ဌာန်ပရိုၚ်ဗၠးၜးမန်
ဂကောံပံၚ်ကောံ ပရေၚ်ကောန်ဂကူမန် သွာၚ်ဓမံက်ပတိုန် ဂကောံမှာဇန်တံ ဖတိုက်ဖအောဝ်ကၠုၚ်တုဲ နကဵုဂကောံပံၚ်ကောံ လိခ်ပတ်ယေန်သၞာၚ်မန် သွက်ဂွံတြးပတိတ်ဏာ လိခ်ကဵုပညာ ပရေၚ်ဂဥုဲၜူမာဲ နွံရောၚ် ဂွံတီကေတ်ရ။
ဂိတုဂျူလာၚ်ဏံမ္ဂး သွက်ဂွံကၠောန် ပေါဲကောံဓရီုကေၚ်ကာ ဂကောံပံၚ်ကောံ လိခ်ပတ်ယေန်သၞာၚ်မန် နွံမံၚ်တုဲ စပ်ကဵုပရေၚ်တြးပတိတ် လိခ်ဏံဂှ် သွက်ဂွံဖျေံအာဗီု ပရေၚ်ကမၠောန် ချိုတ်တ်ပၠိုတ်တ် နွံမံၚ်ရောၚ် သာ်ဝွံ ညးမဒှ်နာယက နာဲပါန်အံၚ် (မတ်မလီု) ဂှ် ဟီုရ။
သၟတ်မန်တန်တဴမံၚ် အပ္ဍဲတွဵုရးမန်တံ ဗွဲမဂၠိုၚ် ခါလၟုဟ် သုၚ်စောဲဒၟံၚ် ဂဥုဲချေံ ဂၠိုၚ်တိုန်မံၚ်တုဲ ဒဂေတ်ပဋိပတ် လီုလာ်ဒၟံၚ်ဂှ် ဂွံဆဵုညာတ်ကၠုၚ်ဂှ်ရ ဒးဖတိုက်ဖအောဝ်ဏာ ပရေၚ်ကဵုပညာဏံရောၚ် သာ်ဝွံ ညးပါလုပ် သွာၚ်ဓမံက်ပတိုန် ဂကောံမှာဇန်မွဲတၠ ဟီုရ။
“ပ္ဍဲကောံဓရီုပိုဲ တုဲကၠုၚ်ဏံ ကာလသ္ၚဳဂၠိပ်အာ ပရေၚ်သၟတ်မန်တံဂှ်တှေ် ဇၟာပ်ပ်ပွိုၚ်ဍုၚ်ဂှ် သုၚ်စောဲဒၟံၚ် ဂဥုဲချေံဏောၚ် ပိုဲဂွံတီကေတ်၊ ဟိုတ်ဂှ်ရ သွက်ဂွံပတိတ်လိခ် ကဵုပညာဂှ် ဒးဖတိုက်ဖအောဝ်ဏာ ဂကောံပံၚ်ကောံ လိခ်ပတ်ယေန်သၞာၚ်” သာ်ဝွံ ညးတေံ ဟီုရ။
အပ္ဍဲကွာန်ဌာန်ဒေသဗွဲမဂၠိုၚ် သၟတ်မန်တံ သုၚ်စောဲဒၟံၚ် ဂဥုဲချေံတံဏံ ဂၠိုၚ်တို်န်ကီုလေဝ် ရဲအလဵုအသဳ ဆေၚ်စပ်တံ ကေတ်အရေဝ် ရပ်စပ်ကၠုၚ် ဟၟဲကီုတုဲ မဒးပတိတ်လိခ် ကဵုပညာ သာ်ဏံရောၚ်။
ပရေၚ်သွံရာန် ဂဥုဲချေံ သာ်ဏံဂှ် ရဲကောန်ဂကောံရပ်လွဟ် ကၠောံဍမံၚ်ကဵု ဒပ်ပၞာန်ဗၟာတံ နကဵုကမၠောန် ပရေၚ်ပိုန်ဒြပ်မွဲသာ် သွံကဵုမံၚ် သၟတ်မန်တံရောၚ် သာ်ဝွံ ညးမံၚ်ရံၚ်လ္ၚတ် ပရေၚ်သွံရာန် ဂဥုဲၜူမာဲ နူဍုၚ်ဇြပ်ဗုမွဲတၠ ဟီုရ။
အပ္ဍဲသၟတ်မန် မွဲအလုံတွဵုရးဍုၚ်မန် ဗွဲမဂၠိုၚ် သုၚ်စောဲဒၟံၚ် ဂဥုဲချေံတုဲ ရဲပွိုၚ်ဍုၚ်ကျာ်မြဟ်၊ မုဟ်ဍုၚ်၊ ဇြပ်ဗု၊ ဍုၚ်ရေဝ်ကဵု ပွိုၚ်ဍုၚ်လှာဒကှ်၊ ပွိုၚ်ဍုၚ်ကအ်ကြိအ်တံ ဂၠိုၚ်ဒၟံၚ်ရောၚ် ညးလ္ၚတ်လဝ်ဂှ် ဂးရ။
ဒုၚ်သ္ဇိုၚ်ကဵု ပရေၚ်ဂၠိုက်ဂၠါဲ လ္ၚတ်ဂွံလဝ်တံဂှ်တုဲ စပ်ကဵုပရေၚ်ဂဥုဲၜူမာဲဏံ ပတိုန်ထ္ၜး ပၠုပ်လဝ်ဂလာန် အပ္ဍဲကောံဓရီု ဂကောံပံၚ်ကောံ ပရေၚ်ဂကူမန်ကီုလေဝ် သၞောတ်ဗ္ၜတ် ၜိုတ်လဵုသုၚ်စောဲမံၚ်ဂှ် ဆိၚ်ဆဝါတ်မံၚ်ဏီရောၚ် ညးတေံဆက်ဟီုရ။
သၟတ်ဗွဲမဂၠိုၚ် သုၚ်စောဲမံၚ် ဂဥုဲချေံတံဂှ် အာယုက်နွံ ၜိုတ်အကြာ ၁၈ သၞာံ ဒှ်တုဲ လ္ၚဵု ၜိုတ်အာယုက် ၁၂ သၞာံတံလေဝ် သုၚ်စောဲမံၚ်ကီုရောၚ်ဂှ် သၟတ်သုၚ်ဂဥုဲချေံမွဲတၠ ဟီုရ။
“သၟတ်လၟုဟ်တံဂှ် ဍေံတံ ဟွံသုၚ်အရက်ပုဟ်၊ သုၚ်ဂဥုဲချေံရ၊ မၞိဟ်ဍောတ်တ် ကောန်ကွာန်ပိုဲ ကဝက်ပြၚ် ဒှ်အာ ရဲသုၚ်ဂဥုဲချေံအိုတ်ရ” သာ်ဝွံ သၟတ်ဗၠာဲ နူပွိုၚ်ဍုၚ်လှာဒကှ်မွဲတၠဟီုရ။
သၟတ်ဗြဴ ချဳဒရာၚ်ဒၟံၚ် ပ္ဍဲဂကောံမှာဇန်မွဲတၠ ရဲကွာန်ယာန်ဒံၚ် ပွိုၚ်ဍုၚ်မွဲဍုၚ်ဂှ်လေဝ် “သၟတ်ဗၠာဲကောန်ကွာန်ပိုဲ ကဝက်ပြၚ်ၚ် သုၚ်စောဲမံၚ် ဂဥုဲချေံ၊ ကွာန်လပါ်တေံ ကွာန်လှာတှေ် ဗၠာဲသီုဖအိုတ် သုၚ်မံၚ်ဂဥုဲချေံ ဟီုစဂွံမံၚ်” သာ်ဝွံ ဟီုရ။
ဟိုတ်နူသုၚ်စောဲဒၟံၚ် ဂဥုဲချေံ သာ်ဏံတုဲ ဒဂေတ်ပဋိပတ် သၟတ်တံ လီုလာ်ဒၟံၚ်တုဲ ပရေၚ်ပၠံၚ်ၜး ကၠတ်ဂၠံက်နာနာ က္တဵုဒှ်ဒၟံၚ်ရောၚ် သာ်ဝွံ ရဲလ္ၚတ်တံ ဟီုရ။
ဂဥုဲချေံဟီုဂှ် ဂကူဍေံမွဲကဵုမွဲ ဟွံတုပ်ကီုတုဲ ၚုဟ်မးလေဝ် တၞဟ်ခြာဒၟံၚ်ကီုရ၊ ဂဥုဲချေံ ပရေအ်အိုတ် မွဲမမ္ဂး ၚုဟ်ဍေံ သြန်ဗၟာ ၃၅၀၀ ဒကေဝ် နွံတုဲ ခိုဟ်အိုတ်ဂှ် ၚုဟ်ဍေံ မၞုံ ၆၀၀၀ ဒကေဝ်ပြၚ်ရောၚ်။