အာကာ – သွက်သ္ဂောံလဟိၚ်ကဵု ပုရိသာတ် ကောန်ဂကူမန် စိုပ်ဌာန်သ္ၚောဲဂှ် နာဲရာမာဉ် က္ဍိုက်ပ်တုဲ ပ္ဍဲသၞာံဏံ ပံက်ပတန်ကၠုၚ် ဂကောံဂဳတရံက်ခ် မၞုံယၟု လျးဂဳတ (THE LIGHT MUSIC) မွဲဝိုၚ်ပၠန်ရ။
ဂဳတရံက်ခ် ကောန်ဂကူမန် သ္ဂောံပတဝ်ပၞးမာန်ကဵု ဂကူတၞဟ်တၞဟ်တံကီု၊ ဂဳတဂကူမန် သ္ဂောံဇၞော်မောဝ်တိုန်ကီု ရန်တၟံတုဲ မ္ဒးပံက်ဝိုၚ်တၟိရောၚ် နာဲရာမာဉ် ဟီုရ။
“ပ္ဍဲဂကူမန်ပိုဲဂှ် ဂကောံဂဳတရံက်ဇေတ်တ် ဟွံမွဲဏီပုဟ်၊ လာၚ်ဍေံ စုၚ်မံၚ်၊ ဟိုတ်ဂှ်ရ ပိုဲပံက်ဝိုၚ်ဂဳတ ရံက်ခ်သက်သက်” နာဲရာမာဉ် ဟီုသာ်ဂှ်ရ။
ဂကောံလျးဂဳတဝွံ ပြဟ်ပြဟ်ဏံ ရန်လဝ် ဒယှေ်ပ္ဍဲဍုၚ်မ္ၚး မပ္တံ ဍုၚ်သေံ၊ မလေဝ်၊ သၚ်္ကပေါဝ်တံတုဲ ဗွဲကြဴ ဆက်ဒယှေ်အာ အပ္ဍဲဍုၚ်မန်ပၠန်ရောၚ် ကောန်ဂကောံ လျးဂဳတ ‘လွဳ’ ဟီုရ။
“ကောန်ဂကူမန်ပိုဲ စိုပ်မံၚ်ဍုၚ်မ္ၚးတံဂှ် လုက်စုက်ကဵု ဂဳတဂကူမန်ပိုဲ အောန်မံၚ်၊ ဟိုတ်ဂှ်ရ ပြဟ်ပြဟ်ဏံ ဂကောံပိုဲဂှ် ပတဝ်လဝ်က္ဍိုပ်ကဵု မန်စိုပ်ဍုၚ်မ္ၚး၊ တုဲပၠန် ရဲတိၚ်တိုက် သီုဖအိုတ်ဂှ်လေဝ် နွံမံၚ် ပ္ဍဲဍုၚ်သေံဖအိုတ်၊ ဍေံတံ ရပ်လဝ် ပါဿပအ် (လိက်တတ်ကၠောံဍုၚ်) သီုဖအိုတ်ရဏောဝ်” လွဳ ဟီုသာ်ဂှ်ရ။
ပ္ဍဲဂကောံဂဳတဂှ် သၟာဒယှေ် ပါလုပ် (၅) တၠတုဲ သၟာတိၚ်တိုက် ပါလုပ် (၅) တၠရ။ ညးဒယှေ်မသုန်တၠတံဂှ် ရာမာဉ်၊ အနဂ္ဃ၊ လွဳ၊ E.co တာရာ၊ အာကာတံ မဒှ်တုဲ ညးတိၚ်တိုက်မသုန်တၠတံဂှ် Lead guitar ဗိုဝ်ဗိုဝ်၊ Hollow guitar သဟာဲနာဲ၊ Bass guitar မတ်တၟး၊ K.B ကောရတ်၊ Drum သိုက်ဟ တံ မဒှ်ရ။ ကောန်ဂကောံတံဂှ် ဒှ်မံၚ်ညးတြုံသၟးတုဲ ညးဗြဴမွဲတၠလေဝ် ဟွံမွဲဏီရ။
သၟာဒယှေ်ဒွက်ရံက်ညးဗြဴ အောန်မံၚ် ပ္ဍဲဂကူမန်ဏီကီု၊ ညးဗြဴဒယှေ်ဒွက်ရံက်မာန်တံဂှ်လေဝ် မၞုံမံၚ် ပ္ဍဲဂကောံဂဳတတၞဟ်တၞဟ်တံတုဲ ပ္ဍဲဂကောံတၟိဏံ ညးဗြဴ ဟွံပါလုပ်ဏီရောၚ်ဂှ် နာဲရာမာဉ် ဟီုရ။
ဂကောံလျးဂဳတဝွံ ချပ်ဇန်မံၚ် သွက်သ္ဂောံပတိတ်ကဝးလေဝ် နွံတုဲ ဃောပကောံပကေဝ်မံၚ်ဒွက်ဖိုဟ်ရောၚ်၊ ကဝးဒွက်တိတ်တုဲမ္ဂး ချပ်ဇန်အာ သွက်သ္ဂောံဒယှေ်ဒွက် အပ္ဍဲဍုၚ်ပၠန်ရောၚ်ဂှ် သၟာဒယှေ်ဒွက် “လွဳ” ဟီုရ။
“လၟုဟ်ပိုဲစွံမံၚ်အာရီု လပါ်ချူဒွက်ဖိုဟ်၊ ဂွံဒွက်ဍာ်ဒကေဝ်ပေၚ်မှ ပိုဲဒှ်ပတိတ်ကဝးဏောဝ်” သာ်ဝွံ “လွဳ” ဟီုရ။
အပ္ဍဲသၟာဂဳတမန်ဂမၠိုၚ်ဂှ် လပါ်ဒယှေ်ဒွက် ကဆံၚ်လှုၚ်တိုန်မံၚ်ကီုလေဝ် လပါ်ဒွက် လပါ်တိၚ်တိုက်တံဂှ် ဍိုန်လျမံၚ် နူဂကူတၞဟ်တၞဟ်တံဏီရောၚ်ဂှ် “လွဳ” ညာတ်ကေတ် လတူဂဳတဂကူမန်ရ။
အပ္ဍဲကောန်ဂကူမန်ဝွံ လောန်ကၠုၚ် သၞာံ (၂၀၀၈) တေံဂှ် ဂဳတဂကူမန် နွံမံၚ် (၉) ဂကောံကီုလေဝ် ဟိုတ်နူအကာဲအရာနာနာတုဲ ဒးဒေံါဇူကၠုၚ် မွဲချိုန်ခဏဂှ်ရ ပ္ဍဲသၞာံ (၂၀၀၉-၂၀၁၀) ဂှ် သှေ်ဆ (၃) ဂကောံဟေၚ်ရောၚ် နာဲဇာတိနာဲ ညးကောပ်ကာဲ ဂကောံဂဳတမန် ဟီုရ။
ဂကောံဂဳတ မၞုံပြာကဋ်ကၠုၚ် (၉) ဂကောံတံဝွံ ဂကောံဂဳတမန်၊ ဂဳတအလကာၚ်္၊ ဂဳတအနာဂတ်၊ လျးဂဳတ၊ ဂဳတဟံသာ၊ ဂဳတဟံၚ်ဍုၚ်၊ Power Music ၊ လျးဟံသာ၊ ရှ်ဆာန်ဂဳတ တံ မဒှ်တုဲ ပၞောဝ်ကဵုဂကောံဂဳတတံဂှ် ဂကောံဂဳတ လျးဟံသာဝွံ မဒှ်ဂကောံဂဳတ မံက်ကၠာအိုတ်တုဲ စပတန်ကၠုၚ် လောန်ကၠုၚ် ၃၀ သၞာံ ပြၚ်ပြၚ်တေံရ။
