ပ္ဍဲကဵုအရာပ်ဏံဂှ် ပွိုၚ် (၁၄) တ္ၚဲဂှ် ဟွံဆဵုမၞိဟ်ယဲကဝ်ဝေဒ်ကီု နူကဵုမၞိဟ်ယဲအရာပ်ဏံဂှ်လေဝ် ဟွံဆက်ကၠောံထၞာန်အာကဵု ဗွဲဗွဝ်ကီု မၞိဟ်လုက်စုက်လဝ်ကဵုမၞိဟ်ယဲအရာပ်ဏံ တိုက်ရိုက်တံဂှ်လေဝ် ဟွံဆဵုစၟယဲဂှ်ရ အရာပ်ဏံဂှ် နူကဵုကၟာတ်လဒဵုလဝ်အခေါၚ်အာကၠုၚ် (Lockdown) ဂှ် ကဵုအခေါၚ်အာကၠုၚ်ယျရောၚ် ဂွံတီကေတ်ရ။

ပ္ဍဲကဵုပွိုၚ်ဍုၚ်မုဟ်ဍုၚ် ဍုၚ်ကၟာဝက် အရာပ်ဝါယာပ်ဂှ် ကၟာတ်လဒဵုထောံအခေါၚ်အာကၠုၚ် သ္ပထောံ (lockdown) တုဲ အရာပ်စိၚ်တံၚ်၊ ကၟာဝက်၊ ထံၚ်ကှ်ေ ကေုာံ ဘာဟနိ (ဂုံးညၚ်းတန်း) တံဂှ် ကဵုဒၟံၚ်အပ္ဍဲသ္ၚိ (Stay Home) ရောၚ် ဌာနပရေၚ်ထတ်ယုက်တွဵုရးဍုၚ်မန် လလောၚ်တြးလဝ်ရ။

ဟိုတ်နူကဵုမၞိဟ်ဗြဴဂှ် ဒှ်မံၚ်Covid-19 Positive ဂှ် ကေၚ်ဍိုက်လဝ်ကွဳလိုန်ဓာတ် (Taxi) တုဲ ဂြိပ်စဴလဝ် ဍုၚ်ကျာ်ခမဳဂှ်ရ သၟာ (Taxi) ပလံၚ်ဏာမၞိဟ်ဗြဴဂှ် နွံပၟိက်ကဵု လုပ် Quarantine ဂှ်ရဂၠိုက်ဂၠာဲမံၚ် ဟွံဆဵုဏီရ။

ဟိုတ်နူကဵုယဲကဝ်ဝေဒ်တံ ဖျာဇၞော်လၟိဟ် (၁) ဍုၚ်မတ်မလီုဂှ် ဒးကၟာတ်လဝ်နွံမံၚ်တုဲ လၟုဟ်ဝွံ ညံၚ်ဂွံကလေၚ်ပတိတ်ကေတ် ကပေါတ်ဖျာဇကုမာန်ဂှ် ကလေၚ်ကဵုလဝ်အခေါၚ်ဗွဲယာယဳရောၚ် ဂွံတီကေတ်ရ။

ပ္ဍဲကဵုရုၚ်ဂဥုဲဇၞော် ဍုၚ်မတ်မလီု ဟဒမ်ပန်ထပ်တၟိ စကာမံၚ်ဒၞာဲလွဳလွတ်ယဲကဝ်ဝေဒ်လၟုဟ်ဝွံ မၞိဟ်ယဲ (၁၀၀) တၠဟေၚ် ဒၟံၚ်ဂွံမံၚ်တုဲ အကာဲအရာလၟုဟ်ဝွံ ဖန်ဖက်ပလေဝ်လဝ်ဒၞာဲတၟိ နွံမံၚ်ရောၚ် ဂကောံအလဵုအသဳတွဵုရးဍုၚ်မန် ဝန်ဇၞော်ပရေၚ်မၞိဟ် ဒံက်တာထုၚ်လေန် လလောၚ်တြးလဝ် ပ္ဍဲကဵုမုက်လိက်ပရေၚ်မၞိဟ်ရ။