မိလျးထဝ် – ဂကောံယေန်သၞာၚ်မန် ဟံသာဝတဳ မတန်တဴ ပ္ဍဲဍုၚ်သၚ်ခလပူရဳ ကေုာံ ဂကောံယေန်သၞာၚ်မန် ဓံၚ်ဖါဘုမ် ခရိုၚ်ကာန်ချနပူရဳတံဂှ် ပ္ဍဲဂိတုမေ ရ ဏံ ဂွံအခေါၚ် ထ္ၜးပျး ယေန်သၞာၚ်မန် ပ္ဍဲတက္ကသိုလ် မဟဳဍောန် (Mahidol) ဍုၚ်သေံ ကုဂကောံဆက်စၠောံ ကွးဘာတက္ကသိုလ် အာဇြဳယာန် (AUN) (Asian Universtiy Network) ရ။
ဂကောံယေန်သၞာၚ်မန် ဟံသာဝတဳ ( ဗီု-AUE MON)
ဂကောံဆက်စၠောံ ကွးဘာတက္ကသိုလ် အာဇြဳယာန်တံဂှ် ဇၟာပ်ဇၟာပ်သၞာံ ကၠောန်ဗဒှ်မံၚ် သဘၚ်သဳကၠဳ သၠာဲဂတးလညာတ် စပ်ကဵုပရေၚ်ပညာ ပ္ဍဲဍုၚ်လုပ်ဂကောံအာဇြဳယာန် မွဲမွဲဍုၚ်ရ။
သၞာံဏံဂှ် စိုပ်အလန် ဍုၚ်သေံ ဒးတာလျိုၚ် ဘာတက္ကသိုလ် မဟဳဍောန် (Mahidol)၊ ကၠောန်ဗဒှ် ပ္ဍဲဒၞာဲဗျူလၟေၚ် သာဲထာန်အာဲယာ ဍုၚ်သာဲယော် ခရိုၚ်ကာန်ချနပူရဳ နူဂိတုမေ ၂ စဵုစိုပ် ဂိတုမေ ၈ တုဲ နူဘာတက္ကသိုလ်ဂှ် ကော်ဘိက်ကၠုၚ် ဂကောံယေန်သၞာၚ်မန် ၂ ဂကောံဏံရ။
ပ္ဍဲဂကောံဆက်စၠောံ ကွးဘာတက္ကသိုလ် အာဇြဳယာန်ဂှ် နူဍုၚ်လုပ်ဂကောံ အာဇြဳယာန် ၁၀ ဍုၚ် ကေုာံ ဍုၚ်ကဝ်ရဳယျာ သၠုၚ်ကျာ၊ ဍုၚ်ဂျပါန် ကေုာံ ဍုၚ်ကြုက်တံလေဝ် ပါလုပ်အိုတ်တုဲ နူဍုၚ် ၁၃ ဍုၚ်ဘာတက္ကသိုလ် ၂၅ ဘာဂှ် ညးစၞးကွးဘာ ကေုာံ အာစာ ၜိုတ် ၁၀၀ တၠ ပါလုပ်အိုတ်ရ။
နူဂကောံယေန်သၞာၚ်မန် ဟံသာဝတဳ လၟိဟ်မၞိဟ် ၂၅ တၠတံဂှ် နကဵုကပေါတ်ကွိၚ်ကွိုက်မန်နာနာတံကီု နူဂကောံယေန်သၞာၚ် ဓံၚ်ဖါဘုမ်ဂှ် လၟိဟ်မၞိဟ် ရ တၠတံကီု ထ္ၜးပျး လှေ် ဒယှေ် တိၚ်တိုက် ပွိုၚ်ၜိုတ် ၃ နာဍဳကီုရ။
“ဂွံအာထ္ၜးပျးကဵု ကွးဘာအာဇြဳယာန်တံဂှ် မိပ်စိုတ်တၟာဂလိုၚ်၊ မုဟိုတ်ရောဟီုတှေ် နူကဵုဍုၚ်ဗွဲမဂၠိုၚ် ကောန်ဂကူဗွဲမဂၠိုၚ်တံ ဂွံတီညာတ်အာ အခိုက်ကၞာယေန်သၞာၚ်မန်ပိုဲ။ ညးတံလေဝ် စိုတ်လုပ်စဗွဲမဂၠိုၚ်တုဲ ဒုၚ်တၠုၚ်ပိုဲကီု” သာ်ဝွံ ညးကောပ်ကောဲ ဂကောံယေန်သၞာၚ်မန် ဟံသာဝတဳ မိသုရိယျာ ဟီုရ။
ဂကောံယေန်သၞာၚ်မန် ဟံသာဝတဳဝွံ နူသၞာံ ၂၀၁၀ တေံဂှ် ကော်ဘိက်နၚ် အာစာ ကွိၚ်ကွိုက်ယေန်သၞာၚ်မန် နာဲထဝ်ပေၚ်၊ နာဲမန်သိၚ် ကေုာံ အာစာဗြဴ ဗ္တောန်လှေ်ဒယှေ် မိမြဟ်သန်တံတုဲ ကတ်လ္ၚတ်ကၠုၚ် ကွတ်လှေ် ဒယှေ် တိၚ်တိုက်အိုတ်ရ။
