ဌာန်ပရိုၚ်ဗၠးၜးမန် – ပ္ဍဲကဵုအခန်ကၞာတ္ၚဲကောန်ဂကူဗဟဵုသၞာံဏံ ကမ္မတဳကၠောန်ဗဒှ်တ္ၚဲကောန်ဂကူဗဟဵုတအ် ရန်တၟံကဵုကောန်ဂကူ ကောန်ဍုၚ်အရၚ်တအ် ဂွံတိုန်စိုပ်ဂကူစုၚ်တုဲ ကော်ဘိက်ဆဝ်ဗ္ၚုဟ်အာပ္ဍဲကဵုလိက်ပရိုၚ်ရောၚ် ကောံဓရီုတုဲကၠုၚ် မရနုက်ကဵုအလန်(၇)ဂှ် ဖျေံလဝ်သ္ဂုတ်သွာတ်ရောၚ် ဂကောံညးအုပ်ကာတ္ၚဲကောန်ဂကူဗဟဵုမွဲတၠ လဴကဵုရ။
သဘၚ်တ္ၚဲကောန်ဂကူအရိုဟ်ဟ်သၞာံတုဲကၠုၚ်ဂှ်မ္ဂး ပရေၚ်ကော်ဘိက်လဝ်ကောန်ဂကူစုၚ်ဂှ် ဟွံကေၚ်ကော်ဘိက် လဝ်မွဲလှေ်ဏီတုဲ သၞာံဏံမ္ဂး ဟိုတ်နူကဵုအကာဲအရာပရေၚ်ကောန်ဂကူကောန်ဍုၚ်အရၚ်တအ် ဒှ်အကာဲအရာတၟေၚ် တုဲ က္ဍိုပ်သ္ကိုပ်ကၠောန်ဗဒှ်တ္ၚဲကောန်ဂကူတအ် ချပ်ဇန်ကၠုၚ်ပရေၚ်ကော်ဘိက်က္ဍိုပ်သ္ကိုပ်ကောန်ဂကူကောန်ဍုၚ်တအ် ဒှ်ကၠုၚ်ရ။
“သၞာံတုဲကၠုၚ်ဂှ် က္ဍိုပ်သ္ကိုပ်စုက်ကဵုပိုဲ ဗီုကဵုက္ဍိုပ်သ္ကိုပ်ကရေၚ်တအ်ရ ကေၚ်ကော်ဘိက်လဝ် ညးတအ်လေဝ် တိုန်စိုပ် ကဵုအရိုဟ်ဟ်သၞာံရ၊ ဆဂး သၞာံဏံဏောဝ်ဟီုတှေ် ပိုဲကော်ဘိက်အလုံကောန်ဂကူမၞုံမံၚ် ပ္ဍဲကၟိန်ဍုၚ်ပိုဲတအ်ဖအိုတ် ရောၚ်”သာ်ဏံ ဂကောံညးအုပ်ကာ နူကၠၚ်ဏံ ဆက်လဴရ။
အစဳအဇန်ကော်ဘိက်ကောန်ဂကူကောန်ဍုၚ်အရၚ်ဂမၠိုၚ်ဂှ် သွက်ဂွံဆဝ်ဗ္ၚုဟ်အာ ပ္ဍဲလိက်ပရိုၚ်ဗၟာဂှ်လေဝ် ကဵုလဝ် တာလျိုၚ်ကဵု သွာၚ်လလောၚ်ပရိုၚ်ကီုရောၚ်ဂှ်လေဝ် ညးဆက်လဴကဵုပၠန်ရ။
ပ္ဍဲကောံဓရီုတ္ၚဲတုဲကၠုၚ်ဂှ် အစာသဝ်နာဲစောန်တၟး ညးမဒှ်ဂကောံကေၚ်ကာတ္ၚဲကောန်ဂကူဗဟဵုဂှ် ပ္တိုန်ထ္ၜးစပ်ကဵုပ ရေၚ်အလာံကၟိန်ဍုၚ်ကီုရ။ ညးဟီုဂှ် “ကာလတ္ၚဲကၠောံသၞာံ ကရေၚ်ကၠောန်အခန်ကၞာညးတအ်ဂှ် လ္တူစၚ်အခန်ကၞာဂှ် ညးတအ် ဟွံစုတ်ပ္တဴလဝ်အလာံကၟိန်ဍုၚ်ပုဟ်ဂှ် အဲဂွံဆဵုကေတ်၊ ကရေၚ်မှဟွံရှေ်သှေ်အလာံကၟိန်ဍုၚ်တှေ် ပိုဲမန်လေဝ် ဒးရှေ်သှေ်ဟာ အဲမိက်ဂွံကဵုချပ်၊ တုဲတှေ် အလာံတၟိဏံဂှ် ဂကောံဂၠးကဝ်ဂမၠိုၚ်လေဝ် ဟွံပလဝ်သမ္တီပုဟ်၊ မွဲသာ်ပၠန် ပ္ဍဲကဵုလိက်အုပ်သ္ဇိုၚ်သၞောဝ်ဥပဒေဍေံ ပိုဒ်လက္ကရဴအိုတ်ဂှ်ကျေဝ် အလာံဏံဂှ် ကာလစၠတ်ထဝ်မံက်တုဲ စၠတ်ထဝ် ကလေၚ်သ္ၚဳဂၠိပ်တုဲမှ သ္ပဒတန် ဂးလဝ်သာ်ဂှ်တှေ် ပိုဲလေဝ် ပ္ဍဲကဵုသဘၚ်တ္ၚဲကောန်ဂကူပိုဲ အလာံကၟိန်ဍုၚ်တၟိဏံ လ္ပ စုတ်တှေ် မုဒှ်” သာ်ဏံ အစာသဝ် ပ္တိတ်ဏါသၟာန်ကမ္မတဳဂမၠိုၚ်တုဲ ကမ္မတဳဂမၠိုၚ်လေဝ် ဒုၚ်တဲတုပ်စိုတ်ရ။
ယဝ်ဟွံစုတ်အလာံကၟိန်ဍုၚ်တၟိဂှ်မ္ဂး ဒုဥက္ကဌအစာသဝ်နာဲဟံၚ်ဍုၚ်ကလေၚ်ပ္တိုန်ထ္ၜးဂှ် ဂွိၚ်ဖေက်ဇီုကပါ်ကၠုၚ်ကဵု ကမ္မ တဳဂမၠိုၚ်တုဲ ဂွိၚ်ဖေက်တ္ၚဲကောန်ဂကူလီုဒှ်မာန်ညးဂးရ။
ရံၚ်ကဵုဂလာန်အစာသဝ်ဟံၚ်ဍုၚ် ပ္တိုန်ထ္ၜးဒှ်ဓဝိၚ်ကဵု ညးတၠ အဝဵုတအ် သ္ပပခက်ဒှ်ကၠုၚ်တုဲ ၜိုန်ညးဂမၠိုၚ်တုပ်စိုတ်ဟွံစုတ်အလာံကၟိန်ဍုၚ်တၟိဂှ်ကီုလေဝ် ဂလာန်တိုန်ကၠုၚ်ဂွိၚ် ဖေက်ခက်ဂးသာ်ဂှ်ဟွံဂတာပ် ပရေၚ်အစာသဝ်ပ္တိုန်ထ္ၜးဂှ် ဒးဒုၚ်ညိအာပၠန်ရ။
ကမ္မတဳကၠောန်ဗဒှ်တ္ၚဲကောန်ဂကူဂမၠိုၚ်ဂှ် ဒုၚ်ယၟုကၠောန်ပရေၚ်ကောန်ဂကူဟီုကၠာလေဝ် ညးက္ဍိုက်ကၠောန်ကမၠောန် ဗွဲမဂၠိုၚ်ဂှ် ဒှ်မံၚ်က္ဍိုပ်သ္ကိုပ်အစာပရေၚ်ဍုၚ်ကွာန်သၟးတုဲ ကမ္မတဳဗဟဵုတအ်ဖျေံကမၠောန်အရာအရာဂှ် တုပ်မံၚ်ကဵု ဗော် ပရေၚ်ဍုၚ်ကွာန်ဇၞော်ဇၞော်မွဲကီုရောၚ် ကမ္မတဳဗဟဵုမွဲတၠ အခါတ်အကာဲထ္ၜးရ။
