စၠန်ထဝ် – သၟာဒယှေ်ဒွက်မန်ဒယှ် ပါမောက္ခဆာန် ဒယှေ်လဝ် ကဝးဓါတ်တၟိ မၞံုယၟု “နွံမံၚ်ဏီ” ဂှ် ပ္ဍဲဂိတုဂျာန္နဝါရဳ ၁၅ ဏံ တြးပတိတ်ဏာကဵု ပုရိသာတ်ကောန်ဂကူမန်တံရောၚ် ပါမောက္ခဆာန် ဟီုရ။
ကဝးတိတ်တၟိလၟုဟ်ဏံဂှ် ရန်လဝ် သွက်ဂွံပတိတ် ပ္ဍဲသၞာံ ၂၀၁၀ ကီုလေဝ် ဟိုတ်နူခက်ခုဲကဵု ပရေၚ်သြန်တုဲ ဒးလဇုဲအာရောၚ် ပါမောက္ခဆာန် ဟီုရ။
“ဒွက်ဂှ် စဳဇန်လဝ် တုဲတုဲမံၚ်ရ၊ ဒးဟီုတပ်ပ်တှေ် သြန်လေဝ်၊ လၟုဟ်တှေ် တၠမူ တိုၚ်ပ္ကဴကဵု စဴနာဲတံ ပတိတ်ကဵုသြန်တုဲတှေ် အာစာကၞေဟ် ဇာတိနာဲ စဳဇန်ကဵုလဝ်ရ” သာ်ဏံ ပါမောက္ခဆာန် ဟီုရ။
ၜိုန်ရ ညးတၞဟ် ကမၠက်မံၚ် ဂကူမန်ကီုလေဝ် ဂကူမန်ဂှ် ဟွံအိုတ်ဏီတုဲ နွံမံၚ်ဏီဖိုဟ်ရောၚ်ဂှ် ပံက်အဓိပ္ပါယ် ချူဇန်လဝ် ပ္ဍဲက္ဍိုပ်ကဝးဒွက် “နွံမံၚ်ဏီ” ဂှ်ရ။
“ယဝ်ရဟီုကဵု ပရေၚ်ကောန်ဂကူမန်တှေ် ဂကူမန်ပိုဲဂှ် ညးတၞဟ်ကမၠက်လေဝ် ဍေံဟွံကၠက်ပုဟ်၊ ဂကူပိုဲဂှ် နွံမံၚ်ဏီ၊ ဒးဟီုတှေ် နွံမံၚ်စုၚ်လေဝ်၊ အိုတ်ကၞောတ် ဒးသရောပ်တုဲဟီုတှေ် မန်ဂှ်ဟွံအိုတ်အာပုဟ် မန်ဂှ် နွံမံၚ်ဏီ၊ အဓိပ္ပါယ်ဍေံ ဗီုဂှ်” သာ်ဏံ ပါမောက္ခဆာန် ဟီုရ။
ၜိုန်ရကဝးကူဆာဲ ကဝ်ပဳ (copy) ပ္ဍဲခေတ်အေန်တာနိတ်ဏံ ဒယှ်မံၚ်တုဲ ရဲပတိတ်ကဝးတံ ပရဲဟွံမွဲကီုလေဝ် မိက်ဂွံပတိတ်ပရဲ ပရေၚ်ဂကူတုဲ မ္ဒးပတိတ်ကဝးဏံရောၚ် တၠမူ နာဲတိုၚ်ပ္ကဴ ဟီုရ။
“ခေတ်လၟုဟ်ဂှ် ခေတ်ကူဆာဲကဝးပတောံ ခေတ်ဍေံတဴတက်မံၚ်ဂှ်တီမံၚ်ရ၊ ပိုဲပတိတ်ကဝးမွဲဂှ် အဓိကဍေံ မၚ်စၟဳစပရဲတိတ် ဟွံသေၚ်ပုဟ်၊ အဓိကမၚ်စၟဳစ ပရဲအနုသုခုမ၊ မွဲပၠန်ဂှ် လတူဂကူပိုဲ ပိုဲဂွံဆဝ်မ္ၚုဟ်ဏာ၊ အဓိက ပိုဲကေတ်ပရဲ လတူဏံရဏောၚ်” သာ်ဏံ တၠမူ နာဲတိုၚ်ပ္ကဴ ဟီုရ။
ပ္ဍဲကဝးဓါတ် “နွံမံၚ်ဏီ” ဏံဂှ် ဒွက်ပရေၚ်ဆာန်လေဝ်နွံ၊ ပရေၚ်ဘဝလေဝ်ပါတုဲ၊ ပရေၚ်စိုတ်ဓါတ်ဆာန်ဂကူလေဝ် ပါမံၚ်ကီုရ။
ကဝးဓါတ် “နွံမံၚ်ဏီ” ဏံဂှ် သုၚ်စောဲလဝ် အခိုက်ကၠောန် (Tune) နကဵုအလဵုဇကုဖအိုတ်တုဲ ပါမောက္ခဆာန်ကဵု ဂမ္ဘဳဆာန်တံ ဒယှ်လဝ်ရ။ ပါမောက္ခဆာန် ဒယှေ်လဝ် ၈ ဒွက်၊ ဂမ္ဘဳဆာန် ဒယှေ်လဝ် ၄ ဒွက်တုဲ ဒွက်ဂကောံ ပါလုပ် မွဲဒွက်ရ။
ပ္ဍဲကဝးဂှ်တှေ် အ္စာကၞေဟ်ဒယှ်ခေမာနန်၊ ဗၠာဲမန်လွဳရတ်၊ ဒဏ္ဍာရဳ၊ ဇာတိနာဲ၊ မန်နာဲဆာန်၊ ပါရဂူဟံသာ၊ ပါမောက္ခဆာန်တံ ချူဇန်လဝ်ရ။