ကောံဓရီုဇၞော် ပရေၚ်ဍုၚ်ကွာန်မန် အလန်ဒုတိယ စကၠောန် ပ္ဍဲဂိတုမေ ၁၂ ရောၚ်

by | May 10, 2018 | ပရိုၚ် | 0 comments

ကောံဓရီုဇၞော် ပရေၚ်ဍုၚ်ကွာန်မန် အလန်ဒုတိယဂှ် စနူဂိတုမေ ၁၂ တုဲ စဳဇန်လဝ် သွက်ဂွံကၠောန်သ္ပအာ ပွိုၚ် ၃ တ္ၚဲတုဲ သဳကၠဳသ္ပဒ္တန် သၞောဝ်ဒက်ပ္တန် ဗော်သ္ပစၞးဂကူမန်ရောၚ် နာဲတၠညး ညးသ္ကိုပ်သ္ကဂှ် ဂးရ။

“ပ္ဍဲကောံဓရီုဇၞော် ပရေၚ်ဍုၚ်ကွာန်မန်ဏံ တၚ်ပထမဂှ် သွက်ဂွံသဳကၠဳ သ္ပဒ္တန်သၞောဝ်ဒက်ပ္တန် ဗော်သ္ပစၞးဂကူမန်ဂှ် နွံဏောၚ်၊ ဒုတိယဂှ် သွက်ဂွံဓမံက်ရုပ်ရဴ ဗော်သ္ပစၞးကောန်ဂကူမန်ဂှ် နွံဏောၚ်” နာဲတၠညး ဂး။

ကောံဓရီုဇၞော် ပရေၚ်ဍုၚ်ကွာန်မန် (MNA)

ပ္ဍဲကောံဓရီုဇၞော်ဏံ ညးစိုတ်လုပ်စကဵု ပရေၚ်ကောန်ဂကူမန်ကီု၊ ညးဘိက်ထေက် ကေုာံ ညးကေၚ်တိုန်ကၠုၚ် ကောံဓရီုဇၞော် ပရေၚ်ဍုၚ်ကွာန်မန် အလန်ပထမ မကၠောန်လဝ် ပ္ဍဲဂိတုဂျာန်နဝါရဳ ဒုတိယ သတ္တဟတေံလေဝ် ပါလုပ်ပၠန်ဏောၚ် ဂွံတီကေတ်။

“သွက်ဂွံဘိက် ဗော်ပရေၚ်ဍုၚ်ကွာန်မန်လေဝ် နွံမံၚ်ရ။ တိုန် ဟွံတိုန်ဂှ် တဴရဴဗော်ညးတံရ” နာဲတၠညး ဂး။

ကောံဓရီုဇၞော် ပရေၚ်ဍုၚ်ကွာန်မန် အလန်ပထမတုဲကၠုၚ်တေံ ဗော်လုပ်သၞောဝ် ဗော်ဒဳမဝ်ကရေဇြဳအလုံရး AMDP ကဵု ဗော်ကောန်ဂကူ MNP တံ ဟွံတိုန်ကောံဓရီုဂှ်သၟးဟွံက ကုဂကောံဓမံက်ရုပ်ရဴ ဗော်သ္ပစၞးဂကူမန်ဂှ်လေဝ် ဟွံသ္ပသမ္တီ သီုဟွံဒုၚ်ဆဵု သာ်ဝွံ ဂွံတီကေတ် နူမဳဒဳယာပရိုၚ်တံရ။

အစဳအရေၚ် ပရေၚ်ဍုၚ်ကွာန် ဒှ်ကၠုၚ် ညံၚ်မပြိုၚ်ဒၟံၚ်ဇြဟတ် အကြာဗော်ပရေၚ်ဍုၚ်ကွာန် ကဵု ဂအုံဇြဟတ်ပရေၚ်ဍုၚ်ကွာန် မ္ၚးဗော်တံဂှ် တတ်ကၠေံတုဲ ထေက်ကဵုဒးပံၚ်ကၠောန်အာ နကဵုနဲကဲ ပရေၚ်ဍုၚ်ကွာန်ကောန်ဂကူရောၚ် နာဲကောရတ် ဒါရာ်တာဂကောံစဳပျး ဖေါအ်ဗြေဝ် မဟာဇန်မန် ဂးရ။

“ပရေၚ်ဍုၚ်ကွာန်ကောန်ဂကူ ကဵု ပရေၚ်ဍုၚ်ကွာန်ဗော်ဂှ် ပိုဲတံ ပါ်ခြာတုဲ ဒးညာတ်လေပ်ဏောၚ်။ နကဵုပရေၚ်ဍုၚ်ကွာန်ဗော်ဂှ် အာဟွံဂွံရ ဟွံသေၚ်။ အာဂွံမံၚ်ရ။ ဆ္ဂး နဒဒှ်ကဏ္ဍဍောတ်တ်မွဲရ စွံထေက်။ ပရေၚ်ဍုၚ်ကွာန်ကောန်ဂကူဂှ် ဒးစွံနဒဒှ်ကဏ္ဍဇၞော်ဇၞော်မွဲရောၚ်။ ကာလဏံ ဒှ်ကာလ ထေက်ကဵုဒးစွံအဓိကကဵု ပရေၚ်ဍုၚ်ကွာန် ကောန်ဂကူမန်ရောၚ်” နာဲကောရတ် ဂး။

ဆ္ဂး လညာတ်ဗော်ဍုၚ်မန်တၟိ NMSP ဂှ် ပ္ဍဲသၞာံ ၂၀၁၈ အဃောဗော် MNP ကဵု AMDP တံ ဂစာန်ဒၟံၚ်သွက်ဂွံပံၚ်ကောံဂှ် ဗော်မန်တၟိမွဲ ထပ်ဒှ်ကၠုၚ်ပၠန်မ္ဂး ဟွံဒုၚ်တဲ ဖျေံလဝ်သ္ဂုတ်သွာတ်ရောၚ် ဂွံတီကေတ် နူဗော်ဍုၚ်မန်တၟိ။

Written by

Related Posts

ဂကောံညဳသၟဟ်ရာမညတအ် သွက်ဂွံပံၚ်အာတောဲကု ဂကောံမန်မၞုံဍုၚ်သေံတအ်နွံ

ဂကောံညဳသၟဟ်ရာမညတအ် သွက်ဂွံပံၚ်အာတောဲကု ဂကောံမန်မၞုံဍုၚ်သေံတအ်နွံ

ဂကောံညဳသၟဟ်ရာမည ဖျေံသ္ဇိုၚ်ဍုၚ်ဖူကေတ် ကၟိန်ဍုၚ်သေံဝွံ ရန်ကဵုကောန်ဂကူမန်မၞုံဍုၚ်သေံတအ် ဂွံညဳသၟဟ်၊ ဂွံဒှ်မွဲဂကောံမွဲဇြဟတ်ရောၚ်ဂးတုဲ သွက်ဂွံရေၚ်တၠုၚ်ချဳဒရာၚ်ပံၚ်အာတောဲကု ဂကောံမှာဇန်မန် မၞုံဍုၚ်သေံဂမၠိုၚ်နွံရောၚ်ဂှ် ညးတာလျိုၚ်ဂကောံညဳသၟဟ်ရာမညတအ် သ္ဂးလဝ်ရ။

ဒူရေန်ဆက်မတ် တိတ်ပြဟ်ကဵု တိတ်လဇုဲ ၚုဟ်ခြာကဝက်

ဒူရေန်ဆက်မတ် တိတ်ပြဟ်ကဵု တိတ်လဇုဲ ၚုဟ်ခြာကဝက်

ဒူရေန် (ဆက်မတ်) စတိတ်တၟိတၟိကဵု ဒူရေန်တိတ်လဇုဲဂှ် ၚုဟ်ခြာဒၟံၚ်ကဝက်တုဲ ကၠအ်ဒူရေန်တိတ်ပြဟ်တအ်ဂှ် ဒှ်ပရေၚ်ပိုန်ဒြပ်ခိုဟ်ခိုဟ်မွဲရောၚ် တၠကၠအ်ဒူရေန်မွဲတၠဂှ် ဟီုရ။

မတၞံထ္ၜိုတ်ဆက်မတ် သၞာံဏံ ၚုဟ်က္ဍၚ်တိုန်ကဝက်

မတၞံထ္ၜိုတ်ဆက်မတ် သၞာံဏံ ၚုဟ်က္ဍၚ်တိုန်ကဝက်

ဟိုတ်နူဗၞိက်ဗွဝ်ဖျာနာနာ က္ဍၚ်တိုန်အာဂှ် ၚုဟ်ထ္ၜိုတ်လေဝ် သၠုၚ်တိုန်ကီုတုဲ မတၞံထ္ၜိုတ်ဆက်မတ် သၞာံဏံလေဝ် ၚုဟ်က္ဍၚ်တိုန်အာကဝက်ဒှ်ရောၚ် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.