Tag: ပရိုၚ်

ကေတ်လဝ်တဆိပ် logo တုပ်ကဵုကမ္မဏဳ “Hyundai” ဂှ်တုဲ နကဵုစၟတ်သ္တီကမ္ပနဳညးတအ်ပေၚ်(၅၀)သၞာံဏံ ပံက်ဏာကဵုမာဲကာစှ်ဖ္ဍိုက် နွံမံၚ်ဏောၚ်ဂးတုဲ ပရိုၚ်မုက်လိက်ပတောံမွဲပိုဒ်ဂှ် မံက်ပြတိတ်ကၠုၚ်အကြာညးသုၚ်စောဲ social mediaတအ် ဗွဲမဂတာပ်အခိၚ်ကီုရ။

ပေါဲဗတိုက် အဃောဒှ်လဝ် ပ္ဍဲတွဵုရးဍုၚ်ကရေၚ်၊ ဒပ်(ဥကထရစ်စခန်း)ဂှ် ပ္ဍဲကဵုပေါဲဗတိုက်ဂှ်တှေ် ကံၚ်သဳပၞာန်တအ် ကၠုၚ်ဗတိုက်၊ ပန်ပှော်လဝ်ကဵုက္ၜၚ်ကျာတုဲ အခိၚ်ကာလကၠုၚ်ပန်ပှော်မံၚ်ဂှ် က္ၜၚ်ကျာကဵုဂစေံ ဇီုဒးအာတုဲ က္ၜၚ်ကျာဂှ်လီုလာ်အာဂးတုဲ ဗီုဂှ်ကေတ်နၚ်လဝ် နူဗီုဍုၚ်သအာၚ်တုဲ ညံၚ်ကဵုဒှ်မံၚ်ပ္ဍဲကၟိန်ဍုၚ်ပိုဲတအ်ကီု ပရိုၚ်ဂှ် မံက်ပြတိတ်ကၠုၚ် အကြာညးသုၚ်စောဲ social media တအ်ရ။

ကေတ်လဝ်ဗီုရုပ် ဂကူပတိုဟ် “Dead man’s fingers” တိုန်နူလ္ပာ်ဂြိုပ်ဒေသသၟဝ်ကျာအာမေရိကာကဵု ယူရောပ်(ဥရောပ)တေံဂှ်တုဲ ညံၚ်ကဵုဗတိုဟ်ဟကူဂှ်တိုန်လဝ် ပ္ဍဲလ္ပာ်တွဵုရးဒေသကရေၚ်ဍာဲတအ်ဂှ်ကီု နူကဵုဗီုဂှ်မွဲကဆံၚ် ကၠောန်သ္ပထောံပရိုၚ်ပတောံတုဲ ကလေၚ်ပါ်ပရအ်မံၚ်ညးသ္ကအ် အကြာညးသုၚ်စောဲ မုက်လိက် “Facebook” တအ်ပၠန်ရ။

ကေတ်လဝ်လိက် နူကဵု post ပတိုန်ထ္ၜးလဝ်လက်သဏ်ကိုဒ်ဝေဒ်ပြံၚ် နူသၞာံ ၂၀၂၁ တေံဂှ်တုဲ ညံၚ်ကဵုလိက်လလောၚ်တြး နူရုၚ်ဂဥုဲစူဠာလံၚ်ကောန် ကၟိန်ဍုၚ်သေံဂှ်ကီု ရဲဖန်ဗဒှ်ပရိုၚ်ပတောံတအ် နိဿဲနၚ်လိက်ပရိုၚ်သၞာံတုဲကၠုၚ်တေံတုဲ ပရိုၚ်ဂှ်ကလေၚ်တြးပတိတ်ဒၟံၚ်ပၠန်ရ။ ပရိုၚ်ဂှ်ပြးတိတ်အာတုဲ ညးမွဲကဵုမွဲ ကလေၚ်ပါ်ပရအ်မံၚ်ညးသ္ကက်ဂှ် ဂွံဆဵုကေတ်ရ။

ပ္ဍဲကဵုဂိတုဂျူလာဲ စၟတ်တ္ရဲ ၁၂ တုဲကၠုၚ်တ္ရဲဒ္ဂိုန်ပေၚ်ဂှ် မခတိုဟ် ခတိုဟ်ဒးတုဲ ဒးအာကာ (၈)မ၊ မၞိဟ် ၆၈ တၠ ဒဒုၚ်ချိုတ်အာဂးတုဲ ပရိုၚ်ဂှ်မံက်ဒယှ်ပြးတိတ်ကၠုၚ် အကြာညးသုၚ်စောဲ social mediaတအ် ဗွဲမဂတာပ်အခိၚ်ကီုရ။ ပရိုၚ်ပြးတိတ်ကၠုၚ်မံၚ်ဏံဂှ် ဒှ်မံၚ်ပရိုၚ်အလီမွဲဂှ် ဗွဲကိုပ်ကၠာမိက်ဂွံပတိုန်ထ္ၜးနကီုရ။