လိခ်လလောၚ်တြးOMCC
မာံသုတ – ကောန်ဂကောံ ဂကောံပံၚ်ကောံ ကံၚ်ဇြဳဖိတ်ဒရေဝ် ကောန်ဍုၚ်အရၚ် (UNFC) သီုဖအိုတ် ဟွံပါလုပ်မ္ဂး ညံၚ်ဂွံတးပဲါ ပရေၚ်ပညဳပညပ် ဓဝ်ၜိုဟ်လလမ်ကုအလဵုအသဳတွဵုရးဍုၚ်မန်ဂှ် ကမ္မတဳပံၚ်ကောံမန်ဍုၚ်သအာၚ် (Overseas Mon Coordination Committee- OMCC) ဖတိုက်ဖအောဝ်ဏာ ဗော်ဍုၚ်မန်တၟိ ပ္ဍဲဂိတုအံက်တဝ်ပါ ၃ ဏံရ။
ဗော်ဍုၚ်မန်တၟိကီု သီုကဵုဗော်မကေၚ်ဒေါအ်လဝ်ပန်ပှော် ကုအလဵုအသဳ တၠအဝဵုပၞာန်ဗၟာ နဝတ/ နအဖ ပ္ဍဲသၞာံ ၁၉၉၀ တေံဂှ် ဒးကေတ်ခန်လ္ၚတ် လတူအရာ မဗၠေတ်မှာကၠုၚ် အခိၚ်ကၠာတေံလေပ်ကီုရောၚ်ဂှ်လေဝ် ပ္ဍဲလိက်လလောၚ်တြး OMCC ဓမံက်ထ္ၜးလဝ်ကီုရ။
“တၚ်ဍိုန်လျ မဗၠေတ်မှာကၠုၚ် ဟီုဂှ် ဟွံသ္ၚဳဂၠိပ် အကာဲအရာ ပရေၚ်ဍုၚ်ကွာန် ပ္ဍဲအခိၚ်ကာလဂှ်တုဲ ဟွံကၠိုဟ်ခၠၚ် နဲကဲအလဵုအသဳပၞာန်တံ လးလဝ်ဗျူဟာဂှ်ဏောၚ်။ ဥပမာ-အလဵုအသဳပၞာန်တံဂှ် သွက်ဂွံလၞိန်ဗပိန် ဇြဟတ်ဒဳမဵုကရေဇြဳတုဲ ဒေံါကၠုၚ်ပန်ပှော်ကဵု ဒပ်ပၞာန်ရပ်လွဟ် ကောန်ဍုၚ်အရၚ်တံဏောၚ်။ ပါ်ပတိတ် မွဲမွဲဂကောံတုဲ ဒေံါကၠုၚ်ပန်ပှော်ဏောၚ်။ ဗွဲကြဴ စဵုကဵုဒှ်ကၠုၚ် ကိစ္စဒပ်မံၚ်ပယျဵု၊ ဂၠံၚ်တရဴ ပရေၚ်ဍုၚ်ကွာန် အလဵုအသဳလၟုဟ် လးလဝ်ဏံဂှ်လေဝ် ဒးစွံသတိဇၞော်ဇၞော်ဏောၚ်” သာ်ဝွံ ဒုဥက္ကဌ OMCC ဟီုလဴ ကုဌာန်ပရိုၚ်ဗၠးၜးမန်ရ။
ဗွဲတၟေၚ် ညးစၞးအလဵုအသဳ ဆဵုဂဗ ကုဒဝ်အံၚ်သာန်သုကျဳကီု၊ သမ္မတ ကော်ဘိက် သွက်သ္ဂောံကလေၚ်စဴဍုၚ်တံကီုဂှ် ၜိုန်နွံတဴကီုလေဝ် ဟွံဆဵုညာတ်ကေတ် ပရေၚ်ပြံၚ်လှာဲ ထေၚ်ထေၚ်လဵုလဵုဏီရောၚ်၊ ဒပ်ပၞာန်အလဵုအသဳတံ ထပက်မံၚ်ပၞာန် ပ္ဍဲတွဵုရးကချေၚ်၊ ကရေၚ်၊ သေံဇၞော်(ယျှာန်)တံဏီရောၚ်ဂှ်လေဝ် ညးဆက်ဟီုရ။
တ္ၚဲအကြာဏံ အလဵုအသဳတွဵုရးမန် ကေုာံ က္ဍိုပ်သကိုပ်ဗော်ဍုၚ်မန်တၟိ ကဆံၚ်လတူတံ၊ သီုကဵုကရောံညးအကြာတံ ကၠတ်ဆဵုဂဗတက်ကျာ ပ္ဍဲဍုၚ်ရေဝ် မွဲဒၞာဲရောၚ်ဂှ် ဂွံမိၚ်ကေတ်ပရိုၚ် နူညးပတှေ်ကေတ်တံကီုလေဝ် သ္ပဒတန်ပရိုၚ်တၞဟ်ခြာ ဟွံဂွံဏီရ။
“နကဵုဗော်ဍုၚ်မန်တၟိ တက်ကျာသဳကၠဳကဵု ကဆံၚ်အလဵုအသဳတွဵုရး ဟွံထေက်ပုဟ်။ ဒးသဳကၠဳကဵု အလဵုအသဳဗဟဵု တိုက်ရိုက်ဏောၚ်” သာ်ဝွံ ညးကဵုကသပ်ပၞာန် ဗော်ဍုၚ်မန်တၟိ၊ သကိုပ်ဗိုလ်ဇၞော်တြေံ နာဲကောရတ် ဟီုရ။
