ဂျူရဳဆာဲ – ရန်ကဵုဘာကောန်ဂကူမန် ညံၚ်ဟွံဂွံလီုအာကီု၊ သ္ဂောံတန်တဴအာ ဍာ်ဇမၠိၚ်မာန်ကီုတုဲ ပ္ဍဲဂိတုဂျုန်ဏံမံက်မ္ဂး ပ္ဍဲဘာတန်လှုၚ် ကောန်ဂကူမန် ပိဒၞာဲဂှ် ပံက်အာ ဘာၜက်တန်စှ် (Post Ten) ရောၚ်ဂှ် ဂွံတီကေတ် နူကမ္မတဳ ဌာနပရေၚ်ပညာရ။

ကွးဘာတန်ဒေါဝ် ဘာကောန်ဂကူမန် ကွာန်တၟိတဴတက် ရေဝ်သၠုၚ်ကျာ ( ဗီု-ဌာန်ပရိုၚ်ဗၠးၜးမန် )

ပ္ဍဲဂိတုအေဗရာ ၃-၄-၅ ပွိုၚ်ပိတ္ၚဲဂှ် ကမ္မတဳ ပရေၚ်ပညာ ကောန်ဂကူမန် ကောံဓရီု ပ္ဍဲဗဒိုပ်ညဳသာ တိဍာ်ဗော်ဍုၚ်မန်တၟိတုဲ ပ္ဍဲဌာနဘာတန်လှုၚ်ပိ မတွံဂး ဗဒိုပ်ညဳသာ၊ အၚ်ဒၚ်၊ ဝၚ်သပဝ်တံဂှ် မွဲမွဲဌာန ဒုၚ်တဲလၟိဟ်ကွးဘာ ၂၀ တၠတုဲ ပံက်အာဘာရောၚ် ဖျေံကၠုၚ်သ္ဂုတ်သွာတ်ရ။

“ကၠာတေံဂှ် ပံက်ကၠုၚ် ပ္ဍဲညဳသာမွဲဒၞာဲဓဝ်၊ လၟုဟ်ဂှ် ဂွံသၠုၚ်ပတိုန် ပရေၚ်ပညာ ဘာကောန်ဂကူပိုဲတုဲ ထပ်ပံက်ဘာဏံ ၜါဒၞာဲပၠန်။ ညံၚ်ဂွံပံက်အာ လၟေၚ်လၟေၚ်သၞာံမာန်ဂှ် ပိုဲတံ ဖျေံလဝ်အစဳအဇန်နွံ” သာ်ဝွံ ညးမလုပ်ဂကောံ ကမ္မတဳ ဌာနပရေၚ်ပညာ ကောန်ဂကူမန် နာဲအာဲကောံ ဟီုရ။

စပ္တံနူသၞာံဗ္တောန်ပညာ ၂၀၀၀ -၂၀၀၁ တေံတုဲ ပ္ဍဲဗဒိုပ်ညဳသာမွဲဟေၚ် ပံက်ကၠုၚ်လဝ် ဘာ Post Ten တုဲ နူဂိတုဂျုန် စဵုဂိတုမာတ်ချ် မွဲသၞာံ ပွိုၚ် ၁၀ ဂိတု ဗ္တောန်ကၠုၚ်ရ။

ဘာ Post Ten သၞာံပထမတုဲမ္ဂး ရုဲစှ်ကွးဘာတုဲ ပတိုန်ဏာ ရုၚ်ဌာနပရေၚ်ပညာ ကောန်ဂကူမန် မၞုံအပ္ဍဲဝၚ်္က (ဍုၚ်သေံ) သွက်သ္ဂောံ ဆက်ဗ္တောန် ပညာ သွက်သၞာံဒုတိယရ။

ကွးဘာ ဘာတုဲတံဂှ် ဒးကလေၚ်ကေတ်တာလျိုၚ် သၟဝ်ဌာနပရေၚ်ပညာ ကောန်ဂကူမန် ပွိုၚ် ၂ သၞာံရ။

ကိုပ်ကၠာနူ ဟွံပံက်ဘာ Post Ten ဏီ ပ္ဍဲဂိတုမေဏံမံက်မ္ဂး သွက်အာစာဘာ၊ အာစာဗြဴ ဘာကောန်ဂကူတံဂှ် ပံက်အာဘာ သၠုၚ်ပတိုန်ဍာ်ဒကေဝ် ဘာသာအေၚ်္ဂလိက် ပွိုၚ်မွဲဂိတုရောၚ် ဂွံတီကေတ်ရ။

ဌာနပရေၚ်ပညာကောန်ဂကူမန်ဂှ် နူသၞာံ ၁၉၇၂ တေံ စဗ္တောန်ကၠုၚ် လိက်ပတ်မန်တုဲ ပ္ဍဲသၞာံ ၁၉၈၄-၈၅ ဂှ် ဒက်ပတန်ကၠုၚ် ဂကောံသၟတ် ပရေၚ်ပညာ ဗဟဵုရ။

အတိုၚ်ဌာနပရေၚ်ပညာ ကောန်ဂကူမန် ပတိတ်လဝ်စရၚ် ပ္ဍဲသၞာံ ၂၀၁၀ ဂှ်မ္ဂး ဘာဗ္တောန်လိက်မန် မၞုံ ၂၇၂ ဘာတုဲ သၟဝ်ဌာနပရေၚ်ပညာ ကောန်ဂကူမန် ဘာကောန်ဂကူ မၞုံ ၁၅၆ ဘာ၊ ဘာပံၚ်တောဲကဵု ဌာနပရေၚ်ပညာ အလဵုအသဳဗၟာ မၞုံ ၁၁၆ ဘာရ။

ကွးဘာ ဗ္တောန်လိက်မန် ပ္ဍဲဘာကောန်ဂကူ မၞုံ မွဲလက်ဘာ်ပြၚ်တုဲ ပ္ဍဲဘာပံၚ်တောဲမၞုံ ၜါလက်ပြၚ်ရ။

ၜိုန်ဒေံါပန်ပှော် လီုအာကီုလေဝ် ဘာကောန်ဂကူမန် မၞုံအပ္ဍဲဍုၚ်တေံဂှ် ဆက်စွံအာ သၟဝ်ဌာနပရေၚ်ပညာ ကောန်ဂကူမန်ပၠန်ရောၚ် ဖျေံလဝ်သ္ဂုတ်သွာတ် ပ္ဍဲကောံဓရီု ကမ္မတဳ ပရေၚ်ပညာ ကောန်ဂကူမန်ဂှ်ရ။