Categories
ပရိုၚ်

သွက်လိက်ကၞပ် သ္ဂောံပ္တိုန်ကဵုပေန်လုၚ် ၂၁ ဗွဝ်ကၠံအလန်တတိယဂှ် ဂကောံဗော်ပရေၚ်ဍုၚ်ကွာန် နူUPDJC ကၠောန်ဒၟံၚ်ကောံဓရီု

ဂကောံဓရီု သွာၚ်ဂကောံဗော်ပရေၚ်ဍုၚ်ကွာန် နူ UPDJC (Chin Chin)

ရန်ကဵုသွက်လိက်ကၞပ် ကဏ္ဍဇၞော် ၅ ကဏ္ဍ သ္ဂောံပ္တိုန်ထ္ၜး ပ္ဍဲကောံဓရီု ပေန်လုၚ် ၂၁ ဗွဝ်ကၠံ အလန်တတိယ တေံတုဲ သွာၚ်ဂကောံဗော်ပရေၚ်ဍုၚ်ကွာန် နူကမ္မတဳပံၚ်တောဲအရာသဳကၠဳ ပရေၚ်ၜိုဟ်လလမ်ကၟိန်ဍုၚ် (UPDJC) ကၠောန်သ္ပဒၟံၚ် ကောံဓရီုမွဲ ပ္ဍဲဍုၚ်ဗိက် ရးတနၚ်သဳဖိုဟ်ဏောၚ် ဂွံတီကေတ်။

ဂိတုဂျောန် ၁၁-၁၂ ဂှ် ဂကောံဗော်ပရေၚ်ဍုၚ်ကွာန် ဇၞးမာဲ၂၃ ဗော် နူကဵုကမ္မတဳ (UPDJC) သ္ပဒၟံၚ်ကောံဓရီု ပွိုၚ် ၂ တ္ၚဲ ပ္ဍဲ Green Eyes Hotel ဍုၚ်ဗိက် ရးတနၚ်သဳဏောၚ် ညးစၞးဗော်ကောန်ဂကူမန် (MNP) မာံဇြေယျာဥူ နူဂကောံညးအုပ်ကာ UPDJC ဂးရ။

“အကာဲအရာ ကၠောန်ကၠုၚ်လဝ် သွက်လိက်ကၞပ် သ္ဂောံပ္တိုန် ပ္ဍဲကောံဓရီုပေန်လုၚ် အလန်တတိယဂှ် သဳကၠဳအာသောဲသောဲဗြဲဗြဲဏောၚ်၊ သ္ဘၚ်သဳကၠဳပရေၚ်ၜိုဟ်လလမ်ဂှ် မွဲကဏ္ဍ၊ မွဲကဏ္ဍပၠန်ဂှ် ဂိတုဂတဂတတေံတှေ် ဂကောံ ၂၃ ဗော်ဏံ ဂေတ်ဒေသနာနာ ဗက်ဆဵုကဵုကောန်ဒေသတံတုဲ ကၠောန်အာ Panel Discussion ဝိုၚ်သဳကၠဳပရေၚ်ဍုၚ်ကွာန် ဆေၚ်ကဵုလၟေၚ်ကမၠောန် ဒဒှ်ပရေၚ်ၜိုဟ်လလမ် အဆံၚ်အဆံၚ်၊ သီုကဵုပရူသဇိုၚ်ဖေဝ်ဒရေဝ်တံဏောၚ်” မာံဇြေယျာဥူ ဂးရ။

လၟေၚ်တရဴဒးအာဂှ် စနူဂိတုဂျူလာၚ် ဒဵုကဵုစိုပ် ဒဳဇြေမ်ဗာတေံ ဂကောံဗော်ပရေၚ်ဍုၚ်ကွာန်တံ ဂေတ်တွဵုရး ကေုာံရးဒေသဇၞော် ၜိုတ် ၆ ဒၞါဲဏောၚ်ဂှ် ကောံဓရီုဏံ ဖျေံလဝ်သ္ဂုတ်သွာတ်နွံ- သာ်ဝွံ နာဲမျဵုတေအ်လွေန် ညးစၞး ဗော်ဒဳမဝ်ကရေဇြဳ အလုံရးမန် AMDP ဂးရ။

“မွဲဂိတုမွဲဝါ မွဲဒၞါဲတှေ် ဇြဟတ်မၞိဟ် ၜိုတ် ၃၀၀ စနူဂိတုဂျူလာၚ်ဏံတုဲ ပ္ဍဲရးသေံသၟဝ်ကျာတေံဂှ် ကၠောန်ပ္ဍဲဍုၚ်ဠာယှဵုဏောၚ်၊ တုဲတှေ် ဆက်အာ ဍုၚ်မျေအ်ကျဳဏာ တွဵုရးကချေၚ်၊ ဍုၚ်လွာဲကဝ် တွဵုရးကယာ (ကရေၚ်ဍာဲ)၊ ဍုၚ်ဖာသီ ရးဨရာဝတဳ၊ ဍုၚ်သေတ်တိုဲ ရးရခေၚ်တံတုဲ ဒဳဇြေမ်ဗာ ဖါအိုတ်ဂှ် ဖအိုတ်တရဴ ပ္ဍဲတွဵုရးချေၚ်ဏောၚ်” နာဲမျဵုတေအ်လွေန် ဂးရ။

ဂကောံဗော်ပရေၚ်ဍုၚ်ကွာန် နူ UPDJC ဂှ် ရိုဟ်ဟ်ဂိတု မွဲဂိတုမွဲဝါ ဆဵုဒၟံၚ်ညးသ္ကံရ၊ ကောံဓရီုလၟုဟ်ဂှ် ဟိုတ်နူဂွံမိၚ်ကေတ် ကၠောန်ကောံဓရီုပေန်လုၚ် ၂၁ ဗွဝ်ကၠံ အလန်တတိယဏောၚ်ဂှ်ရ နဒဒှ် ပလေဝ်စလဝ်ကၠာကၠာလေဝ်ဟီုဂွံ၊ တုဲတှေ် ရန်ကဵုညးဍုၚ်ကွာန်တံ သ္ဂောံတီကၠိုဟ် လၟေၚ်ကမၠောန် ပရေၚ်ၜိုဟ်လလမ်ကီုတုဲ နူဂကောံ ဗော်ပရေၚ်ဍုၚ်ကွာန်တံဏံ ဗီုလဵုစွံအစဳဇန် ပရေၚ်ချဳဒရာၚ်ရော မိက်ဂွံသဳကၠဳပရူဂှ်လေဝ်ပါကီုရောၚ် သာ်ဝွံ ညးစၞး ဗော်ဒဳမဝ်ကရေဇြဳ ကောန်ဂကူသေံ (SNLD) သာၚ်ကျဝ်ညောအ် နူဂကောံညးအုပ်ကာ UPDJC ဂးရ။

“ပ္ဍဲသ္ဘၚ်သဳကၠဳပရေၚ်ၜိုဟ်လလမ်ဍုၚ် အလန်တတိယဏံ သွဟ်တိတ်ကၠုၚ်ဂၠိုၚ်ၚ်ဏောၚ် ဟွံထေၚ်ပုဟ်၊ တုဲတှေ် မုသဳကၠဳ ပရူမုရောဟီုဂှ်လေဝ် ဂွိုအ်သ္ပဒ္တန်ဏီဖိုဟ်တှေ် တၚ်စၟဳစဂွံ မုတိတ်ကၠုၚ်မာန်ရော ဟီုဟွံမာန်ဏီ” သာ်ကျဝ်ညောအ် ဂးရ။

ကောံဓရီုဂကောံဗော်ပရေၚ်ဍုၚ်ကွာန် (နူ UPDJC) ကၠောန်ဒၟံၚ်လၟုဟ်ဏံ တ္ၚဲဒုတိယဂှ် သီုဆဵုဂဗကဵု ဗော်ပရေၚ်ဍုၚ်ကွာန်၊ ဂကောံရေၚ်တၠုၚ်ပရေၚ်မှာဇန် CSOs နွံလ္တူဍုၚ်ဗိက်တံတုဲ ကၠောန်အာ ဝိုၚ်သဳကၠဳ လှာဲဂတးလညာတ်ကီုဏောၚ် ဂွံတီကေတ်ရ။