ဌာန်ပရိုၚ်ဗၠးၜးမန် – ပ္ဍဲဍုၚ်ကျာ်ပိ ဒၞာဲဗွဲမဂၠိုၚ်ဂှ် ဗဝ်လဝ်ကလောံဗကောဝ်အရိုၚ်တုဲ ကောန်ဍုၚ်ကျာ်ပိတံ ဂွိၚ်ဖေက် ဒးဓါတ်ဂျိဗကောဝ်အိုတ်ရ။
ဗကောဝ်အရိုၚ် ဗဝ်စွံလဝ် ပ္ဍဲဍုၚ်ကျာ်ပိ သွက်သ္ဂောံပလံၚ်ပတိတ် ဍုၚ်သေံ (ဗီု-ဌာန်ပရိုၚ် ဗၠးၜးမန်)
ကုမ္ပဏဳ ခဲါဗကောဝ်တံဂှ် နူတိဍာ်ကေအေန်ယူ ခဲါၜံက်ကေတ်နၚ်ဗကောဝ်တုဲ ကၠုၚ်ဗဝ်စွံလဝ် ပ္ဍဲဍုၚ်ကျာ်ပိ ၜိုတ် ၈ ဗွဝ်ရောၚ် ကောန်ဍုၚ်ကျာ်ပိတံ ဟီုရ။
ပ္ဍဲတိဍာ် ကေအေန်ယူ မပ္တံကဵု ကုမ္ပဏဳ (အောၚ်မြေ)၊ (သပြု)၊ (မြသန်း)၊ (ရေႊးထူး)၊ နဝရတ်တံ ခဲါပတိတ်မံၚ် ဗကောဝ်အိုတ်တုဲ သွက်သ္ဂောံပလံၚ်ပတိတ် ဍုၚ်သေံဂှ် ဗဝ်စွံလဝ် ပ္ဍဲဍုၚ်ကျာ်ပိရ။
“ကရပ်ဘာဒယိုၚ်ကၠံဂှ် ဗဝ်လဝ် ဂၠိုၚ်အိုတ်ရ။ နွံၜိုတ် မသုန်ကၠံ၊ တြဴကၠံရိုက်ဏောၚ်” သာ်ဝွံ ကောန်ဍုၚ်ကျာ်ပိမွဲတၠ မၞုံအပ္ဍဲ အရာပ် ၃ မွဲတၠ ဟီုရ။
ကမၠောန်ခဲါၜံက် ဗကောဝ်ဏံဂှ် လောန်ကၠုၚ် နူသၞာံ ၂၀၀၃ – ၂၀၀၄ တေံ နူကဵုကုမ္ပဏဳ ကၠောန်ဗကောဝ် မၞုံယၟု (သပြု) ဂှ် စကၠောန်ပတိတ်မံၚ်တုဲ ကၠောန်လဝ် ရုၚ်စက်သအးဗကောဝ် ပ္ဍဲအရာပ် ၄ ဍုၚ်ကျာ်ပိရ။
ဟိုတ်နူဍာ်ဇီတိတ်ကၠုၚ် နူဗကောဝ်တုဲ ပလိုၚ်၊ ဍာ်ကၟာ မၞုံအပ္ဍဲဍုၚ်ကျာ်ပိတံဂှ် ဒးဓါတ်ဂျိတုဲ က၊ တိရစ္ဆာန်တံ ချိုတ်ကၠုၚ်ကီု၊ မၞိဟ်တံဂှ်လေဝ် ဒှ်ယဲဝေဒနာ ဂၠိုၚ်ကၠုၚ်ကီုဂှ်ရ ပ္ဍဲသၞာံ ၂၀၀၅ ဂှ် အလဵုအသဳတံ ကၟာတ်ထောံ ရုၚ်စက်သအးဗကောဝ်တံဂှ်ရ။
“အခိၚ်တေံဂှ် ရုၚ်စက်သအးဗကောဝ် နွံမံၚ် ပ္ဍဲဍုၚ်ကျာ်ပိတှေ် အန္တရာဲဇၞော်ကွေံကွေံ၊ ကလေဝ် ချိုတ်၊ မၞိဟ်တံဂှ်လေဝ် ဇကုဇကောဝ် ခၞော်၊ က္ဍိုပ်ဂိ၊ ဇိုၚ်တဲဂိ ဒှ်ကၠုၚ်နာနာသာ်။ ဟိုတ်ဂှ်ရ အာစာဂဥုဲတံဂှ် အာတ်မိက်ကၠုၚ် အလဵုအသဳတံတုဲ ကၟာတ်ကၠုၚ်ကမၠောန်ဗကောဝ်ဏံ” သာ်ဝွံ ကောန်ဍုၚ်ကျာ်ပိဂှ် ဟီုရ။
ဗကောဝ်အရိုၚ်ဗွဝ်လဝ် ပ္ဍဲဍုၚ်ကျာ်ပိလၟုဟ်ဂှ် သအးပ္ဍဲဍုၚ်ကျာ်ပိ ဟွံသေၚ်တုဲ သွက်သ္ဂောံပလံၚ်ဏာ ဍုၚ်သေံဂှ် ဖျေံစွံလဝ် မွဲချိုန်ခဏကီုလေဝ် ဟိုတ်နူဒးဒုၚ်လဝ် ဘဲဒဏ်ကၠာတေံဂှ်ရ ကောန်ဍုၚ်ကျာ်ပိတံ ဖေက်လကိုတ်မံၚ် အန္တရာဲ ဂျိသကောဝ်အိုတ်ရ။
0 Comments