ရုင်ဗလးဗၟတ်(EPC) ပ္ဍဲလှိုၚ်သာယာဂှ် ဒးဒှ်ရ ဒဒုၚ်ခတိုဟ်လဝ် မခတိုဟ်တုဲ နူကဵုဂၠံင်ဇၞော်ဂှ် ဂွံဆဵုမံၚ် ဂယက်(မီးခိုးငွေ့)ဂးတုဲ ဗီုပတောံမံက်ကၠုင်ရ။ ဗီုဂှ်တှေ် အကြာညးသုင်စောဲ Facebookတအ် ကလေၚ်ပါ်ပရအ်မံင် ညးသ္ကအ်မွဲကဆံင်ပၠန်ရ။
ဗီုဂှ် ပ္ဍဲဂိတုဇျာန္နဝါရီ စၟတ် (၂၉)ဂှ် နူကဵုအကံက်’’ အောင်ကျော် မင်း’’ဂှ်မွဲကဆံၚ် ပတိုန်ထ္ၜးလဝ်ရ။ ပတိုန်တုဲ ပွိုၚ်ၜိုတ်(၃)ျနာဍဳဂှ် ရဲသုၚ်စောဲsocial mediaတအ် ကလၚ်ပါ်ပရအ်(Share)လဝ်postဂှ် ၜိုတ်(၃၀၀)ပြၚ် နွံကၠုၚ်ရ။
ဗီုပြၚ်ပတိုန်လဝ်ဂှ်တှေ် “မ္ရဵုအခိၚ်နူးဂယးရ၊၊ ဗ္စိုပ် ရုၚ်စက်ဗလးပၟတ်(EPC) ပ္ဍဲလှိုၚ်သာယာတေံ။ ၂၉.၁.၂၀၂၂’’ဂးတုဲ သီုကဵုဗီုဂှ်မွဲစွံ ညးတေံ တောဲပတိုန်လဝ်ပရိုၚ်ဂှ် ဂွံဆဵုကေတ်ရ။
ဗီုဂှ် နူကဵုဌာနပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဗီုရုပ်ရုၚ်ဗလးပၟတ်(EPC) ဒးဒုၚ်ခတိုဟ်လဝ်မခတိုဟ်သေၚ်တုဲ “ ဗီုဝွံ တုဲကၠုၚ်ကာလ ၂၀၂၁ ဂိတုမာတ်တေံ ပ္ဍဲကဵုပရေၚ်တာဒၞာပေါဲထ္ၜးဆန္ဒ လှိုၚ်သာယာ ဍုၚ်လ္ဂုၚ်ဂှ် ဗီုစံၚ်လဝ်တေံဟေၚ်ရ။ ရုၚ်စက်ဗလးပၟတ်(EPC) ပ္ဍဲလှိုၚ်သာယာ(ရွှေဗန်း)ကဵု ရုင်စက်(EPC)ဂှ် ဒးဒှ်ရ ရဲဂကောံပၠန်ဂတးပန်(၄)ဂကောံတအ် ခတိုဟ်လဝ်မခတိုဟ်ဂှ် နူကဵုဂကောံSpring Revolution Flames (SPF)ဂှ် မွဲကဆံၚ် ပ္ဍဲဂိတုဇျာန္နဝါရဳ စၟတ်တ္ရဲ ၂၈ “ဂှ် ပတိုန်ထ္ၜးလဝ် နွံမံၚ်ကီုလေဝ် စပ်ကဵုကိစ္စဗီုဂှ်တှေ် မုလေဝ်ဟွံဆေၚ်စပ်ကဵု ပရိုၚ်ဇဏံတုဲ ဗီုပတိုန်မံၚ်ဏံဂှ် ဒှ်မံၚ်ဗီုပတောံမွဲဂှ် ပိုဲစၟတ်သ္တီရ။
အခိၚ်ကာလလၟုဟ်ဂွံ ပရေၚ်ဍုၚ်ကွာန် ကၟိန်ဍုၚ်ပိုဲတအ်လေဝ် ဟွံညိၚ်ဝတ်ဏီတုဲ ရဲဖန်ဇန်မံၚ် ပရိုၚ်ပတောံတအ်လေဝ် ဖန်ဇန်မံၚ်ပရိုၚ်ပတောံ၊ တြးမံၚ်သြဝါဒ၊ ပတောံပတိုန်မံၚ်ဗီုရုပ်တအ်ဂှ် ဗွဲမဂၠိုၚ်ဂှ် ဂွံဆဵုကေတ်မာန်ရ။
ဟိုတ်ဒှ်သာ်ဂှ်ရ ညးမဗှ်မပရိုၚ်တအ်ကီု၊ ရဲသုၚ်စောဲမံၚ်social mediaတအ်လေဝ် ဆဵုတမ်ရုဟ်ပရိုၚ်မွဲမွဲကဵုဒှ်၊ ဗီုရုပ်တောဲပတိုန်လဝ်ကဵုပရိုၚ်ဂှ်ကဵုဒှ် လ္ပပတှေ်ပြဟ်ဏီညိ။ တုဲပၠန် ဗက်ဂၠိုက်ဂၠာဲ ကျောဝ်ရံၚ် နူဌာနပရိုၚ် လုပ်ကဵုသၞောဝ်တအ်ကၠာညိ။ ဗီုတောဲပတိုန်လဝ်ကဵုပရိုၚ်ဂှ် စၟတ်တ္ရဲအခိၚ်ကာလလၟုဟ်ရဟာ၊ ဗီုဂှ်ဒှ်မံၚ်ဗီု အခိၚ်တုဲကၠုၚ်ရဟာဂှ် ဂၠိုက်ဂၠာဲ၊ လ္ရတ်ရံၚ်ချိုတ်တ်ဗၠိုက်က်တုဲမှ ပတှေ်စှေ်စိုတ်ညိဂှ် မိက်ဂွံဗတိုက်ဖ္ဍောဝ်ဏာကီုရ။
