မိဂျူရဳဆာဲ၊ မိလျးထဝ် – သၞာံဏံဂှ် လပါ်ဂၠံၚ်ကျာ်ပိ မၞိဟ်လုပ်ဍုၚ်သေံအောန်တုဲ မၞိဟ်ကလေၚ်စဴ ဂၠိုၚ်နူသၞာံအာတေံရောၚ် ရဲပၠုပ်မၞိဟ်ဍုၚ်သေံ ကေုာံ ရဲဒဳကွဳစက်တံ ဟီုအိုတ်ရ။
ကွဳစက်ဂြိပ်မံၚ် ဂၠံၚ်ရေဝ်-ကျာ်ပိ မွဲဖဍိုက် ( ဗီု-ဌာန်ပရိုၚ်ဗၠးၜးမန် )
ဟိုတ်နူအကာဲအရာ ဂၠံၚ်ကျာ်ပိ ဟွံၜိုဟ်သြိုဟ်တုဲ မၞိဟ်လုပ်ဍုၚ်သေံ အောန်စှေ်အာရောၚ် ညးတံ ဟီုဆိၚ်ဆအိုတ်ရ။
“အရိုဟ်ဟ်သၞာံ စိုပ်အခိၚ်ဏံတှေ် သၟာကမၠောန် လုပ်ဍုၚ်သေံ မွဲအလန်တှေ် ဗဒါဲကၠံ ဒှ်မံၚ်၊ ပ္ဍဲသၞာံဏံဂှ် မွဲအလန်တှေ် ဂၠိုၚ်အိုတ် ၃၀ တၠ ဓဝ်ရ နွံ” သာ်ဝွံ ရဲပၠုပ်မၞိဟ်ဍုၚ်သေံမွဲတၠ မၞုံလ္တူဍုၚ်ကျာ်ပိ ဟီုရ။
မွဲမွဲတ္ၚဲ အောန်အိုတ် မၞိဟ်ကလေၚ်စဴ မၞုံၜိုတ် ၁၀၀ တၠတုဲ ဂၠိုၚ်မ္ဂး စဵုကဵု ၃၀၀ တၠ မၞုံရောၚ် ညးဆက်ဟီုရ။
တၠကွဳစက် ပၠုပ်ဒၟံၚ်မၞိဟ် ဍုၚ်သေံ နူဍုၚ်ကျာ်ပိမွဲတၠဂှ်လေဝ် “သၞာံဏံ မၞိဟ်ဂွံဂၠိုၚ် အိုတ်အစောန် ဟွံဒှ်ရ၊ အခိၚ်ကၠာတေံ မွဲလတုန်တှေ် ပိုဲပ္ဍိုက်ဂွံဒၟံၚ် မၞိဟ် ၃၀ တၠ ဒှ်မံၚ်၊ လၟုဟ်ဂှ် ၁၂ တၠ ဂၠိုၚ်အိုတ်ရဏောၚ်” ဟီုသာ်ဂှ်ရ။
နူအပ္ဍဲဍုၚ်မန် အာပယျဵုကျာ်ပိတေံမ္ဂး ဂၠံၚ်ရေဝ်-ကျာ်ပိ၊ ဇြပ်ဗု-ကျာ်ပိ၊ လှာဒကှ်-ကျာ်ပိ မၞုံ ၄ တၞုၚ်တုဲ သၞာံဏံဂှ် ဂၠံၚ်ရေဝ်မွဲဟေၚ် အာကၠုၚ်ဂွံရ။ ဂၠံၚ်သၟေဟ်တံဂှ် ဟိုတ်နူဒပ်ပၞာန်ဗၟာတံ ထပက်မံၚ်ပၞာန်ကဵု ညးတံတုဲ ဒပ်ပၞာန်ကရေၚ်တံ ကၟာတ်လဝ်ဖအိုတ်ရ။
ပၞောဝ်ကဵုဂၠံၚ်ပန်တၞုၚ်ဝွံ ဂၠံၚ်ဇြပ်ဗုဂှ် တရဴကြပ် တိဗလးခိုဟ်တုဲ ညးအာကၠုၚ်ဂၠိုၚ်ရ။ ဟိုတ်နူဂၠံၚ်ကၟာတ်အာတုဲ ရဲဒဳကွဳစက် ဂၠံၚ်ဇြပ်ဗုတံ ဗွဲမဂၠိုၚ် ပြံၚ်ကၠုၚ် လပါ်ဂၠံၚ်ရေဝ်တုဲ ဓရိပ်ကွဳစက်အိုတ်ရ။
ဂၠံၚ်ရေဝ်-ကျာ်ပိဂှ် သၞာံတုဲကၠုၚ်တေံ ခရိတ်ကွဳစက် ညးမွဲတၠ ဒးကဵု ၅၀၀ ၝာတ် (သြန်သေံ) ကီုလေဝ် ဟိုတ်နူဂၠံၚ်တၞဟ် ဟွံပံက်တုဲ သၞာံဏံဂှ် ခရိတ်ကွဳစက် ဒှ်အာ ၁၀၀၀ ၝာတ်ရောၚ် ဂွံတီကေတ် နူညးအာတရဴတံရ။
ဂၠံၚ်ရေဝ်ဂှ် ဇြဟ်ဒဵုဂၠိုၚ်တုဲ အာကၠုၚ်ဝါတ်ဂါတ် နူဂၠံၚ်တၞဟ်တၞဟ်ဂှ်ရ ကွဳစက်ဗကပ်မံၚ် မွဲနှေံမွဲနှေံရ။ ပ္ဍဲသၞာံ ၂၀၁၁ ဏံဂှ် ကွဳစက်ဗကပ်အာ ပန်ဝါတုဲ မၞိဟ်ချိုတ်အာ ၃ တၠ၊ ဒးအာဝပ် ၂၀ တၠပြၚ်ရ။
