ဂျူရဳဆာဲ – သွက်သ္ဂောံထံက်ပၚ် က္ဍိုပ်နာဲဗေန် ဖျေံလဝ်လွဟ်ကဵု အလဵုအသဳဗၟာ ခြာဟွံလအ်ဏီဂှ် အလဵုအသဳဗၟာတံ ဗက်မံၚ်သြန် နူညးဒေသတံအိုတ်ရ။
ဂကောံကွာန် မၞုံသၟဝ်အုပ်ဓုပ် ပွိုၚ်ဍုၚ်ပါ်ခေါဇာ ပွိုၚ်ဍုၚ်ရေဝ် မွဲဂကောံကွာန်မ္ဂး မွဲဂိတု သြန်ပိကိုဋ်၊ သ္ၚုစှ်ရိုက်၊ ကၠေၚ်စမွဲစေဝ် ဒးထံက်ပၚ်ကဵုရောၚ် နူအုပ်ဓုပ်ပွိုၚ်ဍုၚ် ကဵုလဝ်စၞောန်ကဵု ကွာန်ဂမၠိုၚ်ရောၚ်ဂှ် အုပ်ဓုပ်ကွာန် ဟွံမိက်ဓမံက်ယၟုမွဲတၠ မတိုန်စိုပ်လဝ် ကောံဓရီုဂှ် ဟီုရ။
သၟဝ်ပွိုၚ်ဍုၚ်ပါ်ခေါဇာဂှ် ဂကောံကွာန် မၞုံ ၆ ဂကောံတုဲ သ္ၚိမၞုံ ၜိုတ် ၂၀၀၀ ပြၚ်ရောၚ် ဆိၚ်ဆလဝ်အိုတ်ရ။
သွက်ညးဖျေံလွဟ်တံ သ္ဂောံမံၚ်စံၚ်အာဂှ် ဇရေၚ်ကွာန်တၟိၜိုပ်ထဝ် သွက်သ္ဂောံသိုၚ်ခၞံကဵု သ္ၚိ ၃၀ မ ကေုာံ သွက်ဂအာၚ်ကၠအ် တဵုလွဳစဂှ် နူအလဵုအသဳပွိုၚ်ဍုၚ်တံ ဖန်ဇန်ကဵုလဝ်တုဲရောၚ်ဂှ် ဂွံတီကေတ်ရ။
မွဲသ္ၚိမ္ဂး သ္ၚုဘာ်ကဠတ်၊ သြန် ၂၅၀၀ ဒကေဝ်၊ ဒုန် ၂၀ တၞုၚ် ဒးပလံၚ်ကဵု ကွာန်တၟိၜိုပ်ထဝ် စဵုဒၞာဲညးဖျေံလွဟ်တံ သိုၚ်ခၞံသ္ၚိရောၚ်ဂှ် သၟတ်ဗြဴ နူလတူဍုၚ်ခေါဇာ လဴထ္ၜးကဵု အတိုၚ်အုပ်ဓုပ်ညးတံ ကဵုလဝ်စၞောန်ကဵု ညးတံရ။
“ဇၟာပ်ဇၟာပ်သ္ၚိ ဒးထံက်ပၚ်ဖအိုတ်ဏောၚ် ညးဟီုလဝ်၊ ကွာန်လ္ၚဵုတံဂှ် အာပလံၚ်မံၚ် ဒုန်အိုတ်ယျ၊ လှုဲလေဝ် အာပလံၚ်မံၚ်အိုတ်ယျ” သာ်ဝွံ သၟတ်ဗြဴဂှ် ဟီုရ။
ကြဴနူဗော်ဍုၚ်မန်တၟိ ဒေံါပန်ပှော်ကဵု အလဵုအသဳပၞာန်ဗၟာ ၁၉၉၅ တေံတုဲ ပ္ဍဲရေဝ်သၠုၚ်ကျာ ကေုာံ ပွိုၚ်ဍုၚ်ဍာ်ဗုသၟဝ်ကျာတံဂှ် ဒပ်ပၞာန်အလဵုအသဳတံ သီတိဍာ်ကၠအ်သွဝ်ကီု ဍဵုဍိုက်ပျဲပျာံကီုတံဂှ် ဒုၚ်ဟွံမာန်တုဲ ညးဒေသတံ ကလေၚ်တဝ်စၞေဟ်ကၠုၚ်ဂှ် က္ဍိုပ်နာဲဗေန်တံလေဝ် ပါလုပ်မွဲက္ဍိုပ်ကီုရ။
ပ္ဍဲဂိတုမာတ်ချ် ၆၊ အခိၚ်နူဂယး ၉ နာဍဳကဝါ်ဂှ် ကၠောန်ဗဒှ် အခန်ကၞာ ဖျေံလွဟ် က္ဍိုပ်နာဲဗေန် ပ္ဍဲခလရ (၃၁) တုဲ သွက်ညးတံဂှ် ထံက်ပၚ်ကဵု သြန်၊ သ္ၚု၊ ကၠေၚ်၊ မြေက်အိုတ်ရောၚ်ဂှ် ဂွံဆဵုကေတ် ပ္ဍဲဂျာနေဝ်ပတိတ်အပ္ဍဲဍုၚ်တေံရ။
ပ္ဍဲဂိတုဖေဖဝ်ဝါရဳ ၂၈ ဂှ် ဂကောံဒမၠမန် (ဂကောံပါ်တိတ်) နာဲဗေန် ဍိုက်က္ဍိုပ် ညး ၆ တၠတံဂှ် နကဵုလွဟ်ဇမၠေံ မွဲဇကိုအ်၊ မကမ် ၁၀ မကီု၊ ပ္ဍဲဂိတုမာတ်ချ် ၅ ဂှ် နူဂကောံဂှ်ပၠန် နာဲဆာန်မန် ဍိုက်က္ဍိုပ်တုဲ ညး ၁၀ တၠတံဂှ် နကဵုလွဟ် RPG မွဲဇကိုအ်၊ လွဟ်ဍောတ်နာနာ ၁၀ ဇကိုအ်၊ မကမ်နာနာ ၁၆၂ မ၊ မကမ် RPG ၃ မ၊ ဖျေဲလွဟ် ရ၊ မာၚ်ခတိုဟ် ၂ မ၊ စက်ဟီုအရေဝ် ၃ မကီု လုပ်ဖျေံလွဟ် ပ္ဍဲတိဍာ်ဌာန်ဂအုပ်ပၞာန် ရးအဂၞဲရောၚ်ဂှ် ချူလဝ် ပ္ဍဲလိက်ပရိုၚ်ဗၟာ မပတိတ် ပ္ဍဲဂိတုမာတ်ချ် ၁၂ ဏံရ။
လၟုဟ် ပ္ဍဲဇရေၚ်ပွိုၚ်ဍုၚ်ဍာ်ဗု ရးတၞၚ်သဳဂှ် က္ဍိုပ်နာဲလောန်၊ နာဲသိုၚ်တံကီု၊ ဇရေၚ်ဒေသဗိက်တံဂှ် ဗော်ကလေၚ်ဒက်ပတိုန် ဟံသာဝတဳကီု၊ ဇရေၚ်ဍုၚ်ဇြပ်ဗု မုဟ်ဍုၚ်ဂှ် က္ဍိုပ်ထပိုဲတာန်လွေန်ကီု၊ ဇရေၚ်ပယျဵုကျာ်ပိဂှ် က္ဍိုပ်အထောန် (အံၚ်ထောန်) တံကီု ဂကောံရပ်လွဟ်မန်နာနာတံ ချဳဒရာၚ်မံၚ်အိုတ်ရ။
One reply on “ညးဒေသတံ ဒးထံက်ပၚ် သွက်က္ဍိုပ်ရပ်လွဟ်မန် ဖျေံလွဟ်”
မုမုရော….ၝေံတံဒှ်ကောန်ပၞာန်တုဲ ကၠောန်စဟွံမာန်ပုဟ်ဟာ….? ညးဍုၚ်ကွာန်တံဒးထံက်ပၚ်မံၚ်ၝေံတံဂှ်…ဇိုၚ်တဲပိုတ်
ဒှ်မံၚ် ခဲါဒုတ်ဟာ..? မုက်မတ်ဗီုၝေံတံဟာ..မၞိဟ်ကလေၚ်ကေတ်ကဵုဍုၚ်မန်ဂှ်…မန်ဗီုၝေံတံရ မန်အိုက်ဂစိုတ်ချောဲဂှ်
ၝေံတံဂျိုၚ်မံၚ်သၟးသၟးရ တိဇိုၚ်…ထွဳ…ဗလေံဇေံကွေံရမန်..