မွဲဒမြိပ်ဂၠံၚ်နူကွာန်ကလအ် စဵုဍုၚ်ခေါဇာ ဂၠံၚ်ဂွံသၠဲတိုန်ဂးတုဲ နူကဵုအလဵုအသဳ၊ ဌာနကၠောန်ဂၠံၚ်ညးဍုၚ်ကွာန် (ပြည်သူ့ ဆောက်လုပ်ရေး) တံ က္ဍိုပ်တိဝါဗ္ၚ ညးဍုၚ်ကွာန် မၞုံမံၚ်သ္ကဲဂၠံၚ် (၂) လ္ပာ်တံ တုက်လဝ်တိကၠအ်ဗွဲမဂၠိုၚ်တုဲ ညးဒေသ ဒးဒုၚ်ဆောံလေၚ်မံၚ်တိကၠအ်တံဂှ် မိက်ဂွံဂွံမံၚ်ၚ္ၚုဟ်လေဲရောၚ် ဟီုဂးမံၚ်အိုတ်ရ။
ကမ္ပနဳ June Cement Industry LDT ဂွံလဝ်အခေါၚ် နူဂကောံကမ္မယှေန် ဗလိုက်တံကၟိန်ဍုၚ်ဗၟာတုဲ သွက်ဂွံသိုၚ်ပ္တန် ရုၚ်စက်တိဗိလာတ် ပ္ဍဲဂတှေ်ဒဵုသာဲ ဇရေၚ် ကွာန်မွဲဂြဝ်-ကအ်ဒုန် ကအ်ပၞဟ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ရပ်ဒၟံၚ်ကမၠောန် အရၚ်ဂွံသိုၚ်ပ္တန်ရုၚ်စက်ဣရတုဲ ရုၚ်စက်ဏအ်ဂေတ်မ္ဂး မွဲတ္ၚဲတှေ် ပ္တိတ်တိဗိလာတ် ဗၞတ် ၅၀၀၀ တာန်ကီုဏောၚ်ဂှ် ဂွံတီကေတ် နူကောန်ကမၠောန် ကမ္ပနဳဂှ်ရ။
အပေါတ်စသုၚ် ကဵု ဂဥုဲဇဗ အယုက်အိုတ်တ် ဟွံမွဲကဵုအခေါၚ် မသီဂွံ နူဆေၚ်ဖျာဂမၠိုၚ် ပွိုၚ်ဍုၚ်မတ်မလီုဂှ် ပ္ဍဲဂိတုမေ (၄) မံက် စံၚ်ပၠေၚ်ထောံ ပ္ဍဲသုသာန် ကုန်သှုဲဇာ ပွိုၚ်ဍုၚ်ကျာ်မြဟ်ရ။
ပ္ဍဲဂိတုအေဗရဴ (၂၆) ပယာံနူဂယး ၜိုတ် (၈) နာဍဳ ရပ်ဂွံဂဥုဲၜူမာဲ ကေုာံလက်နက် မပ္တံလေအ်ဒုက် ၜုန် မြသ္ဇၚ် မခတိုဟ် လွဟ်ကျာ ပ္ဍဲကွာန်အစေန် ပွိုၚ်ဍုၚ်ရေဝ် တွဵုရးဍုၚ်မန်ရဣၚုဟ် ဂွံတီကေတ် နူဒပ်ကောံ မလၞိန်ဗပိန်ပရေၚ်ဂဥုဲၜူမာဲ ကၟိန်ဍုၚ်ဗၟာ လၟေန်ဂၞန်ဒပ် (၃၉) (ရေဝ်) ရ။
“ပြဟ်ဟ်ဏအ် အဲစၟဳစၟတ် သၟာန်သၟုက်မံၚ် ကောန်ဒုဟ်တအ်ဂှ်ဖိုဟ်ရ။ဆ္ဂး အဆက်နွံဗီုလဵုရောဂှ် ဗက်ဒတောဝ်အဆက် ဟွံတုဲဏီ” ရဂှ် ဒုသ္ကိုပ်ဗၠာဲသၟိၚ်တာန်ဇြဝ် မဒှ်သ္ကိုပ်ဒပ်ကောံ မလၞိန်ဗပိန်ပရေၚ်ဂဥုဲၜူမာဲဂှ် ဂးရ။
“မၞိဟ်ဒးဒုၚ်ရပ်ဏာလၟုဟ်တအ်ဂှ် ဒှ်မၞိဟ်သီုသွံ သီုနိဿဲဂဥုဲရ ပိုဲဂွံတီလဝ်။ ကွာန်အစေန်ပိုဲဏအ် ပ္ဍဲပွိုၚ် ရ/၈ သၞာံဏအ် ကိစ္စဂဥုဲၜူမာဲ ပြးဂၠိုၚ်ကၠုၚ်တၟာဂလိုၚ်ရ။ စနူကောန်ကွးဘာ ရ/၈ တန်ဂှ် စကာလေပ်အာအိုတ်ယျ” သာ်ဝွံ ဥုကိုဝ်နာၚ်ၚ် ၝောံမၞိဟ်ကွာန်အစေန် ဂးရ။
ဗီုဏအ်ကီု ပ္ဍဲဂိတုရအဗရဴ (၁၀) တုဲကၠုၚ်ဏအ်ဂှ်လေဝ် ဒပ်ကောံ (၃၉) (ရေဝ်) ဏအ်ရ ရပ်ဂွံဂဥုဲချေံ (၁၂၀) မ ပ္ဍဲသ္ၚိဥုဌေလှာၚ် ကွာန်ကအ်ချ မလုပ်အဝေါၚ်ဂအုံကွာန်ကအ်ဍောတ် အပိုၚ်ဗၠာဲသၟိၚ် ဍုၚ်လၟိုၚ် ပွိုၚ်ဍုၚ်ရေဝ်ဂှ်ကီုရ ဂွံတီကေတ်။
အစဳအဇန် ရုၚ်စက်တိဗုတ်မတ်မလီု MCL မဗဂေတ်စက် နပွမစံၚ်ဗဂဵုချးတၟအ်ဂှ် ဗဒိုအ်ကဵုညိ သာ်ဝွံ ကောန်ဒေသ (၃၇၈၀) တၠ နူကဵုကွာန် (၇) ကွာန်တအ် ထ္ပက်စၟတ်တဲဒ္စဵုဒ္စးတုဲ ပ္တိုန်ထ်ၜး အာတ်မိက်လဝ် ကုသ္ကိုပ်ဝန်ဇၞော် တွဵုရးဍုၚ်မန် ကေုာံ သမ္မတကၟိန်ဍုၚ်ရောၚ် ဂွံတီကေတ်ရ။
ပ္ဍဲတွဵုရးဍုၚ်မန်ဝွံ ကွာန်လ္ၚဵုလ္ၚဵု မကြပ်ဒၟံၚ်ကဵုဒေသ ဍာ်ဖၞုၚ်ဂှ် မွဲတဲလေဝ် ဗြဲဟွံဂူစှေ်ဏီဂှ်ရ ဒးဆဵုဒၟံၚ်ဘဲဝါတ်ဍာ်ဏောၚ် ဂွံတီကေတ် နူဌာနက္ဍိုက်ပ်ပရေၚ်ဖေါအ်ဗြေဝ် ဒေသကွာန်ရး ရ။
ပ္ဍဲတွဵုရးဍုၚ်မန်ဝွံ သီုဟွံစိုပ်ကာလ အတးသၚ်္ကြာန်ဏီ ပပ္တံနူ ဂိတုမာတ် (၁၆) ဒဵုကဵု ဂိတုအေဗရဴ (၅) မံက်ဂှ် ရပ်ဂွံလဝ် ကွဳယာန်ဂမၠိုၚ် ဟွံဒ္ဂေတ်ဗက်သၞောဝ် ဗၞတ် (၅၂၆) မတုဲရဂှ် ဂွံတီကေတ် နူရုၚ်သ္ကိုပ်ဗၠာဲသၟိၚ် တွဵုရးဍုၚ်မန်ရ။
သွက်ကောန်ဇာတ်ကေုာံ သမ္ဘာ ညးဒးဒုၚ်ပန်လဝ် ပ္ဍဲကဵုကွာန်ပါၚ်မၚ်ဂၠန် (၂) တၠ သ္ဂောံဒှ်အထံက်အပၚ်မာန်တုဲ ပ္ဍဲကဵုဂိတုအေဗရဴ (၃)၊ သၞာံ (၂၀၁၆) ဂှ် နူကဵုဂကောံမှာဇန်မန်နာနာကဵု ကောန်ဂကူမန်တံ ပံၚ်ကောံတုဲ အာ ကဵုလဝ်ဒါန်သြန် (၁၄၂၁၀၀၀) ဒကေဝ်ရောၚ် ဂွံတီကေတ်ရ။
ဥူမေန်န်ဥူ တိုန်ဒှ်သ္ကိုပ်ဝန်ဇၞော် နကဵုအသံဂလာန်သမ္မတဂှ် ဒုၚ်ယဵုကေတ်သစာ ပ္ဍဲကၠတ်ထဝ်တွဵုရးမန် ပ္ဍဲဂိတုမာတ် ၃၁ ဂှ်ကီုရ။
အမှုဗိုလ်ဇၞော် ဇြဝ်မျဵုထိတ် (ခလရ ၂၈၀) ဂးလဝ် မှာရာတုဲ ပန်ဂစိုတ်ဒးမၞိဟ် (၂) ပ္ဍဲကွာန်ပါၚ်မၚ်ဂၠန် ရေဝ်သမၠုၚ်ကျာ တွဵုရးမန်ဂှ် ယဝ်ရပ်စပ်စၟဳစၟတ် ပ္ဍဲရုၚ်သၞောဝ်ဓဝ်သွာၚ်ပၞာန်မ္ဂး တၠခန္ဓတံ သွက်ဂွံအာကၠုၚ် ရုၚ်အမှုဂှ် ဒှ်အခက်ခုဲမာန်ဏောၚ် ညးမဗိုၚ်ရၚ်တၠုၚ်မံၚ် ပရေၚ်ဂဗုတ်ဂှ်ဟီုရ။