ဟံၚ်ဍုၚ် – စပ်ကဵုရုၚ်ဗၠာဲသၟိၚ်လ္တူဍုၚ်ဇြပ်ဗု ဒးဒုၚ်ပန်စုတ်လဝ်လွဟ်ဂှ် ဗက်ဂၠာဲစၟဳစၟတ်ဟွံဂွံဏီတုဲ ဝန်ဇၞော်တွဵုရးဍုၚ်မန် ဥူအုၚ်မျေအ် ဟီုဗျိဒေါန်ကု သ္ကိုပ်ဗၠာဲသၟိၚ်တွဵုရးဍုၚ်မန် သာ်ဝွံဂွံတီကေတ်ရ။

ဇြပ်တြေံလဒေါဝ်ဍုၚ်ဇြပ်ဗု

ဂိတုသိပ်တေမ်ပါ ၃ ဂှ် ဝန်ဇၞော်တွဵုရးဍုၚ်မန် ကၠုၚ်စိုပ်ရုၚ်သ္ကိုပ်ဗၠာဲသၟိၚ်လ္တူဍုၚ်ဇြပ်ဗုတုဲ ဟီုဏာသာ်ဏံဂွံတီရ။

ပရေၚ်ဖံက်ခတိုဟ်ပန်လွဟ်က္တဵုဒှ်လဝ်တံဂှ် ရဲထပိုဲတာန်လောန်တံကဵု ဂကောံရပ်လွဟ်ကရေၚ်တံ ပံၚ်တောဲတုဲ ဖန်လဝ်ရောၚ် သာ်ဝွံ သ္ကိုပ်ဗၠာဲသၟိၚ်တွဵုရးဍုၚ်မန် ဟီုပတိုန်ဂလာန်ကု ဝန်ဇၞော်ဂးရ။

“ဂကောံတံဏံဂှ် စွံလဝ်အတိုၚ်ဏံဟွံဂွံပုဟ်၊ ညံၚ်သ္ဂောံရပ်ဂွံဂှ် ဒးဗက်ဂၠာဲဏောၚ်၊ အေဏံဂှ် ဒှ်တာလျိုၚ်ဗၠာဲသၟိၚ်တံရဏောဝ်” သာ်ဝွံ ဝန်ဇၞော် ကဵုဏာသတိသာ်ဏံရ။

လၟုဟ်မ္ဂး ပ္ဍဲအကြာအရာပ်တံကီု၊ လ္တူဂၠံၚ်ဇၞော်တံကီုဂှ် ဂကောံဒပ်ဗၠာဲသၟိၚ်တံ ကေတ်လဝ်ဂီုကၠီုဇၟပ်ပ်ဒၞာဲရောၚ် သာ်ဝွံ ရဲဍုၚ်ဇြပ်ဗုမွဲတၠ ဂးရ။

ဂိတုအဝ်ဂတ် ၂၉ လောန်ကၠုၚ်ဂှ် ရဲရပ်လွဟ် ၂ တၠ ဍိုက်လုပ်ကၠုၚ်ကွဳလိုန်ဓါတ်တုဲ ပန်စုတ်လွဟ် M-40 ပ္ဍဲကဵုရုၚ်ဗၠာဲသၟိၚ်လ္တူဍုၚ်ဇြပ်ဗုဂှ် ဒှ်ကၠုၚ်လဝ်ရ။

ပ္ဍဲကဵုဂိတု ဂျောန်၂၉ တေံလေဝ် ဗုမ်မွဲမကေၚ်ခတိုဟ်လဝ် ကရပ်သ္ၚိသ္ကိုပ်အုပ်ဓုပ်ပွိုၚ်ဍုၚ်ဇြပ်ဗုဂှ်တုဲ ကၟာၚ်သ္ၚိလေဝ်သရိုဟ်အာကီုရ သာ်ဝွံ ညးကြပ်ကဵုရုၚ်ထံၚ်ပရိုၚ် (စရဖ) ဍုၚ်ဇြပ်ဗု မွဲတၠဟီုရ။

ဗီုဏံကီု ပ္ဍဲသၞာံအာတေံ ဂိတုမေ ရ အခိၚ်ဗ္တံဂှ်လေဝ် ကရပ်ရုၚ်ဗၠာဲသၟိၚ်လ္တူဍုၚ်ဇြပ်ဗု ဗုမ်မွဲမကေၚ်ခတိုဟ်လဝ်ဂှ် ဒဵုကဵုလၟုဟ်ထမံက်ကဵုတၠတဲဟွံမာန်ဏီရ။

အခိၚ်ကၠာတေံဂှ် ဒပ်ပၞာန်ဗၟာတံကဵု ဒပ်ဗၠာဲသၟိၚ်တံ ၜိုန်ရပံၚ်တောဲကေတ်ကၠုၚ်ပရေၚ်ဂီုကၠီုကီုလေဝ် လၟုဟ်မ္ဂး နူကဵုအလဵုအသဳတၟိဏံတိုန်ကၠုၚ်တုဲ ဆေၚ်စပ်ကဵုပရေၚ်ဂီုကၠီုလ္တူဍုၚ်ဂှ် ဂကောံဗၠာဲသၟိၚ်တံဟေၚ် ဒးကေတ်ကဵုဒၟံၚ်ဂီုကၠီုရောၚ် သာ်ဝွံ လိက်ပရိုၚ်အပ္ဍဲဍုၚ်ဗၟာတံ ချူထမံက်ထ္ၜးလဝ်ရ။