မိစၠန်ထဝ် – သဘၚ်ပတန်ကွာန်ခအံၚ်ကြေဟ် ပေၚ် (၁၀၀) သၞာံဂှ် တ္ၚဲဏံ ကၠောန်ဗဒှ်ဏာ သဘၚ်ဇၞော်ဇၞော် ဗွဲမမိပ်လဟိၚ်ရ။
ကြဴနူကျာ်ဇၞော်အာစာတၠဂမၠိုၚ် ပံက်အခန်ကၞာဂှ် ကဵုဒါန်ဖါပ်သၚ် ကုခမဳသၚ် မနိမန်နၚ် နူဒေသမန်နာနာ (၃၀၀) ဇကုတုဲ စရိုဟ်ဍာ်အိုတ်ရ။ ညးဒေသ နူပွဳပွူတံဂှ်ကီု ညးဒေသမန် နူကွာန်နာနာတံကီု လၟိဟ်ၜိုတ်မွဲလက်ပြၚ် တိုန်စိုပ်သဘၚ်ကၞာတုဲ နူဂကောံယေန်သၞာၚ်မန်လေဝ် ဒယှေ်လဟိၚ်မံၚ် ပ္ဍဲသဘၚ်ပံက် အခန်ကၞာဏံဂှ် ဂွံဆဵုကေတ်ရ။
ကွာန်ခအံၚ်ကြေဟ်ဝွံ မဒှ်ကွာန်မန်ကီုလေဝ် နူအခိၚ်ကာလ လက်ထက်အလဵုအသဳဗၟာ (မဆလ) တေံ ပါ်တိဍာ်တေံဂှ် ပါလုပ် အပ္ဍဲပွိုၚ်ဍုၚ်ကအ်ကြိအ် တွဵုရးကရေၚ်ရ။
နူဂိတုဖဝ်ရဂိုဏ် ၁၁ စွေက်တေံ စကၠောန်သဘၚ်ဓရ် ပွိုၚ်မသုန်တ္ၚဲတုဲ ကြဴဂှ် ပၠုပ်ပေဲါဇာတ်ဗၟာ ၜါဗ္တံ၊ ဂဳတမန် ၜါဗ္တံရ။ လၟုဟ် ပၠုပ်မံၚ် ပေဲါဇာတ်မန် ၜါဗ္တံပၠန်တုဲ ဝေၚ်မံၚ်သဘၚ် ဟွံအိုတ်ဏီရ။
ကွာန်ခအံၚ်ကြေဟ်ဝွံ ပ္ဍဲလက်ထက်အၚ်္ဂလိက် အုပ်ဓုပ်ဍုၚ်ပိုဲ နူသက္ကရာဇ်ဍုၚ် (၁၂၇၂) တေံဂှ် ညးမဒှ် က္ဍိုပ်သကိုပ်မန် အပါဇၞော် မၞုံယၟု နာဲဂျ ပတန်လဝ်ကွာန်ရ။ အခိၚ်စပ္တန်ကွာန်ဂှ် မၞုံသ္ၚိ (၁၂) မဟေၚ်ရ။
လၟုဟ် ပ္ဍဲကွာန်ခအံၚ်ကြေဟ် သ္ၚိဒှ်ကၠုၚ် (၆၀၀) မပြၚ်တုဲ လၟိဟ်မၞိဟ် မၞုံ (၃၀၀၀) ပြၚ်ရ။ ကောန်ကွာန် ဗွဲမဂၠိုၚ်တံဂှ် လွဳလမျီု နကဵုကမၠောန်ဝါဗ္ၚ၊ ကမၠောန်ကၠအ်သွဝ်တုဲ လ္ၚဵုတံဂှ် အာကၠောန်စ ပ္ဍဲဍုၚ်သေံ ကေုာံ ဍုၚ်သအာၚ်နာနာရ။
ကောန်ကွာန်ဖအိုတ်တံဂှ် ရှေ်သှေ် လျုၚ်ပတှေ်တဴ ဗုဒ္ဓဘာသာအိုတ်ရ။