အာကာ။ ။ဟိုတ်နူဒစဵုဒစးကဵု ပေဲါရုဲမာဲ ၂၀၁၀ တုဲ ညးဒးဒုၚ်မံၚ်ထံၚ် ပ္ဍဲထံၚ်အၚ်စိၚ် တၠဂုဏ်ဥက္ကံသ ကော် တၠဂုဏ်အဇ္ဇဝွံ လၟုဟ် ဒးဒုၚ်မံၚ် ယဲဝေဒနာကၟက်ဂြိုဟ် (ကျောက်ကပ်) ပ္ဍဲထံၚ်ရောၚ် ကလောကောဒေံညးမွဲတၠ ဟီုရ။
လောန်ကၠုၚ် ၜိုတ်မွဲသတ္တဟတေံဂှ် စၟဳစၟတ်ယဲတုဲ သ္ဂောံဆဵုကေတ် လက်သဏ်ယဲကၟက်ဂြိုဟ်ရ။ သ္ဂောံလွဳပရာယဲဂှ် ပ္ဍဲရုၚ်ဂဥုဲထံၚ် ဂဥုဲဟွံဍိုက်ပေၚ်တုဲ သွက်သ္ဂောံလွဳ ပ္ဍဲရုၚ်ဂဥုဲမ္ၚးမာန်ဂှ် လၟုဟ် ဃောဂစာန်ပလေဝ်ပလေတ်စမံၚ်ရောၚ်ဂှ် ညးမရီုဗၚ်မံၚ် ပရေၚ်ကိစ္စညးမွဲတၠ ဟီုရ။
“စမ်ပဿဴ၊ တက်ဓါတ် (ဓါတ်မှန်) တုဲ ဆဵုလက်သဏ်ယဲကၟက်ဂြိုဟ်ဂှ် ပိုဲဂွံမိၚ်ကေတ်ရ၊ ဂွံဝဳယဲမ္ၚးမာန်ဂှ်လေဝ် ဒးပတိုန်မံၚ်လိက်ဏီ၊ တုဲတှေ် ဒးမၚ်မံၚ် ဒေံတၠဂုဏ်ဂှ်ဏီ” သာ်ဝွံ ညးဗြဴဂှ် ဟီုရ။
ပ္ဍဲတၠဂုဏ်ဥက္ကံသဂှ် ကိုပ်ကၠာတေံလေဝ် ယဲထိုၚ်စၞ နွံကၠုၚ်မံၚ်တုဲ ဟိုတ်နူဘဲဒဏ် ဒးဒုၚ်တက်ပျဲစၟဳစၟတ်လဝ်ဂှ် လၟုဟ်သီုဒးဒုၚ်မံၚ် ဝေဒနာယဲဇွဟ်၊ ယဲဂၞိၚ်ဂိတံရောၚ် ဒေံဗြဴညး အာဆဵုလဝ်ကဵုညး ကလေၚ်လဴထၜး အတိုၚ်ညးဟီုလဴလဝ်ဂှ်ရ။
ပ္ဍဲအိန်ထံၚ်သ္ၚိ တၠဂုဏ်ဥက္ကံသဂှ် မအံက်ဗျု တၠဝေဒနာယဲဇမၠိၚ်မွဲ ကေုာံ ဒေံဗြဴ မၞုံၜိုတ်အာယုက် ၂၀ သၞာံပြၚ်မွဲဟေၚ် မၞုံတုဲ သ္ဂောံအာဆဵုကဵု တၠဂုဏ်ဂှ် ဒှ်အခက်အခုဲ ဇၞော်ကဵုဇြဟတ်ရောၚ် ဒေံဗြဴညး ဟီုရ။
သ္ပပတံနူ ဂိတုမေ ၁၄ တေံဂှ် ပတိုန်ရုၚ်ဂဗုတ် ကုညး (၆) ဝါတုဲကီုလေဝ် ဟွံဖျေံဒုဟ်ဒဏ်ဏီရ။ သအာၚ်နူဂှ်ပၠန် မသကောဒေံညးတံဂှ်လေဝ် ဟွံဂွံအခေါၚ် လုပ်ကလၚ် ပ္ဍဲရုၚ်သၞောဝ်ဓဝ်ရ။
သွက်ဂွံပတိုန်ဂဗုတ် ကုညးဂှ် မန်ကျာ်သြဳ (ညးဒးဒုၚ်ရပ် နကဵုအမှုဒုၚ်ပလံၚ်တၠဂုဏ် ကြဴနူတၠဂုဏ်ဒးဒုၚ်ရပ်တုဲ လအ်ၜိုတ် ပန်တ္ၚဲ) ဒးဒုၚ်သ္ပသက်သဳ ဒးထပက်လဝ်စၟတ်တဲရောၚ်ဂှ် ကာလမန်ကျာ်သြဳ ကလေၚ်ဗၠးကၠုၚ် ကလေၚ်လဴထ္ၜးရ။
လၟုဟ် ပတိုန်လဝ်ဂဗုတ် ကုညး နကဵုအမှု ပလီုပလာ် ပရေၚ်ဂီုကၠီု ကၟိန်ဍုၚ်၊ အမှု တက်တြးလိက် ဟွံလုပ်သၞောဝ်၊ အမှုဓါတ်လလဳ အဳလက်ထရဝ်နေတ် ပံၚ်ပိအမှုရ။
တၠဂုဏ်ဥက္ကံသ မၞုံအာယုက် (၂၈) သၞာံ မဒှ်ဇာတိ ကွာန်မုဟ်ဒုန်၊ ပွိုၚ်ဍုၚ်ၜါသွာၚ်ဝွံ ဒှ်အာစာလိက်ဍောတ် ပ္ဍဲတိုက်ဗ္တောန်လိက်ပရိယတ္တိ အံၚ်ဇၞး ကွာန်နာၚ်သၠုၚ်တုဲ သ္ပဒတဴကၠုၚ် ပ္ဍဲဘာဂှ် ၜိုတ် (၅) သၞာံရ။
ပ္ဍဲဂိတုဂျာန်နဝါရဳ (၇) ဂှ် ဗၠာဲသၟိၚ်တံ ရပ်ဏာ တၠဂုဏ်ဥက္ကံသ ပ္ဍဲအရာပ်ခိုၚ်ကၠိုက် ဍုၚ်ဇြပ်ဗုတုဲ အခိၚ်လၟုဟ် ဆက်ရပ်ထိၚ်လဝ်ညး ပ္ဍဲထံၚ်အၚ်စိၚ် တိုက် (၂) ဗဒမ် (၁) ရ။
0 Comments