မာံတဵုလွဳ – ကောန်ဂကောံဗော် NLD ဍုၚ်ကျာ်ပိတံ ရာဒနာမိက် သွက်ဗော်ညးတံ သ္ဂောံအံၚ်ဇၞးမာန် ပ္ဍဲပေါဲရုဲမာဲအကြာဏံတုဲ ကၠောန်ဗဒှ်ဏာ ခန်ကၞာ ပ္ဍဲဇရေၚ်ကျာ်စေတဳ မၞုံအရှာံဘာဓမ္မဟေဝန် ဍုၚ်ကျာ်ပိ ဂိတုအေပရဳ (၁) ပယျာံနူဂယး ရ နာဍဳ ၃၀ မိနစ် ရ။
အခန်ကၞာရာဒနာမိက်ဖျေံမေတ္တာ သွက်ဂွံကၠောန်ဗဒှ်မာန် သာ်ဝွံဏံဂှ် နူဗော်ညးတံ အာတ်လဝ်အခေါၚ် ဒစးဒုၚ်လဝ် နူညးအုပ်ဓုပ် ပွိုၚ်ဍုၚ် ကေုာံ ဗၠာဲသၟိၚ်ပွိုၚ်ဍုၚ်တံကီု နွံတုဲမှ ဂွံအခေါၚ်ကၠောန်ရောၚ် သ္ဂောံတီကေတ်ရ။
“ က္ညလဝ်လကျာ် ပိဇကု၊ ဒဂိုန်သဳ၊ ကလၚ်ပၚ်မှိန်ဓရ်မ္ၚဵု၊ ကဵုဒါန်သၚ်တုဲ စရိုဟ်ဍာ်ရ” သာ်ဝွံ ဥူတာန်လောန် ညးမဒှ် ဥက္ကဌ ဗော်ဒဳမဝ်ကရေသဳကောန်ဂကူ NLD ပွိုၚ်ဍုၚ်ကျာ်ပိဂှ် ဟီုရ။
ပေါဲရုဲမာဲအကြာ ကၠောန်သ္ပဒၟံၚ် မွဲကၟိန်ဍုၚ်တ္ၚဲဏံ နူဗော် NLD ပွိုၚ်ဍုၚ်ကျာ်ပိပိုဲဏံ ရဒနာမိက်ဏာကဵု ဗော် NLD ကဵုဂွံကလိဂွံ ပေါဲအံၚ်ဇၞးညိ၊ ဒဝ်အံၚ်သာန်သုကျဳ ကဵုဂွံထက်ယုက်ညိ၊ အယုက်ကဵုဂွံ ဇမၠိၚ်စဵုကဵု ၁၀၀ သၞာံပြၚ်ညိ သာ်ဝွံ နူကဵု ဥက္ကဌ ဥူတာန်လောန် တိုၚ်ကဵုရမျာၚ်ဂှ် ကောန်ဂကောံဗော်ဂမၠိုၚ် ဟီုဗက် ဂြုဂြုဂြီုဂြီုအိုတ်တုဲ ဗဂူဗြဲရတ်အိုတ် ရ။
သၟာၚ်နူဂှ် အခန်ကၞာကၞောတ်တဲ အခါအုပ်ကၠေံနိဂီုဂှ်ပၠန် နူဥက္ကဌ ဥူတာန်လောန် တိုၚ်အာကဵုနရမျာၚ် ကရေဲ ဒဝ်အံၚ်သာန်သုကျဳ အယုက်ကဵုဇမၠိၚ်ညိ၊ ဗော် NLD ဗွဲစၟတ်ဒးအံၚ်ဇၞးဏေါၚ်၊ ဗွဲစၟတ်ဒးမာန်ဏေါၚ် သီုညးဖအိုတ် ကညာၚ်ကရေဲတိုန် ဂြုဂြုဂြီုဂြီုတုဲ ဗဂူဖျေံဗြဲရတ် မွဲဝါပၠန်ရ။
နကဵု ဂဥုပ်ဗော်ဒဳမဝ်ကရေသဳကောန်ဂကူ NLD ဝွံ တ္ၚဲဏံ ဟိုက်နူဒှ် တ္ၚဲပြိုၚ်ပ္ကာန် ပေါဲရုဲမာဲအကြာ မဒှ်တုဲ ကောန်ဗော် ဒဳမဝ်ကရေသဳကောန်ဂကူဂမၠိုၚ် ယိုက်ဂၠၚ်ဍိုတ်၊ ယိုက်ဂၠၚ်ဗတဳ ကၠောန်ပရေၚ်ကုသဵု သွက်ဂွံ ဒက်ပ္တန်ကျာ် စေတဳတၟိမွဲဇကု မၞံုပ္ဍဲအရှာံဘာဂှ် ပ္ဍဲပွိုၚ်မွဲတ္ၚဲ ကေတ်ကုသဵုတုဲ သီုကဵုဏာဒါန်သြန် ၃၀၀၀၀ ဗာတ်ရောၚ်ဂှ် ရဲဍုၚ်ကျာ်ပိ ညးမပါလုပ်မံၚ် ပ္ဍဲပရေၚ်ကၠောန်သ္ပ ကုသဵုပွိုၚ်မွဲတ္ၚဲဂှ် ဟီုရ။
ပပ္တံနူဂိတု ဖေဖဝ်ဝါရဳ ၂၆ ဂှ်စပံက်ရုၚ် ပ္တိုန်ကၠုၚ်လဝ် လိက်ဂတဵုမုက် ဂဥုပ်ဗော်ဒဳမဝ်ကသေဳကောန်ဂကူ ပ္ဍဲဍုၚ်ကျာ်ပိ ဏံဂှ် ကာလပံက်ရုၚ်တေံဂှ် လၟိဟ်မၞိဟ်လုပ်လဝ်ကောန်ဂကောံဗော် NLD ၂၅၀ တၠပြၚ် မၞုံဒၟံၚ်ရောၚ် သ္ဂောံတီကေတ်ရ။
