စၠန်ထဝ်– နူကောံဓရီုဇၞော် ဂကောံပံၚ်ကောံ ပရေၚ်ဂကူမန် (MAU) အလန်ပဥ္စမ ဖျေံလဝ်သ္ဂုတ်သွာတ် သွက်ဂွံကၠောန် တၞးစၟတ်သမ္တီ ကောန်ဂကူမန် (Mon National ID card) ဂှ် လၟုဟ် ထမံက်ရုပ်ရဴ ကၠောန်ကဵုမံၚ်ရ။

သွက်ဂွံတီစရၚ် သတီုလၟိဟ် ကောန်ဂကူမန်ကီု၊ ဂွံသီဗ္ၜောဝ် ပကောံဇြဟတ် ကောန်ဂကူကီု၊ ဂွံစၟတ်သမ္တီ ကောန်ဂကူမန် လောဲကီု ရန်တၟံတုဲ ကၠောန်ကဵု တၞးစၟတ်သမ္တီ ကောန်ဂကူမန်ဏအ်ရောၚ် ညးအုပ်ကာနာနာ ဂကောံပံၚ်ကောံ ပရေၚ်ဂကူမန် နာဲလျးရတ် ဟီုရ။

“ကောန်မန်ဇကု ယဝ်ရကာဒ်ကောန်ဂကူမန်ဏံ နွံတှေ် အခိၚ်ဇကု ဒှ်ဒဒိုက်ဇၞော်ဇၞော် မွဲသာ်ၜါရာ နူကဵု (MAU) ဏံ ကေတ်လျိုၚ် ဘိုၚ်ပသောၚ်ကဵုမာန်ဏောၚ်၊ တုဲမွဲသာ်ပၠန်ဂှ် ကောန်မန်တံ ညးမွဲကဵု ညးမွဲ ဂွံရီုဗၚ် ညးသကအ်မာန်ကီု၊ ဂွံစၟတ်သမ္တီ ညးသကအ်မာန်ကီု ရန်တၟံလဝ် နွံ” သာ်ဝွံ နာဲလျးရတ် ဟီုရ။

သ္ပပတံနူ ဂိတုအဝ်ဂါတ် (၂၂) တုဲကၠုၚ်ဏံ စကၠောန်ကဵုမံၚ် တၞးစၟတ်သမ္တီ ကောန်ဂကူမန် ပ္ဍဲဍုၚ်သေံမွဲဒၞဲါတုဲ လၟုဟ်မ္ဂး ကောန်ဂကူမန် လၟိဟ်ၜိုတ် (၃၀၀) တၠပြၚ်တံ တက်ဗီုကၠောန်တၞးဏံ တုဲဒှ်အာရရောၚ်။

ကၠောန်ကဵုကောန်ဂကူမန် မၞုံမံၚ် ပ္ဍဲဍုၚ်သေံ ဍုၚ်သအာၚ် ကေုာံ ပ္ဍဲဒေသပယျဵုတံတုဲမ္ဂး သွက်ဂွံကၠောန်အာ အပ္ဍဲဍုၚ်တေံဂှ်လေဝ် နွံမံၚ်ရောၚ် ညးဆက်ဟီုရ။

ပ္ဍဲဍုၚ်သေံ ဒၞာဲလ္ၚဵုတံဂှ် ဒုၚ်ယၟုဂကောံတေံ ဂကောံဏံတုဲ လီဠာန်ကၠောန်စမံၚ် တၞးစၟတ်သမ္တီ ကောန်ဂကူမန် နွံရောၚ် သၟာကမၠောန် ကောန်ဍုၚ်သေံတံ ဟီုရ။ အစဳအဇန်တံဂှ် ဟွံဆေၚ်စပ်ကဵု ဂကောံပံၚ်ကောံ ပရေၚ်ဂကူမန် (MAU) ရောၚ် နာဲလျးရတ် ဟီုရ။

ကၠောန်တၞးစၟတ်သမ္တီဏံမ္ဂး အခိၚ်တက်ဗီုကဵု ဗပေၚ်တၚ်နၚ်ဂှ် ဒးကဵု (၁၀၀) ၜါတ်တုဲ အခိၚ်ဂွံကာဒ်တေံမ္ဂး ဒးကဵု (၁၀၀) ၜါတ်ပၠန်ရောၚ်။ ဗီုပြၚ်ကာဒ်ဂှ် တုပ်သၟဟ်ကဵု လိက်စၟတ်သမ္တီ ကောန်ဍုၚ်ကီုတုဲ ပ္ဍဲဂှ်မ္ဂး ယၟုဇကု၊ ဂၞန်ဇကု၊ ဗီုရုပ်ဇကု၊ ဌာန်ဒၟံၚ် ချူထမံက်လဝ် နွံဍိုက်က်ပေၚ်ၚ်တုဲ လ္ပစးဂှ် အရံၚ်အကး ရုပ်သၚ်္ကေတ အလာံၜိုပ်ပဝ်ဍောတ်တ်မွဲ နွံရ။

“မွဲတ္ၚဲ ပိုဲဗျုထဴအာတှေ် ပိုဲဂွံထ္ၜးကဵု ကောန်ပိုဲ စဴပိုဲ သက်သဳကောန်မန်မွဲဏောၚ်၊ ဟိုတ်ဂှ်ရ ပိုဲတက်လဝ် တၞးစၟတ်သမ္တီဏံ” သာ်ဏံ ညးဂွံကၠောန်လဝ် တၞးစၟတ်သမ္တီ နူကဵုဒေသပယျဵုမွဲတၠ ဟီုရ။

ကောန်ဂကူမန် ၜိုန်ရဟွံဗၠးၜးဏီကီုလေဝ် တၞးစၟတ်သမ္တီဏံ နွံမ္ဂး ပ္ဍဲအကြာကောန်ဂကူဇကု မၞိဟ်ဒုၚ်ကဵုလျိုၚ် နွံတုဲ အကြာကောန်ဂကူတၞဟ်ဟ်တံလေဝ် ဂွံပတဝ်အာက္ဍိုပ်မာန်ကီုရောၚ်၊ ကာဒ်ဏံဂှ် ပြဟ်ပြဟ်ဏံ သုၚ်စောဲအာ ပ္ဍဲအကြာကောန်ဂကူမန်တံတုဲ ယဝ်ရ ကောန်ဂကူမန် ဂွံအခေါၚ်ဗၠးၜးမ္ဂး ကလေၚ်သုၚ်စောဲအာ ပ္ဍဲဍုၚ်တေံမာန်ပၠန်ရောၚ် သာ်ဝွံ ညးတာလျိုၚ် သၟာကမၠောန် ရးမည နာဲကောတၠရတ် ဟီုရ။

ပ္ဍဲဂကောံပံၚ်ကောံ ပရေၚ်ဂကူမန် (MAU) ဂှ် ပံၚ်ကောံ ဒက်ပ္တန်လဝ် နကဵုသွာၚ်ဇၞော်ပန်သွာၚ်တုဲ အပ္ဍဲဂှ် ဗော်ဍုၚ်မန်တၟိ၊ ဗော်ပရေၚ်ဍုၚ်ကွာန် အပ္ဍဲဍုၚ်၊ ဂကောံမန် စိုပ်ဒေသပယျဵု ကေုာံ ဂကောံမန် စိုပ်ဍုၚ်သအာၚ်တံ ပါလုပ်ရ။