မိလျးထဝ် – ပ္ဍဲသၞာံ ၂၀၁၁ ဏံဂှ် သၟာဒယှေ်ဒွက်မန်တံ ပတိတ်ကဝးဒွက်ဂၠိုၚ်တိုန် နူကဵုအရိုဟ်ရိုဟ်သၞာံတေံရောၚ် သၟာဒယှေ်ဒွက်မန်ဒယှ် ရာမာဉ်ဟီုရ။
ကဝး DVD ရာမာဉ် ၂၀၁၁ (Photo-IMNA)
သၟာဒယှေ်ဒွက်တၟိ စရာဲ၊ သၟးအံၚ်၊ အကး၊ နန်ထဝ် သၟာဒယှေ်ဒွက်တြေံ ကြဝိတ်ထဝ် ကေုာံ ရာမာဉ်တံ သီုဖအိုတ် ၜိုတ် ၁၀ ကဝး ပတိတ်လဝ်ရောၚ် ဂွံတီကေတ်ရ။
“သၞာံတုဲကၠုတေံဂှ် ရဲပတိတ်ကဝးအောန်မံၚ်၊ သၟာဒယှေ်ဒွက် တြေံတြေံ မပ္တံ သူရိယမာန်၊ သက္က (စက္ကန့်)၊ သပ္ပါဲ၊ အဂ္ဂ ၜိုတ်ဂှ်ရ ပတိတ်ကၠုလဝ်ကဝး သၞာံဏံဂှ် ဂၠိုၚ်တိုန်” သာ်ဝွံ ရာမာဉ်ဟီုရ။
ဟိုတ်နူသၟာဒယှေ်ဒွက်မန်တၟိတၟိတံ ပဵုတိုန်ကၠုၚ်ကီု သၟာဒယှေ်ဒွက်တြေံတံလေဝ် သၞာံဗွဲမလအ်လစဳဇန်လဝ် သွက်ဂွံပတိတ်ကဝးဂှ် သၞာံဏံမှ ပတိတ်မာန်ကၠုၚ်ဒှ်တုဲ ကဝးဒွက်မန်သၞာံဏံ တိတ်ဂၠိုၚ်တိုန်မဒှ်ရောၚ် ရာမာဉ် ဟီုရ။
ဆဂှ်သၟးဟွံက ကဝးမန်တိတ်တၟိတံလေဝ် သၟာဒယှေ်ဒွက်မန်ဗွဲမဂၠိုၚ်တံ စိုပ်ကဵုအခိုက်ဒွက်တုဲ ဟွံသုၚ်စောဲ အခိုက်ဒွက်ညးတၞဟ်ဟ် နကဵု အခိုက်ဒွက်ဇကုကဵုဇကုဟေၚ် ပတိတ်ကၠုၚ်ကဝးအိုတ်ရ။
သၟာဒယှေ်ဒွက်တြေံ အနဂ္ဃ ဂှ်“သွက်ပုရိသာတ်တံဂှ် လဟိၚ်မံၚ်ကဵုလၟိုန်ရ၊ ကော်ဘိတ်စိုပ်တှေ် လဟိၚ်ကဵုတွဵုရ။ သၞာံ ၂၀၁၂၊ အကြာ ဂိတုဂျာန်ဂျဝါရဳကဵု ဖေဖဝ်ဝါရဳဏံတှေ် အစဳဇန်သွက်ဂွံအာဒယှေ် ဍုၚ်သၚ်ကာပူနွံမံၚ်၊ ဆဂး စၟတ်တ္ၚဲဂှ် ဟွံတီချိုတ်ပၠိုတ်ဏီ” သာ်ဝွံ ဟီုရ။
ကဝးပတိတ်လဝ်အပ္ဋဲသၞာံဏံဂမၠိုၚ် ကဝး မၞုံယၟု “ရမျာၚ် ၂၀၁၁” သၟာဒယှေ်ဒွက် ရာမာဉ် လဟိၚ်လဝ်ဂှ်လေဝ် အကာဲအရာ သွံရာန် ဟွံပရေံကွေံရောၚ် ဂွံတီကေတ်ရ။
ရာမာဉ် ဟီုဂှ် “ကဝး “ရမျာၚ် ၂၀၁၁” ဂှ် ဂိတု အဝ်ဂေတ်ဂှ် တက်တြးပတိတ်လဝ် DVD ၁၃၀၀၀ မတုဲ တြးလဝ် ဍုၚ်ဗၟာ၊ သၚ်ကာပူ၊ မလေယှာ၊ ဍုၚ်သေံရ။ စရိတ်ပတိတ်ကဝးတံဂှ် အိုတ်အာ ၜိုတ် ကၠံမသုန်စှေ်ကိုဋ် ဒကေဝ်ပြၚ်ရောၚ်ဂှ်လေဝ် ရာမာဉ် ဟီုရ။
ရာမာဉ်ဝွံ သၞာံ ၂၀၀၆ တေံလေဝ် ကေၚ်ပတိတ်ကၠုၚ်လဝ် ကဝး မၞုံယၟု “ပရၚ်တဲလောက” ရ။ အခိၚ်ဂှ်ဝွံ ပတိတ်လဝ် ကဝး လၟိဟ် ၁ ဠက်မကီုလေဝ် ကဝး ၜိုတ် ရ လ္ၚီမဟေၚ် ဂွံသွံရ။
သၟာဒယှေ်ဒွက်မန် ရာမာဉ်၊ လွဳ၊ အနဂ္ဃ ကေုာံ ပိုန်ဒေဝဳတံ ပ္ဍဲဂိတုနဝ်ဝေမ်ပါ ၉ တုဲကၠုၚ်ဏံဂှ် အာဒယှေ်လဟိၚ်လဝ်ဒွက် သ္ဘၚ်လးသ္ၚာက္ထိုန် ပ္ဍဲဍုၚ်သေံ၊ ခရိုၚ်ဖါန်ၚာနွံရ။
စၞး ဒးဟဳု ပဵု တိုန်ဂှ် ဟဳုဂၠိူၚ်တိုန်ဟွံဂွံဟာ စၞးဒးစကာဝေါဟာ သုၚ်စောဲ ဂှ် ရပ်စပ် စကာ ဝေါဟာမန်ဍက်ဍက်ဂှ် ဂပ်ဝ်ရောၚ် သၟာဒယှ်ေဒွက်တအ်ဂှ် ဒှ်အစာံကောန်ဂကူပိုဲရ