မာံသုတ – ပ္ဍဲဂိတုအံက်တဝ်ပါ (၂၁) ဂှ် ဇရေၚ်ကွာန်ကၟာဝက်၊ ပွိုၚ်ဍုၚ်မုဟ်ဍုၚ် ဂကောံရပ်လွဟ် ဟွံတီယၟုမွဲဂကောံ ရပ်ဏာကောန်ကမၠောန် ကုမ္ပဏဳပရေၚ်သိုၚ်ခၞံ ပုဂ္ဂလိကတုဲ ညံၚ်သ္ဂောံကလေၚ်နုက်ကေတ် မွဲတၠ ၁၀ ကိုဋ်ဂှ် ကလေၚ်လဝ်ပရိုၚ်ရောၚ် ဂွံတီကေတ် နူညးမစုက်လုက်ကဵု တၠခန္ဓတံရ။
“ပ္ဍဲမၞိဟ်ဒးဒုၚ်ရပ် ပန်တၠဂှ် ကလေၚ်ဗလးကဵုမွဲတၠတုဲ ပြၚ်နၚ်အရေဝ်ကဵု ညးဗၠးကၠုၚ်ဂှ် သွက်ဂွံကလေၚ်နုက်ကေတ် မွဲတၠ စှ်ကိုဋ်။ မၞိဟ်သှေ်ပိတၠဂှ် ရပ်ထိၚ်လဝ် ပ္ဍဲဂြိုပ်ဖိုဟ်” သာ်ဝွံ ညးမစုက်လုက် ဟွံမိက်ဓမံက်ယၟုဂှ် ဟီုရ။
အခိၚ်နူဂယးပြဟ် (ၜိုတ် ၅ နာဍဳ) ဂှ် ဂကောံရပ်လွဟ် ဟွံတီယၟုမွဲဂကောံ လုပ်ပန်ထောံ ဗဒိုပ်ကုမ္ပဏဳသိုၚ်ခၞံ အေကဝ် (AK) ကေတ်လဝ် ကာန်ထရာ် ဂၠံၚ်ကွဳစက် မတ်မလီု-ရေဝ်-ဒဵုဒလဲဂှ်တုဲ သီုရပ်ကော်ဏာ ကောန်ကမၠောန် ၄ တၠရ။
ဃောလုပ်ပန် ဗဒိုပ်ကမၠောန် မၞုံဇရေၚ်ကွာန်ကၟာဝက်ဂှ် သီုစံၚ်ထောံ တာဲကောန်ကမၠောန်ဇူဒီု ကေုာံ ကွဳစက်တုဲ သီုပန်ဖံက်ဏာလွဟ်ရောၚ် ညးဒေသတံ ဟီုရ။
ညးကလေၚ်ဗၠးကၠုၚ်တံဂှ် နူဗဒိုပ်ဗၠာဲသၟိၚ် ကွာန်ကၟာဝက် စၟဳစၟတ် သၟာန်သၟုက်ဒၟံၚ်တုဲ လၟုဟ်စိုပ်မံၚ်အလဵုဂှ် ဟွံတီကေတ်ဏီရ။
“ကၠာသဘၚ်ကျာ်ဏံ ဟွံဒှ်ဏီဂှ် ဂကောံရပ်လွဟ်မွဲဂကောံ ဗက်အာတ်မံၚ်လှုဲ ပ္ဍဲကွာန် ပွိုၚ်ဍုၚ်မုဟ်ဍုၚ်ဏံကီု၊ တၠကၠအ်လ္ၚဵုတံဂှ် သီုဒးကဵုဏာလှုဲလေဝ် နွံမံၚ်” သာ်ဝွံ တၠကၠအ်ဗ္ၜိုတ် နူကွာန်ကၟာဝက်မွဲတၠ ဟီုရ။
ဂိတုအံက်တဝ်ပါ (၁၈-၂၀) တုဲကၠုၚ်ဏံဂှ် ဒှ်တ္ၚဲကၠောန်ဗဒှ် သဘၚ်ကျာ်ကၟာဝက်ရ။
တုပ်တဴသာ်ဂှ်ကီု ပ္ဍဲဂိတုဂျူလာၚ် ၁၁ ဂှ် ဂကောံရပ်လွဟ် မန်၊ ကရေၚ် ပံၚ်တောဲတံ ရပ်တံၚ်ဏာ ကောန်ကမၠောန်ကၠောန်ဂၠံၚ် နူကုမ္ပဏဳ (AK) ဂှ် မွဲတၠတုဲ အာတ်လဝ်လှုဲ (၁၅၀) ကိုဋ်ရောၚ်ဂှ် ဓမံက်ထ္ၜးလဝ် ပ္ဍဲပရိုၚ်ကၠာတေံရ။
သွက်သ္ဂောံထိၚ်ဒဝ် ပလေဝ်အာဂၠံၚ်ဒဒန် သကုတ် မတ်မလီု-ရေဝ်-ဒဵုအလဲ မၞုံဇမၠိၚ် ၁၁၂ တိုၚ်၊ ၆ ဖာလုၚ်ဂှ် သ္ပပတံနူ ၁၆-၃-၂၀၁၁ တုဲ နကဵုသၞောဝ် ဗဳအဝ်ဒဳ (BOT) ကဵုလဝ်အခေါၚ် ကုကုမ္ပဏဳ သိုၚ်ခၞံ အေကဝ် (AK) ရောၚ်ဂှ် ဝန်ဇၞော်သိုၚ်ခၞံ ကၟိန်ဍုၚ် ဟီုကၠုၚ်လဝ် နွံရ။
ကုမ္ပဏဳဝွံ ပ္ဍဲအခိၚ်ကသီု ဒေံါဇူလဝ် ပရေၚ်ပလေဝ်ဂၠံၚ်ဂှ်ရ ကွဳစက်တံ အာကၠုၚ်ဝါတ်ဂါတ် ဒှ်အခက်အခုဲ ဗွဲမလောန်တုဲ ဗက်မံၚ်အကံက်ဂၠံၚ် ဇၟာပ်ဇၟာပ်တ္ၚဲရောၚ်ဂှ် ဂွံတီကေတ် နူညးအာတရဴတံရ။
ဂကောံရပ်လွဟ်တံ ဗက်မံၚ်အကံက်၊ ရပ်တံၚ်ဒၞံၚ်မၞိဟ် ပ္ဍဲဒေသမန်သာ်ဏံဂှ် ကြဴနူ သၞာံ ၂၀၁၀ ဗော်ဍုၚ်မန်တၟိ ဒေံါပန်ပှော် လီုကၠုၚ်ကဵု အလဵုအသဳပၞာန်ဗၟာတုဲဂှ် ကတဵုဒှ်ကၠုၚ် ဂၠိုၚ်ရောၚ် ညးမလ္ၚတ်တံ သ္ၚဳဂၠိပ်အိုတ်ရ။
ပရေၚ်ကတဵုဒှ်ဏံဂှ် နူကဵုဌာန်ဂအုပ် ခရိုၚ်မတ်မလီု ဗော်ဍုၚ်မန်တၟိ ဆက်လ္ၚတ်မံၚ်ဖိုဟ်ရောၚ်ဂှ် ညးတာလျိုၚ် ဗော်ဍုၚ်မန်တၟိမွဲတၠ ဟီုရ။