နာဲမာန် – အပ္ဍဲရးဍုၚ်မန်ဂှ် သွက်ရဲဝါဗ္ၚတအ် ဒှ်အခက်အခုဲကဵု ပရေၚ်ဂၠာဲ ကောန်ကမၠောန်ဝါတ် ဇၞော်ကဵုဇြဟတ်ကီုလေဝ် ကပေါတ်စက် ခေတ်တ္ၚဲဏံဂှ် ဒှ်အထံက်အပၚ်ကဵု ပရေၚ်ဂၠာဲကောန်ကမၠောန်ဝါတ် သွက်ရဲဝါဗ္ၚတအ် တၟာဂလိုၚ်ရ။
ဃောရဲၚမွဲတၠ ပ္ဍိုက်ဇက်မံၚ်ဆံက်နကဵုကွဳဂၠဴ ( ဗီု-ဌာန်ပရိုၚ်ဗၠးၜးမန်)
ရဲဝါဗ္ၚတ္ၚဲဏံဂှ် သုၚ်စောဲ ပ္ဍဲကမၠောန်ဝါဗ္ၚဂှ် သုၚ်စောဲကပေါတ်စက် ဂတာပ်ခေတ် ဖအိုတ်တုဲ ညးကၠောန်ကဵု ပြေၚ် ဂၠဴ အလေံတြေံဂှ် ကြပ်ဟွံမွဲအိုတ်ရ။ ဟိုတ်နူသုၚ်စောဲကၠုၚ် ကပေါတ်စက် ဂတာပ်ခေတ် ဖအိုတ်တုဲ ကောန်ကမၠောန်ဂှ်လေဝ် ဟွံဒးဂၠာဲ ဗီုခေတ်ကၠာတေံ လၟိဟ်ဂၠိုၚ်ၚ်ရ။
“ကၠောန်ဗ္ၚ ခေတ်တ္ၚဲဏံဂှ် ကောန်ကမၠောန် ဂၠာဲဝါတ်လေဝ် မုဂွံဒှ် အခက်အခုဲရော ၊ ဝါဗ္ၚ ၜိုတ် (၁၀) ဨက (၂၀) ဨကဏံ ဇကုမွဲဓဝ်လေဝ် ထဲကဵု စက်ထဲတိ မွဲမတှေ် ကၠောန်ကေတ်မာန်မံၚ်လေဝ်။ ကပေါတ်စက် ဂတာပ်ခေတ် တိတ်မံၚ် လၟုဟ်ဏံ သက်သာခိုဟ်ကွေံကွေံဏောဝ်” သာ်ဏံ တၠဝါဗ္ၚ ရဲကွာန်ကၟာဝက် ပိုၚ်လဝ်တိဗ္ၚ (၅၀) ဨက မွဲတၠဂှ် လဴကဵုရ။
ညးတၠတိဝါဗ္ၚ ရာန်ကပေါတ်စက် ထဲတိ ဟွံမာန်တအ်ဂှ်မ္ဂး လိၚ်ကော်နၚ် စက်ထဲတိတုဲ ကဵုဇိက် ဝါဗ္ၚဇကုအိုတ်ရ။ လိၚ်စက်ထဲတိဂှ် မွဲဨက သီုထဲ သီုဇိက်မ္ဂး ဒးကဵု (၆) လက်ဒကေဝ်ရ။
“ကၠေၚ်ၚုဟ်တိုန်မှ ၚုဟ်ပဵုတိုန်ညိ” သာ်ဏံ တၠဝါဗ္ၚ နူကွာန်ပ္ၚ ပွိုၚ်ဍုၚ်ဇြပ်ဗုမွဲတၠ လဴကဵုရ။
သၟာကမၠောန် အပ္ဍဲရးဍုၚ်မန် ဗွဲမဂၠိုၚ်ဂှ် တိတ်ကၠောန်စ ဍုၚ်မ္ၚး ဍုၚ်သေံ ဂၠိုၚ်လောန်တုဲ ကောန်ကမၠောန် အပ္ဍဲဍုၚ်မန်ဂှ် ဒဵုကဵု ဟွံမွဲ ဒှ်ကၠုၚ်ရ။
“ကၠောန်ဗ္ၚ ခေတ်တ္ၚဲဏံဂှ် ထဲကဵုစက်၊ ပၠောကဵုစက်၊ ဗ္တမ်ရ ဒးဗ္တမ်မံၚ်ကဵုတဲ၊ စက်ရတ်သြောံလေဝ် တိတ်ယျ၊ ဆဂး ဟွံဂၠိုၚ်ဏီပုဟ်၊ ဖရဳသြောံလေဝ် ဟွံဒးဖရဳကဵုမၞိဟ်ရ။ ကပိုက်ကဵုကျာစက်လေဝ် ဒှ်ကၠုၚ်ယျ။ ခေတ်စက် မံက်ကၠုၚ်ဂှ် သွက်ပိုဲ ရဲဗ္ၚတအ် သက်သာ တၟာဂလိုၚ်” သာ်ဝွံ တၠဝါဗ္ၚ နူပွိုၚ်ဍုၚ်မုဟ်ဍုၚ်ဂှ် ဟီုပၠန်ရ။
စက်ကြုက် ကၠောန်ဗ္ၚ မွဲစုမ်မ္ဂး သီုၝောံ ကွဳစက်၊ ထဲၜါစုမ် ကဵု ဍိုပ်ၜါစုမ်ဂှ် ၚုဟ်လၟုဟ် မၞုံအကြာ (၃၄) ကိုဋ်ရ။ ယဝ်ရာန် စက်ထဲတိ သက်သက် ကွဳစက် သွက်ဂွံဇက်စ ဟွံပါမ္ဂး ဒးကဵု အကြာ (၁၅) ကိုဋ် ပြၚ်ရ။
ပွိုၚ်မွဲတ္ၚဲ ယဝ်ဇိက်ထဲကဵု စက်မ္ဂး သီုထဲ သီုပရောပ် (ဒဵုကဵုဗ္တမ်ဂွံ) ဂှ် ဇိက်ဂွံ အကြာ မွဲဨကပြၚ် ကြပ်ၜါဨကရ။ ယဝ်ဇိက်ထဲကဵု ပြေၚ်ဂၠဴမ္ဂး ထဲတိသၟး မွဲတ္ၚဲ ဂွံဂွံမွဲဨကဂှ် ဝါတ်ဗွဲမလောန်ရောၚ် သၟာဗ္ၚ နူပွိုၚ်ဍုၚ်ဇြပ်ဗု မွဲတၠပၠန်ဂှ် ဟီုလဴရ။
တၠကမၠောန် ခေတ်တ္ၚဲဏံဂှ် ကၠောန်ကၠအ်လေဝ် ဗါ်ရာပ်ကဵုစက်တုဲ ဟွံဒးဂၠာဲ ကောန်ကမၠောန် ရဲဗါ်ရာပ်တအ် လၟိဟ်ဂၠိုၚ်ဂၠိုၚ် ဗီုကၠာတေံရ။
