စၠန်ထဝ် – အဃော အသိၚ်ၚုဟ်ထၜိုတ်တိုန်မံၚ်ဂှ် တၠကၠအ်ထၜိုတ် ဍုၚ်သေံ ဒေသခရိုၚ်ဖာန်ၚါမ် ၜိုတ် (၃၀၀) တၠတံ ပလံၚ်ဗစိုပ်လိက် ဇရေၚ်သၟာကမၠောန် သွက်ဂွံယှုအ်ဖျေံ လှုဲရ။

ဗီုစွံသကှ်လဝ်ထၜိုတ်

ကၠာတေံ ပရအ်ကဵုမံၚ် ၆ ဂအုံ ၄ ဂအုံကီု ရဲဂွံအောန်နူဂှ်ကီု စနူဂိတု ဂျာန္နဝါရဳ ၂၀ ဂှ်တုဲ တၠကၠအ်ထၜိုတ်တံ ကေတ်ဟပဵုပတိုန် ၅ ၜါတ် သီုဖအိုတ်ရောၚ် ညးခွာတ်မံၚ်ထၜိုတ် ပ္ဍဲဒေသဖါန်ၚါမ် နာဲထောန်ဟီုရ။

“သွံထၜိုတ်တုဲ ဂွံ ၁၀၀ ၜါတ်တှေ် သေဌဳ ကေတ် ၆၀ ပိုဲဂွံ ၄၀ ၜါတ်၊ ဒၞာဲလ္ၚဵုဂှ်တှေ် ၆၅ ကဵု ၃၅ လေဝ် နွံမံၚ်၊ ကဵုဒၟံၚ်ဗီုဂှ်လၟိုန်ဂှ် လၟုဟ် သေဌဳတံ ကေတ်ဟပဵုထောံ ၅ ၜါတ်သီုဖအိုတ်၊ ကၠာတေံကေတ်မံၚ် ၆၀ တှေ် လၟုဟ် ကေတ်ထောံ ၆၅၊ ကေတ်မံၚ် ၆၅ ဂှ်တှေ် ကေတ်တိုန် ရ၀” သာ်ဝွံ နာဲထောန် ဟီုရ။

ယဝ်ရ ၚုဟ်ထၜိုတ်တိုန်ဒၟံၚ် မွဲကီလို ၁၀၀ ၜါတ် လ္ပာ်လတူမ္ဂး တၠကမၠောန်တံ ကေတ်အာဗီုဏံတုဲ ယဝ်ရ ၚုဟ်စှေ်အာ သၟဝ် ၁၀၀ ၜါတ်မ္ဂး အတိုၚ်ၚုဟ်တြေံဂှ် ကလေၚ်ကဵုပၠန်ရောၚ် ပ္ဍဲလိက်တၠကမၠောန်တံကဵုလဝ်ဂှ် ပါမံၚ်ရ။

လိက်ဂှ်ဝွံ ချူလဝ် နကဵု ဘာသာ ဗၟာ ကေုာံ သေံ ၜါဘာသာတုဲ သၟဝ်ဂှ် နကဵုစၟတ်တဲ သေဌဳတံ ပါမံၚ်ရ။

“ဗီုဗီုဏံ မုလှေ်လေဝ် ဟွံကေၚ်ဒှ်ကၠုၚ်ပုဟ်၊ အခိၚ်ၚုဟ်ထၜိုတ်ခိုဟ်မှ သ္ပဗီုဏံ၊ ဍေံတံ (သေဌဳ) တံ နူဍိုက်ကွဳလိုန်ဓါတ်ဂှ် လၟုဟ်ဍိုက်ကွဳစက်ကာမာန်၊ နူမံၚ်ဒၟံၚ် ပ္ဍဲကွာန်ဂှ် တိုန်အာမံၚ်ပ္ဍဲဍုၚ်မာန်ဂှ် ပိုဲတံကၠောန်ပစကဵုမံၚ်ဍေံ၊ လၟုဟ်ထၜိုတ်ၚုဟ်ခိုဟ်မွဲတဲဂှ် သ္ပဗီုဏံ စိုတ်ဟွံမိပ်မံၚ်ရ၊ ဆဂး ဇကုဂှ် အခေါၚ်ဟီုဟွံမွဲတှေ် ဒးမံၚ်အတိုၚ်ဏံရ၊ သောၚ်လှုဲမွဲဝါတှေ် ဂွံမံၚ် ၃၀၀၀ ၜါတ်ဂှ် လၟုဟ် ၂၀၀၀ ရဂွံ ပရေၚ်စသုၚ်ကြေတ်အာညိလေဝ်” သာ်ဝွံ နာဲထောန် ဟီုရ။

ပ္ဍဲဂိတု ဂျာန္နဝါရဳ ၁၀ ဂှ် ကၠအ်ထၜိုတ် ၂ ကၠအ်ဟေၚ် စထပိုတ်ကၠုၚ်ၚုဟ်ကီုလေဝ် လၟုဟ်ဂှ် ကၠအ်ထၜိုတ် ပ္ဍဲဒေသဖါန်ၚါမ်သီုဖအိုတ် သွက်ဂွံထပိုတ်ၚုဟ်ဂှ် ပလံၚ်လဝ်လိက်တုဲဒၟံၚ်ရ။

လၟုဟ်ၚုဟ်ထၜိုတ် မွဲကဳလဝ် ၁၆၀ ၜါတ်လ္ပာ်လတူ နွံမံၚ်တုဲ သွက်ဂွံတိုန် ဒဵုကဵု ၂၀၀ ၜါတ် နွံမံၚ်ရောၚ် သၟာကမၠောန်ခွာတ်ထၜိုတ် ပ္ဍဲဍုၚ်သေံတံ ဟီုမံၚ်အိုတ်ရ။

“ယဝ်ရ ဍေံတံထပိုတ်လေဝ် ဇကု မုဟီုဟွံဂွံမံၚ်ရ၊ ဇကုတိတ်အာတှေ် မၞိဟ်စိုပ်ကၠုၚ်ပၠန်ရ၊ ဟိုတ်ဂှ်ရ မုလေဝ် လ္ပဟီု ၜိုတ်ဂွံဂှ် ကၠောန်အာတှေ် ခိုဟ်အိုတ်ရ” သာ်ဝွံ သၟာကမၠောန် နူသူရာတ်ဌာန်နဳမွဲတၠ ဟီုရ။