စၠန်ထဝ် – သွက်ဂွံလုပ်ပြိုၚ် ပေဲါရုဲမာဲအကြာဏံ နကဵုဗော်ဒဳမဝ်ကရေဇြဳအလုံဒေသရးမန် AMDP တံ မဒးလုပ်ပြိုၚ် ဒၞာဲလတူဍုၚ်မတ်မလီုဂှ် ဂွံလၟိဟ်မာဲ အောန်မာန်မံၚ်ရောၚ် ဥက္ကဌဗော် ညးတံဟီုရ။
အစာဇၞူမန်ဂှ် “လတူဍုၚ်မတ်မလီုဂှ် လၟိဟ်မာဲအောန်အာညိဏောၚ်၊ မုဒှ်ရောဟီုတှေ် ဗော်ဒဝ်သုကျဳတံဂှ် မၞိဟ်ထံက်ဂလာန်ဂၠိုၚ်မံၚ်ဏောၚ်၊ ဆဂး ၜိုတ်ပိုဲစှေ်မံၚ်ပရေၚ်စန္ဒက်လၟုဟ်ဂှ်တှေ် ကောန်ဂကူမန် လ္ပာ်၊ အရာပ်ကွာန်တံဂှ် ထံက်ဂလာန် ကဵုဇြဟတ်ကဵုပိုဲပေၚ်ၚ်ရဏောၚ်ဂး” သာ်ဝွံ ဟီုရ။
ဗော်ဒဳမဝ်ကရေဇြဳအလုံဒေသရးမန်ဝွံ လုပ်ပြိုၚ်အာ ပ္ဍဲဍုၚ်မတ်မလီု မွဲဒၞာဲဓဝ်ဒှ်တုဲ လၟုဟ်စှေ်မံၚ်ပရေၚ်စန္ဒက် ပ္ဍဲပွိုၚ်ဍုၚ်မတ်မလီု အကြာ အရာပ်၊ ကွာန် (၄၁) ဒၞာဲရ။
“လၟုဟ်စှေ်မံၚ်ပရေၚ်စန္ဒက် သီုကဵုမိမျေတ်မျေတ်ဝဵု ဖိုဟ်ဏောဝ်၊ ပိုဲအာသ္ၚိကောန်ဗော်ပိုဲတံ တုဲတှေ် ပကောံမၞိဟ် တိုန်မွဲသ္ၚိစှေ်မွဲသ္ၚိတုဲ စှေ်မံၚ်ပရေၚ်စန္ဒက်ရ” သာ်ဝွံ အစာဇၞူမန် ဟီုရ။
ပ္ဍဲတွဵုရးဍုၚ်မန် သွက်ဂွံလုပ်ပြိုၚ်ပေဲါရုဲမာဲအကြာ ဒၞာဲညးစၞး စၠတ်ထဝ်ညးဍုၚ်ကွာန် လတူဍုၚ်မတ်မလီုမွဲဒၞာဲဓဝ်ဟေၚ်နွံမံၚ်တုဲ နူကဵုဗော် AMDP မိမျေတ်မျေတ်ဝဵု၊ နူကဵုဗော် NLD ဂှ် ဒဝ်ဃေန်ဌေကွျဲ(ဒေါ်ခၚ်ဌေးကြွယ်)၊ နူဗော်တစညဂှ် ဥူအံၚ်တာန်ဥူ ကေုာံ နူဗော်ကျဖောအ်ဂှ် ဥူတေန်သဵုမဵုနာၚ်တံ လုပ်ပြိုၚ်အိုတ်ရောၚ်။
ဗော်ဒဳမဝ်ကရေဇြဳအလုံဒေသရးမန်တံ ထပ်ပံက်လဝ် ရုၚ်တၟိ ပ္ဍဲတွဵုရးကရေၚ် ပွိုၚ်ဍုၚ်လှာဒကှ်၊ လတူဍုၚ်ကျာ်ပိ ကေုာံ ရးတၞၚ်သဳ လတူဍုၚ်ဍာ်ဗုတံရ သာ်ဝွံညးတာလျိုၚ်ရုၚ်ဗဟဵု (AMDP) နာဲသာန်တေန် ဟီုရ။
နာဲသာန်တေန်ဂှ် “လတူဍုၚ်မတ်မလီုဂှ် ပ္ဍဲကဵုအရာပ်၊ကွာန်တံ ပံက်လဝ်ရုၚ်တုဲအာယျ၊ တုဲတှေ် သွက်ဂွံပံက်အာ ရးတၞၚ်သဳ ဍုၚ်ကအ်သံၚ်တေံဂှ် လိက်စှေ်မံၚ်လေဝ်တုဲမံၚ်ရ၊ ဆဂး ဟွံဂွံအာပံက်ဏီပုဟ်၊ သွက်ဂွံဗလးရုပ်ရမျှာၚ် ပ္ဍဲဂိတု မာတ်ချ် (၉) ကဵု (၁၈) ဂှ် ဟွံဂွံရုဲစှ်မၞိဟ်ဟဝ်ဏီပုဟ်” သာ်ဝွံဟီုရ။
နကဵုဗော်ဒဳမဝ်ကရေဇြဳအလုံဒေသရးမန်ဂှ် စဵုကဵုစိုပ်ပေဲါရုဲမာဲဏံ စှေ်အာပရေၚ်စန်ဒက်ရောၚ်ဂှ်လေဝ် ရဲဗော်ညးတံ ဟီုရ။
ဗော်ဒဳမဝ်ကရေဇြဳအလုံဒေသရးမန်ဂှ် ပ္ဍဲပေဲါရုဲမာဲ (၂၀၁၀) တေံ လုပ်ပြိုၚ်ညးစၞး (၃၄) ဒၞာဲတုဲ ဇၞးကၠုၚ် (၁၆) ဒၞာဲရ။
သွက်ပေဲါရုဲမာဲအကြာပ္ဍဲဂိတုအေဗရဴ(၁)ဏံဂှ် အလုံကၟိန်ဍုၚ်မွဲ သၠးမံၚ် ၄၈ ဒၞာဲတုဲ ဗော်သီုဖအိုတ် ၁၉ ဗော် လုပ်ပြိုၚ်အာရောၚ်ဂှ် ဂွံတီကေတ်ရ။