ဟံၚ်ဍုၚ် – အပ္ဍဲတွဵုရးဍုၚ်မန် သၟဝ်တဲပွိုၚ်ဍုၚ်ဆေၚ်စပ်တံ ရုဲစှ်မံၚ်သ္ကိုပ်အုပ်ဓုပ်ကွာန်(ဝါ) သ္ကိုပ်အုပ်ဓုပ်အရာပ်တံဂှ် နကဵုကောန်ကွာန်တံတိုက်ရိုက်ရုဲပ္တိုန်ကဵုဟွံသေၚ်၊ ဟွံကေတ်ဆန္ဒ ကောန်ညးဍုၚ်ကွာန်တံမွဲသာ် အလဵုအသဳတံ ရုဲစှ်ပ္တိုန်ကေတ်ဒၟံၚ်ရောၚ် ဂွံတီရ။
သ္ကိုပ်အုပ်ဓုပ်အရာပ်ဟီုဂှ် အရာပ်မၞုံအပ္ဍဲကွာန်ဟွံသေၚ် အရာပ်မၞုံလ္တူဂြိုဟ်ဍုၚ်ဟေၚ် ဂကောံအုပ်ဓုပ်အလဵုအသဳတံ သ္ပလဝ်စၟတ်သမ္တီရောၚ်ဂွံတီရ။
ညးသ္ပသ္ကိုပ်သ္က သ္ကိုပ်အုပ်ဓုပ်ပွိုၚ်ဍုၚ်ကီု သီုကဵုရဲဂကောံရုၚ် ကောန်ရဲပြဝါညးတံဂှ် ကော်ပကောံကေတ် မိမဍုၚ်ကွာန် ညးတံဍုက်ကေဝ်လဝ်တံညိညိညညတုဲ ဟွံကေတ်ဆန္ဒကောန်ကွာန်တံလးလး ရုဲစှ်ပ္တိုန်မံၚ် သ္ကိုပ်အုပ်ဓုပ်အရာပ်/ကွာန်တံရ။
ဗော်ဒဳမဝ်ကရေဇြဳအလုံရးမန်
“ပ္ဍဲပွိုၚ်ဍုၚ်မုဟ်ဍုၚ်ဂှ် ရုဲစှ်လဝ်ၜါဒၞာဲတုဲကီုရ၊ စရုဲလဝ်ကွာန်ဍောတ်တ်သၟး ကွာန်ဇၞော်ဇၞော်တံဂှ် ဟွံဒှ်ရုဲစှ်ဏီ၊ လောန်ကၠုၚ် ဂိတုဂျောန် ၁၇ တေံဂှ် သ္ကိုပ်အုပ်ဓုပ်ပွိုၚ်ဍုၚ်ကဵု ဂကောံညးတံစှေ်ကၠုၚ်ကွာန်ဘာဒေါဝ်၊ ကောံပကောံကေတ် မိမဍုၚ်ကွာန်ၜိုတ် ၂၀ တၠတုဲ ကၠောန်ပေါဲကောံဓရီု၊ ညးတံရန်လဝ် မၞိဟ်ဥက္ကဌတြေံ ပတိုန်လဝ်ယၟုမွဲတၠကဵု နူဗော်ဒဳမဝ်ကရေဇြဳ အလုံရးမန် ပၠုပ်လဝ်ဂလာန်မွဲတၠ၊ သၟာန်ကေတ်ဆန္ဒရဲတိုန်စိုပ်ဏံသၟးရ” သာ်ဝွံ ကောန်ကွာန်ဘာဒေါဝ် ပွိုၚ်ဍုၚ်မုဟ်ဍုၚ်မွဲတၠဟီုရ။
ဥက္ကဌတြေံတံဂှ် လက်ထက်အလဵုအသဳပၞာန်ရုဲစှ်ကေတ်လဝ်ဒှ်တုဲ ရဲထံက်မံၚ်ဂလာန်ကု ဗော်ကျဖေါအ်ဟေၚ်ရ။ ရဲညးတံပၠုပ်ဂလာန်ရုဲစှ်ပတိုန် အလံၚ်သ္ကိုပ်အုပ်ဓုပ်ကွာန်တံဂှ်လေဝ် ဒှ်ရဲကြပ်ကဵု ဗော်ကျဖေါအ်တံပၠန်ရ။
ဗွဲကိုပ်ကၠာ အတိုၚ်မၞိဟ်ဥက္ကဌတြေံပတိုန်လဝ် ရုဲစှ်ဏာ နာဲအံၚ်ကျဳ ဂွံတီရ။ ဆဂး နာဲအံၚ်ကျဳ ဟွံဒုၚ်တဲတုဲ ကလေၚ်ရုဲစှ်ပ္တိုန်ဏာ မၞိဟ်ရဲဗော်ဒဳမဝ်ကရေဇြဳအလုံရးမန် ပၠုပ်လဝ်ဂလာန် နာဲလှမိုၚ်ဂှ် ဒးတုပ်အာစိုတ်အိုတ်ရ သာ်ဝွံ ကောန်ကွာန်ဘာဒေါဝ်ဂှ် ဆက်ဟီုရ။
တုပ်ကဵုပရေၚ်ဏံကီု လပါ်ပွိုၚ်ဍုၚ်ဝါဍောတ် (တ္ကအ်ခၟိုၚ်) တေံလေဝ် ဟွံကေတ်ဆန္ဒကောန်ကွာန်တံမွဲသာ် သ္ကိုပ်အုပ်ဓုပ်ပွိုၚ်ဍုၚ်တံ ကော်ပကောံကေတ် မၞိဟ်ဍုက်ကေဝ်ကဵုညးတံတုဲ ရုဲစှ်ပတိုန်ဒၟံၚ်သ္ကိုပ်အုပ်ဓုပ်ကွာန်တံရောၚ် ရဲသ္ဇိုၚ်ဒေသဆေၚ်စပ်တံဟီုရ။
အပ္ဍဲရုဲစှ်ပ္တိုန်သ္ကိုပ်အုပ်ဓုပ်အရာပ်/ကွာန်တံ သာ်ဏံဂှ် ကေတ်ဆန္ဒကောန်ညးဍုၚ်ကွာန်တံတုဲ မိက်ဂွံကဵုကၠောန်သ္ပပေါဲရုဲမာဲကွာန်ရောၚ် သာ်ဝွံဗော်ဒဳမဝ်ကရေဇြဳအလုံရးမန် လလောၚ်တြးပတိတ်လဝ် လစွံစိုတ်ညးတံနွံရ။
အတိုၚ်ပၟိက်စိုတ်သ္ကိုပ်အုပ်ဓုပ်ပွိုၚ်ဍုၚ် ရုဲစှ်ပ္တိုန်ကေတ်မ္ဂး ဗီုကောန်ကွာန်တံ နွံပၟိက်ရန်တၟံလဝ် ဒှ်ကၠုၚ်ဟွံမာန်ကီု၊ ရဲအုပ်ဓုပ်ဒၟံၚ်ကွာန်ရးလၟုဟ်တံပၠန်လေဝ် ကောန်ကွာန်တံဟွံဒးဂၞပ်စိုတ်ကီုတုဲ မိက်ဂွံကဵုဒှ်အပြံၚ်အလှာဲမွဲမွဲသာ်ဂှ် ကောန်ကွာန်တံပၟိက်နွံမံၚ် သာ်ဝွံ ညးအုပ်ကာ ဗော်ဒဳမဝ်ကရေဇြဳအလုံရးမန် ဒံက်တာမာံနဲသိုဝ် ကေၚ်ဟီုလဴလဝ်ကဵုဌာန်ပရိုၚ်ဗၠးမန်နွံရ။
တုဲပၠန် ပရေၚ်ရုဲစှ်ပ္တိုန်ဥက္ကဌကွာန် လက်ထက်အလဵုအသဳပၞာန်တုဲကၠုၚ်တေံမ္ဂး အာတ်မိက်ဆန္ဒ ဂကောံသံဃနာယကကွာန်ဆေၚ်စပ်တံတုဲ အလံၚ်ဥက္ကဌပိတၠ၊ အရန်ပိတၠ အပ္ဍဲရန်စွံလဝ်တံဂှ်မှ ဥက္ကဌမယကပွိုၚ်ဍုၚ် ရုဲကေတ်ဥက္ကဌကွာန်မွဲတၠရ။
ၜိုန်ဂှ်လေဝ် ပရေၚ်ရုဲဥက္ကဌသာ်ဏံဂှ် အခိၚ်ကၠာတေံလေဝ် နကဵုသၞောတ်ဝ်စှေ်စှေ်ကေၚ်ရုဲစှ်ကၠုၚ်ဟၟဲကီုတုဲ အတိုၚ်မၞိဟ် ရုဲအုပ်ဓုပ်ပွိုၚ်ဍုၚ် (ဝါ) ဒပ်ပၞာန်တံတုပ်စိုတ်ဟေၚ် ရုဲစှ်ကေတ်လဝ်ရ။
သ္ကိုပ်အုပ်ဓုပ်အရာပ်/ကွာန်လၟုဟ်ဂှ် ဗီုသၞာဲဒဴရဲယိုက်ဂၠေၚ်တာလျိုၚ်အလဵုအသဳတံကီု ဒးဍိုက်ပေၚ်ကဵု တၚ်နၚ် ၁၀ တၚ်ဏံရောၚ်။ ဗော်ပရေၚ်ဍုၚ်ကွာန်လဵုမှဟွံကေၚ်ပါလုပ်ကၠုၚ်၊ အပ္ဍဲအလဵုအသဳအဆက်က် ညးကေၚ်ပါလုပ်ကၠုၚ်လဝ် “ရဲစိၚ်တုက်တက်ခၞုက်” တံညံၚ်ဟွံဂွံပါလုပ်၊ ဗ္ဒဗ္ဒါဲလဝ်ဂကောံပွိုၚ်ဍုၚ်တံတုဲ ရဲဂၠံက်ကေတ်အခေါၚ်အရာတံ ညံၚ်ဟွံဂွံပါလုပ်၊ ရဲကေၚ်လုလောန်လဝ်အမှုအရာ ညးဒးဒုၚ်လဝ်ထံၚ် မၞိဟ်ပရီုကေုာံ ရဲကောန်ကွာန်တံ ဟွံရှေ်သှေ်ရဴဂဴတံ သာ်ဝွံတၚ်နၚ်တံဏံပါလုပ်ဒၟံၚ်ရ။
