မာံတဵုလွဳ – မွဲဒမြိပ် ဂၠံၚ်ကွဳစက် ဇြပ်ဗု-ကျာ်ပိဂှ် ဟိုတ်နူအကံက်ဂၠိုၚ်တုဲ သၟာဗၞိက်တံ ကူသာန်သွံရာန်ဗၞိက် ဟွံမာန်အိုတ်ဂှ်ရ ပ္ဍဲပွိုၚ်ဍုၚ်ကျာ်ပိဂှ် ကပေါတ်စသုၚ်တံ ၚုဟ်က္ဍၚ်တိုန်အိုတ်ရ။
“အခိၚ်ရာသဳဏံဂှ် ဂၠံၚ်ဍာ်လေဝ် အာဟွံဂွံရပုဟ်။ ဂၠံၚ်ကွဳစက်မွဲရ အာကၠုၚ်ဂွံ။ ပ္ဍိုက်ဏာကပေါတ်ပၠန်လေဝ် ကေတ်အကံက်ဂၠိုၚ်ကွေံကွေံ။ ပရဲဟွံမွဲတုဲ သၟာဗၞိက်တံ ဟွံကူဗၞိက်အိုတ်ရပုဟ်” သာ်ဝွံ သၟာဗၞိက် နူဍုၚ်ကျာ်ပိမွဲတၠ ဟီုရ။
သၟာဗၞိက် ဍုၚ်ကျာ်ပိတံဂှ် နူအပ္ဍဲဍုၚ်ဗၟာတေံ ကူရာန်နၚ် ဗၞိက်စသုၚ် မပ္တံကဵု ကၠေၚ်၊ မြေက်၊ လသိုဏ်၊ ကကှ်ကှ်တံတုဲ ကလေၚ်သွံအိုတ်ရ။
နူဒမြိပ် ဂၠံၚ်ကွဳစက် ကျာ်ပိ-ဇြပ်ဗုဂှ် သၞေဟ်အကံက် မၞုံ ၃၃ ဒၞာဲတုဲ တမ်ဒပ်အလဵုအသဳ မၞုံပ္ဍဲဒေသ၊ ဗၠာဲသၟိၚ်၊ ပၞာန်ညးဍုၚ်ကွာန်၊ လဝကတံကီု ဗော်ဍုၚ်မန်တၟိ၊ ကေအေန်ယူ ကေုာံ ဒဳကေဗဳအေတံကီု ကေတ်ဒၟံၚ်အကံက်အိုတ်ရောၚ်ဂှ် ညးဒဳကွဳစက်မွဲတၠ ပလံၚ်ဒၟံၚ်ကပေါတ်ဗၞိက် ပယျဵုဂှ် ဟီုရ။
“ကွဳစက် သၠာစှ် ပ္ဍိုက်ကပေါတ်မွဲဖ္ဍိုက်တှေ် ဒးကဵုမံၚ်အကံက် ၜိုတ် (၂၀) ကိုဋ်။ ကွဳစက်ဍောတ်ဍောတ် ပ္ဍိုက်မၞိဟ်မွဲဖ္ဍိုက်တှေ် ဒးကဵုမံၚ် ၜိုတ် (၂) ကိုဋ်” သာ်ဝွံ ညးဟီုရ။
ဟိုတ်နူဒှ်အခက်အခုဲကဵု ပ္ဍိုက်ကပေါတ်ဗၞိက်ဂှ်ရ ပ္ဍဲပွိုၚ်ဍုၚ်ကျာ်ပိဂှ် ပ္ဍဲဂိတုတုဲကၠုၚ်ဏံ သ္ၚုမွဲရိုက် (မွဲနဘာ်) ဂှ် ဒးရာန်ကေတ် ၂၂,၅၀၀ ဒကေဝ်ကီုလေဝ် လၟုဟ် တိုန်အာစဵုကဵု ၂၅,၀၀၀ ဒကေဝ်တုဲ လသိုဏ်ဗကေတ်မွဲကဳလဵုဂှ် နူ ၅၀၀ ဒကေဝ် တိုန်အာ ဒဵုကဵု ရ၀၀ ဒကေဝ်ရ။
တုပ်သာ်ဂှ်ကီု ကမၠာ်ကှ်ကှ် မွဲကဳလဵုဂှ် ဂိတုကၠာတေံ ဒးရာန်ကေတ်ဒၟံၚ် ၂,၁၀၀ ဒကေဝ်ကီုလေဝ် လၟုဟ်တိုန်အာဒဵုကဵု ၂,၅၀၀ ဒကေဝ်ရ။
“သၟာကမၠောန် ရုၚ်စက် နွံပ္ဍဲပွဳပွူ ဍုၚ်ကျာ်ပိဏံဂှ် အဓိက စမံၚ်စၞစသုၚ် ဍုၚ်ဗၟာတုဲ ကပေါတ်စသုၚ်ဍုၚ်ဗၟာ ၚုဟ်တိုန်အာတှေ် ဂွံၚုဟ်လိၚ်ကဵု ခရိတ်စဂှ် ဟွံကိတ်ညဳရပုဟ်” သာ်ဝွံ မိအိချောန် မကၠောန်ဒၟံၚ်ကမၠောန် ပ္ဍဲရုၚ်ဇိၚ်ဒၞပ်ဂှ် ဟီုရ။
ဂၠံၚ်ဇြပ်ဗု-ရေဝ်ဂှ် မၞုံဇမၠိၚ် ၜိုတ် ၆၀ တိုၚ်တုဲ မွဲဒမြိပ်ဂၠံၚ်ကွဳစက် ပိဂအုံ ၜါဂအုံဂှ် မဒှ်တိဍာ် ကေအေန်ယူတံ ထိၚ်ဒဝ်လဝ်ရ။
0 Comments