ဂျူရီဆာဲ – ပ္ဍဲဂိတုဂျူလာၚ် ၁၂ လောန်ကၠုၚ်ဏံ ညးတာလျိုၚ်ကမ္မတဳတ္ၚဲကောၚ်ဂကူမန်(ဗဟဵု)တံ အာကလအ်ဒဂိုန် ဗ္ဂိန်သပိုၚ်သ္ၚာကု ခၟဳသၚ်မန်အလုံပွိုၚ်ဍုၚ်မုဟ်ဍုၚ် အပ္ဍဲဘာလကျာ်ကွာန်ဂဗုဲ ပွိုၚ်ဍုၚ်မုဟ်ဍုၚ်ဂှ် ဂွံတီလဝ်ရ။
အသေအဟာန်တ္ၚဲကောန်ဂကူမန်(ဗဟဵု) ( ဗီု - ဌာန်ပရိုၚ်ဗၠးၜးမန် )
ပ္ဍဲညးတာလျိုၚ်ကမ္မတဳတ္ၚဲကောၚ်ဂကူမန်(ဗဟဵု)တံဂှ် နာယကနာဲတေန်အံၚ်၊ ဒုဥက္ကဌဂမၠိုၚ် ဒံက်တာဟံၚ်ဍုၚ်၊ ဒံက်တာစောန်တၟးကေုာံ ကောန်ဂကောံဂမၠိုၚ်တံပါလုပ်ဒၟံၚ်ရ။
နူအလုံပွိုၚ်ဍုၚ်မုဟ်ဍုၚ်ဂှ် က္ညနိမန်နၚ်သၚ်ခၟဳမန်နူပွိုၚ်တိုက် ၁၁ တိုက်ကီု သီုကဵုဘာကရပ်ဇိုၚ်ဝုတ်ဒိုဟ်ကွာန်ဂဗုဲတံပါလုပ်ဒၟံၚ်ကီုရောၚ် ဒံက်တာဟံၚ်ဍုၚ် ဟီုလဴရ။
“ပိုဲကလအ်ကၠုၚ်ဒဂိုန်ဗီုဗီုဏံဂှ် ပေၚ်ပိဝါရ၊ ဗွဲတၟေၚ်တှေ် သၞာံဏံကျာ်ဇၞော်ဘာလွဳမာန်ထဝ်ပဝ်စဴအာတုဲ စၞးညးသၚ်မွဲမွဲတၠ သွက်ဂွံကေတ်ကဵုတာလျိုၚ်ပရေၚ်လိခ်ပတ်တံကီုဂှ် အဲဂမြၚ်ပတီပတိုန်ထ္ၜးကဵုလဝ်သၚ်တံရ” သာ်ဝွံညးတေံ ဆက်ဟီုရ။
ဥက္ကဌလိခ်ပတ်ယေန်သၞာၚ်ကဵုဗုဒ္ဓဘာသာပွိုၚ်ဍုၚ်မုဟ်ဍုၚ် ကျာ်ဇၞော်ဘာလွဳမာန်ထဝ် ကွာန်ကၟာဝက် ဘဒ္ဒန္တဣန္ဒက အာယုက် ရ၅ သၞာံဂှ် ပဝ်စဴအာလဝ် လောန်ကၠုၚ်ဂိတုဂျောန် ၁၅ တေံရ။
“အကာဲအရာပရေၚ်ဍုၚ်ကွာန်မန်လၟုဟ်ကီု သွက်ဂွံသၠုၚ်ပတိုန်ကဆံၚ် ပရေၚ်ဗတောန်လိခ်ပတ်မန်ကီု ဗီုလဵုဒးရေၚ်တၠုၚ်ထေက်ဂှ်လေဝ် အဲဂမြၚ်ပတီလဝ်ကဵု သၚ်တံဂမၠိုၚ်ကီုရ” သာ်ဝွံနာဲတေန်အံၚ် ဟီုရ။
အခေါၚ်အရာဆေၚ်စပ်ကဵုဂကူမန်၊ အကာဲအရာနူကာလဒေါအ်ပန်ပှော်နူကၠာတေံကေုာံ ဗီုပြၚ်လဵုသ္ဂောံသောၚ်ကလးအား ပြသၞာပရေၚ်ဍုၚ်ကွာန်တံဂှ်ကီု ညးဟီုဂးဏာနွံ ဂွံတီရ။
ကမ္မတဳတ္ၚဲကောန်ဂကူမန်(ဗဟဵု)ဝွံ ဒက်ပ္တန်လဝ်ကဵု ဂကောံကၠောန်ဗဒှ်သဘၚ်တ္ၚဲကောန်ဂကူမန် ဇၟာပ်ကွာန်၊ ပွိုၚ်ဍုၚ်တံဒှ်တုဲ စပ်ကဵုပရေၚ်ကမၠောန်တ္ၚဲကောန်ဂကူဂှ် ဖျေံဒၟံၚ်ကဵုအစဳဇန်နာနာရ။
