ဝဏ္ဏမာန်၊ သေပ်တေမ်ဗာ ၉၊ ၂၀၂၀
ညးစၞးဗော်ညဳသၟဟ်မန်ဖအိုတ်ဂှ် (၆၇) တၠ ပတိုန်လဝ်စရၚ်ကုကမ္မယှေန်တုဲ အလုံသီု (၆၇) တၠဂှ် ကမ္မယှေန်ပေဲါရုဲမာဲတံ လလောၚ်သ္ပကၠုၚ်ဒတန်တုဲရ။ ပ္ဍဲကဵုညးစၞးဖအိုတ် (၆၇) တၠဂှ် ညးစၞးမၞိဟ်တြုံ (၅၀) တၠဂှ် ပါလုပ် (47.6%)၊ ညးစၞးမၞိဟ်ဗြဴဂှ် (၁၇) တၠ ပါလုပ် (25.4%) ရ။ တၟော်ကဵုအဝဲပၠန်မ္ဂး အာယုက် (၄၀) သၞာံ လ္ပာ်သၟဝ်ဂှ် (၂၃) တၠ (34.3%)၊ (၄၀) သၞာံ လ္ပာ်လတူဂှ် (၄၄) တၠ (65.7%) ရ။
ဒေသလုပ်ဒုၚ်ရုဲစှ်ဂှ် ပွိုၚ်ဍုၚ်ကျာ်ထဝ် သီု (၄) ဒၞာဲ၊ ပွိုၚ်ဍုၚ်ပံၚ် သီု (၄) ဒၞာဲ၊ ပွိုၚ်ဍုၚ်မတ်မလီု သီု (၅) ဒၞာဲ၊ ပွိုၚ်ဍုၚ် ကျာ်မြဟ် သီု (၄) ဒၞာဲ၊ ပွိုၚ်ဍုၚ်ၜါသွာၚ် (တ္ကံခၟိုၚ်) သီု (၄) ဒၞာဲ၊ ပွိုၚ်ဍုၚ်မုဟ်ဍုၚ် သီု (၄) ဒၞာဲ၊ ပွိုၚ်ဍုၚ်ဇြပ်ဗု သီု (၄) ဒၞာဲ၊ ပွိုၚ်ဍုၚ်ရေဝ် သီု (၅) ဒၞာဲကဵု စၞးကေၚ်ကာကောန်ဍုၚ်အရၚ် (ဗၟာ) (၁) ဒၞာဲ၊ ပံၚ် (၈) ဒၞာဲ/ပွိုၚ်ဍုၚ်ကဵု စၞးကောန်ဍုၚ်အရၚ် (၁) ဒၞာဲ။
ရးတနၚ်္သဳဂှ် ပွိုၚ်ဍုၚ်ဍာ်ဗု ကၠတ်ထဝ်ရး စၟတ် (၂) (၁) ဒၞာဲ၊ ပွိုၚ်ဍုၚ် (ဘုတ်ပြၚ်း) ကၠတ်ထဝ်ရး စၟတ် (၂) မွဲဒၞာဲ၊ ပွိုၚ် ဍုၚ်ဗိက် ကၠတ်ထဝ်သီု (၄) ဒၞာဲ၊ ပွိုၚ်ဍုၚ်ကံသံၚ် သီု (၄) ဒၞာဲ၊ ပွိုၚ်ဍုၚ် (ပုလော) ကၠတ်ထဝ်ရး စၟတ် (၂) မွဲဒၞာဲ၊ ဖအိုတ် (၅) ပွိုၚ်ဍုၚ်ဂှ် လုပ်ဒုၚ်ရုဲပေၚ်ပေၚ် (ကၠတ်ထဝ်သီု ၄ ဒၞာဲ) ဂှ် (၂) ပွိုၚ်ဍုၚ်၊ ကၠတ်ထဝ်မွဲမွဲဗၠိုၚ် (သွာၚ်) (၃) ဒၞာဲ/ပွိုၚ်ဍုၚ်။
ပ္ဍဲတွဵုရးဍုၚ်ကရေၚ်ဂှ် ပွိုၚ်ဍုၚ်ကံကြိက်ဂှ် ကၠတ်ထဝ်ညးဍုၚ်ကွာန်၊ ကၠတ်ထဝ်ကောန်ဂကူကဵု ကၠတ်ထဝ်တွဵုရး စၟတ် (၂) ပံၚ်ပိဒၞာဲ၊ ပွိုၚ်ဍုၚ်ဘာအၚ်ဂှ် ကၠတ်ထဝ်ကောန်ဂကူ၊ ကၠတ်ထဝ်တွဵုရး စၟတ် (၁) ကဵု ကၠတ်ထဝ်တွဵုရး စၟတ် (၂) ပံၚ်ပိဒၞာဲ၊ ပွိုၚ်ဍုၚ်လှာဒကှ်ဂှ် ကၠတ်ထဝ်ညးဍုၚ်ကွာန်၊ ကၠတ်ထဝ်ကောန်ဂကူ စၟတ် (၃) (၄)၊ ကၠတ်ထဝ်တွဵုရး စၟတ် (၁)၊ ကၠတ်ထဝ်တွဵုရး စၟတ် (၂) ကဵု ကၠတ်ထဝ်ကေၚ်ကာကောန်ဍုၚ်အရၚ် (မန်) (၁) ဒၞာဲ၊ ပွိုၚ်ဍုၚ်လှာဒကှ်ဂှ် လုပ်ဒၞာဲပေၚ်ပေၚ် (သီု ၅) ဒၞာဲ၊ သှ်ၜေါပွိုၚ်ဍုၚ်ဂှ် (၃) ဒၞာဲ။
ရးလ္ဂုၚ်ဂှ် ပွိုၚ်ဍုၚ်ဥက္ကလာပသၠုၚ်ကျာ ကၠတ်ထဝ်ရး စၟတ် (၁) မွဲဒၞာဲ၊ ပွိုၚ်ဍုၚ် (ဒေါပုံ) ကၠတ်ထဝ်ရး စၟတ် (၁) မွဲဒၞာဲ၊ ပွိုၚ်ဍုၚ် (ရေႊပြည်သာ-မှော်ဘီ-ထန်းတပၚ်) ကၠတ်ထဝ်ကောန်ဂကူ (၂) မွဲဒၞာဲ၊ ပွိုၚ်ဍုၚ် (သာကေတ) ကၠတ် ထဝ်တွဵုရး စၟတ် (၁) မွဲဒၞာဲ၊ ပွိုၚ်ဍုၚ် (စမ်းချောၚ်း) ကၠတ်ထဝ်ရး စၟတ် (၁) မွဲဒၞာဲ၊ ပံၚ် (၆) ပွိုၚ်ဍုၚ်ဂှ် ကၠတ်ထဝ် မွဲမွဲဒၞာဲ။
ရးဗ္ဂောဂှ် ကၠတ်ထဝ်ရး စၟတ် (၁) ကဵု ကၠတ်ထဝ်ရး စၟတ် (၂) ပံၚ်ၜါဒၞာဲ၊ ပံၚ်ဖအိုတ်မ္ဂး (၆၇) ဒၞာဲ သွက်ဂွံလုပ်ပြိုၚ်ရ။
ပ္ဍဲကဵု (၆၇) ဒၞာဲဂှ် တွဵုရးဍုၚ်မန်၊ ရးတနၚ်္သဳ၊ တွဵုရးဍုၚ်ကရေၚ်၊ ရးလ္ဂုၚ်၊ ရးဗ္ဂော အိုတ်သီုဂှ် တွဵုရးလဵု၊ ပွိုၚ်ဍုၚ်လဵု ဇၞးမာန်ဂၠိုၚ်၊ တွဵုရး-ရးလဵု ပွိုၚ်ဍုၚ်လဵုဇၞးမာန် မွဲဒကုတ်မွဲဒကဴ (ကဝက်ကဝုဲ) ၊ တွဵုရး-ရးလဵု ပွိုၚ်ဍုၚ်လဵု ဇၞးမာန် အကာဲအရာ နွံအောန်ဂှ် သ္ၚဳဂၠိပ်ရံၚ်အာ မွဲဝါစိုအ်။
ကရေၚ်သ္ၚဳဂၠိပ်ရံၚ်အာ တၚ်နၚ်နူလိက်ပရေၚ် ချူပတိုန်ထ္ၜးလဝ် ပ္ဍဲကဵုလိက်ပရိုၚ်သၞံၚ်တိုၚ် ပ္တိတ်လဝ်လၟေၚ်တုဲကၠုၚ် လၟေၚ် (၈) လၟိဟ် (၁၇) နကဵုက္ဍိုပ်လိက်ပရေၚ် ‘တၚ်သ္ၚဳဂၠိပ်ပေဲါရုဲမာဲ ၂၀၁၅ တုဲတေံကဵု သွဟ်ပေဲါရုဲမာဲ ၂၀၂၀’ ဂှ်မ္ဂး ပါ်စမ်ရံၚ် (၃) အဆံၚ်ရ။
၁။ ဒေသအကာဲအရာ ဒၞာဲဇၞးမာန်ဂၠိုၚ်
၂။ ဒၞာဲဇၞးမာန် မွဲဒကုတ်မွဲဒကဴ (ကဝက်ကဝုဲ)
၃။ ဒၞာဲဇၞးမာန် အကာဲအရာနွံအောန် သာ်ဝွံ ပါ်လဝ် (၃) အဆံၚ်ရ။
၁။ ဒေသအကာဲအရာ ဒၞာဲဇၞးမာန်ဂၠိုၚ်
ဒေသအကာဲအရာ ဒၞာဲဇၞးမာန်ဂၠိုၚ်ဂှ် ပ္ဍဲတွဵုရးဍုၚ်မန် ဇၞးမာန်နွံဂၠိုၚ်ရ။ ဆဂးဂှ် ပ္ဍဲကဵုဒေသ အကာဲအရာဒၞာဲဇၞးမာန်ဂၠိုၚ် ဂှ်လေဝ် ပွိုၚ်ဍုၚ်ရေဝ်၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ကျာ်မြဟ် (၄) ပွိုၚ်ဍုၚ်ဟေၚ် အကာဲအရာဇၞးမာန်ဂၠိုၚ် ရ။ ပ္ဍဲကဵု (၄) ပွိုၚ်ဍုၚ်ပၠန်ဂှ်လေဝ် အလုံသီု (၄) ဒၞာဲ ဂွံဇၞးမာန်သီုဖအိုတ် (ကၠတ်ထဝ်ညးဍုၚ်ကွာန်၊ ကၠတ်ထဝ်ကောန် ဂကူ၊ ကၠတ်ထဝ်တွဵုရး) ဂှ်လေဝ် ဟီုဟွံမာန်ရ။
ပ္ဍဲကဵု (၄) ပွိုၚ်ဍုၚ်ဂှ် ဒၞာဲဇၞးမာန်ဂၠိုၚ် သွာၚ်ကၠတ်ထဝ်တွဵုရး ဇၞးသီုဖအိုတ်မ္ဂး ဂွံ (၈) တၠရ။ သှေ်နူဂှ် ကၠတ်ထဝ်ညးဍုၚ် ကွာန်ကဵု ကၠတ်ထဝ်ကောန်ဂကူ (၄) ဒၞာဲ (သီုရေဝ် ၅ ဒၞာဲ) ဂှ် အတိုၚ်သီု (၄-၅) ဒၞာဲ ဂွံဇၞးဖအိုတ်ဂှ်လေဝ် ဒှ်ဟွံမာန်ရ။ တော်ကဵုပေဲါရုဲမာဲတုဲကၠုၚ် (၂၀၁၅) ဂှ်မ္ဂး ပွိုၚ်ဍုၚ်ရေဝ်ဂှ် သွာၚ်ကၠတ်ထဝ်ကောန်ဂကူ ဒကုတ်သၟဝ်ကျာ ဇၞးလဝ် (၁) ဒၞာဲ၊ ပေဲါရုဲမာဲအလန်ဏံ ဗော်မန်မွဲဓဝ်တုဲ အကာဲအရာခိုဟ်မံၚ်ရ။ ပ္ဍဲကဵုဒေသ အကာဲအရာဇၞးမာန်ဂၠိုၚ် (၄) ပွိုၚ်ဍုၚ် ဖအိုတ် ဂွံလုပ်ပြိုၚ်ဖအိုတ် (၅) တၠဂှ် သွာၚ်ကၠတ်ထဝ်ညးဍုၚ်ကွာန်ကဵု ကၠတ်ထဝ်ကောန်ဂကူဂှ် ဇၞးဗၞတ် (၃) တၠဟီု မ္ဂး ကၠတ်ထဝ်တွဵုရးဂှ် (၈) တၠ ကၠတ်ထဝ်လတူတေံ (ကၠတ်ထဝ်ညးဍုၚ်ကွာန်-ကောန်ဂကူ) ဂှ် (၃) တၠ ပံၚ် (၁၁) တၠ။
၂။ ဒၞာဲဇၞးမာန် မွဲဒကုတ်မွဲဒကဴ (ဇၞးကဝက်ကဝုဲ)
ဒၞာဲဇၞးမာန် မွဲဒကုတ်မွဲဒကဴ (ဇၞးကဝက်ကဝုဲ) ဟီုဂှ် ဗီုကဵုပွိုၚ်ဍုၚ်ၜါသွာၚ်၊ ပွိုၚ်ဍုၚ်ပံၚ်၊ ပွိုၚ်ဍုၚ်လ္ၚဵု ပ္ဍဲတွဵုရးကရေၚ်နွံရ။ တော်ကဵုပေဲါရုဲမာဲတုဲကၠုၚ် (၂၀၁၀-၂၀၁၅) တေံမ္ဂး ပွိုၚ်ဍုၚ်ၜါသွာၚ်ဂှ် ကၠတ်ထဝ်တွဵုရး စၟတ် (၁) ဇၞးလဝ်၊ သှေ်သွာၚ်ကၠတ်ထဝ်တၞဟ်တၞဟ် ကၠတ်ထဝ်ကောန်ဂကူဂှ် မမာဲဗော်ၜါပံၚ်တုဲ ဒးဗက်မံၚ်မာဲ (၇၀၀၀) မာဲပြၚ်၊ သွာၚ်ကၠတ်ထဝ်ညးဍုၚ်ကွာန်ဂှ် ဒးဗက် (၁၀၀၀၀) မာဲပြၚ်၊ ကၠတ်ထဝ်တွဵုရး စၟတ် (၂) ဂှ်လေဝ် ဒးဗက်မံၚ် (၁၀၀၀၀) မာဲပြၚ်မံၚ်ဏီရ။ တော်ကဵုဗော်မန်ပံၚ်ကောံတုဲ ပွိုၚ်ဍုၚ်ၜါသွာၚ်ဂှ် ဇၞးဗၞတ် (၂) ဒၞာဲ ရန်စမ်ရံၚ်။
ပွိုၚ်ဍုၚ်ပံၚ်ဂှ် တော်ကဵုပေဲါရုဲမာဲ (၂၀၁၅) သွာၚ်ကၠတ်ထဝ်ကောန်ဂကူ မာဲဗော်မန်ၜါဗော် ပံၚ်တုဲ ကျမံၚ် (၂၀၀၀၀) မာဲပြၚ်၊ သွာၚ်ကၠတ်ထဝ်ညးဍုၚ်ကွာန်လေဝ် ဒးဗက်မာဲ (၂၀၀၀၀) ပြၚ်၊ သွာၚ်ကၠတ်ထဝ်တွဵုရး စၟတ် (၁) ဂှ် မာဲ ဗော်မန်ၜါဗော်ပံၚ်တုဲ ဒးဗက်မာဲ (၁၂၀၀၀) ပြၚ်၊ တွဵုရးစၟတ် (၂) ဂှ် ဒးဗက်မာဲ (၈၀၀၀) ပြၚ် သရောပ်မ္ဂး သွာၚ် ကၠတ်ထဝ်တွဵုရး စၟတ် (၂) ဂှ် အကာဲအရာသွက်ဂွံဇၞး (၁) ဒၞာဲနွံတုဲ သှေ်နူဂှ် ဒးဗက်မံၚ်မာဲ (၂၀၀၀၀) ပြၚ်မံၚ်တုဲ ဇြိုၚ်ဂွံဇၞးရ။
ဒၞာဲဇၞးမာန် မွဲဒကုတ်မွဲဒကဴ (ဇၞးကဝက်ကဝုဲ) ဏံဂှ် ပ္ဍဲပွိုၚ်ဍုၚ်ၜါသွာၚ်ဂှ် ကၠတ်ထဝ်တွဵုရး (၁) ကဵု ကၠတ်ထဝ်ကောန် ဂကူ (၁) ဒၞာဲ ပံၚ်ၜါဒၞာဲ၊ ပွိုၚ်ဍုၚ်ပံၚ်ဂှ် သွာၚ်ကၠတ်ထဝ်တွဵုရး စၟတ် (၂) ဂှ် အယောၚ်အလာသွက်ဂွံဇၞး (၁) ဒၞာဲ၊ သှေ်ကၠတ်ထဝ်တွဵုရး စၟတ် (၁) ဂှ် ဒးဗက်မံၚ်မာဲ လၟိဟ် (၁၂၀၀၀) ပြၚ်ဏီတုဲ ဂွံဇၞးဇြိုၚ်သန်ရ။
သရောပ်သ္ၚဳဂၠိပ်ကေတ် ဒၞာဲဇၞးမာန် မွဲဒကုတ်မွဲဒကဴ (ဇၞးကဝက်ကဝုဲ) ဏံဂှ် ပွိုၚ်ဍုၚ်ၜါသွာၚ် ကၠတ်ထဝ်တွဵုရး (၁) တၠ ကဵု ကၠတ်ထဝ်ကောန်ဂကူ (၁) တၠ ပံၚ်ၜါတၠ၊ ပွိုၚ်ဍုၚ်ပံၚ်ဂှ် ကၠတ်ထဝ်တွဵုရး (၁) တၠ ပံၚ်ကၠတ်ထဝ်တွဵုရး ဗၞတ် (၂) တၠကဵု ကၠတ်ထဝ်ကောန်ဂကူ (၁) တၠ ပံၚ် (၃) တၠရ ဇၞးမာန်။
ပ္ဍဲတွဵုရးဍုၚ်ကရေၚ်ဂှ် ပွိုၚ်ဍုၚ်ဘာအၚ်ဂှ် လၟိဟ်ဂကူမန်အောန်မံၚ်တုဲ အကာဲအရာ သွက်ဂွံဇၞးဂှ် ဇြိုၚ်သန်ရ။ ပွိုၚ်ဍုၚ် ကံကြိက်ဂှ် လၟိဟ်ဂကူမန်နွံဂၠိုၚ် ဗၞတ်ထေက်ကြိုက်တုဲ ဒကုတ်လ္ၚဵု အကာဲအရာ သွက်ဂွံဇၞးနွံမာန်ရောၚ် သၟာသ္ၚဳဂၠိပ်လ္ၚဵု စၟဳညာတ်လဝ်ရ။ ပွိုၚ်ဍုၚ်လှာဒကှ်ဂှ် လၟိဟ်ဂကူကရေၚ်၊ ဗၟာ၊ သေံ၊ မန် ထုဲနှဴနွံဂၠိုၚ်တုဲ ကၠတ်ထဝ်ကောန်ဂကူ၊ ကၠတ်ထဝ်ညးဍုၚ်ကွာန်ကဵု ကၠတ်ထဝ်တွဵုရး စၟတ် (၁) ဂှ် ဇြိုၚ်ဂွံဇၞးတုဲ ကၠတ်ထဝ်တွဵုရး စၟတ် (၂) ဂှ် ယာံခါရ ဂကူမန်အာစုတ်မာဲလၟိဟ်ဂၠိုၚ်မ္ဂး အကာဲအရာ သွက်ဂွံဇၞးနွံရောၚ် ညးအုပ်ကာ ဗော်ညဳသၟဟ်မန် နာဲသိုက်လျး သ္ၚဳဂၠိပ်ထ္ၜးလဝ်ရ။
၃။ ဒၞာဲဇၞးမာန် အကာဲအရာနွံအောန်
ဒကုတ်ဒေသ ဒၞာဲဇၞးမာန် အကာဲအရာနွံအောန်ဝွံ တုဲကၠုၚ်ပေဲါရုဲမာဲ (၂၀၁၀-၂၀၁၅) တေံမ္ဂး ပွိုၚ်ဍုၚ်မတ်မလီုဂှ် မွဲအလန်လေဝ် ဟွံကေၚ်ဇၞးကၠုၚ်လဝ်ဏီရ။ ပ္ဍဲပေဲါရုဲမာဲ (၂၀၂၀) ဏံဂှ် ညးစၞးအလံၚ်အမာတ် လုပ်ဒုၚ်ရုဲဂှ် ဂကူမန်သၟးဟွံက သီုကဵုဂကူတၞဟ်တၞဟ်တံ ဂွံလဝ်ပရေၚ်ထံက်ဂလာန်တုဲ အလန်ဏံ မွဲဒၞာဲဟွံသေၚ် မွဲဒၞာဲ သွက်ဂွံဇၞးမာန်နွံရောၚ် ညးဂမၠိုၚ် အခါတ်အကာဲလဝ်ရ။ ဆဂး ဒကုတ်လဵု၊ ကၠတ်ထဝ်သွာၚ်လဵုဇၞးဂှ် ဟီုချိၚ်ဆဝါတ်ရ။
ဗီုဂှ်ကီု ရးတနၚ်္သဳ၊ ရးလ္ဂုၚ်၊ ရးဗ္ဂောတံဂှ် လၟိဟ်သတီုဂကူမန် နွံအောန်ကီု၊ သြဇာပရေၚ်ဂကူမန် နွံအောန်ကီုတုဲ အကာဲအရာသွက်ဂွံဇၞးဂှ် ဇြိုၚ်သန်ရ။
သရောပ်မ္ဂး ဒေသအကာဲအရာ ဇၞးမာန်ဂၠိုၚ်ဂှ် သွာၚ်ကၠတ်ထဝ်တွဵုရးဂှ် (၈) တၠ၊ သွာၚ်ကၠတ်ထဝ်ညးဍုၚ်ကွာန်ကဵု ကၠတ်ထဝ်ကောန်ဂကူဂှ် (၃) တၠ ပံၚ်ဗၞတ် (၁၁) တၠ၊ ဒၞာဲဇၞးမာန် မွဲဒကုတ်မွဲဒကဴ (ဇၞးကဝက်ကဝုဲ) ဂှ် ကၠတ်ထဝ်တွဵု ရး ဗၞတ် (၂) တၠ ကဵု ကၠတ်ထဝ်ညးဍုၚ်ကွာန်/ကောန်ဂကူ (၁) တၠ ပံၚ် (၃) တၠ၊ ပ္ဍဲတွဵုရးဍုၚ်ကရေၚ်ဂှ် သွာၚ်ကၠတ် ထဝ်တွဵုရး ဗၞတ် (၁) တၠကဵု ကၠတ်ထဝ်ညးဍုၚ်ကွာန်/ကောန်ဂကူ (၁) ပံၚ် (၂) တၠ၊ ဒၞာဲဇၞးမာန်အကာဲအရာနွံ အောန်ဂှ် သွာၚ်ကၠတ်ထဝ်တွဵုရး ဗၞတ် (၁) တၠ ကဵု သွာၚ်ကၠတ်ထဝ်ညးဍုၚ်ကွာန်/ကောန်ဂကူ ဗၞတ် (၁) တၠ ပံၚ် (၂) တၠ ဇၞးမာန်မ္ဂး ဖအိုတ် ကၠတ်ထဝ်တွဵုရး-ရး ဂှ် ဗၞတ် (၁၁) တၠ၊ ကၠတ်ထဝ်ညးဍုၚ်ကွာန်/ကောန်ဂကူ ဂှ် (၆) တၠ သွက်ဂွံဇၞးမာန် သ္ၚဳဂၠိပ်ပတိုန်ထ္ၜးဏာရ။
