ညးတာလျိုၚ် ဗော်ကောန်ဂကူမန် နူကဵုပွိုၚ်ဍုၚ်ကအ်ကြိက် တွဵုရးဍုၚ်ကရေၚ် ကမ္မတဳဗဟဵု (၂) တၠကဵု ကမ္မတဳပွိုၚ် ဍုၚ် (၃) တၠတံဂှ် ဓဝ်ပတှေ် လ္တူက္ဍိုပ်သ္ကိုပ်ဗော်ပရေၚ်ဍုၚ်ကွာန်တံ ဟွံမွဲဂးတုဲ ပ္ဍဲကဵုဂိတုနဝ်ဝေမ်ဗာ (၂၂) ဂှ် ပ္တိုန်လဝ် လိက်နုက်တိတ် နူကဵုဗော်ကောန်ဂကူမန်ရောၚ် ဂွံတီကေတ်ရ။
နကဵုဒပ်ပံၚ်ကောံ UNFC ဂှ် ဟွံမိက်ကဵုအာဇြဟတ်ဓရိုဟ်လ္ပာ်ဝေၚ်ပေဲါပၞာန်တုဲ ပေဲါသဳကၠဳတက်ကျာ လ္တူခုၚ် ညံၚ်ဂွံဒှ်မာန် ဆက်ရုန်ဂ္စာန်အာမံၚ်ဏီရောၚ် ဒုဥက္ကဌ UNFC နာဲဟံသာ ဟီုရ။
ကိစ္စလိက်တေၚ် ဆေၚ်ကဵုပရေၚ်သ္ကိုပ်ဝန်ဇၞော်တွဵုရးဍုၚ်မန်ဂှ် အကြာမွဲၜါတ္ၚဲဏံ စှေ်လ္ၚတ်စၟဳစၟတ်အာရောၚ် ဥူညာဏ်ဝေန် (ကေၚ်ကာဗဟဵု ဗော်အေန်အေဝ်ဒဳ) ညးက္ဍိုပ်ဂကောံ စှေ်လ္ၚတ်စၟဳစၟတ် ဟီုရ။
ဗော်ဍုၚ်မန်တၟိ ဟိုတ်နူဟွံဂွံထ္ပက်လဝ်စၟတ်တဲ လိက်ကသုက်တုပ်စိုတ်ဒေါံပန်ပှော်အလုံဍုၚ်အေန်ဇြဳအေ NCA ဏီဂှ်ရ သွက်ဂွံကၠောန်ပေါဲသဳကၠဳ ပရေၚ်ဍုၚ်ကွာန်အဆံၚ်ကောန်ဂကူ နအလိုက်ဂကူညးကုညးဂှ် ပြဟ်ဟ်ဏံ ပ္ဍဲတွဵုရးဍုၚ်မန် ကၠောန်မာန်ဟွံသေၚ်ဏီရောၚ် ဂွံတီကေတ်ရ။
ပ္ဍဲကဵုတွဵုရးမန်ဂှ် ၚုဟ်ထ္ၜိုတ်ခိုဟ်တိုန်ကၠုၚ်တုဲ အပ္ဍဲဂိတုဒဳဇြေမ်ဗာ စၟတ်တ္ၚဲ (၁) ဂှ် ထ္ၜိုတ်အဆံၚ် RSS-3 မွဲပံၚ်တှေ် က္လိဂွံတဴၚုဟ် ဒဵုကဵု ၉၉၀ ဒကေဝ်ရောၚ် ဂွံတီကေတ်ရ။
ဂဥုဲခတိုဟ်မာၚ်(ယမ်း) ဒးစကာ ပ္ဍဲကမၠောန်ခတိုဟ်တၟံ အပ္ဍဲတွဵုရးမန်ဏံ ညံၚ်ဟဂွံဒှ်ဆဆဵုဂှ် ဝန်ဇၞော်ပရေၚ်ကေၚ်ကာပယျဵုဓနက်ကဵုပရေၚ်ဂီုကၠီု ကော်တၠကမၠောန်မာၚ်ကေုာံ ကောန်ကမၠောန် ၁၀၀ တၠပြၚ်ၚ် နွံအပ္ဍဲတွဵုရးမန်ဏံတုဲ လဴက္လးကဵုလဝ်ဓဝ်သတိ ကုတၠကမၠောန်မာၚ်တၟံတံ ပ္ဍဲရုၚ်ဂကောံအလဵုအသဳ တွဵုရးဍုၚ်မန်ရ။
ကောံဓရီုလၟေၚ်ဍာံ အလန်စတုတ္ထ ကၠတ်ထဝ်တွဵုရးမန်အလန်ဒုတိယဂှ် ဒဳဇြေမ်ဗာ ရ မံက်တေံမ္ဂး ကၠောန်သ္ပ ပ္ဍဲၝောံခန်ကောံဓရီုကၠတ်ထဝ်တွဵုရးမန်ရောၚ် ဂွံတီလဝ်နူရုၚ်ကၠတ်ထဝ်တွဵုရးမန်တုဲ အခါကၠောန်ကောံဓရီုဂှ်မ္ဂး မ္ၚးနူဂလာန်သွက်ဂွံပၠောပ် (၄) သာ်၊ သွက်ဂွံသၟာန် သမာန် (၃၀) ပြၚ်တုဲ ဥပဒေအပြောံ သွက်ဂွံပလေဝ် ဥပဒေ ကမၠောန်ၜဵုလေဝ် ပ္တိုန်ထ္ၜးကီုရောၚ် ဂွံတီကေတ်ရ။
ပ္ဍဲပေါဲရုဲမာဲအကြာ မကၠောန်ပ္ဍဲတ္ၚဲအေဗရဴ ၁ မံက် သၞာံ ၂၀၁၇ တေံဂှ် ဗော်မန်ၜါဗော် ဗော်ဒဳမဵုကရေဇြဳ အလုံရးမန် ကေုာံ ဗော်ကောန်ဂကူမန်တံ လုပ်ပြိုၚ်ရောၚ်ဂးလဝ်ကီုလေဝ် ညးလဵုလုပ်ဒုၚ်ရုဲရောဂှ် ဟွံဂွံရုဲရန်လဝ် ညးစၞးဏီရောၚ် ဂွံတီကေတ်နူကဵုဗော်ပရေၚ်ဍုၚ်ကွာန်မန်တံရ။
ပ္ဍဲကၠတ်ထဝ် ကလေၚ်ချုပလေဝ် ဥပဒေအပြောံပရေၚ်ဗဂဵုလဟဵု (စည်ပၚ်) ဂှ် ရန်ကဵုသွက်ကမ္မတဳ အဆံၚ်ပွိုၚ်ဍုၚ်တံ ကၠောန်ကမၠောန်သ္ဂောံဂြိပ်တုဲ ကမ္မတဳပရေၚ်ဗဂဵုလဟဵု အဆံၚ်တွဵုရးဂှ် ပလှ်ကၠေံလဝ်ရောၚ် ဂွံတီကေတ် နူကဵုရုၚ်ကၠတ်ထဝ် တွဵုရးဍုၚ်မန်ရ။
နူကဵုလ္ပာ်ဒပ်ပၞာန်အလဵုအသဳတံ ဍိုက်ထ္ပက်ပၞာန်ဂှ် ဗီုဂွံဒေါံ ညိလေဝ်ဟွံမွဲဏီဂှ်ရ ဒပ်ပံၚ်ကောံမဟာမိတ်သ္ကုတ်သၟဝ်ကျာ မတွံဂး ဒပ်ပၞာန်ဗၠးၜးကချေၚ် KIA၊ ဒပ်ပၞာန်ဗၠးၜးတအာၚ် (ပလံၚ်) TNLA ၊ ဒပ်ကဝ်က MNDAA ကေုာံ ဒပ်ပၞာန်ရခေၚ် AA တံ ပပ္တံနူဂိတုနဝ်ဝေမ်ဗာ ၂၀ တုဲဂှ် ပံၚ်တောဲကလေၚ်ထ္ပက်ပၞာန်ကီုရ သာ်ဝွံ သ္ကိုပ်ဗိုလ်ဇၞော် တာဖုၚ်ကျဝ် ညးအုပ်ကာနာနာ TNLA ဟီုရ။