အာကာ

ကမ္မတဳဗဟဵု ဗော်ဍုၚ်မန်တၟိ ဒေံါဇူလဝ် နူဂိတုကၠာတေံဂမၠိုၚ် စဳဇန်ပလေဝ်ပလေတ်စမံၚ် သွက်ဂွံလုပ်ပေဲါရုဲမာဲ ၂၀၁၀ နွံရောၚ် သ္ဂောံမိၚ်ကေတ်ရ။

ညးဒေံါဇူပိတၠ ဖက်ဆောညးအုပ်ကာနာနာ ဗော်ဍုၚ်မန်တၟိ နာဲဆာန်တိ၊ နာဲထဝ်အိန် ကော် နာဲဃောသိုက် ကေုာံ နာဲတေန်လှ တံဂှ် ပံၚ်အာကဵုအလဵုအသဳပၞာန်ဣယျရောၚ် ညးမလ္ၚတ်ပရေၚ်ပၞာန်တံ သ္ၚဳဂၠိပ်အိုတ်ရ။

“ပ္ဍဲရုၚ်ဗော်လတူဍုၚ် ကၟာတ်လဝ်လၟုဟ်ဏံဂှ် ကမ္မတဳဗဟဵုတြေံတံကဵု ညးတာလျိုၚ်ဍောတ်ဍောတ်တံ ကၠုၚ်ကောံမံၚ် အတိုၚ်ပၟိက်ဆန္ဒညးတံ၊ နူကဵုဗော် ကဵုလဝ်တာလျိုၚ် ဟွံသေၚ်ပုဟ်” ရဴသာ်ဝွံ ကမ္မတဳဗဟဵု ဗော်ဍုၚ်မန်တၟိမွဲတၠ ဟီုလဴထ္ၜးရ။

ဟွံဒုၚ်တဲ ပြံၚ်လှာဲ အယောၚ်အလာ ဒပ်ပၞာန်မၚ်ပယျဵု ဟွံသေၚ်မ္ဂး ဒပ်ပၞာန်မၚ်ကွာန်ရောၚ် နူဂိတုအေဗရာ ၂၂ ဂှ် ဗော်ဍုၚ်မန်တၟိ ကလေၚ်လဝ်လိက် ကုအလဵုအသဳပၞာန်တုဲ ရုၚ်ဗော်မၞုံအပ္ဍဲဍုၚ်ဂမၠိုၚ် ကၟာတ်ထောံဖအိုတ်ရ။

ကြဴနူဒေံါပန်ပှော် သၞာံ ၁၉၉၅ တေံတုဲဂှ် ကေတ်တၚ်တုပ်စိုတ် ကုအလဵုအသဳပၞာန်တုဲ ရုၚ်ဗော်ဍုၚ်မန်တၟိဂမၠိုၚ် ပံက်ကၠုၚ် ပ္ဍဲဍုၚ်လ္ဂုၚ်၊ ဍုၚ်မတ်မလီု၊ ဍုၚ်ဇြပ်ဗု၊ ဍုၚ်ရေဝ်၊ ဍုၚ်ကျာ်ပိ ကေုာံ ဍုၚ်ဗြဝတဳဂမၠိုၚ်ရ။

လၟုဟ် နာဲဆာန်တိ စိုပ်မံၚ်ပ္ဍဲရုၚ်ဗော်ဍုၚ်မန်တၟိ လတူဍုၚ်မတ်မလီုရောၚ်ဂှ် ကောန်ရုၚ်မွဲတၠ ၜိုန်ဟီုသ္ပဒတန်ကီုလေဝ် ကာလသၟာန် မုရဴကမၠောန်တာလျိုၚ်မွဲ ညးကၠောန်သ္ပမံၚ်ရောဂှ် ဟွံကလေၚ်သှ်ရ။

နာဲထဝ်အိန်ဂှ်လေဝ် ဇၟာပ်ဇၟာပ်တ္ၚဲ စိုပ်ကၠုၚ်မံၚ်ရုၚ်ရောၚ်ဂှ် ရုၚ်ဆက်ဆောံ ဍုၚ်ဇြပ်ဗု ဟီုသ္ပဒတန်ရ။

“နာဲထဝ်အိန်ဂှ် သွက်ဂွံလုပ်ပေဲါရုဲမာဲ နူဗော်ဍုၚ်မန်တၟိ ဗလးလဝ် ညးတံရောၚ် ” သာ်ဝွံ ညးဟီုတွံစန်ဒက်မံၚ် အကြာခမဳသၚ်တံရောၚ်ဂှ် သၚ်နူဍုၚ်ဇြပ်ဗု ဟွံမိက်ဓမံက်ယၟုမွဲဇကု ဟီုရ။

အတိုၚ်ညးမခါတ်အကာဲတံ သ္ၚဳဂၠိပ်လဝ်မ္ဂး ရုၚ်ဗော်ဍုၚ်မန်တၟိ ကၟာတ်လဝ် အပ္ဍဲဍုၚ်တံဂှ် ကမ္မတဳဗဟဵု ဒေံါဇူပိတၠတံ ကလေၚ်ပံက်လဝ်အိုတ်ရ။ ပရေၚ်ပိုန်ဒြပ်ဗော်ဍုၚ်မန်တၟိ သှေ်သၟေဟ်မံၚ် ပ္ဍဲဍုၚ်တံဂှ် ညးတံ ဆက်ရပ်ထိၚ်လဝ်တုဲ အတိုၚ်ဂၠံၚ်တရဴ အလဵုအသဳပၞာန်လးလဝ် ဒုၚ်ယၟုဗော်ဍုၚ်မန်တၟိတုဲ သ္ဂောံလုပ်ဒုၚ်ရုဲမာဲမာန်ဂှ် ရုန်ဂစာန်မံၚ်အိုတ်ရောၚ်။

က္ဍိုပ်နာဲအံၚ်နာၚ် ဒေါံဇူလဝ် နူဗော်ဍုၚ်မန်တၟိတံလေဝ် သွက်သ္ဂောံပြံၚ်လှာဲ အယောၚ်အလာ ဒပ်ပၞာန်မၚ်ပယျဵု ဟွံသေၚ်မ္ဂး ဒပ်ပၞာန်မၚ်ကွာန်ဂှ် ဗက်ပကောံပကေဝ်မံၚ် ဇြဟတ်မၞိဟ် သ္ဂောံပေၚ် ၅၀ တၠတုဲ လၟုဟ်ကဵုမံၚ်ဘာသဇိုၚ်ကွတ်ပၞာန် ပ္ဍဲကွာန်ဒဵုဣသိ ပွိုၚ်ဍုၚ်ဇြပ်ဗုရ။

အကြာဏံ ဒုသကိုပ်ပၞာန်ဇၞော် ယျေဝ်မျေတ် သွက်သ္ဂောံစှေ်ကၠုၚ် ဍုၚ်မတ်မလီု နွံမံၚ်တုဲ သွက်သ္ဂောံချပ် လးဗျူဟာ ကုသကိုပ်ရးအဂၞဲ ကိစ္စဗော်ဍုၚ်မန်တၟိ ကတဵုဒှ်ဒၟံၚ်လၟုဟ် နွံမံၚ်ရောၚ်ဂှ်လေဝ် ညးမလ္ၚတ်ပရေၚ်ပၞာန်တံ စၟဳညာတ်လဝ်ရ။

နာဲဆာန်တိ ကေုာံ သကိုပ်ပၞာန် တိတ်နာၚ်ဝေန် သကိုပ်ရး ဌာန်ဂအုပ်ပၞာန်ရးဒိုဟ်အဂၞဲတံဂှ် အခိၚ်တိုန်ဘာတက္ကသိုလ် ဍုၚ်မတ်မလီုတေံ ကေၚ်ဒှ်ကၠုၚ်ရဲဍက်ဍက်ရောၚ် သ္ဂောံမိၚ်ကေတ် နူညးတီညာတ်တံရ။