ဂကောံလိုန်ကွဳလိုန် Green Bike သီုမချဳဒၟံၚ် ပရေၚ်သဘာဝပွဳပွူဂှ် ညးတံလုပ် သီုကွာန်အၚ်ဒၚ် ဒေသဖာလိန် ပွိုၚ်ဍုၚ်ရေဝ် တွဵုရးမန် ဒၞါဲဒးဒုၚ်ရန်လဝ် သွက်ဂွံသိုၚ်ပ္တန် ရုၚ်စက်ပၟတ်ဓါတ်လလဳ မစကာ စၞပရက်တၟံချး ဂှ်ဏောၚ်တုဲ စိုပ်အဂှ်မ္ဂး ညးတံ ဟီုဓရီုတက်ကျာ သဳကၠဳပရူ သဘာဝပွဳပွူ ကုရဲဒေသတံကီုဏောၚ်ဂှ်လေဝ် ဘုံမျာတ်ဟာန် နူဂကောံကွဳလိုန်ဂှ် ဟီုရ။
ကောံဓရီုလၟေၚ် မရနုက်ကဵု (၁၃) ဝါ မဒှ်ကောံဓရီု အလန်လက္ကရဴအိုတ် သွက်ကၠတ်ထဝ်တွဵုရးမန် အလန်ပထမတေံဂှ် ကၠောန်သ္ပ တုဲဒှ်အာ ပ္ဍဲစၟတ်တ္ၚဲ ဂျာန္နဝါရဳ
ပ္ဍဲစၟတ်တ္ၚဲ ဇာန္နဝါရဳ ၂၆ အ္ခိၚ်သဝ်တ္ၚဲ (၆)နာဍဳ ကၠောန်သ္ပဏာ ပေါဲရုဲစှ်မိသၟာကျေဝ် (မိယေန်သၞာၚ်) Miss Mon State 2016 ပ္ဍဲၝောံခန်တွဵုရးမန် ဍုၚ်မတ်မလီုဂှ်တုဲ ဇြေန်ရတဳလေန် (ကော်) ဇြေန်မာဝေန် ကောန်ဍုၚ် ကျာ်ထဝ် က္လိဂွံဏာ ၝောံကိုဋ် ဗြကၞေၚ် ဂွံတီကေတ်ရ။
အပ္ဍဲတွဵုရးဍုၚ်မန် ကွာန်မၞုံဒၟံၚ်သကုတ်သၠုၚ်ကျာ ပွိုၚ်ဍုၚ်မုဟ်ဍုၚ်တံဂှ် ပရေၚ်ရုဲစှ်ညးအုပ်ဓုပ်ကွာန်တၟိ တုဲဒှ်အာ ကီုလေဝ် ကွာန်လ္ၚဵုလ္ၚဵုတံဂှ် ပရေၚ်ဟွံတုပ်စိုတ် လတူရုဲစှ်လဝ်ညးအုပ်ဓုပ်ကွာန်တံနွံဒၟံၚ်တုဲ ကိစ္စက္လေၚ်ပတိုန် လိက် ကုရုၚ်ဌာနအုပ်ဓုပ်ပွိုၚ်ဍုၚ်တံနွံမံၚ်ရောၚ် ဂွံတီကေတ်ရ။
သၟိက်မိက်ဂွံယိုက်ဒိုက် ယဵုဂုန် တၠပညာလိက်ပတ်မန် ကေုာံ ကျာ်ဇၞော်အ္စာကၞေဟ်ဒယှ်ဒယှ် ချူဗဒှ်ကၠုၚ် လိက်ပတ်ဝၚ်မန်တံဂှ်တုဲ သိုၚ်ပ္တန်တိုက်ဗှ်လိက် ကေုာံ တိုက်ထ်ၜးပျး လိက်ပတ်ဝၚ်မန်တြေံတြဟ် ပ္ဍဲဍုၚ်ကၟာဝက် ဏောၚ် ဂွံတီကေတ် နူဒကာဂမၠိုၚ်ရ။
နူကဵုစၟတ်သမ္တီတ္ၚဲကဵုဒါန်ဆီဂကူမန် မရနုက်ကဵု (၆) ဝါဏံတုဲ အလုံဂကူမန် ညံၚ်ဂွံပါလုပ်ချဳဓရာၚ်အာ ကဆံၚ် ကောန်ဂကူမာန်ဂှ် ညးက္ဍိုက်ပ် ဂကောံ ရာမညလောဟိတတံ ဆဝ်ဗ္ၚုဟ်မံၚ်ရောၚ်။
ပ္ဍဲသၞာံဗ္တောန်ပညာ (၂၀၁၆-၁၇) ဏံ သွက်ဂွံဗ္တောန်အာလိက်မန် ပ္ဍဲဘာသ္ဇိုၚ်တန်မူလအလဵုသဳ နဍာ်ဒ္ကေဝ် စိုပ်ပ်မာန် ရန်တၟံတုဲ နူကဵုကဝ်မတဳချူဓဇက် ဇုတ်ဓရံၚ်လိက်ဗွဟ်မန် (မွန်စာသၚ်ရိုးညွန်းတမ်း ပြုစုရေး ကော်မတီ) တအ် သ္ကိုပ်သ္ကကဵုမံၚ်တန်ဗ္တောန် နဲကဲဗ္တောန်လိက်မန် ကုအ္စာဗ္တောန်ဒၟံၚ်လိက်မန် အပ္ဍဲဘာ အလဵုအသဳ လၟိဟ် (၄၀၀) တၠရောၚ် ဂွံတီကေတ်ရ။
ပ္ဍဲတွဵုရးဍုၚ်မန် ညးစၞးအလံၚ်အမာတ် စရာဲဍာ်ဒ္ကေဝ်လီု (၅) တၠဂှ် နူဗော်ကောန်ဂကူမန် ပါလုပ်မွဲတၠရောၚ် ဂွံတီ ကေတ် နူရုၚ်ကဝ်မယှေန်ပါ် တွဵုရးဍုၚ်မန်ရ။
ဒဒှ်ရ ဟွံမွဲပၟိက်၊ ဟွံဒးဂၞပ်ကဵု ကုရုၚ်စက်တၟံချး ကေုာံ ကမ္ပနဳတဝ်ယဝ်ထာဲ (Toyo-Thai Corporation Public Company Limited – TTCL) ရဂှ် ပ္ဍဲဇာန္နဝါရဳ ၂၄ ပ္ဍဲဒေသဖာလိန် ပွိုၚ်ဍုၚ်ရေဝ် တွဵုရးမန်တေံ ပစူပ္တိုန် တၞးဗီု ဗဳနာၚ်ပဝ်သတာရ ဂွံတီကေတ်။
ဥတုဇကလာပ်ရုပ်ကျာ်ဇၞော်ဘာဂြိုပ်ဝၚ်စိၚ် (ကျောက်တလုံး) ဘဒ္ဒန္တကေသရမဟာထေရ်ဂှ် စပ္တံနူဂိတုမေ (၃၁) သၞာံ၂၀၁၄ တေံ ဖျေံလဝ်ဘာနိဗ္ဗာန်ယာယဳတုဲ တုဲကၠုၚ်ဂိတုဂျာန်နဝါရဳ (၂၄) ဂှ် ဂကောံဒါယကာတအ်ကီု၊ ဂကောံဝန်ဇၞော်တွဵုရးဍုၚ်မန်တအ်ကီု သွက် ဂွံလ္ၚောဝ်သ္ပပူဇဴမာန် ပဆုဲပြံၚ်စွံပ္တန်အာ ပ္ဍဲကဵုဇြပ်သဘၚ်ဓဝ်ဘူမိရာဇာ ပွိုၚ် (၁၀) တ္ၚဲပၠန်ရောၚ် ဂွံတီကေတ်ရ။