ရာၚ်မြဟ် – သွက်သ္ဂောံကလိဂွံ ကဆံၚ်တုပ်သၟဟ် ကေုာံ အခေါၚ်စၞောန်ပျး အလဵုဇကု (အခေါၚ်ကံကုသဵုဇကု ဇကုဖန်ဖက်ကေတ်မာန်) တုဲ ဂကောံဗၠးၜးကချေၚ် KIO ဂှ် ပ္ဍဲဂိတုဂျာန္နဝါရဳ ၁၉ ဏံ ဆဵုဂဗသဳကၠဳကဵု ဂကောံဓမံက်ပတိုန် ပရေၚ်ၜိုဟ်လလမ် အလဵုအသဳဗၟာတံရ။
အတိုၚ်ပၟိက်ဆန္ဒ ညးဍုၚ်ကွာန်ကချေၚ်တံ နွံပၟိက် အခေါၚ်အရာ ကဆံၚ်တုပ်သၟဟ် ကေုာံ အခေါၚ်ကံကုသဵုဇကု ဇကုဖန်ဖက်ကေတ်မာန်ဂှ် နနဲပရေၚ်ဍုၚ်ကွာန် ပ္ညဳပ္ညပ်သဳကၠဳတုဲ သ္ဂောံသောၚ်ကလးမာန် ဒးသဳကၠဳကဵု ညးစၞးအလဵုအသဳတံရောၚ်ဂှ် ကိုပ်ကၠာနူဟွံဂွံသဳကၠဳမွဲတ္ၚဲ KIO ပတိတ်လဝ်ပရိုၚ်ရ။
“ၜိုတ်အခိၚ်ဒေါဝ်တ္ၚဲ ပိုဲစသဳကၠဳ၊ တ္ၚဲယးတေံလေဝ် ပိုဲဆက်သဳကၠဳမံၚ်ဏီ။ လပါ်ပိုဲဂှ်တှေ် အတိုၚ်ပိုဲနွံပၟိက် ပရေၚ်ၜိုဟ်လလမ်ဇေတ်ဇေတ် ဂွံသဳကၠဳ နနဲပရေၚ်ဍုၚ်ကွာန်ဂှ် ပတိုန်ထ္ၜးလဝ် တၚ် ၆ တၚ်” သာ်ဝွံ ညးမၞုံအခေါၚ်ဟီုဂး KIO နာဲလနာန် ဟီုရ။
ပ္ဍဲပေဲါဆဵုဂဗ ဍုၚ်ယှိုဲလဳ၊ ကၟိန်ဍုၚ်ကြုက်ဂှ် ညးစၞးပရေၚ်ၜိုဟ်လလမ် အလဵုအသဳ ကဆံၚ်ကၟိန်ဍုၚ် ၁၄ တၠ ဥူအံၚ်သိုၚ် ဍိုက်က္ဍိုပ်တုဲ လပါ် KIO ဂှ် ညးစၞး ၁၄ တၠ ပါလုပ်ရ။
ပေဲါပၞာန်မ္ဂးဂှ် ဒှ်အဆက်ဖဵု ပရေၚ်ဍုၚ်ကွာန်ဂှ်ရ ဒေံါကၠေံပေဲါပၞာန်တုဲ သွက်သ္ဂောံဒက်ခၞံပတိုန် ပရေၚ်ၜိုဟ်လလမ် ဍာ်ဇမၠိၚ်မာနဂှ် ဒးသောၚ်ကလး နနဲပရေၚ်ဍုၚ်ကွာန်ရောၚ် နကဵု KIO ဒုၚ်ဂိုၚ်ကေတ်လဝ်ရ။
ဟိုတ်နူပတှေ်ကေတ်သာ်ဂှ်ရ နကဵု KIO ပ္ညဳပ္ညပ်သဳကၠဳကၠုၚ်ကဵု အလဵုအသဳ အဆက်ဆက်တုဲ ဒေံါကၠုၚ်ပန်ပှော်ရ။
KIO ဂှ် ပ္ဍဲသၞာံ ၁၉၉၄ တေံ ဒေံါကၠုၚ်ပန်ပှော်ကဵု အလဵုအသဳပၞာန်ဗၟာတုဲ နူသၞာံ ၂၀၁၁၊ ဂိတုဂျုန် ၉ ဂှ် ကလေၚ်ပန်ပှော်ညးသကအ်ဂှ်ရ ညးဍုၚ်ကွာန်ကချေၚ် နူတွဵုရးကချေၚ် ကေုာံ တွဵုရးသေံသၟဝ်ကျာ ၜိုတ် ၆ လက် ဒးဆဵုဂဗကၠုၚ်ကဵု ဘဲဒဒိုက်နာနာရ။
ဂကောံဓမံက်ပတိုန် ပရေၚ်ၜိုဟ်လလမ် အလဵုအသဳ ဥူအံၚ်သိုၚ် ဍိုက်က္ဍိုပ်ဂှ် ဂွံတၚ်တုပ်စိုတ် ပရေၚ်ဒေံါပန်ပှော် ကုဒပ်ပၞာန် “ဝ” (UWSA) ကေုာံ ဒပ်ပၞာန်မာၚ်ဠာတုဲ ထပက်ကၠုၚ်စၟတ်တဲတုဲရ။
တုပ်တဴသာ်ဂှ်ကီု ဂကောံညးစၞး ပရေၚ်ၜိုဟ်လလမ် ဝန်ဇၞော်ကွဳပၟတ် ဥူအံၚ်မေန် ဍိုက်က္ဍိုပ်ဂှ်လေဝ် အပ္ဍဲဂိတုဏံ ဂွံတၚ်တုပ်စိုတ် ပရေၚ်ဒေံါပန်ပှော် ဗွဲပဏာမ ကုဗော်သွးကရေၚ် KNU၊ ဒပ်ပၠတရဴချေၚ် CNF ကေုာံ ဒပ်ပၞာန်သေံ သၠုၚ်ကျာ (SSA-S) တံတုဲ ထပက်ကၠုၚ်စၟတ်တဲကီုရ။
ကြဴနူဂိတုဂျာန္နဝါရဳ ၂၀ ဂှ် သွက်သ္ဂောံဆဵုဂဗကဵု ဗော်ဍုၚ်မန်တၟိ၊ ဗော်တဴတက် ကရေၚ်ဍာဲ (KNPP) တံ နွံရ။
