မာံအဲ – ညံၚ်ဟွံဂွံ ပလာပ်ပထုဲ ပေဲါရုဲမာဲမကၠောန်ဗဒှ် ပ္ဍဲတ္ၚဲယးဂှ် ဒပ်ပၞာန်ကရေၚ် ကေအေန်ယူ အာတ်မိက်လဝ်သြန် (၁၀) ကိုဋ်ၝာတ် နူကမ္မတဳ ဒပ်ပၞာန်စဵုဒၞာကွာန် (နယ်ခြားစောၚ့်တပ် ကော်မတီ) ဍုၚ်ကျာ်ပိရောၚ် ညးမစုက်လုက်ကဵု ကမ္မတဳ ဒပ်ပၞာန်စဵုဒၞာကွာန်မွဲတၠ ဟီုရ။
ပ္ဍဲဂိတုနဝ်ဝေမ်ပါ (၆) တ္ၚဲဏံဂှ် ဒပ်ပၞာန်ဗၠးၜး ကောန်ဂကူကရေၚ် ဒပ်မဟာ ၆ တမ်ဒပ် ၁၆ အာတ်မိက်လဝ်သြန်ဂှ်တုဲ ဂကောံဖောအ်ဗြေဝ် လတူဍုၚ်ကျာ်ပိ ကေုာံ ရယက ဍုၚ်ကျာ်ပိ မသုန်တြဴတၠတံ ဃောအာပ္ညဳပ္ညပ်မံၚ်ဖိုဟ်ရောၚ် ညးမပါလုပ် ပ္ဍဲဂကောံရယက လတူဍုၚ်ကျာ်ပိမွဲတၠ ဟီုရ။
“ၜိုတ် ကေအေန်ယူတံ အာတ်လဝ် စှ်ကိုဋ်ဂှ် ပိုဲကဵုဟွံမာန်ပုဟ်၊ ယဝ်ရၜိုတ် ပန် မသုန်ကိုဋ်တှေ် ပိုဲကဵုမာန်” သာ်ဝွံ ရယက ဂှ် ဟီုရ။
သွက်ဂွံကဵုသြန်ကဵု ကေအေန်ယူဂှ် လၟုဟ် ဂကောံအလဵုအသဳ လတူဍုၚ်ကျာ်ပိတံ ဗက်ပကောံမံၚ်သြန် ပ္ဍဲတၠပိုန်ဒြပ်တံတုဲ တၠပိုန်ဒြပ်ဇၞော်ဇၞော်တံဂှ် လ္ၚဵုဒးကဵု စဵုကဵုမွဲကိုဋ်ရောၚ် တၠပိုန်ဒြပ် လတူဍုၚ်ကျာ်ပိမွဲတၠ ဟီုရ။
“တၠပိုန်ဒြပ် ဍောတ်ဍောတ်တံဂှ်တှေ် ဒးကဵု မသုန်လက်ၝာတ်၊ ဆဂး ရယကတံ ဟီုဂှ် ကဵုသွက်အကံက် ကေအေန်ယူ ဏောဝ်၊ ကဵုသွက် ဟွံဂွံပလာပ်ပထုဲ ပေဲါရုဲမာဲ ဟွံသေၚ်ပုဟ်” သာ်ဝွံ တၠပိုန်ဒြပ်ဂှ် ဟီုရ။
ဍုၚ်ကျာ်ပိဂှ် ဒှ်ဍုၚ်ပယျဵုတုဲ ဒးကဵုမံၚ် အကံက်ကဵု ကေအေန်ယူ ဇၟာပ်ဇၟာပ်သၞာံရောၚ်၊ မွဲမွဲသၞာံမ္ဂး ဒးကဵုမံၚ်အကံက်ကဵု ဒပ်ပၞာန်ကရေၚ် ကေအေန်ယူ ၜိုတ်မသုန်ကိုဋ်တုဲ ဗက်ကံက်ကေတ်မံၚ် ပ္ဍဲသၟာပရေၚ်ပိုန်ဒြပ် ကေုာံ အကြာသ္ၚိသိုက်လောဲတံရောၚ် ကောန်ဍုၚ်ကျာ်ပိမွဲတၠ ဟီုရ။
စပ်ကဵု ကိစ္စ ဒပ်ပၞာန်ကေအေန်ယူ ဗက်သြန် ပ္ဍဲဍုၚ်ကျာ်ပိဏံတုဲ နူဌာန်ပရိုၚ်ဗၠးၜးမန် သၟာန်သၟုက်ရံၚ် ဒု-ဥက္ကဌ ကေအေန်ယူ ကီုလေဝ် ဟွံတီပရေၚ်ဏံရောၚ် ညးဟီုရ။
