ခတ္တာနန် – ပ္ဍဲဂိတုဖေဖဝ်ဝါရဳ ၂၄ ဏံ ပ္ဍဲကၠတ်ထဝ်ညးဍုၚ်ကွာန် သ္ပဒတန် သၞောဝ်ပွမတေၚ်ကၟုဲ ပ္ဍဲသၞောဝ်အုပ်ဓုပ်အရာပ် ဟွံသေၚ် သၞောဝ်အုပ်ဓုပ်ဂကောံကွာန်ရ။

ပ္ဍဲအခန် (၉) ပိုဒ်ဇၞော် ၁၇/ (က) (ခ) မပါပ္ဍဲသၞောဝ်ဂှ်မ္ဂး ညးဟွံလုပ်စရၚ်သ္ၚိတံ နဒဒှ်ကၟုဲ ကၠုၚ်ဇူဒီုၜက်ဗ္တံကီု၊ ကၟုဲကလေၚ်စဴအာကီုတံဂှ် ဒးတေၚ်လဴကဵု သကိုပ်အုပ်ဓုပ်အရာပ်/ကွာန် မဆေၚ်စပ်တံ အတိုၚ်စၟတ်သမ္တီလဝ်ရောၚ်ဂှ် ချူဓမံက်လဝ် ပ္ဍဲလိက်ပရိုၚ်အလဵုအသဳဗၟာ နကဵုစၟတ်တ္ၚဲ ၂၅ ဂှ်ရ။

“ဟိုတ်နူစၞောန်ပျး သၞောဝ်ဏံတုဲ ပ္ဍဲဍုၚ်ပိုဲ ဟွံၜိုဟ်သြိုဟ်ဏီပုဟ်ဂှ် အဓိပ္ပါယ်ဍေံ မံက်မံၚ်” သာ်ဝွံ ဥူမျဵု (ဌာနသ္ၚဳဂၠိပ် ပရေၚ်သၞောဝ်) နူကံၚ်ဇြဳညးဗက်ဂဗုတ်ဍုၚ်ဗၟာ ဟီုရ။

ဍုၚ်ဇကု ၜိုဟ်သြိုဟ်မံၚ် ဗၠးၜးမံၚ်ဏောၚ် ယဝ်ဇကုပတှေ်တှေ် ဟွံဒးစၞောန်ပျး သၞောဝ်ဗီုဏံရောၚ်ဂှ် ဥူမျဵု ဆက်ဟီုရ။

အတိုၚ် အခန် (၁၁) ပိုဒ်ဇၞော် ၂၇ မပါလုပ် ပ္ဍဲသၞောဝ်ဂှ်မ္ဂး ယဝ်ဟွံတေၚ်ကၟုဲမ္ဂး ဒးဒုၚ်ကေတ်အရေဝ်ရောၚ်၊ နဒဒှ်ဒုဟ်ဒဏ် ဒးဒုၚ်အာ ဒဏ်သြန်ဟွံၜက်အာ နူမသုန်လ္ၚီဒကေဝ်၊ ဒဏ်ထံၚ် ဟွံၜက်အာ နူထပှ်တ္ၚဲရောၚ်ဂှ်လေဝ် ဓမံက်ထ္ၜးလဝ်ကီုရ။

“ဍုၚ်ပိုဲ ကၠာဟွံဂွံဗၠးၜး နူခေတ်ကဝ်လဝ်ဏဳတေံ ဟွံတေၚ်ကၟုဲတှေ် ကဵုဒုဟ်ဒဏ်တံ ဖျေံထံၚ်တံ ကေၚ်ကၠောန်ကၠုၚ်မံၚ်ရ၊ လၟုဟ်ဂွံဗၠးၜးတုဲ ဍုၚ်ဇကုၜိုဟ်သြိုဟ်မံၚ်ယျဂှ် သၞောဝ်ဗီုဏံ ထ္ၜးပျးကဵု ဟွံမာန်ဏီပုဟ်” သာ်ဝွံ ဥူမျဵု သ္ၚဳဂၠိပ်ထ္ၜးရ။

ပ္ဍဲဍုၚ်ဒဳမဵုကရေဇြဳလ္ၚဵုတံဂှ် သၞောဝ်တေၚ်ကၟုဲ ဟွံမွဲအိုတ်ရောၚ်၊ ဇက်မံၚ်တရဴဒဳမဵုကရေဇြဳဏောၚ် ဟီုတုဲ မုဟိုတ်ဂွံစၞောန်ပျး သၞောဝ်ဗီုဏံဂှ် ကၠိုဟ်ကေတ် ဟွံမာန်ရောၚ်ဂှ်လေဝ် ညးဆက်ဟီုရ။

ဆေၚ်စပ်ကဵု ဗီုပြၚ်ခါန်ကၞက်ရုဲစှ် သကိုပ်အုပ်ဓုပ်အရာပ်/ကွာန်တုဲ ဂလာန်သမတ ဥူတိၚ်သိၚ် ပၠုပ်ပတိုန်လဝ် ပွမကဵုမာဲမံက်မံက်ဂတဝ်ဂတဝ်ဂှ် ကျအာရ။

သၞောဝ်ပွမတေၚ်ကၟုဲဂှ် ပ္ဍဲလက်ထက်ကဝ်လဝ်ဏဳ အၚ်္ဂလိက် နူသၞာံ ၁၉၀၇ တေံ စစၞောန်ပျးကၠုၚ်တုဲ စဵုကဵုအခိၚ်လၟုဟ် ဟွံပြံၚ်လှာဲမွဲသာ် ဆက်သ္ပဒတန် စကာမံၚ်ဖိုဟ်ရ။