ကွးဘာ နူ (Grade 5) စဵုကဵု (Grade 11) မၞုံအပ္ဍဲပွိုၚ်ဍုၚ်ဇြပ်ဗု၊ တွဵုရးဍုၚ်မန်ဝွံ အခိၚ်ကာလဥတုက္ညၚ်ဏံ သွက်ဂွံကတ်လ္ၚတ်လိက်ပတ်မန် ချိုတ်ချိုတ်မာန်ဂှ်မ္ဂး နူဌာန်သဇိုၚ်ပရေၚ်ပညာပုပ္ဖဟံသာဏံ ပ္ဍဲဂိတုမာတ် (၈) တေံ သွက်ဂွံပံက်အာ တန်ဗ္တောန်လိက်ပတ်မန်ဥတုက္ညၚ် မသက္ကုၚုဟ် (ၚုဟ်မးမး) နွံရောၚ် ဂွံတီကေတ် နူညးတာလျိုၚ်ဂကောံတံရ။
တန်ဗ္တောန်ဒါန်ပညာ မသက္ကုၚုဟ်ဏံဝွံ ပံက်ဗ္တောန်အာ ပ္ဍဲရုၚ်ဌာန်သဇိုၚ် ပရေၚ်ပညာပုပ္ဖဟံသာ၊ အရာပ်ခိုၚ်ကၠိုက်၊ ဂၠံၚ်ကွာန်ကြုၚ်ကြုက်၊ ဍုၚ်ဇြပ်ဗုတုဲ ကွးဘာ Grade-5၊ Grade-6၊ Grade-7၊ Grade-8၊ Grade-9 ၊Grade-10 ကဵု Grade-11 တံဂှ် ဒုၚ်အာတဲရောၚ် ဂွံတီကေတ်ရ။
“အခိၚ်က္ညၚ်ကၟာတ်ဘာဏံ နူ (၅) တန် စဵုကဵု (၉) တန်ဂှ် မွဲသ္ကုတ်၊ (၁၀) တန်ကဵု (၁၁) တန်ဂှ် မွဲသ္ကုတ်၊ ပါ်တုဲ သွက်ဂွံဗ္တောန်နွံရ။ မုဟိုတ်ရောတှေ် လ္ၚဵုဂှ် လေပ်မံၚ်မန်၊ လ္ၚဵုဂှ် မုဟွံလေပ်လေဝ်နွံရ။ ဟိုတ်ဂှ်ရ ပါ်တုဲဗ္တောန်ရ။ အဓိက ဗ္တောန်အာလိက်မန်ဏောၚ်။ အပ္ဍဲကဵုဏံဂှ်တှေ် ကောန်ၚာ်တံ ညံၚ်စိုတ်ဂွံလုပ်စဂှ် ကမ်ပျူတာ၊ လိက်အေၚ်ကလိက်တံလေဝ် ဗ္တောန်ကဵုဏောၚ်” သာ်ဝွံ ညးတာလျိုၚ် နူဌာန်သဇိုၚ်ပရေၚ်ပညာပုပ္ဖဟံသာမွဲတၠ ဟီုလဝ်ရ။
တန်ဗ္တောန်ဏံဝွံ နူကဵုအဆံၚ်သဇိုၚ်လိက်ပတ်မန် ဟီု၊ ဗှ်၊ ချူ သ္ဂောံတောတက် စိုန်သကီုမာန်ဂှ်မ္ဂး ဗ္တောန်အာကဵု ပွိုၚ် (၂) ဂိတုရောၚ် ဂွံတီကေတ်ရ။
လိက်ပ္တိုန်စရၚ် သွက်ဂွံတိုန်တန်ဗ္တောန်ဏံဂှ်ဝွံ စပ္တံနူဂိတုဖေဖဝ်ဝါရဳ (၂၈) ဏံ နအလဵုဇကု ကၠုၚ်ပ္တိတ်ကေတ် ပ္ဍဲဌာန်သဇိုၚ်ပရေၚ်ပညာပုပ္ဖဟံသာဏံမာန်ရ။
ၜိုန်ဂှ်ကီုလေဝ် သၞောတ်ဗ္ၜတ်လဝ် လၟိဟ်ကွးဘာ / ကောန်တန်ဗ္တောန်ဂၠိုၚ်အိုတ် စဵုကဵု (၁၂၀) တၠနွံဂှ်ရ နကဵုညးစိုတ်လုပ်စတံ ဗွဲမဂတာပ်အခိၚ် ကၠုၚ်စိုပ်ပ္တိုန်စရၚ်ညိဂှ်လေဝ် ဟီုဂးကဵုလဝ်သတိရ။
“လၟိဟ်ကွးဘာဂှ်တှေ် သၞောတ်ဗ္ၜတ်လဝ်ဏောၚ်။ မုဟိုတ်ရောတှေ် ပံက်အာ ပ္ဍဲဘာသိုၚ်လဝ်တၟိဂှ်ဏောၚ်။ ဒၞာဲဗဒမ်တံဂှ်လေဝ် သိုၚ်ခၞံဟွံတုဲဒှ် ချိုတ်ချိုတ်ပၠိုတ်ပၠိုတ်ဏီပုဟ်။ အခန်ဗ္တောန်လိက်ဂှ် နွံ (၄) ခန်၊ ဂတဂှ်တှေ် သွက်ဂွံဗ္တောန်လိက်ဂှ် ဇြပ်ဇမၠိၚ်နွံမွဲမဏောၚ်။ ဟိုတ်ဂှ်ရ လၟိဟ်ကွးဘာ အကြာ (၁၀၀) ကဵု (၁၂၀) ဟေၚ် ဒုၚ်တဲဂွံရ။ တန်တဴကဵုဒၞာဲကီုဏောၚ်” သာ်ဝွံ ညးတာလျိုၚ်ဂှ် ဟီုလဝ်ရ။
ဌာန်သဇိုၚ်ပရေၚ်ပညာပုပ္ဖဟံသာဝွံ ရန်တၟံကဵု လိက်ပတ်မန်၊ ပရေၚ်ပညာမန် သ္ဂောံဂဵုလဟဵုတောတက်ဂှ်ရ သ္ပသဇိုၚ်ကဵု အစဳဇန်ဒါန်ပညာ၊ တန်ဗ္တောန်ဥတုက္ညၚ်တုဲ ဒှ်ဂကောံပရေၚ်ပညာ ကၠောန်သ္ပရေၚ်တၠုၚ် ပံက်ကၠုၚ်ဒၟံၚ် လၟေၚ်လၟေၚ်ရောၚ် ဂွံတီကေတ်ရ။
ဂိတုဂျာန္နဝါရဳတုဲကၠုၚ်ဏံ အကြာဌာန်သဇိုၚ်ပရေၚ်ပညာပုပ္ဖဟံသာကဵု ကဝ်လိက်/ဌာနပရေၚ်ပညာ မၞုံသၟဝ်တက္ကသဵုမဟာစုလာလံၚ်ကံၚ်တံ ချုက်လဝ်လိက်ကသုက် MOU တုဲ ညးဒေသမန် ဒှ်မံၚ်ခက်ခုဲ သွက်သ္ဂောံဗ္တောန် ပရေၚ်ပညာအဆံၚ်သၠုၚ်တံဂှ်လေဝ် သွက်ဂွံကဵုအာလာဘ်ဗ္တောန်ပညာနွံရောၚ် ဂွံတီကေတ် နူညးတာလျိုၚ်ဂကောံတံရ။
