Download Guiding star Vol.10, No.13, July.1, 2022
Category: ပရိုၚ်
ပေါဲဗတိုက် အဃောဒှ်လဝ် ပ္ဍဲတွဵုရးဍုၚ်ကရေၚ်၊ ဒပ်(ဥကထရစ်စခန်း)ဂှ် ပ္ဍဲကဵုပေါဲဗတိုက်ဂှ်တှေ် ကံၚ်သဳပၞာန်တအ် ကၠုၚ်ဗတိုက်၊ ပန်ပှော်လဝ်ကဵုက္ၜၚ်ကျာတုဲ အခိၚ်ကာလကၠုၚ်ပန်ပှော်မံၚ်ဂှ် က္ၜၚ်ကျာကဵုဂစေံ ဇီုဒးအာတုဲ က္ၜၚ်ကျာဂှ်လီုလာ်အာဂးတုဲ ဗီုဂှ်ကေတ်နၚ်လဝ် နူဗီုဍုၚ်သအာၚ်တုဲ ညံၚ်ကဵုဒှ်မံၚ်ပ္ဍဲကၟိန်ဍုၚ်ပိုဲတအ်ကီု ပရိုၚ်ဂှ် မံက်ပြတိတ်ကၠုၚ် အကြာညးသုၚ်စောဲ social media တအ်ရ။
ပရိုၚ်ဏံဂှ် နူကဵုအကံက် “Naw Shar” ဂှ်မွဲကဆံၚ် စပတိုန်လဝ်တုဲ သီုကဵုလိက်၊ သီုဗီုဂှ် ကလေၚ်ကာပ်ကာဲထောံပရိုၚ်ဂှ်တုဲ ညးမွဲကဵုမွဲကလေၚ်ပါပရအ်ကၠုၚ်မံၚ်ညးသ္ကအ်ရ။
စပ်ကဵဵုဗီုဏံဂှ်တုဲ နူဂကောံစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဗီုအဃောဒှ်လဝ်ပေါဲဗတိုက် ပ္ဍဲတွဵုရးကရေၚ် ဍုၚ်ဗြဝတဳ (မြဝတီ) ဂှ်ဟွံသေၚ်တုဲ ဒှ်မံၚ်ဗီုနူဍုၚ်သ္အာၚ်မွဲဂှ် ပိုဲစၟတ်သ္တီလဝ်ရ။ မုဟိုတ်ရောဟီုတှေ်ပ္ဍဲသၞာံ ၂၀၁၉၊ ဂိတုအေဗြဴ၊ စၟတ်တ္ရဲ ၁၇ဂှ် ဒပ်ပၞာန်ကျာ Holloman Air Force နူကၟိန်ဍုၚ်အာမေရိကာန် တွဵုရး (နယူးမက္ကဆီကိုပြည်နယ်)တေံ က္ၜၚ်ကျာဂကူ F-16 မွဲခ္ဍာ်ဂှ် ဇီုဒးအာ ကဵုဂစေံလၞေၚ် (သိမ်းဌက်)တုဲ ဗီုပြးတိတ်ကၠုၚ်မံၚ်ဏံဂှ် ဒှ်မံၚ်ဗီုတြေံတြေံ ဗီုနူကၟိန်ဍုၚ်အာမေရိကာန်တေံမွဲဟေၚ်ရ။
ကေတ်လဝ်ဗီုရုပ်နူဍုၚ်သ္အာၚ်တအ်တုဲ တြးပတိတ်မံၚ်ပရိုၚ်ပတောံ ဗီုဗီုဇဏံဂှ် ဍေံပါလုပ်မံၚ် ပ္ဍဲဂကူပရိုၚ်ပတောံတအ်ဖအိုတ်ရ။ ကာလပိုဲတအ်ဆဵုဗီုရုပ်ပတောံဗီုဇဏံမ္ဂး ဗီုပတိုန်လဝ်တအ်ဂှ် ကိတ်မံၚ်ကဵုပရိုၚ်တအ်ဂှ်ရဟာ ဟွံသေၚ်တှေ် ဗီုတြေံတြေံမွဲဟာ ညံၚ်ပိုဲတအ်ဂွံတီမာန်ဂှ် ပိုဲဂၠိုက်ဂၠာဲစၟဳစၟတ်ရံၚ် ပ္ဍဲ“Google Image Search”ကဵု “Reverse Image Search”ဂှ်တှေ်ဗီုတအ်ဏံဂှ်ကၠုၚ်နူလဵု စၟတ်တ္ရဲနူအခိၚ်လဵုဂှ် ဂွံတီကေတ်မာန်ရ။
ဟိုတ်ဂှ်ရ ဆဵုတမ်ရိုဟ်ပရိုၚ်မွဲမွဲမ္ဂး စဳၟစၟတ်ရံၚ်အးအးတုဲ တီကၠးလ္တူပရိုၚ်တအ်မှ ပတှေ်စှေ်ပါ်ပရအ်ညိဂှ်လေဝ် မိက်ဂွံဗတိုက်ဖ္အောဝ်ဏာကီုရ။
Reference>>တွေးပြီးမှယုံ-Think Before You Trust
ကေတ်လဝ်ဗီုရုပ် ဂကူပတိုဟ် “Dead man’s fingers” တိုန်နူလ္ပာ်ဂြိုပ်ဒေသသၟဝ်ကျာအာမေရိကာကဵု ယူရောပ်(ဥရောပ)တေံဂှ်တုဲ ညံၚ်ကဵုဗတိုဟ်ဟကူဂှ်တိုန်လဝ် ပ္ဍဲလ္ပာ်တွဵုရးဒေသကရေၚ်ဍာဲတအ်ဂှ်ကီု နူကဵုဗီုဂှ်မွဲကဆံၚ် ကၠောန်သ္ပထောံပရိုၚ်ပတောံတုဲ ကလေၚ်ပါ်ပရအ်မံၚ်ညးသ္ကအ် အကြာညးသုၚ်စောဲ မုက်လိက် “Facebook” တအ်ပၠန်ရ။
ပရိုၚ်ဏံဂှ်နူကဵု page “Kayan Generation Youth”ဂှ် စတြးပတိတ်လဝ်ဂှ်ဂွံဆဵုကေတ်မာန်တုဲ ပ္ဍဲကဵုpostဂှ်တှေ် “ပတိုဟ်တိုန်နူတွဵုရးကရေၚ်ဍာဲပိုဲတအ်ရ ၜိုန်တမေၚ်တၟဟ်မံၚ်ကီုလေဝ် စိုတ်ဟွံခိုဟ်ရ။ ရံၚ်ကေတ်တှေ်ဒဒုၚ်စသိုၚ် ညံၚ်ကဵုသဂံၚ်တအ် ဟွံဂွံတိတ်ဗၠးနူဘဝပရလိုက်ဂှ်ကီု” သာ်ဝွံ ချူပတိုန်ထ္ၜးလဝ်ပရိုၚ်ဂှ် သာ်ဂှ်ရ။
ပရိုၚ်ဂှ် နူကဵုဂကောံစဳၟစၟတ်ပရိုၚ်ပိုဲတအ် ကလေၚ်ဂၠိုက်ဂၠာဲရံၚ် ပ္ဍဲ “Google Reverse Image Search” ဂှ်တုဲ ဒှ်မံၚ်ဗီုနူဍုၚ်သ္အာၚ်မွဲဂှ် ပိုဲစၟတ်သတီလဝ်ရ။ တုဲပၠန် ရဲကၠောန်ဗဒှ်ပရိုၚ်ပတောံတအ် သုၚ်စောဲလဝ်ဗီုဏံတုဲ ညံၚ်ရဲဗှ်ပရိုၚ်တအ် စိုတ်ဂွံလုပ်စမာန်ဂှ် တံၚ်ဂြာဲလဝ်စိုတ်ညးဗှ်ပရိုၚ်တအ်မွဲဂှ် ချိုတ်ဗၠိုက်မံၚ်ရ။ အခိၚ်လၟုဟ်ဂှ် ပရိုၚ်ညးတအ်ပတိုန်လဝ်ဏံဂှ် ကလေၚ်ဖျေံထောံဂှ် ဂွံတီကေတ်ရ။
ပတိုဟ်ဟကူ “Dead man’s fingers” ဏံဂှ် ဒှ်ဂကူပတိုဟ်တိုန်စ လ္ပာ်ဂြိုပ်ဍုၚ်အာမေရိကာကဵု ဍုၚ်ယူရောပ်တေံဂှ်လေဝ် ပတိုန်ထ္ၜးလဝ်နွံရ။ ဗီုမတိုန်ထ္ၜးလဝ်ကဵဵုပရိုၚ်တအ်ဂှ် ဗီုတွဵုရးဒေသကရေၚ်ဍာဲတအ်ဟွံသေၚ်တုဲ ဒှ်မံၚ်ဗီုနူဍုၚ်သ္အာၚ်တအ်မွဲဟေၚ်ဂှ်ရ ပရိုၚ်ဏံဂှ်တၚ်နၚ်လေဝ် ဟွံခိုၚ်ဂၠိုက်ဂှ်ရ ဒှ်မံၚ်ပရိုၚ်ပတောံမွဲဂှ် ပိုဲစၟတ်သတီလဝ်ကီုရ။
ပုရိသာဒ်ညးမသုၚ်စောဲမံၚ် Social Mediaတအ်လေဝ် ဆဵုတမ်ရိုဟ်ပရိုၚ်မွဲမွဲကဵုဒှ်၊ ဗီုတောဲပတိုန်လဝ်ကဵုပရိုၚ်တအ်ဂှ်ကဵုဒှ် ကာလပိုဲတအ်ဆဵုမ္ဂး ပိုဲလ္ပပတှေ်စှေ်စိုတ်ပြဟ်ဏီညိ။ တုဲပၠန် ဗီုတောဲပတိုန်လဝ်ကဵုပရိုၚ်တအ်ဂှ် ပရောပရာတအ်ဂှ် ဒှ်လဝ်ပ္ဍဲကၟိန်ဍုၚ်ပိုဲတအ်ရဟာ၊ ဗီုနူဍုၚ်သ္အာၚ်ဟာဂှ် စဳၟစၟတ်ရံၚ်ပ္ဍဲ “Google Reverse Image Search”ဂှ်တှေ်အခိၚ်ကီု၊ စၟတ်တ္ရဲတအ်ဂှ် ဂွံတီကေတ်မာန်မံၚ်ဏောၚ်ဂှ်လေဝ် မိက်ဂွံဗတိုက်ဖ္အောဝ်ဏာကဵုကီုရ။
Reference >>တွေးပြီးမှယုံ-Think Before You Trust
ကေတ်လဝ်လိက် နူကဵု post ပတိုန်ထ္ၜးလဝ်လက်သဏ်ကိုဒ်ဝေဒ်ပြံၚ် နူသၞာံ ၂၀၂၁ တေံဂှ်တုဲ ညံၚ်ကဵုလိက်လလောၚ်တြး နူရုၚ်ဂဥုဲစူဠာလံၚ်ကောန် ကၟိန်ဍုၚ်သေံဂှ်ကီု ရဲဖန်ဗဒှ်ပရိုၚ်ပတောံတအ် နိဿဲနၚ်လိက်ပရိုၚ်သၞာံတုဲကၠုၚ်တေံတုဲ ပရိုၚ်ဂှ်ကလေၚ်တြးပတိတ်ဒၟံၚ်ပၠန်ရ။ ပရိုၚ်ဂှ်ပြးတိတ်အာတုဲ ညးမွဲကဵုမွဲ ကလေၚ်ပါ်ပရအ်မံၚ်ညးသ္ကက်ဂှ် ဂွံဆဵုကေတ်ရ။
ပရိုၚ်ဏံဂှ် နူကဵုpage “Health & &Knowledge” ဂှ်မွဲကဆံၚ် တြးပတိတ်လဝ်တုဲ မၞိဟ်ကလေၚ်ပါ်ပရအ်လဝ် ဒဵုကဵုလၟိုဟ် ၄၈၂ တၠ ဒှ်ကၠုၚ်ရ။
စပ်ကဵုပရိုၚ်ဏံတုဲ နူဂကောံစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဒှ်မံၚ်ပရိုၚ်ပတောံမွဲဂှ် ပိုဲစၟတ်သတီလဝ်ကီုရ။ မုဟိုတ်ရောတှေ် မလိက်အတိုၚ်ပါမံၚ်ပ္ဍဲကဵုပရိုၚ်တအ်ဂှ် ကလေၚ်ဂၠိုက်ဂၠာဲရံၚ်တုဲ နူကဵုအကံက် “Phyo Katay” ဂှ်မွဲကဆံၚ် တုဲကၠုၚ်သၞာံ ၂၀၂၁၊ ဂိတုဂျူလာဲ၊ စၟတ်တ္ရဲ ၅ တေံဂှ် ညးတေံကေၚ်ပတိုန်ထ္ၜးလဝ်နွံမံၚ်တုဲ လိက်ဏံဂှ် တုပ်ပ်မံၚ်ကဵုလိက်ညးတေံကီုရ။ စပ်ကဵုလက်သဏ်ယဲကိုဒ်ဝေဒ်ပြံၚ်ကော် BA(4)ကဵု BA(5)ဏံတုဲ နူကဵုရုၚ်ဂဥုဲစူဠာလံၚ်ကောန်ဂှ် ညးတအ်လလောၚ်တြးပတိတ်လဝ်လိက်ဗီုဏံဂှ် ဟွံမွဲဏီရ။
ပရိုၚ်ဒဒှ်တြေံသၞာံတုဲတုဲကၠုၚ်တေံဂှ် ကလေၚ်ထမံက်ထ္ၜးတြးပတိတ်မံၚ်ဗီုဗီုဇဏံဂှ် ရဲသုၚ်စောဲ Social Mediaတအ်လေဝ် မွဲဆေၚ်ခနဒှ်စလေပ်ဂှ် ဂွံဆဵုကေတ်မံၚ်တွဵုရ။
ယဲကပ်တအ်ဂှ် လ္ပာ်ကၟိန်ဍုၚ်သေံတေံ ကလေၚ်ကၠောံထၞာန်သ္ကက်မြဟ်ကၠုၚ်မံၚ်တုဲ၊ ပ္ဍဲကၟိန်ဍုၚ်ပိုဲတအ်လေဝ် မၞိဟ်ကၠောံထၞာန်စမံက်ကၠုၚ်မံၚ်ဂှ်ရ အန္တရာယ်ယဲကပ် စပ်ကဵုလက်သဏ်ယဲကိုဒ်ဝေဒ်ဂကူပြံၚ် ကော် BA (4)ကဵု BA (5)တအ်ဂှ် ထေက်ကဵုဒးစွံသတိရ။
ရံၚ်ကဵုအတိုၚ်ဗွဲလ္တူဏံတုဲ ပုရိသာတ်ညးမဗှ်မံၚ်လိက်ပရိုၚ်တအ်ကီု၊ ညးမသုၚ်စောဲမံၚ် Social Media တအ်လေဝ် ဆဵုတၚ်နၚ်ပရိုၚ်မွဲမွဲမ္ဂး တၚ်နၚ်ပရိုၚ်ဇဂှ် ဒဒှ်ဍာံမံၚ်ရဟာ ဟွံသေၚ်တှေ် တၚ်နၚ်ပရိုၚ်ကလေၚ်နိဿဲလဝ်ဟာဂှ် ဂၠိုက်ဂၠာဲစၟဳစၟတ်ရံၚ်ကဵုအးညိဂှ် မိက်ဂွံဗတိုက်ဖ္အောဝ်ဏာကီုရ။
ပ္ဍဲကဵုဂိတုဂျူလာဲ စၟတ်တ္ရဲ ၁၂ တုဲကၠုၚ်တ္ရဲဒ္ဂိုန်ပေၚ်ဂှ် မခတိုဟ် ခတိုဟ်ဒးတုဲ ဒးအာကာ (၈)မ၊ မၞိဟ် ၆၈ တၠ ဒဒုၚ်ချိုတ်အာဂးတုဲ ပရိုၚ်ဂှ်မံက်ဒယှ်ပြးတိတ်ကၠုၚ် အကြာညးသုၚ်စောဲ social media တအ် ဗွဲမဂတာပ်အခိၚ်ကီုရ။ ပရိုၚ်ပြးတိတ်ကၠုၚ်မံၚ်ဏံဂှ် ဒှ်မံၚ်ပရိုၚ်အလီမွဲဂှ် ဗွဲကိုပ်ကၠာမိက်ဂွံပတိုန်ထ္ၜးနကီုရ။
ဗီုပြၚ်ချူပတိုန်လဝ်ဂှ်တှေ် “ပ္ဍဲတ္ရဲဂိတုပေၚ်ဂှ် မခတိုဟ် ခတိုဟ်လဝ်လ္တူကျာ်လ္ဂုၚ်ဂှ်တုဲ မၞိဟ် ၆၈ တၠ ဒးဒုၚ်ချိုတ်အာ” ဂးတုဲ နူကဵုအကံက် “A161”ဂှ်မွဲကဆံၚ် ညးတေံတြးပတိတ်လဝ်ပရိုၚ်ဂှ် ဗွဲမဂတာပ်အခိၚ်ရ။ ပ္ဍဲကဵုဗီုဂှ်တှေ်ဗီုရုပ်မၞိဟ်တိုန်ကျာ်၊ ဗီုရုပ်မခတိုဟ်ခတိုဟ်လဝ်ဇဂှ် တုဲပၠန် ဗီုရုပ်ကွဳစက်ကာပ္ဍိုက်မၞိဟ်ယဲ(Ambulance) တအ် သီုကဵုဗီုရုပ်ကာပၞာန်တအ်ကီု ပံၚ်ထောံမွဲဗီုတုဲ လ္တူဗီုဂှ်တှေ် “တ္ရဲဂိတုပေၚ်ဂှ် မခတိုဟ် ခတိုဟ်တုဲ မၞိဟ် ၆၈ တၠ ချိုတ်အာတုဲ ကာ ၈ မလီုလိုက်အာ” ဂးတုဲ ချူပတိုန်လဝ် မလိက်လ္တူဗီုဂှ်လေဝ် ဂွံဆဵဵုကေတ်မာန်ရ။
ပရိုၚ်ဂှ် နူကဵုဂကောံစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဒှ်မံၚ်ပရိုၚ်ပတောံမွဲဂှ် ပိုဲစၟဳသ္တီလဝ်ရ။ မုဟိုတ်ဂွံစၟဳသ္တီလဝ်ပရိုၚ်ပတောံမွဲရောဟီုတှေ် ဗီုမခတိုဟ်ဗတိုဟ်တုဲ ပၟတ်တဴမံၚ်အတိုၚ်ပ္ဍဲပရိုၚ်ဏံဂှ်တှေ် ဒှ်မံၚ်ဗီု နူသၞာံ ၂၀၁၆၊ ဂိတုဂျူလာဲ စၟတ်တ္ရဲ ၁၆ဂှ် မခတိုဟ် ခတိုဟ်ဒးလဝ်ကာတအ်ဂှ်တုဲ ဗၠာဲသၟိၚ်(policeman) နူဍုၚ်အီရန်မွဲတၠ အဃောဒးဒုၚ်ချိုတ်အာလဝ်တေံဟေၚ်ရ။ တုဲပၠန်ဗီုမၞိဟ်တိုန်မံၚ်ကျာ် လ္တူကျာ်လ္ဂုၚ်တအ်ဂှ်လေဝ် ဒှ်မံၚ်ဗီု နူသၞာံ၂၀၂၀တေံမွဲဂှ်လေဝ် ဗီုနူတမ်ဏံဂှ်တှေ် ကျောဝ်ကေတ် ပ္ဍဲ “Myanmar Digital News” website ဂှ်တှေ်ဂွံဆဵုကေတ်မာန်ရ။ စပ်ကဵုပရိုၚ် ဒဒှ်ရ မခတိုဟ် ဗတိုဟ်ဒးတုဲ မၞိဟ်ဒးချိုတ်အာ ၆၈တၠဏံဂှ်တှေ် ဌာနပရိုၚ်လုပ်ကဵုသၞောဝ်မွဲလဵုလေဝ် ဟွံဂွံပတိုန်ထ္ၜးလဝ်ဏီရ။ ပရိုၚ်ပြးတိတ်ကၠုၚ်မံၚ်လၟုဟ်ဏံဂှ် တၚ်နၚ်ပရိုၚ်လေဝ် ဟွံဍာံပြ၊ ဗီုတောဲပတိုန်လဝ်တအ်ဂှ်လေဝ် ဒှ်မံၚ်ဗီုနူသၞာံတုဲတုဲတေံဂှ်ရ ပရိုၚ်ဏံဂှ် ဒှ်မံၚ်ပရိုၚ်ဗၠေတ်တ်မွဲဂှ် ပိုဲစၟတ်သ္တီလဝ်ရ။
ဟိုတ်ဒှ်သာ်ဂှ်ရ ဆဵုတမ်ရိုဟ်ပရိုၚ်မွဲမွဲမ္ဂး လ္ပပတှေ်ပါ်ပရအ်ပြဟ်ဏီတုဲ ဗက်အကျောဝ်ရံၚ် နူဌာနပရိုၚ်လုပ်ကဵုသၞောဝ်တအ်ကၠာညိ။ တုဲပၠန် ဗီုတောဲပတိုန်လဝ်ကဵုပရိုၚ်ဇကုဆဵုလဝ်တအ် ဗီုနူသၞာံတုဲတုဲတေံရဟာ၊ ဗီုအခိၚ်လၟုဟ်ရဟာဂှ် ဂၠိုက်ဂၠာဲစၟဳစၟတ်ရံၚ်စၟတ်တ္ရဲဇဂှ် ချိုတ်ချိုတ်ဗၠိုတ်တ်တုဲမှ ပတှေ်စှေ်စိုတ်ပါ်ပရအ်ညိဂှ် မိက်ဂွံဗတိုက်ဖ္အောဝ်ဏာကီုရ။
ရန်တၟံကဵု နူကဵု “City Mart Supermarket”ဂှ် ပေၚ်၂၆ သၞာံတုဲ ကၠာဟွံဂွံစိုပ် ဂိတုဂျူလာဲ၊ စၟတ်တ္ရဲ ၃ ဂှ်မ္ဂးရဲပါ်ပရအ်(share)ကဵုမုက်လိက်ဏံသီုဖအိုတ်ဂှ် နူကဵု “City Mart”ဂှ် ကဵုနပရၚ်တဲတၟေၚ်ထိုၚ်မွဲမရောၚ်ဂးတုဲ ပရိုၚ်ဂှ် မံက်ပြးတိတ်ကၠုၚ် အာအကြာညးသုၚ်စောဲ social mediaတအ်ပၠန်ရ။
ဗီုပြၚ်ချူပတိုန်လဝ်ဂှ်တှေ် “နူကဵု City Mart ပေၚ်၂၆ သၞာံဏံဂှ် ကၠာဟွံဂွံစိုပ် ဂိတုဂျူလာဲ၊ စၟတ်တ္ရဲ ၃ဂှ် ကၠောန်တုဲဒှ်အာတုဲ ညးဘိုၚ်ပါ်ပရအ်(share)လဝ်တအ်သီုဖအိုတ်ဂှ် ပလံၚ်ကဵုနထိုၚ်(အိတ်)အိုတ်ယျ” ဂးတုဲ နူကဵုpage “City Mart Fans”ဂှ်မွဲကဆံၚ် ဗီုပရၚ်တဲတအ်ကီု၊ ဗီုညးအာရာန်ဖျာတအ်ဂှ်ကီု ပတိုန်ထ္ၜးလဝ်ပ္ဍဲကဵဵု pageဂှ် ဂွံဆဵုကေတ်မာန်ရ။ ပရိုၚ်ဂှ်ပြးတိတ်ကၠုၚ်လ္တူလပှ်ကျာတုဲ ပွိုၚ်မွဲတ္ရဲဓရ်ဂှ် ညးကလေၚ်ပါ်ပရအ်မံၚ် လၟိုဟ်ၜိုတ်မွဲလက်ကဵု၃လ္ရီုပြၚ်နွံကၠုၚ်ရ။
ပရိုၚ်ဂှ် နူကဵုဂကောံစၟဳစၟတ်ပရိုၚ် ဒး၊ ဟွံဒး၊ ဒးချပ်ပိုဲတအ် ကလေၚ်စၟဳစၟတ်ရံၚ်တုဲ ဒှ်မံၚ်ပရိုၚ်ဖန်ဇန်ကေတ်လဝ်တုဲ မုက်လိက်ပတောံမွဲဂှ် ပိုဲစၟတ်သမ္တီလဝ်ရ။ မုဟိုတ်ဂွံစၟဳသမ္တီလဝ် မုက်လိက်ပတောံမွဲဂှ်တှေ် “ပရိုၚ်ပြးတိတ်မံၚ် စပ်ကဵု ကဵုပရၚ်တဲတအ်ဂှ် သီုကဵုဟွံလုပ်ကဵုသၞောဝ်မွဲသာ်ကေတ်လဝ်တဆိပ် “City Mart”ညးတအ်တုဲ မုက်လိက်ပတောံမွဲဟေၚ် မုလေဝ်ဟွံဆေၚ်စပ်ကဵုပရေၚ်ကမၠောန် “City Mart Supermarket ကဵဵုCMHL”ပုဟ်ဂှ် နူကဵုpageလုပ်ကဵုသၞောဝ်“City Mart Supermarket”ညးတအ်ဂှ်မွဲကဆံၚ် ကလေၚ်သောၚ်ကလးပတိုန်ထ္ၜးလဝ်နွံရ။ ဟိုတ်ဒှ်သာ်ဂှ်ရပရိုၚ်ဏံဂှ် ဒှ်မံၚ်ပရိုၚ်မုက်လိက်ပတောံမွဲဂှ် ပိုဲစၟတ်သ္တီလဝ်ရ။
ပရိသာတ်ညးမဗှ်မံၚ်လိက်တအ်လေဝ် ဆဵုတမ်ရိုဟ်ပရိုၚ်မွဲမွဲမ္ဂး လ္ပပတှေ်စှေ်စိုတ်ပြဟ်ဏံတုဲ မုက်လိက်ပြးတိတ်ကၠုၚ်မံၚ်တအ်ဂှ် အာဗက်ပကိတ်ပညဳရံၚ် နူကဵုpageလုပ်ကဵုသၞောဝ်ညးတအ် ကၠးကၠးဖ္ဍးဖ္ဍးတုဲမှ ပတှေ်စှေ်စိုတ်ပါ်ပရအ်ညိဂှ် မိက်ဂွံဗတိုက်ဖ္အောဝ်ဏာကီုရ။
မာံသုခ ပတိုန်ထ္ၜးလဝ်ရ။
သၟာန် ။ ။ ယွံမူ မူဂှ် ဒှ်ညးချူဒွက်မွဲတၠလေဝ်ကီု အကြာဏံ သွက်ဂွံထ္ၜးအာနဲကဲ တန်ဗ္တောန်ချူဒွက်လေဝ်နွံမိၚ်မံၚ်ရ၊ ဆက်စပ်တုဲ မိက်ဂွံသၟာန်ဂှ်တှေ် နကဵုညးချူဒွက်မွဲတၠ ပ္ဍဲဂကူမန်ပိုဲ ဂယိုၚ်လမျီုဟွံမာန်ဏီ ဟီုဂးမံၚ်ရ၊ လ္တူဏံ နကဵုမူ ဗီုလဵုညာတ်လဝ်နွံ လဴစကဵုညိ။
သွဟ် ။ ။ ယွံ စပ်ကဵုအ္စာကၞေဟ်ချူဒွက်ဂှ်တှေ် မ္ၚးနူကဵုဂယိုၚ်လမျီုဟွံမာန်ဂှ် ရဲစိုတ်လုပ်စလေဝ် အောန်မံၚ်ဟဂှ်ရ၊ ပ္ဍဲကဵုသွာၚ်အ္စာကၞေဟ်တၟအ်ကွပ်တအ်ဂှ် ဆ္ဂး ဒုၚ်သ္ဇိုၚ်ကဵု ဂွံမၚ်မွဲလွဳပရာလိက်ပတ်တုဲတှေ် ရဲညးဇြိုဟ်နက်ကဵု လိက်ပတ်တအ်ဂှ်တှေ် စိုတ်ညးထတ်မံၚ်ဟဂှ်ရ ညးဂွံကၠောန် အဲညာတ်ကေတ်ဗီုဏံတုဲတှေ် ဆေၚ်ကဵုပရေၚ် ယဝ်ရတၚ်စၟဳစကဵု အ္စာကၞေဟ်ဂှေ်တှ် ဍေံဟွံမွဲပုဟ်၊ ပရေၚ်ပိုန်ဂြပ်ဍေံနွေံတှ် ပရေၚ်ဍုက်ကေဝ် ပရေၚ်ဒဒှေ်ယှ် သွက်ဘဝၜိုတ်ဏံ။
သၟာန် ။ ။ ယွံ မွဲသာ်ပၠန်ဂှ် စပ်ကဵုရဲချူဒွက် ပ္ဍဲကဵုဒွက်မွဲဒွက်ဂှ် ဂလိုၚ်လဵုဒယှ်ဒယှ်အာ နကဵုယၟုညးချူဒွက် ညးဂွံတီဂှ် အောန်မံၚ်၊ လ္တူဏံရော ဗီုလဵုမူညာတ် နွံမံၚ်ကီုရော?
သွဟ် ။ ။ ယွံ ခိုဟ်ကွေံ တၚ်သၟာန်ဏံ၊ ပိုဲနူဍောတ်ဍောတ် အခိၚ်ကတ်လိက်တေံလေဝ် ပိုဲဆဵုရဲအ္စာကၞေဟ်ချူဝတ္ထု ချူဒွက် ချူကဗျ၊ ပရေၚ်စပ်ကဵုချူဏံတှေ် ပရေၚ်သ္ပသမ္တီ ပ္ဍဲကဵုညးဍုၚ်ကွာန် ပုရိသာဒ်ကောန်ဂကူတအ်ဂှ် ညးဟွံသ္ပတီလဝ်ဟွံသေၚ် ညးဟွံတီလဝ် အကာဲအရာဂွံသ္ပသမ္တီ သွက်ရဲချူဂှ်တုဲတှေ် အသိၚ်အလိုန်ဍေံဟွံသၠုၚ်တိုန်၊ ပဵုနူဂှ်တှေ် ပ္ဍဲကဵုခေတ်တဴတက်လၟုဟ်ဏံဂှ် ပရေၚ်သ္ပသမ္တီ သီုဍေံအောန်စှ်အောဏီ၊ ရံၚ်ထံက်ကဵု သၟာဒယှ်ဒွေက်အခိၚ်တေံတှေ် သွာၚ်ဒွက်တှေ် ဗီုအ္စာဇၞူတအ် အ္စာချူဒွက်ပ္ဍဲကဵုမန်ဟီုတှေ် ဨကရာဇ်အ္စာချူရ၊ လ္ၚဵုဂှ်တှေ် အ္စာတၠဗန်တအ် အမ်သဝ်မန် ကောန်ဆာန်မန် ဗညာတၠနာဲတအ် စုၚ်အခိၚ်လျးဟံသာတေံ ဂဳတမန်တေံ၊ သၟာဒယှေ်ဒွက်တိုန်စၚ်ဏောၚ်တှေ် ညးတအ်လဴမံၚ် ညအ်ဂှ်အ္စာကၞေဟ်ယၟုဏံယၟုဏံတုဲ ညးတအ်ဟီုပရူဖျုန်ဒွက်ညိတုဲတှေ် ညးတအ်ဒယှေ်၊ အခိၚ်ပိုဲမိၚ် သော်ဇကုပိုဲစူမံၚ်ဏောၚ် ဒဒှ်ရအ္စာကၞေဟ်လေဝ် ဂွံဒုၚ်စသိုၚ်ပ္ဍဲဒၞာဲဂှ်ကီု၊ ညးတအ်ဍောၚ်ပြေ၊ အခေတ်လၟုဟ်ဏံဂှ် ခေတ်လ္တူလပှ်ကျာလေဝ်နွံ ပရေၚ်ဆက်စၠောံလေဝ်ခိုဟ်ဏောၚ်၊ ဆ္ဂး ရဲအ္စာကၞေဟ်တအ် တၚ်မိပ်မြဟ်ပ္ဍဲစိုတ် ပ္ဍဲက္တောဝ်သောတဏံ ဂွံမိၚ်အောန်မံၚ်ဏောၚ်၊ ဗီုဂှ်တှေ် ပဵုတုဲတှေ် ဍေံဍိုန်စှေ်၊ တၚ်ဍေံဍိုန်ဏံဂှ်ညံၚ်ဂွံဓမံက်ပတိုန်မာန် ညအ်လေဝ် သွက်ဂွံဒးဂ္စါန် အဲညာတ်ကေတ်ဗီုဂှ်။
သၟာန် ။ ။ ယွံ လ္တူအကာဲအရာ ဟီုနူကၠၚ်ဏံတှေ် သွက်ရဲအ္စာကၞေဟ်တၟိတၟိတအ် ဍေံဂွံမံက်တိုန် ညးဝါသနာမံၚ်တအ် ညံၚ်ဂွံမံက်တိုန်သွာၚ်ချူဒွက်ဂၠိုၚ်ဂၠိုၚ်မာန်ဂှ် နကဵုမူ ဗီုလဵုမိက်ဂွံကဵုလညာတ်နွံရော?
သွဟ် ။ ။ နကဵုပူဂဵုအဲတှေ် အဓိကဍေံ အ္စာကၞေဟ်ချူလိက်တအ် လိက်ပရေၚ်ကဵုဒှ် လိက်ဒွက်ကဵုဒှ် ဍေံဂၠိုၚ်တိုန်မှလေဝ် ပရေၚ်သ္ပသုတေသန လက္ကရဴဍေံမံက်ကၠုၚ်ဏောၚ်၊ ဍေံမံက်ကၠုၚ်ဏောၚ်တှေ် ပရေၚ်မၚ်မွဲလိက် ကြက်ရှ်သာမၚ်မွဲအာ လိက်ပတ်ဇကု ဍေံဒှ်ကၠုၚ်ပ္ဍဲမန်ဂၠိုၚ်ဂၠိုၚ်ဏောၚ်၊ ယဝ်ရ အ္စာကၞေဟ် သွာၚ်စုၚ်ချူအောန်မံၚ်ဏောၚ်တှေ် ကြက်လိက်ရှ်သာလိက်တအ် ဍေံအောန်စှေ်ကၠုၚ်ဏောၚ်၊ မုဒှ်ရောတှေ် ချူဏံဂှ် ဍေံဒှ်မံၚ်ဗယာပ်မေတ္တာ ပရေၚ်အာရီု အရၚ်စိုတ်ဓါတ်ဆာန်ဂကူမွဲမွဲဍေံခိုၚ်မံၚ်ဏောၚ်။
ဆေၚ်စပ်ကဵုဒွက်ဏံ အောန်ကွေံကွေံ၊ ဂွံဂွံပံက်တိုန်ပါၚ်တြၚ် အခေါၚ်အရာဆဵုဂဗကဵု အ္စာကၞေဟ်တၟိတၟိ တန်ဗ္တောန်ကီု မုကီုဂှ် အောန်ကွေံကွေံ၊ မုပရောတှေ် ဒွက်ဏံဂှ်ဍေံကၠုၚ်ဗီုပြၚ်လိက်ဇၟန် အကြာကဗျ အကြာလၚ်္ကာဆန် လၚ်္ကာကယျဟ်တအ်ဏောၚ်၊ နဲကဲဍေံချိုတ်ချိုတ်ပၠိုတ်ပၠိုတ် ဗီုပြၚ်ဍေံစှေ်စှေ် အ္စာတမၠာတမၠာတအ်လေဝ် ဖျေံလဝ်ဗီုပြၚ်ချူဂှ်လေဝ် ဍိုက်ဍိုက်ပေၚ်ပေၚ်ဟွံမွဲ၊ ဍေံဟွံမွဲတှေ် ဒှ်မံၚ်အခိုက်ဒတန် လၟုဟ်တှေ် ဒုၚ်သ္ဇိုၚ်ကဵုဝါသနာဏောၚ်၊ ဒုၚ်သ္ဇိုၚ်ကဵုလညာတ်ဏောၚ်၊ ဒုၚ်သ္ဇိုၚ်ကဵုပရေၚ်ဒုၚ်စသိုၚ်ဏောၚ် ချူတဴမံၚ်ညးသ္ကံ ဗီုဂှ်ဏောၚ်တှေ် ဒးဓမံက်ပ္တိုန် အသိၚ်အလိုန်မွဲမွဲဏောၚ်တှေ် ဆေၚ်စပ်ကဵုဒွက် ဒးကသေံကၟဝ် ဒးကဖှ်ပ္တိုန်ရှ် စပ်ကဵုပရေၚ်ဂွံသ္ပသမ္တီ လ္တူအ္စာကၞေဟ်ချူဒွက် အဓိပ္ပါဲဗီုဂှ်ဏး။
သၟာန် ။ ။ အဓိက ညံၚ်အ္စာကၞေဟ်ချူဒွက် ဂွံမံက်တိုန်ဂၠိုၚ်ဂၠိုၚ်မာန်ဂှ် နွံပၟိက်မံၚ် လ္တူပရေၚ်သ္ပသမ္တီ တၟာဂလိုၚ်ဏောၚ် ဗီုဂှ်လေဝ်မူဏး။
သွဟ် ။ ။ ယွံ ဇှ်ဂှ် အဓိက ဇြိုဟ်နက်အိုတ်ရ၊ တန်တဴပ္ဍဲသ္ပသမ္တီဏောၚ် ညးဂွံကၠောန်ကဵုသွာၚ် အ္စာကၞေဟ်ချူဒွက်ဏံဂှ် ဟွံမွဲပုဟ်၊ ညးမွဲဟွံဂွံကၠောန်လဝ်ဏီပုဟ်၊ အခိၚ်ဂဳတမန်ပေၚ် (၃၀) သၞာံ အဲဗက်ဂၠာဲချပ်ကဵု တၠပညာအ္စာကၞေဟ်တအ် ခမဳသၚ်ကျာ်ဇၞော်အ္စာတအ်ဂှ်တုဲ မိက်ဂွံကၠောန်နာဗီုဏံဟီုတုဲ ညးတအ်ဟီုခိုဟ် မိပ်စိုတ် ကိုပ်ကၠာနူညးဟွံဂွံချိုတ်ဏီတှေ် ဒဒှ်ရဂကူညးတအ် သ္ပမံၚ်စၟတ်သမ္တီ နကဵုကၞေဟ် ဒဒှ်ရဒှ်မံၚ်ဂုဏ်ဖဵု အရၚ်ဂကူဏောၚ် နကဵုကၞေဟ်ညးတအ်ဂှ် ချူဓဇက်မံၚ်ဝၚ်ဂကူဏောၚ်၊ ဇှ်ရ ပိုဲကၠောန်ဂွံမွဲအလန်၊ သွာၚ်အ္စာကၞေဟ်ချူဒွက်ဏံဏောၚ်တှေ် အောန်ကွေံကွေံ။
သၟာန် ။ ။ ယွံမူ နကဵုဂလာန်လက္ကရဴအိုတ် မုမိက်ဂွံဗ္ကန်စနွံရော ဟီုကဵုညိကီု။
သွဟ် ။ ။ မိက်ဂွံဗ္ကန်ဂှ်တှေ် ပ္ဍဲကဵုသွာၚ်အ္စာကၞေဟ်ချူဒွက်ဏံလေဝ် ဍေံဒှ်မံၚ်အရၚ်ဒတုဲဖဵု မၚ်မွဲလိက်ပတ် ဒှ်မံၚ်တမ်ရိုဟ် ချူဓဇက်ဝၚ်ဂကူ ဒှ်မံၚ်ပရေၚ်ဗယာပ်မေတ္တာနာနာ အကြာကောန်ဂကူမွဲကဏ္ဍကီုရဏောၚ်၊ ဇှ်ရတှေ် သၟတ်တၟိတအ်ကီု ညးဆာန်ဂကူတအ်ကီု မိက်ဂွံကဵုညာတ်ကေတ် ကြက်ရှ်သာ ပ္ဍဲကဵုအ္စာကၞေဟ်ဏံ ဒှ်မံၚ်တၚ်အဓိက ပ္ဍဲဂကူကီုဏောၚ်၊ မိက်ဂွံကဵုချူတိုန်ဂၠိုၚ်ဂၠိုၚ် အ္စာကၞေဟ်ချူဒွက်မန် မိက်ဂွံကဵုမံက်တိုန်ဂၠိုၚ်ဂၠိုၚ် မိက်ဂွံကဵုကောန်ဂကူတအ် သ္ပကၠုၚ်သမ္တီ လ္တူအ္စာကၞေဟ်တအ်ဂၠိုၚ်ဂၠိုၚ်၊ ပရေၚ်သ္ပသမ္တီဂၠိုၚ်တိုန်မှလေဝ် အ္စာကၞေဟ်မန် ဍိုပ်ဍဴရာၚ်ကဴ ပ္ဍဲဂကူပိုဲ ဂၠိုၚ်ကၠုၚ်ဏောၚ် မိက်ဂွံဗကန်ဆၜိုတ်ဏံရ။
ဌာန်ပရိုၚ်မန် ပ္တိုန်ထ္ၜးလဝ်ရ။
သၟာန် ။ ။ ယၟုအ္စာကီု၊ အ္စာစချဳဓရာၚ်ကၠုၚ် ပ္ဍဲကဵုလိက်တၟံဏံ နွံသာ်လဵုဂှ်လေဝ် လဴထ္ၜးကဵုညိ?
သွဟ် ။ ။ ယွံ ယၟုအဲဂှ် နာဲဗယှေန်ရ။ ချဳဓရာၚ်ကၠုၚ်လိက်တၟံဟီုဂှ် အလန်ပထမဂှ် လုပ်ကၠောန်ကမၠောန် လက်ထက်ရုၚ်အေၚ်္ဂလိက်ရ။ လက္ကရဴဏံ စိုပ်လက်ထက်ဗၟာဂှ် ဍေံပြံၚ်ထောံယၟု (ရှေ႕ဟောၚ်းသုတေသန) ပ္ဍဲကဵုပြံၚ်ထောံယၟုဂှ် နူလက်ထက်အေၚ်္ဂလိက်တံ စပ္တန်ရုၚ်လိက်တၟံဂှ်ရ မန်ပါမံၚ်၊ လိက်မန်ပါမံၚ် လိက်ဗၟာပါမံၚ်၊ လိက်ပါဠိပါမံၚ်၊ လိက်သံသကြိုတ်ပါမံၚ်။ အေဇှ် ဠဍေံပ္တန်လိက်တၟံတၟိတၟိဂှ်ရ။ အေဇှ်တှေ် ဠပိုဲဂတာပ်ဂှ် ရဲကွာန်ထဝ်ပၠၚ် ညးတံကၠောန်ဒၟံၚ်ကမၠောန် ပ္ဍဲရုၚ်ဂှ် နူလက်ထက်အေၚ်္ဂလိက်တေံရ နွံမံၚ်။ တုဲပၠန် စိုပ်လက်ထက်ဏံဂှ် ညးကဆံၚ်တိုန်အာ၊ ဒၞာဲညးဂှ် ညးသ္ပအေန်တာဗျူ၊ အဲလေဝ် လုပ်သှ်တုဲ မၞိဟ်ဇၞော်ပ္ဍဲရုၚ်ဂှ် အဲသှ်လဝ်ဂှ် ညးဒးစိုတ်တုဲ ဒးကၠောန်ကမၠောန် ပ္ဍဲရုၚ်ညးဏောၚ်၊ ရုၚ်ဂှ် ဒးမံၚ်ပ္ဍဲလ္ဂုၚ်ဟွံသေၚ်ပုဟ်၊ ဠသှ်ဂှ် သှ်ပ္ဍဲလ္ဂုၚ်ရ။ ဒးတိုန်ကၠောန်ကမၠောန် ပ္ဍဲကဵု ‘ဝ’ တေံဏောၚ်။ အာမာန်ပိုဲဟီုတုဲ စိုပ်ကၠုၚ်ပ္ဍဲကဵု ‘ဝ’ ရ။ စိုပ်ကၠုၚ် ‘ဝ’ ပ္ဍဲရုၚ်ဂှ်တုဲ မုဒးချူရောဟီုတှေ် ခေတ်ညးတံ ပ္တန်မံၚ်လိက်၊ စပ်ကဵုလိက်မန်ဖအိုတ် ညးတံကဵုချူပ္တိတ်ဏောၚ်၊ နကဵုအမိၚ်သၟိၚ်ဂှ် ကဵုပ္တိတ်လိက်မန်ဏောၚ်။ အ္စာနွံပ္ဍဲရုၚ်တြေံတြေံတေံဂှ် ညးဒးချူလိက်တြေံတြေံ၊ အဲဂှ် ဒးချူလိက် လက်ထက်သၟိၚ်ဓမ္မစေတဳ၊ လိက်တၟံၜါဏံ ချူတုဲဂှ် ညးတံပ္တိတ်ဂှ် “မွန်ကျောက်စာပေါၚ်းချုပ်” ရ။ လက္ကရဴဏံ ပ္ဍဲရုၚ်ဂှ် ပိုဲတံဆက်ကၠောန်မံၚ်ဟဂှ်လေဝ်၊ ဟိုတ်ဒှ်သာ်ဂှ်ရ ကိစ္စပ္ဍဲရုၚ်ဂှ်တှေ် ပိုဲတံတီအာ ဗဟုသုတနာနာရ။ မ္ၚးဂှ် ဟွံမွဲစကွေံပုဟ်။ မၞိဟ်တြေံတြေံတံ တက်ကျာပရောလိက်တၟံဟီုဂှ် တုဲအာမွဲဝါဓဝ်ဟွံသေၚ်ပုဟ်၊ ဍေံကလေၚ်မံက်ကၠုၚ်မံၚ်ရ။ တေံမံက်ကၠုၚ်၊ ဣဏံမံက်ကၠုၚ်၊ အေဂှ်တှေ် ဒးလ္ၚတ်၊ ဒးဗှ်ရ။ အခိၚ်လက်ထက်ပိုဲ လ္ၚတ်မံၚ်တေံဂှ် ပ္ဍဲတက္ကသဵုကီု၊ ရဲလ္ပာ်ပညာလိက်ဟီုဂှ် လိက်မန် လက်ထက်သၟိၚ်မနုဟဝ် ဟွံမွဲပုဟ်၊ ဍာံမံၚ် ဟွံညာတ်ပုဟ်၊ သၟိၚ်မနုဟဝ် ရပ်စပ်မံၚ်ဂှ် ပါဠိကဵု သံသကြိုတ် လိက်ညးဂှ် ဒဵုကဵုလက်ထက်ပိုဲ ဟွံမွဲပုဟ် ဍာံမံၚ်ရ။ ဆဂး ဟွံမွဲပုဟ် ဟဂှ်လေဝ်ဟွံသေၚ်၊ အေဂှ်တှေ် လိက်ဂှ် နွံမံၚ် ဗၠိုက်မံၚ် ဟွံတီပုဟ်၊ အဃောပိုဲနွံမံၚ် ပ္ဍဲဍုၚ် (မိုးကုတ်) ဏံ ကျာ်တြေံမွဲ ညးတံကလေၚ်ပလေဝ်တုဲ အေပ္ဍဲဂှ်မ္ဂး လိက်မန်ပါမံၚ်၊ ဆဵုလိက်မန်ကၠာတေံ ရုပ်ကျာ်တိ၊ ကၠောန်လဝ်ကဵုတိ ဂၠံၚ်စးဂှ် ချူလဝ်ဗီုမန်၊ ကျာ်ဂှ် ကျာ်သၟိၚ်နဝ်ရထာ ညာတ်ကၠုၚ်ရ။ စနူဂှ်တုဲတှေ် မုဒှ်ကၠုၚ်ရောဟီုတှေ် ပရိုၚ်ပြံၚ်ကၠုၚ်ယျ၊ ကၠာတေံဏံ လက်ထက်သၟိၚ်နဝ်ရထာ၊ လိက်မန်ဟွံမွဲပုဟ် ပ္ဍဲရုၚ်တံ သမ္တီလဝ်နွံဗီုဂှ်၊ လၟုဟ် ကလေၚ်မံက်တိုန် လိက်မန်၊ အဲရ မၞိဟ်အာဗှ် အာပ္ဍဲ (မိုးကုတ်) ရံၚ်တုဲ ဒှ်မံၚ်လိက်မန်ရ။ ကပေါတ်ဂှ်တှေ် ကပေါတ်သၟိၚ်အနဝ်ရထာ၊ မုဂွံအာအဓိပ္ပဲါဗီုလဵုရောဟီုတှေ် လက်ထက်သၟိၚ်နဝ်ရထာဏံဂှ် ပါဠိ၊ သံသကြိုတ် ဠကၠာတေံ တီလဝ် ၜိုတ်ဂွံရနွံ၊ လၟုဟ်လိက်မန် သၟိၚ်နဝ်ရထာ ရပ်စမ်မံၚ် အဓိပ္ပဲါမန်တိတ်ကၠုၚ်ရ။ အေဂှ်တှေ် ပိုဲဂွံကတ်တီကၠိုဟ်အာ လိက်မန်သၠုၚ်တိုန်မံၚ်ရ။ တုဲပၠန် လအ်ဟွံလအ် လိက်မန်တံ မံက်တိုန်မံၚ်သိုက်က်ရ။ လက္ကရဴဏံ အဲဇူထောံနူရုၚ်တုဲ ပ္ဍဲကဵုမျေတ်တာဏံ လိက်သၟိၚ် (စောလူမၚ်း) မံက်တိုန်မွဲဝါပၠန်။ လိက်ဂှ် ဗၠိုက်မံၚ်တုဲတှေ် ညးတံကလေၚ်ဂၠိုက်ဂၠာဲဂွံ (၃) သ္ကုတ်၊ (၃) သ္ကုတ်ဂှ် ဗ္ဂပ်ထောံတုဲ အေပ္ဍဲကဵုဗ္ဂပ်ဂှ် မၞိဟ်ဂမၠိုၚ် ကၠုၚ်ဗဵု၊ ၚးတး၊ သၟးတုဲတှေ် လိက်ဂှ်မံက်မံၚ်၊ ပ္ဍဲကဵုလိက်မံက်ဟီုဂှ်တှေ် လိက်မန်လေဝ်ပါ၊ လိက်ပျူလေဝ်ပါ၊ မံက်တိုန်ၜါလ္ပာ်ရ။ မွဲလ္ပာ်ဂှ်မန်၊ မွဲလ္ပာ်ဂှ်ပျူ၊ အခိၚ်ဂှ် အဲဟွံကၠောန်ကမၠောန်ရုၚ်ရ။ ပိုဲဒးရုန်ဂ္စာန် အဆက်လ္ၚတ်မံၚ်ဟဂှ်မှ လိက်မံက်ကၠုၚ်မ္ဂး ဂွံဗှ်ကၠုၚ်မာန်၊ အဲဇူထောံတုဲ လိက်မံက်ကၠုၚ်မ္ဂး ပ္ဍဲရုၚ်ဂှ် ညးတံဗှ်ဟွံမာန်ရ။ လိက်ဏံ ညးတံ ပ္တိုန်ဍုၚ်အိန္ဒိယရ။ နကဵုဍုၚ်အိန္ဒိယပၠန်လေဝ် ကိစ္စလိက်ဏံ ဟိုတ်နူဟွံကၠးတုဲတှေ် ညးတံလေဝ် မုဖျေံသ္ဂုတ်သွာတ်ဟွံဂွံဟဂှ်ရ။ ညးတံဟီု ညးတံကလေၚ်ဖျဴနၚ်အတိုၚ်ဂှ်၊ ဟိုတ်ဂှ်ရ စိုပ်ကၠုၚ်ပ္ဍဲအဲပၠန်ရ။ ပၠးစက္ခူတုဲတှေ် မံက်တိုန်လိက်မန် ဗှ်ဂွံမံၚ်ရ။ ဂၠံၚ်လ္ပာ်မွဲလ္ပာ်ဂှ် ဍေံဟွံကၠးစကွေံပုဟ်၊ ဆဂး မၞိဟ်လ္ၚဵုတံဂှ် ဍေံလ္ၚတ်တုဲ ဍေံဟီုဂှ် ဣညအ်လိက်ဗၟာဏောၚ်၊ လိက်ဗၟာဂှ် အခိၚ်ဂှ်ဟွံမွဲဏီပုဟ်၊ ဆဂးဂှ် ပ္ဍဲကဵုလိက်တၟံဏံ ဍေံ ညာတ်လိက်ဗၟာ ဍေံဟီု၊ လိက်ဗၟာဟီုတှေ် တက္ကသဵုဂှ်ကီု၊ တက္ကသဵုဂၠးတိဂမၠိုၚ် စိုတ်လုပ်စ သၟာန်သၟုဟ်ညးသ္ကံရ။ တုဲပၠန် က္ဍိုပ်မွဲလ္ပာ်ဂှ် သက္ကရာဇ်ကီု၊ မုကီု၊ ဍေံတံဗဒှ်ဝၚ်တုဲတှေ် အေဇှ် မၞိဟ်ဒးစိုတ် ဟီုစဟဂှ်ရ။ တုဲပၠန် လိက်တၟံမန်ဟီုဂှ် သၞာံဗွဲစၟတ်ကဵုညးတံ ကဵုပိုဲလၟုဟ်တှေ် ခြာၜိုတ်ဗၞတ် (၁၀၀၀) လ္ၚီသၞာံရ။ အရေဝ်ဗီုပိုဲလၟုဟ် ပိုဲကၠိုဟ်စဝါတ်ညိ၊ လက်ထက်ညးတံ ဟီုအရေဝ်ဍိုန်ဍောတ်မံၚ်ဏောၚ်၊ ရမျှာၚ်အခိၚ်တေံကဵု အခိၚ်လၟုဟ် လေဝ် ဍေံဟွံတုပ်စကွေံပုဟ်၊ လိက်ခေတ်ပိုဲလၟုဟ်ဂှ် ပိုဲရဗှ်ဂွံ၊ လိက်ခေတ်ပိုဲဏံဂှ် အာဗှ်လိက်ခေတ်ညးတံတှေ် ဟွံလ္ၚတ်လဝ်ပုဟ်တှေ် ဗှ်ဟွံဂွံ၊ ဟွံတီရ။ ဟိုတ်ဂှ်ရ လၟုဟ်ဏံ ရဲကတ်မံၚ်လိက်တံဂှ် စိုတ်ဇကု ဒးလဝ်စိုတ် ခေတ်ဗီုပိုဲဏံဟွံသေၚ်ပုဟ်၊ ဇကုလ္ၚတ်မံၚ် လိက်ခေတ်တေံတှေ် ဇကုဒးစွံစိုတ်ဗီုတေံကီု ဒးလ္ၚတ်ဗီုဂှ်ကီုမှ ကိစ္စလိက်ဏံ ဇြိုဟ်ဟ်နက်က် ပိုဲကၠိုဟ်တီကေတ်မာန်ရောၚ် မိက်ဂွံဟီုဗ္ကန် ဆၜိုတ်ဏံရ။
မာံရဲထဝ်
တၞံတဵု ကေုာံ သတ်တဵုမ္ဂးဂှ် ………
ဘာသာမန် = တၞံတဵု၊ သတ်တဵု၊ ဘာသာဗၟာ = သစ်တိုပၚ်၊ သစ်တိုသီး၊ ဘာသာသေံ(ထိုၚ်) =ကရဓန်၊ ဘာသာၚ်္ဂလိက် = Santol၊ ယၟုရုက္ခဗေဒ = Sandoricum koetjape၊ ဒေသမူလဂှ် ဒေသအေန်ဒဝ်ချိုၚ်ဏာ၊ သဳရိလကာၚ်္၊ အိန္ဒိယျ၊ သၟဝ်ကျာအဝ်သတေလဳယျာ ကေုာံ တ္ကအ်သေဝ်ယှေ (ဆေးရှဲကွျန်းစု) ဒှ်တုဲ ပ္ဍဲကၟိန်ဍုၚ်ဗၟာဏံမ္ဂး တွဵုရးဍုၚ်မန်၊ တွဵုရးဍုၚ်ကရေၚ်၊ တွဵုရးဍုၚ်ရခေၚ် ကေုာံ ဒေသဇၞော်ရးတၞၚ်သဳ ဗွဲမဂၠိုၚ် အလဵုဍေံကဵုဍေံ ကၠုတ်တိုန်ဒၟံၚ်နွံတုဲ တၠကၠအ်လ္ၚဵုဂှ် တဵုလဝ်လေဝ်နွံရ။ အခိၚ်ပြဟ်ပြဟ်ဏံမ္ဂး သတ်တဵုဂမၠိုၚ်ဂှ် ကၠောန်ပလေဝ်လဝ်ဒဒှ်စၞစတုဲ အပ္ဍဲဍုၚ် ကေုာံ ဍုၚ်သၟာၚ်ကီု သွက်ဂွံသွံစမာန်ဂှ် တၠကၠအ်တံဂလိုၚ်တဵုဒၟံၚ် ဂကူတၞံတဵုမၞုံကဵုဍာ်ဒကေဝ်ခိုဟ်ဂှ်အိုတ်ရောၚ်။
ဂကူသတ်တဵုဂမၠိုၚ် ……….
ဂကူတၞံတဵုဂှ် ဒှ်ဂကူတၞံဆုအယုက်ဂၠိၚ်မွဲဂကူတုဲ ဖျုန်ဆု (သစ်သား) ဂှ် ဟိုတ်နူဒှ်ဂကူဖျုန်ဆုပရံၚ်တုဲ စကာဒၟံၚ် ပ္ဍဲကာနာနာသာ်အိုတ်ရ။ စပ်ကဵုလၟိဟ်သတ်တဵု သတ်တိတ်မာန်ဂှ် တန်တဴလ္တူအဝယ်တၞံအာယုက်ဇၞော်၊ အာယုက်ဍောတ် (အဝယ်တၞံဇၞော် အဝယ်တၞံဍောတ်) ရ။ အဝယ်တၞံဍောတ်မ္ဂး သတ်အောန်တုဲ အဝယ်တၞံဇၞော်မ္ဂး လၟိဟ်သတ်ဂၠိုၚ်ရ။ ဂကူသတ်တဵု (ဂကူဒေသဂမၠိုၚ်ဂှ် ဗွဲမဂၠိုၚ် အဝယ်သတ်ဍောတ်) တုဲ ဖျုန်ကြဳ၊ မခ္ဍန်ဍေံ ဇၞော်ရ။ ဂကူသတ်တဵုရုဲစှ်လဝ် (သၞဴလဝ်မဗဳဇ) (မျိုးစပ်) ဂှ် တၠကၠအ်တံ ကော်ဒၟံၚ် သတ်တဵုသေံ (ကရဓန်ဗွေဖိုၚ်) ဂှ် အဝယ်သတ်ဍေံဇၞော်တုဲ ဖျုန်တီုရ။ ရှ်သာဂကူသတ်တဵုဒေသဂှ် ဖျးကေက်တုဲ ဖျတ်ဒၟံၚ်ညိညရ။ ဂကူ သတ်တဵုကရဓန်ဗွေဖိုၚ်ဂှ် ဖျုန်ဖေါဝ် (ပွပြီး) တုဲ ရှ်ဍာတ်ဂၠိုၚ်၊ လ္ၚဵုဂှ် ဍာတ်ဍာတ်ဖျးဖျးဒှ်ဒၟံၚ်ရောၚ်။ အခိၚ်လၟုဟ်ဏံ တၠကၠအ်တံဂလိုၚ်တဵုဒၟံၚ် ဂကူတၞံတဵု (ကရဓန်ဗွေဖိုၚ်) လၟိဟ်ဂၠိုၚ်ရ။ အရံၚ်သာ်သတ်တဵုဂှ် ဗွဲအပြောံမ္ဂး နွံတဴအရံၚ်သာ်ဗကေတ် ကေုာံ အရံၚ်သာ်မိတ်ဒှ်ရောၚ်ဂှ် သ္ဂောံဆဵုကေတ်မာန်ရ။
ဥတုရာသဳ ကေုာံ ဂကူတိ (ဂတှေ်ရှ်တိ) ………….
တၞံတဵုဂှ် ဒှ်ဂကူတၞံအာယုက်ဂၠိၚ်မွဲဂကူတုဲ အကာဲအရာဥတုရာသဳဂမ္တဴတုဲ ဒှ်ဒၟံၚ်ဓါတ်ဍုက်ဍေက်နွံဒၟံၚ်ဂှ် ဒးဂၞပ်ဂၠိုၚ်ရ။ တၞံတဵုဝွံ နူဗလးဍာ်ၜဳဂှ် သၠုၚ်တိုန်အာဗၞတ် (၃၀၀၀) ပေဒှ်ကီုလေဝ် တၞံဒှ် (တၞံကၠုတ်တိုန်) မာန်ဏီရ။ တၞံတဵုဝွံ ဒၞာဲဂတှေ်ရှ်တိခိုဟ်တုဲ ဒေသဂွံဗြဲဂၠိုၚ်ဂှ် သာတုဲတၞံကတဵုဒှ်ခိုဟ်မာန်တုဲ သၟာၚ်နူဂှ် ၜိုန်ရဒှ်ဒေသကှ်သဍဟ်ဒၟံၚ်ကီု လေဝ် တၞံတဵုဂှ် ကတဵုဒှ် (ဂျိုၚ်တဴ) မာန်ဏီရ။ ပ္ဍဲကၟိန်ဍုၚ်ဗၟာမ္ဂး ဒေသ္ကုတ်သၟဝ် မဒှ်ဒေသရးဇၞော်ဗဂေါ၊ တွဵုရးဍုၚ်မန် ၊တွဵုရးဍုၚ်ကရေၚ်၊ တွဵုရးဍုၚ်ရခေၚ် ကေုာံ ဒေသဇၞော်ရးတၞၚ်သဳ ဂမၠိုၚ်ဂှ် (အလဵုဍေံကဵုဍေံကၠုတ်တိုန်) ကတဵုဒှ်ဒၟံၚ်ရောၚ်ဂှ် သ္ဂောံဆဵုကေတ်မာန်ရ။
လက္ချန်တၞံတဵု ကေုာံ သတ်တဵု ………..
သတ်တဵုဂှ် ဗွဲမဂၠိုၚ် သ္ဂောံဆဵုကေတ် နကဵုအရံၚ်သာ်ဗကေတ် ကေုာံ အရံၚ်သာ်မိတ်ရဂၠိုၚ်တုဲ တန်တဴလ္တူဂကူသတ်တဵုတုဲ ဖျုန်တီု ကေုာံ ဖျုန်ကြဳနွံတဴရ။ ဖျုန်သတ်တဵုနွံသၟဝ်ခၞော်သတ်တဵုဂှ် ဒှ်ဖျုန်တဵု သွက်ဂွံစမာန်ဒှ်ရ။ သၟဝ်ခၞော်သတ်တဵု မဒှ်ဖျုန်သတ်တဵုဂှ် ရှ်ဍေံဍာတ်၊ ဖျး၊ ဖျတ်တုဲ အရံၚ်မဍေံသာ်ဍီုဂှ် နွံဒၟံၚ်လဒေါဝ်သတ်တဵုဂှ်ရ။ တဝ်တၞးမွဲမွဲတဝ်ဂှ် တၞးပိတၞးနွံတုဲ တၞုၚ်တၞးဂှ် နွံအရံၚ်သာ်ၚေက် လ္ပာ်တမ်တၞးဂှ် နွံအရံၚ်သာ်ၚေက်ၜတ်ၜတ်ရ။ ပ္ကဴတဵုဂှ် ဒှ်ပ္ကဴအဝယ်ဍောတ်ဍောတ်တုဲ အရံၚ်သာ်မိတ်ၜတ်ၜတ်ဒှ်ဒၟံၚ်ရ။ ပ္ကဴဂှ် ကဴတုဲ စိုပ်အခိၚ်ဂိတုအေဗရဴ၊ မေ၊ ဂျောန်ဂှ် သတ်ခတဲဍောတ်ဍောတ် စတိတ်ကၠုၚ်ရ။ သတ်တဵုဂှ် ဗွဲမဂၠိုၚ်ခ္ဍမ်ဒၟံၚ်တုဲ သတ်လ္ၚဵုဂှ် ခ္ဍမ်တုဲ လ္ပါ်လ္တူဂှ် ဂၠိၚ်တိတ်ဒၟံၚ်ကီုရ။ အဝယ်သတ်တဵုဍောတ်ဍောတ်ဂှ် တုပ်တဴညံၚ်ရဴသတ်ပ္ကဴ၊ ဗီုသတ်လၚ်ကာကီုရ။ တၞံတဵုဂှ် ဒှ်ဂကူတၞံဆုပရံၚ် ကေုာံ တၞံဂှ် ဒှ်ဂကူတၞံအာယုက်ဂၠိၚ်မွဲဂကူတုဲ တၞံဇၞော်ဇၞော်ဂှ် နွံဒၟံၚ်သၠုၚ်တၞံ ဗၞတ် (၅၀) ပေ၊ စဵုကဵု (၁၅၀) ပေ နွံမာန်ရ။
ကၠောန်တိပလေဝ်တိ …………
အခါရရုဲတိ တဵုတၞံသတ်တဵုမ္ဂး ဒၞာဲတိတဵုတၞံတဵုဂှ် ဗွဲကိုပ်ကၠာ ဒးသၟးထောံတၞံရာပ်၊ တၞံချောဲ ကေုာံ တၞံဟွံဒှ်ဖဵုဂမၠိုၚ်ဂှ် ဒးၚးတးထောံဖအိုတ်ရ။ တိသွက်ဂွံဖေါဝ်ဂရုဒၟံၚ်ကီု သီုမချောဲ (မြက်မျိုးစေ့များ) ဂမၠိုၚ် ညံၚ်ဟွံကလေၚ်ကၠုတ်တိုန်ပၠန်ဂှ် ဒးထောဲတိ၊ ဒးဇိက်တိဂှ် ချိုတ်ချိုတ်ပၠိုတ်ပၠိုတ်ရ။ ကမၠောန်ကၠောန်ပလေဝ်တိဂှ် ကၠာနူဟွံစိုပ်အခိၚ်ကသီုဏီဂှ် ဒ္စးဒုၚ်တုဲကၠောန်လဝ်ထေက်ရ။ ၜံက်ကတိုၚ်တဵုတၞံတဵုမ္ဂး ဗွိုက်ကတိုၚ် (ပါၚ်ကတိုၚ်) ကေုာံ လျိုဟ်ကတိုၚ်ဂှ် ဒးစွံအာ (၂၀ၝောံတဲx၂၀ၝောံတဲx၂၀ၝောံတဲ) ရ။ ပ္ဍဲကတိုၚ်ဂှ် ဝဲါသဘာဝနာနာသာ် ဒးစုတ်ကဵု လျိုၚ် (၂၀) ကဳလဝ်တုဲ ဒးကၠောန်ပလေဝ်လဝ်ကဵု တိသွက်ဂွံတဵုတၞံရ။
တဵုတၞံဂမၠိုၚ် ………..
တၞံတဵုပလုန်လဝ်တၞံဂှ် ဂွံအာယုက်တၞံ (၁) သၞာံမ္ဂး တဵုတၞံဂွံမာန်ရ။ အခါတဵုတၞံတဵုမ္ဂး မွဲတၞံကဵုမွဲတၞံ ဒးခြာၜံက်အာကတိုၚ်တဵု (၂၀-ပေ) လေဝ်ဂွံတုဲ ဟွံသေၚ်မ္ဂး ခြာၜံက်အာကတိုၚ် (၂၅-ပေ) တုဲ တဵုအာလေဝ်ဂွံကီုရ။ ပ္ဍဲမွဲဨကဂှ် ယဝ်တဵုသၞောတ် (၂၀) ပေမ္ဂး ဂွံတၞံ (၁၀၈) တၞံတုဲ ယဝ်တဵုအာသၞောတ် (၂၅) ပေမ္ဂး ဂွံတၞံ (၆၉) တၞံရ။ တဵုနူမ (ပလုန်မတုဲတဵု) မ္ဂး လအ်ဂွံ (၅) သၞာံ (၇) သၞာံတုဲမှ စသတ်မာန်ရ။ ဂကူတၞံတဵုလ္ၚဵုဂှ် ပ္ဍဲပွိုၚ် (၃-၄) သၞာံဟေၚ်ဂှ် စသတ်လေဝ်နွံရ။ တန်လဝ်ကၞာၚ်၊ ဆက်လဝ်ကၞာၚ်ဂမၠိုၚ်ဂှ် ပ္ဍဲပွိုၚ် (၂-၃) သၞာံဟေၚ် စသတ်မာန်ရောၚ်ဂှ် သ္ဂောံဆဵုကေတ်ရ။
စုတ်ကဵုဝဲါနာနာသာ် …………
အခိၚ်တဵုတၞံတေံဂှ် ပ္ဍဲကတိုၚ်တဵုဂှ် ဟိုတ်နူဗပေၚ်စုတ်လဝ်ကဵု ဝဲါသဘာဝနာနာသာ်ရောၚ်ဒှ်တုဲ တဵုတၞံတုဲ သွက်တၞံဂွံဖောအ်ဗြေတဴတက်ခိုဟ်ဂှ် မ္ဒးစုတ်ကဵုဝါဓါတ် ပ္ဍဲမွဲသၞာံဂှ်ၜါဝါရ။ ဂကူဝဲါဓါတ် (N) ဂှ် ဒးစုတ်ကဵု ဂကူဝါဲယူရဳယျာ၊ ဂကူဝါဲအမဝ်နဳယာမ်သာလာဖိက်ရ။ မွဲတၞံဂှ် လျိုၚ် (၁၀၀) ဂရာမ် စဵုကဵု (၅၀၀) ဂရာမ် (၀.၁ kg, ၀.၅ kg) မွဲသၞာံၜါဝါ စုတ်ကဵုထေက်ရ။ ဒးစုတ်ကဵု ပ္ဍဲတိ ပ္ဍဲပွဳဗွိုၚ်တၞံဂှ်ရ။ တဵုတၞံတုဲ ဂွံမွဲဂိတုဂှ် မွဲဝါ၊ ဂွံတြဴဂိတုဂှ် မွဲဝါပၠန် စုတ်ကဵုဝါဲဓါတ်မာန်ရ။ တၞံတဵု စိုပ်ကၠုၚ်အခိၚ်သတ်တဵု သတ်တိတ်မ္ဂး တၞံတဵုမွဲတၞံဂှ် ဒးစုတ်ကဵု ဝါဲဓါတ်ယူရဳယျာ ကေုာံ ဝါဲဓါတ်ပဝ်တိတ် ဂကူဝါဲဓါတ်ၜါဂကူဏံသၞဴတုဲ မွဲတၞံမ္ဂး ဝါဲဓါတ် လျိုၚ် (၃၀၀) ဂရာမ်၊ (၅၀၀) ဂရာမ် ဒးစုတ်ကဵုရ။
ကၠောန်ပ္တိတ်တၞံသွက်တဵု၊ ပလုမ်ပ္တိတ်တၞံနူမ ကေုာံ နူတၞံ၊ ကၞာၚ်ဂမၠိုၚ်မာန် ………….
နူမတဵု (သစ်တိုစေ့) ကီု နူတန်လဝ်ကၞာၚ်၊ ဆက်လဝ်တၞံကၞာၚ်ကီု၊ စုတ်မတ်တုဲ ဂွံကၠုၚ်တၞံဂမၠိုၚ်ဂှ် ဆက်တဵုအာ ပ္ဍဲကၠအ်တေံမာန်ကီုရ။ နူတၞံ ဆက်ကၞာၚ်၊ တၞံတန်ကၞာၚ်ဂမၠိုၚ်ဂှ် တၠကၠအ်တံ ကလေၚ်တဵုဂၠိုၚ်ရ။
အခိၚ်ပလှ်သတ် ကေုာံ လၟိဟ်သတ်တိတ်မာန် ပ္ဍဲမွဲတၞံ ………….
အခိၚ်သတ်တဵုကြံၚ်ဍုဟ်ဂှ် ဒှ်အခိၚ်ဂိတုမေ၊ စဵုကဵုစိုပ်ဂိတုအံက်တဝ်ဗာရ။ အရံၚ်သာ်ခၞော်သတ်တဵုဂှ် ဒှ်အရံၚ်သာ်မိတ်ကြံၚ်ကြံၚ်မ္ဂး ဒှ်အဝယ်ကြံၚ်ဍုဟ်တုဲ အခိၚ်ဂှ် ပလှ်ကေတ်သတ်တဵုဂမၠိုၚ်ဂှ်မာန်ရ။ တၞံတဵုအဝယ်ဇၞော် မွဲမွဲတၞံမ္ဂး သတ်တိတ်ဒၟံၚ်လၟိဟ်ဗွဲမဂၠိုၚ် သ္ဂောံဆဵုကေတ်မာန်ရ။ တၞံတဵု စိုပ်အဝယ်သတ် (တၞံဇၞော်) မွဲတၞံ ပ္ဍဲမွဲသၞာံဂှ် လၟိဟ်သတ်တဵု (၁၅၀၀၀) မ စဵုကဵု ( ၂၀၀၀၀) မ သတ်တိတ်မာန်ရ။
စၟစၟန်ဂမၠိုၚ် လုပ်ပလီုပ္ဍဲသတ်တဵု …………..
ပ္ဍဲသတ်တဵုဂှ် တန်တဴလ္တူအကာဲအရာနာနာသာ်တုဲ ဂကူစၟစၟန်နာနာသာ် လုပ်ပလီုပလာ်ဒှ်မာန်ကီုရ။ ဂကူစၟပလီုသတ်တဵုဂှ် နွံတဴဂကူဗွဲမဂၠိုၚ်ကီုလေဝ် ကြမ်အိုတ်ဂှ် ဒှ်ဂကူစၟရုဲစုတ်သတ် (သီးထိုးယၚ်) ရ။ သွက်ဂွံစဵုဒၞာအာ စၟရုဲစုတ်သတ်ဂှ် ၜိုန်ရဂဥုဲဓါတုနွံတဴဗွဲမဂၠိုၚ်ကီုလေဝ် ဟိုတ်နူဒှ်ဘဲဂၠိုၚ် သွက်ညးစသတ်တဵုတံနွံတုဲ နဲစဵုဒၞာကဵု စက္ခူ ကေုာံ ထိုၚ်ပလာတ်သတိတ်ဂှ် ဒှ်နဲခိုဟ်အိုတ်တုဲ တၠကၠအ်တံ ဒှ်နဲစကာဂၠိုၚ်အိုတ်ရ။ သတ်တဵုဂှ် ဂွဳကဵုစက္ခူ မွဲထပ် (ဒုၚ်ကဵုစက္ခူမွဲထပ်) တုဲ မ္ၚးဂှ် ကလေၚ်ပြိုက်စုတ်ကဵု ထိုၚ်ပလာတ်သတိတ်ဂှ်ပၠန်ရ။ ဗီုသဏ္ဍန်စဵုဒၞာဒၟံၚ်စၟ ပ္ဍဲသတ်လၚ်ကာ၊ သတ်ကြုက်ဂှ်ကီုရ။
သတ်တဵုဂှ် သ္ဂောံစကာအာ နကဵုစၞစနာနာသာ် ………….
သတ်တဵုဂှ် ဗွဲမဂၠိုၚ်စကာဒၟံၚ် (စဒၟံၚ်) ဒဒှ်စၞစ၊ ပ္ဍဲဒေသဍုၚ်ဒိုဟ်အဂၞဲအေယှဂမၠိုၚ် (အရှေ႕တောၚ်အာရှနိုၚ်ၚံများ) ဂှ် ဒှ်ဂၠိုၚ်အိုတ်ရ။ ဍုၚ်ပလိုတ်ဂမၠိုၚ်တေံဂှ် နူတၞံဍေံ၊ နူရိုဟ်ဍေံ၊ နူသတ်ဍေံဂှ် စကာဒၟံၚ် ပ္ဍဲအရာကၠောန်ဂဥုဲ၊ ကၠောန်ယိုဟ် ကေုာံ ကၠောန်ဂျေဲလဳ ဒဒှ်စၞစဝေၚ် (သရေစာအဖြစ်) ဂၠိုၚ်ရ။ ပ္ဍဲကၟိန်ဍုၚ်ဗၟာဏံဂှ် သတ်တဵုတုၚ်၊ သတ်တဵုဗ္စး၊ သတ်တဵုဂွပ်၊ သတ်တဵုကှ်ကှ် ကၠောန်တုဲ စအိုတ်ရ။ ဂကူသတ်တဵု ပ္ဍဲဒေသဂမၠိုၚ်ဝွံ ဒှ်ဂကူသတ်တဵု အဝယ်ဍောတ်သောဲတုဲ ရှ်ဖျးဂၠိုၚ် ၊ရှ်ဖျတ်နွံဂၠိုၚ်ရ။ ဂကူမန်တံ ဗ္စးသတ်တဵုဂှ် သၞဴဍုန်ကဵုဖျုန်၊ သၞဴဍုန်ကဵုၚုဲ၊ ကတုဲ လေပ်စအိုတ်ရ။ ဂကူသတ်တဵုဒေသဂှ် သံက်ခၞော်တုဲ ၜံက်ကဵုမြတုဲ သၞဴစုတ်ၜဵု ပ္ဍဵုစုတ်ပ္ဍဲစှေ်၊ ပ္ဍဲဂြဳတုဲ စွံလဝ်ကၠိုဟ်သၞာံမာန်ရ။ ဂကူသတ်တဵုသေံ (ကရဓန်ဗွေဖိုၚ်) ဂှ် အခါကြံၚ်ခိုဟ်မ္ဂး သံက်ခၞော်တုဲ ရေက်ကြဳကြဳ စဲပကှ်လဝ်ကှ်ကှ်တုဲ တၠကၠအ်သေံ(ထိုၚ်)တံ သွံဒၟံၚ် ဒဒှ်အပေါတ်သွံဍုၚ်သၟာၚ်(ပြည်ပပို႕ကုန်)အိုတ်ရောၚ်။
ဝဏ္ဏမာန်၊ ဂိတုဇှေ် (၁၁) စွေက်
စပ်ကဵုပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ဟိုတ်နူအကာဲအရာခိုဟ် အခိၚ်ဒး ကျာဒးတုဲ ချူကၠုၚ်လိက်ပရေၚ်ဆဝ်မ္ၚုဟ် လၟေၚ်အဆက်ဆက်ရ။ သတ္တဟဏံလေဝ် ရန်ကဵု ဂွံနွံကဵုပရေၚ်ပလေဝ်ပလေတ် ပ္ဍဲဂကူမန်တုဲ ထပ်ချူပတိုန်ထ္ၜးဏာ ဒဒှ်ဆက်စပ်ဗွဲလက္ကရဴဏံ မွဲပိုဒ်ပၠန်ရ။
ပ္ဍဲဂကူမန် သွက်ဂွံပြုပြေၚ်ဆန်ၜန် လၟေၚ်ကမၠောန်ပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ် ကမ္မတဳရေၚ်တၠုၚ် (ဝါ) ကမ္မတဳရေၚ်တၠုၚ်ပရေၚ်ဗ္တောန်လိက်မန် ပ္ဍဲဘာတန် ဒးနွံမွဲဂကောံထေက်ရောၚ် စှေ်စိုတ်ရ။
ဗီုကဵုဌာနပရေၚ်ပညာကောန်ဂကူမန်၊ ဗီုပြၚ်ကမ္မတဳပရေၚ်ပညာကောန်ဂကူမန် ပြေၚ်ရေၚ်လဝ်လၟေၚ်ကမၠောန် အလုံမွဲစက်ယန်ကမၠောန်အိုတ်သီု ဂွံဆန်ၜန်ပြုပြေၚ်အာ ပရေၚ်အ္စာဘာ၊ ပရေၚ်ဗ္တောန်၊ ပရေၚ်ပတိုန်ထ္ၜး အကြာ အ္စာတအ်ကဵု ဌာနပရေၚ်ပညာ (အလဵုအသဳ)၊ ပရေၚ်ပညဳပညပ် အကြာဂကောံလိက်ပတ်ယေန်သၞာၚ်မန်ကဵု အကြာအလဵုအသဳ စတမ် သွက်ဒးဆန်ၜန်ပြုပြေၚ်အာ လၟေၚ်ကမၠောန်သွာၚ်ဇဳသာ်ရ။
ပြဟ်ဟ်ဏံ ဒှ်ဒၟံၚ်ပရေၚ်ခက်ခုဲဇၞော်ဇၞော်မွဲတၚ်ဂှ် ပ္ဍဲကဵုဘာဗ္တောန်လိက်မန် ဘာတန်အလဵုအသဳဂှ် လိက်ဗွဟ်ဗ္တောန်ဟွံမွဲတုဲ ဂွံဗ္တောန်လိက်ဂှ် ဒှ်ဒၟံၚ်ပရေၚ်ခက်ခုဲဇၞော်ဇၞော်မွဲရ၊ ကိစ္စဏံ ဂကောံလဵုကေတ်တာလျိုၚ်တုဲ ဂွံပတိုန်ထ္ၜးကဵု စၞးအ္စာတအ်ဂှ် ယုတ်ဒေက်ဒၟံၚ်ရ။
အကာဲအရာခိုဟ်ညိဂှ် တုဲကၠုၚ်မေ (၂၃-၂၅) ဂှ် စပ်ကဵုပရေၚ်ဗ္တောန်လိက်မန် ပ္ဍဲဘာတန်အလဵုအသဳဂှ် သဳကၠဳလဝ်နွံတုဲ တန်မူလ၊ တန်လ္ဒောဝ် သွက်ဂွံဖျေံဗီုဗ္တောန်ဂှ် သဳကၠဳလဝ်နွံရ၊ ဟိုတ်နူအသိၚ်အလိုန်ဏံတုဲ လိက်စၞောန်နူကဵုဌာနဝန် ဇၞော် ပရေၚ်ပညာအလဵုအသဳတအ် စပ်ကဵုခါန်ကၞက်အ္စာဘာတအ်ကီု၊ စပ်ကဵုဘာမိက်ဂွံဗ္တောန်လိက်မန်တအ်ဂှ်ကီု ဌာနပရေၚ်ပညာတအ် ပတိတ်ကၠုၚ်လိက်ရ။
တ္ၚဲဆဵုဂဗသဳကၠဳ ဂကောံဆက်စၠောံဗမံက်ရုပ်ရဴ ဂကောံပံၚ်ကောံဂကူမန် ဂျောန် (၂၃) ဂှ်လေဝ် ဗော်ဍုၚ်မန်တၟိကီု၊ ဗော်ညဳသၟဟ်မန်ကီု၊ သွာၚ်ဂကောံမဟာဇန်ကီု သဳကၠဳစပ်ကဵုပရေၚ်ဗ္တောန်လိက်မန် ပ္ဍဲဘာတန်တုဲ သွာၚ်ကဆံၚ်လ္တူကဏ္ဍသဳကၠဳကဵု အလဵုအသဳ ဌာနမဆေၚ်စပ်တအ်ဂှ် ဗော်ပရေၚ်ဍုၚ်ကွာန်တအ်သဳကၠဳ၊ ကာလပရေၚ်ကမၠောန်စှေ်ကၠုၚ် ဒးဗမံက်ရုပ်ရဴ စပ်ကဵုဒးချူခၞံလိက်ဗွဟ်ဗ္တောန်ကီု၊ ဂွံရေၚ်တၠုၚ်ဆက်စၠောံ အကြာအိုတ်သီုတအ်ကီု ပ္ဍဲဂကောံလိက်ပတ်ယေန်သၞာၚ်ဂှ် ဒးပခိုၚ်ပလေဝ်လဝ်ဒတုဲဒတုဲရောၚ်ဂှ် သဳကၠဳလဝ်ရ။
ရံၚ်ကေတ်လၟုဟ်မ္ဂး ညးက္ဍိုက်ဍိုပ်ဂကောံဗ္တောန်လိက်ပတ်မန် ဥတုကညၚ်လ္ၚဵုတအ်ရ ရေၚ်တၠုၚ်ချဳဒရာၚ်ဒၟံၚ်နွံရ။ ဆ ဂး အလုံမွဲစက်ယန်ကမၠောန်ဂွံဂေတ်ဖအိုတ်ဂှ် ပ္ဍဲဂကူမန် ဂကောံဖန်ဇန်ကောပ်ကာဲ ဗွဲမစှေ်ကဵုသၞောတ်မွဲ ဟွံမွဲဏီရ။
စပ်ကဵုလိက်ဗွဟ်ဂှ် ချူခၞံလဝ် သွက်တန်မူလ တုဲဒှ်အာရ။ ယဝ်ရအခေါၚ်စှေ်ကၠုၚ်မ္ဂး သွက်တန်လ္ဒောဝ်ဂှ် ဒးချူခၞံပၠန်ရ။ အတိုၚ်က္ဍိုပ်သ္ကိုပ်ဗော်ဍုၚ်မန်တၟိတအ် သဳကၠဳတက်ကျာ ကုကံၚ်ဇြဳပၞာန်တအ်မ္ဂး သွက်ဂွံဗမံက်ရုပ်ရဴသောဲသောဲဗြောဲ ဗြောဲဂှ် ဒးဆက်သဳကၠဳအာမံၚ်ဏီရ။
“ပ္ဍဲကွာန်ပိုဲ လၟိဟ်ကွးဘာပေၚ်မံၚ်ဖိုဟ် ပိုဲဟီုအာပတိုန်ထ္ၜးကဵု အ္စာဘာကေတ်လဝ်တာလျိုၚ်ဂအုပ်ဘာဂှ် ညးဟွံကဵုအ ခေါၚ်ဗ္တောန်ပုဟ်၊ ပိုဲဒှ်မံၚ်ခက်ခုဲဇၞော်ဇၞော် ရဲကွာန်ပိုဲကီု ကောန်ကွးဘာတအ်ကီု မိက်ဂွံဗ္တောန်လိက်မန် အိုတ်အစောန်၊ ဆဂး အ္စာဘာဂအုပ်ဘာဂှ် ညးဟွံကဵုအခေါၚ်တုဲတှေ် ပိုဲဂွံပတိုန်ထ္ၜးကဵုညးဂှ်လေဝ် ကေတ်ဟွံဒး” အ္စာ ဘာဗ္တောန်ဒၟံၚ်လိက်ဥတုကညၚ် ကွာန်ကြုၚ်စိၚ် (ကရပ်ဍုၚ်မတ်တၟ) မွဲတၠ ဟီုရ။
တုပ်သာ်ဂှ်ကီု ပရေၚ်တၚ်ခက်ခုဲ ပရေၚ်တၚ်ဆိုအ်ဗ ပ္ဍဲအရာပရေၚ်ကမၠောန်ဗ္တောန်လိက်မန် ပ္ဍဲဘာတန်အလဵုအသဳဂှ် အ္စာဘာတအ် ဘာကွာန်တအ် ဒှ်ဒၟံၚ်ပရေၚ်တၚ်ခက်ခုဲနွံနာနာသာ်ရ။
“အ္စာပ္ဍဲဒေသပိုဲလေဝ်ဟဂှ်ရ အ္စာတအ်ဒှ်မံၚ်ပရေၚ်ခက်ခုဲယျေယျေ ပရေၚ်ဗ္တောန်လိက်ကီု၊ ပရေၚ်ဂွံခါန်ကၞက်အ္စာကီု ဂွံအာကဵုညးဂှ်လေဝ်ဟွံတီပုဟ်၊ အာကဵုအ္စာဘာ ဘာအလဵုအသဳတအ်လေဝ် ဟွံပြေပြံၚ်ပုဟ်၊ ညးတအ်ဟီုတှေ် တာလျိုၚ်ညးတအ်ဟွံသေၚ် ဆေၚ်ကဵုဂကောံလိက်ပတ်ဏောၚ် ညးတအ်ဟီု၊ ဆေၚ်ကဵုလိက်ပတ်တှေ် အာကဵုလိက်ပတ်ကဆံၚ်ပွိုၚ်ဍုၚ် ညးတအ်လေဝ် ပသောၚ်ကဵုဟွံမာန် ပိုဲခက်မံၚ်ဖိုဟ်” ညးဘိုၚ်ရေၚ်တၠုၚ်ပရေၚ်ဗ္တောန်လိက်မန် ပ္ဍဲဘာတန်ပွိုၚ်ဍုၚ်ကျာ်မြဟ်မွဲတၠ ဟီုရ။
စိုပ်အခိၚ်ဗ္တောန်လိက်ဏံ လိက်ဗွဟ် လိက်သွက်ဂွံဗ္တောန်ဟွံမွဲ အရာဏံ ဒှ်တၚ်ခက်ခုဲဇၞော်ဇၞော်မွဲရ၊ တုဲပၠန် ပရေၚ်ဗ္တောန်ပါ်ပရအ်အခိၚ် မွဲဘာသာဂှ် မွဲဘာကဵုမွဲဘာ မွဲကွာန်ကဵုမွဲကွာန် မွဲဒေသကဵုမွဲဒေသ ဟွံတုပ်ညး သ္ကအ်အိုတ်ရ။ ပရေၚ်ပါ်ကဆံၚ် အကြာအ္စာဘာအလဵုအသဳတအ်ကဵု အ္စာဗ္တောန်လိက်မန်တအ်လေဝ် ဒေသလ္ၚဵုနွံရ။
ဘာလ္ၚဵုဂှ် ပြဟ်လဝ်အခိၚ်ကၠာဟွံကော်ဘာ နူဂယး (၈) နာဍဳနွံ၊ ဘာလ္ၚဵုဂှ်ပၠန် အခိၚ်(၃) နာဍဳတုဲ ဗ္တောန်လေဝ်နွံ ဗီုပြၚ်နာနာသာ် တၚ်ဆိုအ်ဗနွံရ။
သွက်ဂွံဗ္တောန်အာ လိက်ဘာကောန်ဍုၚ်အရၚ်တအ်ဂှ် နူကဵုအလဵုအသဳတုဲတုဲကၠုၚ်တေံ ခါန်ကၞက်လဝ် အ္စာဘာဗ္တောန်လိက်ကောန်ဍုၚ်အရၚ် နွံၜါဗီုရ။
ၜါဗီုဟီုဂှ် အ္စာဘာ/အ္စာဗြဴ ဗ္တောန်လိက်ကောန်ဍုၚ်အရၚ် နကဵုၚုဟ်ကမၠောန်တ္ၚဲ ကဵုသြန်ဂိတု ဗတ်ဗၟာပေၚ်ပေၚ်မ္ဂး (တိုၚ်းရၚ်းသားဘာသာစကားစာပေသၚ်ကြားမည့် နေ႕စား လပေး ဆရာ/ဆရာ မများ) (Teaching Assistant – TA) ဂှ် ပွိုၚ်မွဲတ္ၚဲဂှ် ဇၟာပ်ဘာသာဗ္တောန်ဒၟံၚ်ဂှ် စတမ်နူလိက်ဗွဟ်ဗၟာ၊ လိက်သချာၚ်္၊ လိက်ပထဝဳ သိပ္ပံအိုတ်သီုဂှ် ဒးကေတ်တာလျိုၚ်ကၠာဲနကဵုဘာသာမန်ရ။
မွဲပၠန်ဂှ် အ္စာဘာ/အ္စာဗ္တောန်လိက်အရေဝ်ဘာသာကောန်ဍုၚ်အရၚ် (တိုၚ်းရၚ်းသားစာပေဘာသာစကား သၚ်ကြား မည့် ဆရာ/ဆရာမများ) (Language Teacher – LT) ဒးဗ္တောန်ကေတ်တာလျိုၚ် ပ္ဍဲမွဲတ္ၚဲ မွဲအခိၚ်မွဲဘာသာဟေၚ် ဒးဗ္တောန်ရ။
ခရိတ်အ္စာဘာ/အ္စာဘာဗြဴ ကေတ်တာလျိုၚ်ဗ္တောန်လိက်အရေဝ်ဘာသာကောန်ဍုၚ်အရၚ် နကဵုၚုဟ်ကမၠောန်တ္ၚဲကဵု သြန်ဂိတု (နေ႕စားလပေး) (Teaching Assistant – TA) ဂှ် မွဲဂိတု (၁၃၀၀၀၀) မွဲကိုဋ်ကဵုပိလက်ဒကေဝ် ဂွံဒုၚ်စ သိုၚ်တုဲ၊ အ္စာဘာ/အ္စာဗြဴဗ္တောန်လိက်ဘာသာမန် မွဲအခိၚ်မွဲဘာသာ (Language Teacher – LT) ဂှ် မွဲဂိတု (၆) လက် ဂွံဒုၚ်စသိုၚ်ရ။
စရာဲဍာ်ဒကေဝ်အ္စာဘာ/အ္စာဗြဴ ဗ္တောန်လိက်ဘာသာကောန်ဍုၚ်အရၚ်ဂှ် အံၚ်လဝ် (၉) တန်တုဲ သၟဝ်အာယုက် (၃၀) ဒးဒှ်ရ။
ပ္ဍဲကဵုဘာအလဵုအသဳမွဲမွဲဘာဂှ် လၟိဟ်ကွးဘာဗ္တောန်လိက်မန်ပေၚ် (၂၀) တၠမ္ဂး အခေါၚ်ဗ္တောန်လိက်မန်နွံရ။ နကဵုဗၞတ် ဗ္ၜတ်အလဵုအသဳမ္ဂး ကောန်ကွးဘာလၟိဟ် (၄၀) တၠမ္ဂး ဂွံအခေါၚ်ခါန်ကၞက်အ္စာဘာ/အ္စာဗြဴဗ္တောန်လိက်မန် (၁) တၠနွံရ။ ပ္ဍဲကဵုဘာမွဲဘာဂှ် တန်ပထမ၊ တန်ဒုတိယ၊ တန်တတိယ ပံၚ်တန်သီုဖအိုတ်ပေၚ် (၂၀) တၠမ္ဂး အခေါၚ်ဗ္တောန်လိက်မန်နွံရ။
အကာဲအရာဗ္တောန်လိက်မန်ဂှ် နူကဵုဂွံလဝ်အခေါၚ် KG+5 ဂှ် နူကဵုဗော်ဍုၚ်မန်တၟိ အာဆဵုလဝ်ကဵု ကံၚ်ဇြဳပၞာန်တုဲ (+7 , + 9) သွက်ဂွံဆက်သဳကၠဳအာ တုဲကၠုၚ်မွဲၜါတ္ၚဲဂှ် လိက်တိတ်ကၠုၚ်မွဲတၞးပၠန်ရ။ အဓိပ္ပဲါဂှ် သွက်ဂွံဗ္တောန်အာ လိက်ဘာ သာမန်တန်လဒေါဝ်ဂှ် သွက်ဒးဆက်သဳကၠဳအာနွံရ။
ဂိတုဂျောန် (၉) တုဲကၠုၚ်ဏံဂှ် နူကဵုဌာနဝန်ဇၞော် ပရေၚ်ကောန်ဍုၚ်အရၚ် ပလံၚ်ဗစိုပ်လဝ်လိက် ကုကမ္မတဳ လိက်ပတ်ယေန်သၞာၚ်မန် တွဵုရးဍုၚ်မန် (မန်၊ ကရေၚ်၊ ပအိုဝ်) ဂှ် ဘာနွံပၟိက် မိက်ဂွံဗ္တောန်လိက်ဘာသာကောန်ဍုၚ် အရၚ်နွံမ္ဂး ဂိတုဂျောန် (၂၆) လက္ကရဴအိုတ် ညံၚ်ဂွံပတိုန်ဗစိုပ်လိက် ရုၚ်ဌာနကောန်ဍုၚ်အရၚ်ရ။
ဆက်ဂှ်တုဲ ဂိတုဂျောန် (၂၀) ဂှ် နူကဵုဌာနဝန်ဇၞော်ကောန်ဍုၚ်အရၚ် ပလံၚ်ဗစိုပ်လိက် ကုကမ္မတဳလိက်ပတ်ယေန် သၞာၚ်မန် တွဵုရးဍုၚ်မန်ဂှ် ဂိတုဂျောန် (၃၀) စွံလက္ကရဴအိုတ် ရဲနွံပၟိက် မိက်ဂွံသ္ပအ္စာဘာ/အ္စာဗြဴ ဗ္တောန်လိက်ဘာသာ ကောန်ဍုၚ်အရၚ်မ္ဂး အတိုၚ်တၞးဗပေၚ်ဂှ် ဗပေၚ်တုဲ ညံၚ်ဂွံပ္တိုန် လိက်စၞောန်တိတ်ကၠုၚ်နွံရ။
အခိၚ်ဗော်ပရေၚ်ဍုၚ်ကွာန်မန်တအ် ဂွံအခေါၚ်သဳကၠဳ ကုအလဵုအသဳကံၚ်ဇြဳပၞာန်တအ်ဏံဂှ် ပ္ဍဲမန်တအ်လေဝ် ဂကောံကေတ်တာလျိုၚ်ရေၚ်တၠုၚ်ကောပ်ကာဲ သွာၚ်ဗ္တောန်လိက်မန်ပ္ဍဲဘာတန် ဒးဖန်ဇန်ပလေဝ်ပလေတ်လဝ်ထေက်ရောၚ် ပတိုန်ထ္ၜးရ။
