မိလတိုပ်ဗု ပတိုန်ထ္ၜးလဝ်ရ။
သၟာန် ။ ။ အတိုၚ်စၟဳစလဝ်ဂှ်ရ အ္စာတံ ဂွံဒုၚ်ရုဲစှ်တုဲ ဇၞးကၠုၚ်ပေဲါရုဲမာဲ၊ ဟွံလံတှေ် အ္စာတံ ဒးတိုန်ကၠတ်ထဝ်ရတှေ် သွက်ဂွံတိုန်ကၠတ်ထဝ်ဂှ် ဗီုလဵုဇကုအ္စာတံ ပခိုၚ်ကၟောန်လဝ်ဂၠံၚ်တရဴသာ်လဵုရော?
သွဟ် ။ ။ တၚ်ရန်တၟအ် လုပ်ပေဲါရုဲမာဲဂှ် နွံမံၚ်ပိတၚ် တၚ် (၁) အခေါၚ်အရာဗွဲမတုပ်သၟဟ် ကံကုသဵုဂကူညး ဂကူညး ညံၚ်ဂွံဖန်ဖက်ကေတ်တ်မာန် ဒုၚ်သ္ဇိုၚ်ကဵုဂကူတုဲ ကၟိန်ဍုၚ်ပံၚ်ကောံဇေတ်တ် ညံၚ်ဂွံဒှ်ကၠုၚ်မာန် ဂိုတ်ဂစာန်ဏောၚ်၊ တၚ် (၂) ဝါဒသၞောတ်တၠအဝဵု ဝါဒမဟာဂကူ ပိုဲညံၚ်ဂွံဒစဵုဒစးအာ၊ (၃) စပ်ကဵုဂကူ ဘာသာသာသနာ လိက်ပတ်ယေန်သၞာၚ် ညံၚ်ဂွံဓမံက်တိုန် ညံၚ်ဂွံထိၚ်ဒဝ်ဂဵုလဟဵုအာ ကိစ္စကဵုလဝ်ဂတိပါၚ် တအ်ဂှ် ညံၚ်ဂွံဓမံက်ရုပ်ရဴ စိုပ်ကၠတ်ထဝ်တုဲ လပါ်ဒန်ကုတ်သၞောဝ် ချူသၞောဝ်တအ်ဂှ် ဂိုတ်ဂစာန် ပ္တိုန်ထ္ၜးအာမာန်ရောၚ်။
သၟာန် ။ ။ အ္စာတံ ဂွံဒုၚ်ရုဲစှ်ဂှ် အသိၚ်ဇြဟတ်ဓရိုဟ်ဗော်ဟာ? အသိၚ်ညးဍုၚ်ကွာန်ပူဗိုၚ်ခိုဟ်ဟာ?
သွဟ် ။ ။ ဇၞးကၠုၚ်မာဲဟီုဂှ် ပစၞးကဵုဂကူမန်ဟီုဂှ် ဗော်မန်နွံမွဲရ ဟိုတ်ဗော်မန်ညဳသာသၟဟ်သၟန်တုဲ ပစၞးဗော်ညဳ သၟဟ်မန် ပစၞးဂကူတုဲ လုပ်ပြိုၚ်ကၠုၚ်ပေဲါရုဲမာဲရ၊ တော်ကဵုကာလတ္ၚဲဏံ ၂၀၂၀ ဏံတှေ် ဇြဟတ်ဇၞော်ကဵုအသိၚ် ဂွံဆဵုညာတ်ကေတ်ဏောၚ်၊ ဂွံဂွံဇၞးဟီုတှေ် ဟိုတ်နူမူဝါဒ ဗော်ညဳသၟဟ်မန် ကမ္မတဳအံၚ်ဇၞးမာဲပိုဲ ၜိုတ်အစောန်နွံ ပတိတ်ဇြဟတ် ဖျေံဗီုပြၚ်တုဲ ဂိုတ်ဂစာန်ကၠုၚ်လေဝ်ပါ၊ ဟိုတ်မန်ပိုဲ ညဳသာသၟဟ်သၟန် ကောန်ဂကူမန် တအ်ဗွဲမဂၠိုၚ် စိုတ်ထတ် ဇြဟတ်နွံကၠုၚ်လ္တူဗော်တုဲ ညးဆန္ဒမာဲ ဂကူမန်ပိုဲကီု ညးဍုၚ်ကွာန်တန်တဴ မံၚ် ပ္ဍဲသကုတ်လ္ပါ်ဏံ ပရေၚ်ထံက်ဂလာန် အသိၚ်ဍေံခိုဟ်တိုန်မံၚ်ဏောၚ် ပိုဲသ္ၚဳဂၠိပ်ဂွံ။
သၟာန် ။ ။ အ္စာတံ စိုပ်လတူကၠတ်ထဝ်တုဲတှေ် အဓိက ကိုပ်ကၠာအိုတ် မုအ္စာတံ ပလေဝ်ပလေတ် သွက်ဂွံပတိုန် ထ္ၜး သဳကၠဳအာချပ်လဝ်နွံ?
သွဟ် ။ ။ ရံၚ်ကဵုအကာဲအရာတ္ၚဲဏံဂှ် ပ္ဍဲကၠတ်ထဝ်တွဵုရးဍုၚ်မန်ဂှ် လ္ပါ်ဗော် MUP ၆ တၠ လ္ပါ်ဗော်တေံဂှ် နွံ ၁၄ တၠ ဇြဟတ်ညဳသာသၟဟ်မံၚ် ဟွံသေၚ်ပုဟ်၊ ဆေၚ်ကဵုၝေံပိုတ် ၂၆၁ ဂှ် သ္ကိုပ်ဝန်ဇၞော်ဂှ် ၜိုတ်လဵုဒှ်ဒှ် ၜိုတ်ဒှ်ကၠုၚ်မာန်ဂှ် ဂစာန်ဏောၚ်၊ ၝေံပိုတ် ၂၆၁ ဂွံပဆုဲပလေဝ်ဟီုဂှ် တၚ်ဍိုန်ဓတ်နွံကီုကၠာရ ကူချပ်လဝ်နွံမွဲ ကၟိန်ဍုၚ်ပိုဲဏံ စပ်ကဵုပရေၚ်ၜိုဟ်လလံ ဂွံခက်ခုဲ ဂွံဆိုအ်ဗမံၚ်ဖအိုတ်ဂှ်တှေ် ဟိုတ်နူအခေါၚ်အရာကောန်ဂကူ ဍိုက်က်ပေၚ်ဟွံဂွံဂှ်ရ တၚ်ဇၞော်အိုတ် ပိုဲညာတ်ဗီုဂှ်၊ ယဝ်ရ ပ္ဍဲကဵုအလဵုအသဳမံက်တိုန်ဂတဏံ တၚ်ယုတ်ဒေက် ညးတအ်တီမံၚ်ကၠးကၠးရ၊ တၚ်ယုတ်ဒေက်ဏံဂှ် တွဵုရးညးကဵုညး သ္ကိုပ်ဝန်ဇၞော် ကိစ္စပ္ဍဲအခါန်ကၞက်ဂှ် ညံၚ်ဂွိုအ်ကယောဝ်ဗက်မာန်တှေ် တုပ်ညံၚ်ရဴ ကဵုအခေါၚ်ကုကောန်ဂကူတအ်ရောၚ် ဟီုမာန်မံၚ်ရ။
သၟာန် ။ ။ ဒှ်ညးစၞးကၠတ်ထဝ်တုဲ ကာလဂွံဒုၚ်ခါန်ကၞက် ပ္ဍဲဌာနအလဵုအသဳ ဝန်ဇၞော်မွဲမွဲဌာနတှေ်ရော ဗီုလဵုအ္စာတံ ချပ်လဝ်ကီု?
သွဟ် ။ ။ နူစရုဲစှ်အလံၚ်အမာတ်ဂှ် တၚ်တုပ်စိုတ် အလံၚ်အမာတ်ကဵု ဗော် နွံမံၚ်၊ ဒှ်အာအမာတ်တုဲ အလံၚ် အမာတ် ဒကုတ်ကၠတ်ထဝ်နွံဏောၚ်၊ အလံၚ်အမာတ် ဒကုတ်အလဵုအသဳ နွံဏောၚ်တှေ် စပ်ကဵုဌာနဝန်ဇၞော် ဍေံကော် ခါန်ကၞက်ကၠုၚ်တှေ် နကဵုဗော်ပိုဲဏံ ပိုဲချပ် ဂွံတၚ်တုပ်စိုတ်မှ ကိစ္စယိုက်ဂၠေၚ် ပ္ဍဲအလဵုအသဳတအ် ကဵုအခေါၚ်ဏောၚ် တၚ်တုပ်စိုတ်နွံမံၚ်၊ ဆဂး ပ္ဍဲလ္ပါ်ကၠတ်ထဝ်လေဝ် ကိစ္စပတန်သၞောဝ် ပ္ဍဲကၠတ်ထဝ်လေဝ် ပိုဲ ဒးဂိုတ်ဂစာန်ဏောၚ်၊ ယဝ်အကာဲအရာ ဍေံကဵုလ္ပါ်ဒကုတ်အလဵုအသဳလေဝ် မၞိဟ်ဇကုပါထေက် ဒးလုပ်ထေတ် ဏောၚ်လေဝ် ဒုၚ်ကေတ်လဝ်နွံမံၚ်ရ၊ ဆဂး တၚ်တုပ်စိုတ်နကဵုဗော် ဒးကေတ်တွဵုဏောၚ် တုပ်လဝ်စိုတ်နွံမံၚ်။
သၟာန် ။ ။ သွဟ်ပေဲါရုဲမာဲ နဝ်ဝေမ်ဗာ ၈ တုဲကၠုၚ်ဏံ ပဲါနူပွိုၚ်ဍုၚ်ရေဝ်ကဵု ပွိုၚ်ဍုၚ်မုဟ်ဍုၚ်တုဲတှေ် သှေ်ပွိုၚ်ဍုၚ် တၞဟ် ကျဂၠိုၚ်၊ မုဟိုတ်ဂွံကျဂၠိုၚ် အ္စာသ္ၚဳဂၠိပ်ကဵုညိ?
သွဟ် ။ ။ အကာအရာတ္ၚဲဏံ လုပ်အာ(၈)ပွိုၚ်ဍုၚ်ဂှ်တှေ် ပွိုၚ်ဍုၚ်ကျာ်မြဟ် ဇြပ်ဗု ဍုၚ်ပံၚ်တအ် ဂွံကျအာဂှ် သွဟ်ဍေံ ၜိုတ်မံက်ဂှ် မံက်ကၠုၚ်မံၚ်ယျ၊ ဆဂး စၟတ်သမ္တီပေၚ်ၚ်ဂှ် ပိုဲဟီုဂွိုအ်ဏီ၊ မုဟိုတ်ဂွံဇၞးအောန်ဟီုတှေ် ပ္ဍဲကဵု ကွာန်မန်တအ်ဂှ် မၞိဟ်အခေါၚ်ကဵုမာဲနွံဂှ် ဗက်လဝ်စရၚ်နွံမံၚ်ရရ၊ ဆဂး မၞိဟ်ၜိုတ်ကဝက်ဂှ် နွံမံၚ်ဍုၚ်မ္ၚးဏောၚ်၊ မၞိဟ်နွံမံၚ်ဍုၚ်မ္ၚး ဂွိုအ်ကဵုမာဲဂှ် ဒှ်မံၚ်မမာဲ သွက်မန်ဂၠိုၚ်ၚ်ဏောၚ် ပိုဲစှေ်စိုတ်၊ ဟိုတ်မၞိဟ်နွံဍုၚ်မ္ၚးဂၠိုၚ် ပ္ဍဲကဵု မာဲကျဟောံဂှ် ပါမံၚ်မွဲတၚ်၊ ပ္ဍဲလ္တူဍုၚ်ဇၞော်ဂှ်တှေ် ဟိုတ်ဂွံစှေ်ပရေၚ်စန္ဒက်အောန် ပရေၚ်ချီဓရာၚ်ဇြဟတ်အောန်ကီု ပေဲါရုဲမာဲဂတတေံ မာဲလ္တူၝောံဍုၚ်တအ်ဂှ် ပရေၚ်ချီဓရာၚ်ပိုဲစွံအရီုဇၞော်ဇၞော် ဂိုတ်ဂစာန်အာတှေ် ပေဲါအံၚ်ဇၞး ဇၞော်ကဵုဇြဟတ် ဍေံဂွံကၠုၚ်မာန်ဏောၚ်၊ စိုပ်ကၠုၚ်ပေဲါရုဲမာဲဂတဏံဂှ်တှေ် ကောန်မန်ပိုဲအခေါၚ်ကဵုမာဲနွံ ပ္ဍဲဍုၚ်မ္ၚးတေံဂှ် ဗီုပြၚ်စှေ်စှေ် ညံၚ်ဂွံအာကဵုမာဲ ဟွံသေၚ်တှေ် အခိၚ်ကာလကဵုမာဲ ညံၚ်ဂွံစဴကၠုၚ် ဇရေၚ်ဒေသဇကုဂှ် ပိုဲပလေဝ်ပလေတ်ဖန်ဇန်မာန်တှေ် ရေၚ်တၠုၚ်အာ ဗီုပွိုၚ်ဍုၚ်ရေဝ် ဗီုမုဟ်ဍုၚ်တအ်ဂှ် ပွိုၚ်ဍုၚ်တၞဟ်ဟ်လေဝ် ဒှ်ကၠုၚ်မာန်ပေၚ်ၚ်ဏောၚ် ပိုဲပတှေ်ဒုၚ်ဂိုၚ်ကေတ်လဝ်ဗီုဂှ်။
သၟာန် ။ ။ ဗီုကဵုအလဵုအသဳတုဲကၠုၚ်ဏံတှေ် စပ်ကဵုဘဏ္ဍာ သွက်ကောန်ဍုၚ်အရၚ်ဂှ် မန်၊ ဗမာ၊ ကရေၚ်၊ ပအိုဝ် ဂှ် ဂွံလဝ်ဟွံသၟဟ်ညးသ္ကံပုဟ်၊ လတူဏံရော ဗီုလဵုအ္စာတံ ရေၚ်တၠုၚ်အာ ချပ်လဝ်နွံ?
သွဟ် ။ ။ ပ္ဍဲတွဵုရးဂှ် ကိစ္စပရေၚ်ကောန်ဍုၚ်အရၚ်ရ ဒှ်အဓိက ၜိုတ်ပိုဲညာတ်တုဲကၠုၚ်တေံဂှ် ပ္ဍဲကၠတ်ထဝ်တွဵုရး ဍုၚ်မန်ဏံ ဍေံပံက်လဝ်ကမ္မတဳ ပရေၚ်အရာ (ရေးရာကော်မတီ) နွံမံၚ်၊ ပ္ဍဲကဵုဂှ်ဂှ် ကမ္မတဳကောန်ဍုၚ်အရၚ်( တိုၚ်းရၚ်းသားရေးရာကော်မတီ) ဏံ ဒးဒှ်ဗော်ဇၞးလဝ်မာဲဂၠိုၚ်ၚ်တွဵုဏောၚ် ဒှ်ဥက္ကဌဏောၚ်၊ ဒၞာဲဏံဂှ် အမာတ် မန်ပိုဲစိုန်သကီုမံၚ်ရရ ဗော်ဇၞးလဝ်မာဲတွဵု ဒးကဵုတာလျိုၚ်ဥက္ကဌဟွံသေၚ်ပုဟ်၊ ပ္ဍဲကဵုကောန်ဍုၚ်အရၚ် ၜိုန်ရဇၞးလဝ်မာဲဗီုဍေံတအ် ဟွံပေၚ်ကီုကၠာရ တာလျိုၚ်ကိစ္စကောန်ဍုၚ်အရၚ်ဏံ ဒး ကဵုတာလျိုၚ်ကဵုညးတအ်ထေက်၊ ကိစ္စသြန်ဘဏ္ဍာ စပ်ကဵုပရေၚ်ကောန်ဍုၚ်အရၚ် ဖျေံနၚ်ကဵုနူကဵုကၟိန်ဍုၚ်တေံ ကိုတ်ပန်လ္ၚီမသုန်ကၠံ(၄၅၀၀)ကိုတ် ကရေၚ်ဂှ် (၁၅၀၀)၊ ဗၟာဂှ် (၁၀၀၀)၊ ပအိုဝ် (၁၀၀၀)၊ မန် (၁၀၀၀) ဨတအ်ဏံဂှ် လဓမံက်ရုပ်ရဴတှေ် တၚ်ဝါတ်ဂါတ်နွံတၟာဟလိုၚ်၊ မိက်ဂွံဒှ်ဗီုလဵုဟီုတှေ် ပ္ဍဲကဵုသြန်ဘဏ္ဍာ စပ်ကဵုကိစ္စကောန်ဍုၚ်အရၚ် နကဵုမန် ဒးဖျေံကဵုဂၠိုၚ်ၚ်ဏောၚ်၊ ပ္ဍဲသၞောဝ်ဍေံ ကိစ္စမန်ဂှ် သ္ကိုပ်ဝန်ဇၞော် ဒးကေတ်လျိုၚ်ဏောၚ်ဂှ် ပ္ဍဲသၞောဝ်ဍေံချူလဝ်နွံမံၚ်ရ၊ ဆဂး လဒးဓမံက်ရုပ်ရဴကမၠောန်ဂှ် ဝန်ဇၞော်လ္ပါ်ဏံ အရီုညးဟွံစိုပ်ကၠုၚ်ပုဟ်၊ ညးဒုၚ်စ သြန်ဘဏ္ဍာဖျေံလဝ်ဂှ်ရ၊ ဟိုတ်ဂှ်ရ ကိစ္စလိက်ပတ်ကီု၊ တ္ၚဲကောန်ဂကူကီု၊ တ္ၚဲသၟတ်ကီု၊ နာနာသာ် ပရေၚ်မန်ပိုဲဗွဲမဂၠိုၚ် နွံမံၚ်ဏောၚ်၊ ကိစ္စသြန်ၜိုတ်ဍေံဖျေံလဝ်ဏံဂှ် ဟလဵုပလေဝ် ရုမ်ဂပ်ဟွံမာန်ပုဟ်၊ သ္ကိုပ်ဝန်ဇၞော်ဏံ ဂတးကျောဝ်ဗက်ဟွံဂတာပ်ပုဟ်ဂှ်ရ သွက်မန်တှေ် သြန်ဘဏ္ဍာ ရုမ်မ်ဂပ်ပ် ဥပမာ – ကိုတ်ပိလ္ၚီဟာ၊ ကိုတ်ပန်လ္ၚီ သွက်မန်သက်က် ဒးဖျေံနၚ်ထေက်တွဵု ကိစ္စဏံဂှ် ပိုဲလေဝ်အာတ်မိက်အာဏောၚ် မိက်ဂွံပ္တိုန်ထ္ၜးရ။
သၟာန် ။ ။ တၚ်တၞဟ်ဟ် မုအ္စာသွက်ဒးထပ်ဗပေၚ်နွံဏီရော?
သွဟ် ။ ။ တၚ်ထပ်ဗပေၚ်ဂှ်တှေ် ဟိုတ်ညးဍုၚ်ကွာန်တအ် ထံက်လဝ်ဂလာန် ကဵုကၠုၚ်မာဲရ ပိုဲတအ် ဒှ်ကၠုၚ်အမာတ်ကၠတ်ထဝ် စိုပ်အာဏောၚ်၊ ဂတဏံ မစပ်ကဵုပရေၚ်ဂကူဂှ်တှေ် ၜိုတ်အစောန်ပိုဲနွံ ဂိုတ်ဂစာန်ရေၚ်တၠုၚ်အာဏောၚ်၊ ညးဍုၚ်ကွာန်တအ်ဖၟိုတ်ဂှ် လ္တူအမာတ်တအ် ပၟိက်မိက်ဂွံကဵုကသပ်တအ်ဂှ် ဗွဲမကၠးဖ္ဍး ကဵုကသပ်ပ္တိုန်ထ္ၜး၊ ဆန္ဒညးဍုၚ်ကွာန်တအ်ရ ရမျာၚ်ညးဍုၚ်ကွာန်တအ်ရ ညံၚ်ဂွံစိုပ်အာ ကၠတ်ထဝ်တေံဏောၚ်တှေ် အမာတ်တအ် စိုပ်ကၠတ်ထဝ် သဳကၠဳဓမံက်အာရုပ်ရဴရောၚ် မိက်ဂွံဟီုဆၜိုတ်ဏံရ။
