယုဒ္ဓယ၊ ပထုံဌာနဳ၊ ဆာဲနက် ကေုာံ နခေါမ်သဝန်တံ ဒးဘဲဍာ် သကာတ်မြဟ်အိုတ်ရ။
ပွိုၚ်ၜါဂိတု ဗြဲဂူဒၟံၚ်ဆက်ဆက်တုဲ ဟိုတ်နူဖံက်ပရိုဟ်ဖျေံ ဍာ်ကၟိုန်ဂှ်ရ ပၞောဝ်ခရိုၚ် ရ၆ ခရိုၚ် မၞုံပ္ဍဲဍုၚ်သေံဂှ် ဒးဘဲဍာ် ၆၁ ခရိုၚ်တုဲ ရုၚ်စက်ဂၠိုၚ်ကဵုဠက်တံလေဝ် ဒးကၟာတ်လဝ်အိုတ်ရ။
ဍာ်ဇၞော် ပ္ဍဲဍုၚ်သေံသၞာံဏံဂှ် ပ္ဍဲပွိုၚ် ၅၀ သၞာံမ္ဂး သကာတ်မြဟ်အိုတ်တုဲ ဟိုတ်နူဘဲဍာ် မၞိဟ်ချိုတ်အာ ၃၄၂ တၠရ။
