စနူကဵုဂိတုအံက်တဝ်ဗာ ၆ ဏံဂှ် ပ္ဍဲကဵုတွဵုရးဍုၚ်မန် ပွိုၚ်ဍုၚ်ရေဝ် ဗဒဲါဂၠံၚ်လုပ်ကွာန်ကလအ်ဂှ် ပံက်လဝ်သၞေဟ်ကၚ်တုဲ စမ်ၜတ်အာစၟယဲကဝ်ဝေဒ် သွက်ရဲဒဳကွဳစက်၊ ရဲဗက်သ္ကံကွဳစက်တံကီု ဂွံတီကေတ်ရ။

လၟုဟ်ဝွံ ရဲဒဳကွဳစက်ကဵု မၞိဟ်ဗက်သ္ကံတံဂှ် နကဵု COVID-19 Test Kit ဂှ် စၟဳစၟတ်မံၚ်ကဵုစၟယဲဂှ် ပွိုၚ် (၃) တ္ၚဲဂှ် မၞိဟ် (၇၀၀) တၠကြပ်ပေၚ်တုဲ အပ္ဍဲဂှ် ဆဵုညာတ်အာစၟယဲမၞိဟ် (၄) တၠရောၚ် ဌာနပရေၚ်ထတ်ယုက်တံ လလောၚ်တြးလဝ်ရ။

မၞိဟ်ယဲကဝ်ဝေဒ်သ္ပဒတန် ပ္ဍဲကဵုတွဵုရးဍုၚ်မန်တံဂှ် ကောန်ၚာ်အာယုက် (၁၀) သၞာံ နူကဵုဍုၚ်ကျာ်ခမဳလေဝ် ဒးဒုၚ်ကၠောံယဲကဝ်ဝေဒ်ဂှ်ရ သကအ်ရဲဝေၚ်လဝ်ကရောံညးတေံမွဲစွံ (၁၁) တၠတံလေဝ် ပ္ဍဲကဵုဂိတုအံက်တဝ်ဗာ (၁) ဂှ် ဒးကၠုၚ်လုပ် Quarantine ပ္ဍဲကဵုဍုၚ်မတ်မလီုရောၚ် ဂွံတီကေတ်ရ။

“ပ္ဍဲတွဵုရးဍုၚ်မန်ဂှ်တှ်ေ မၞိဟ်ယဲ နူဍုၚ်မတ်မလီုကဵု ပွိုၚ်ဍုၚ်ၜဳကလေၚ်တံရ စှ်ေဂၠိုၚ်လေဝ်၊ ပွိုၚ်ဍုၚ်ဍေံတံရတှ်ေ ဆဵုမၞိဟ်ယဲဂၠိုၚ်တှ်ေလေဝ် အပ္ဍဲမၞိဟ်ယဲသှ်ေမံၚ်တံဂှ် မၞိဟ်ယဲ ၄ တၠဂှ်ရ ဒးမၚ်ရံၚ် (ယဲသ္ကာတ်) မံၚ်ဖိုဟ်” သာ်ဏံ ညးဂးရ။

“ပ္ဍဲကဵုတိဍာ်ဗော်ဍုၚ်မန်တၟိ ပွိုၚ်ဍုၚ်လှာဒကှ်ဂှ် ကၟုဲနူကဵုမ္ၚး အာကၠုၚ်ဟွံဂွံ ညးတံ ပိုၚ်ခြာလဝ်ရ။ အေပ္ဍဲကဵုဒၞာဲတံဏံ အဲဟွံဒှ်အာ စန်ဒက်မာဲရ။ သွက်အဲမွဲဂှ် ၜိုန်ရညးတံ ကဵုကၠုၚ်အခေါၚ်တၟေၚ်ရကၠာလေဝ် အဲဖျေံလဝ် သ္ဂုတ်သွာတ် ဟွံအာရပုဟ်။ မုဟိုတ်ရောတှ်ေ ဟိုတ်နူကဵုဇကုတုဲ ရဲဒေသတံ ဒးဒှ်ဓဝိၚ်၊ ပ္ဍဲဇကု ယဲဟွံမွဲကီုလေဝ် ဟွံမိက်ဂွံဒှ် သၠေဟ်ပၟာရ” သာ်ဝွံ ညးစၞးအလံၚ်အမာတ် နူကဵုဗော်ကောန်ဂကူမန် နာဲထောန်လွေန် ဟီုရ။